أنا وإنت وبليغ

أكيد لو كنت عايشة في زمن بليغ حمدي وكان ليا اتصال مباشر بيه كنت أكيد أكيد وقعت في غرامه.

أصل بليغ شبه حب حقيقي.. ينفع بطل قصة متعبة.. مأساة من مأساويات البشر المغرمين. كل ما اقرا عن سيرته أحس إنه حد أعرفه في زمن ما اتوجدنا فيه سوا. يعني لو اتقابلنا تاني النهاردة، مش هبذل مجهود كبير في التعامل معاه.. أنا عارفة الحالة دي كويس، عندي الكتالوج جوه، وعندي الاستعداد إني أحبه من أول وجديد عادي خالص.

اكتشفت من فترة إن بليغ حمدي هو العامل المشترك الأعظم بين كل المطربين اللي بحبهم.. هو سر حبي ليهم. المزيكا يا ناس المزيكا..

وكلامي ده مش خيانة لحبي لفريد الأطرش ومحمد عبدالوهاب، بالعكس!

أصل مش بس المزيكا، بليغ كان بيلحن الكلمات اللي بيحس إنها بتعبر عنه هو بشكل مباشر.. م الآخر مش بتبقى أغنية المطرب وللا الشاعر، كان دايما بليغ.. بليغ اللي عايز يوصل لنا الكلام ده.. عشان كده كان بيعرف يلحنه حلو.. في إيديا المزامير .. وبقلبي المسامير .. الدنيا غربتني .. وأنا الشاب الأمير

أنا أكيد أعرفك يا بليغ وقابلتك قبل كده، وحبيتك، وماقولتلكش... وإن لقاكم حبيبي سلمولي عليه .. طمنوني لاسمراني عاملة إيه الغربة فيه

‫-‬ ما تقول له يا قمر .. وللا إنت يا قمر .. اتعلمت القساوة وبقيت زي حبيبي .. بتنسى - يا قمر - حبايبك يا قمر؟

- في كل مكان .. في كل كلام .. في نجمة بعيدة .. ف كل زمان .. في كل اتنين بيتقابلوا حنين بحنين .. بكل كلام تقوله شفايف العاشقين .. هنتقابل في كل لقا .. في كل وداع

- وعملت إيه فينا السنين؟ عملت إيه؟ فرقتنا؟ لا! غيرتنا؟ لا! ولا دوبت فينا الحنين..

- أنا كل ما قول التوبة يا بوي .. ترميني المقادير يا عين .. وحشاني عيونه السودة يا بوي .. ومدوبني الحنين يا عين

- حَلِم الليل على شعري .. هينسى الفجر .. ويفضل ليلنا طوالي .. لآخر العمر ..

- والسنين .. خلتني أشوف من قد إيه متفرقين .. فرقتنا .. غربتنا .. تعبتنا ..

- آه يا ناعسة وخبريني يا بوي .. اللي غربنا مين .. واللي توهنا مين

دي مش نصوص اختيارها مقصود عشان أركز على احساس بليغ بالغربة والعمر والسفر والحنين، دي عينة عشوائية، ده اختصار بليغ!