في ناس هنا في مصر خايفين على النظام الأسري بسبب قانون أمريكاني جديد بيقول للمثليين تقدروا تتجوزوا وتكونوا أسر. النظام الأسري بيعاني من فترة طويلة أصلا في أمريكا والطلاق أكتر من الجواز وفي الوقت اللي المثليين بيطالبوا فيه بالجواز كتير جدا فعليا سواء مثلي أو عادي مابيقدموش على خطوة تكوين أسرة دي ولو اتجوزوا غالبا بيطلقوا والعيال بتتبهدل في النص.. الأسرة في أمريكا عندها أزمة فعلا، وأنا مش شايفة إن قانون زواج المثليين ده هيساهم بأي حاجة في تفشي الأزمة أو انحسارها.. المثليين عندهم إحساس جماعي بالاضطهاد وزي العيال مصرين يحصلوا على كل حاجة محرومين منها، ولما يحصلوا عليها هيسيبوها عادي. وبكرة تشوفوا أفلام أمريكاني قصتها اتنين مثليين عايشين مع بعض بقالهم خمستاشر سنة وواحد منهم عايز يتجوز والتاني عنده فير أوف كومتمنت.
على حسب ما أنا فاهمة، في القرآن المثلية فعل فاحش وحرام وربنا عاقب قوم سيدنا لوط بسببه. وأنا مسلمة ومؤمنة بالقرآن وبكل اللي بيقوله حتى لو العلماء - النهاردة - بيقولوا غير كده. هو ده الإيمان أصلا.
مؤمنة كمان إن الناس أحرار في تصرفاتهم وربنا بيحاسبهم عليها. إتنين في أوضة لوحدهم، مسئولين قدام ربنا عن أفعالهم. أنا مليش دعوة. إحنا كلنا ملناش دعوة.
اعتقد كمان إن المثلية مش مرض؛ بس كمان مش فطرة، هي اختيار، وإلا مكنش ربنا حرمها.. ربنا بيحاسب على اللي لينا يد في اختياره مش اللي مجبولين عليه.
الأداء اللي على السوشال ميديا بتاع تكفير المثليين ده أداء طفولي. الزنا والسرقة والكدب حرام بس مابتكفروش أصحابهم، ليه بقى بتكفروا المثليين؟ مش يمكن دي نقطة ضعفهم اللي ممكن يتوبوا عنها في يوم من الأيام؟
وعلى فكرة، أكيد المثليين دول بني آدمين عندهم أخلاق طيبة وأخلاق وحشة، ناجحين في حاجات وفاشلين في حاجات، في منهم ناس دمها خفيف وناس دمها يلطش؛ بشر عاديين.. كلام الناس بيحسسني ساعات إنهم كائنات خرافية شريرة شر مطلق. مش بشر خطائين.
كمان الأداء المضاد بقى بتاع "أو نوو إنت رافض المثلية؛ وأنا كنت مفكراك متحرر ومؤمن بالعلم ومش رجعي ومتخلف " ده بردو أداء طفولي وبينافي أبسط قواعد الحرية اللي إنت بتتشدق بيها. إنت مش قادر تستوعب إختلاف الناس وإختلاف عقلياتهم.
وأخيرا؛ إحنا قاعدين في مصر اللى المجتمع فيها والأديان والدولة والأغلبية بيرفضوا المثلية وييحرموها، محموقين ليه إن قوم آخرين في قارة أخرى بمنظومة اجتماعية وسياسية وأخلاقية مختلفة تماما قرروا إن المثلية حاجة طبيعية وسمحوا لهم يحصلوا على ورقة رسمية اسمها زواج؟ ليه مابنتفرجش في صمت ونشوف الموضوع هيتطور لفين؟ مش يمكن هيتعلموا حاجة؟ مش هيمكن هنتعلم حاجة؟ .. ما تيجوا نشوف!
- صحيح محدش طلب رأيي؛ بس أنا قررت أسلي صيامي وأكتب الكلمتين دول -
No comments:
Post a Comment