فصبر جميل

كل ما يضيق بيا الحال في الشغل؛ وأغلب أزمات حياتي ليها علاقة بالشغل بما إنه هو باختصار حياتي - وده مش وصف رومانسي ده وصف محايد للحال للأسف - المهم، كل ما يضيق بيا الحال في الشغل وبعد ما اتضايق شوية أو كتير واعيط شوية أو كتير ربنا بيلهمني السؤال المهم " هو أنا عملت اللي عليا وللا لأ؟"

فأجاوب.. عملت اللي عليا والله يا رب.. انت عارف؛ أنا بتعب في شغلي ازاي؛ وبعمل إيه؛ وبحط فيه وقت ومجهود ازاي.. لو متأكدة من حاجة حياتي فيه إني مدمنة شغل، مفيش أسبوع عدى عليا قصرت في شغلي، ومش بس عشان مدمنة شغل إنما عشان بتقيك يا رب ومؤمنة بالاتقان والإحسان عشان كده عمري ما اشتغلت في حاجة مش بحبها أو مش بتبسطني..

بس بقى؛ فلما ألاقي إني عاملة اللي عليا ومش مقصرة برتاح، لأني متأكدة "أن الله لا يضيع أجر من أحسن عملا" وساعتها بطمن إن بكرة أحسن وإن الازمة مهما طالت هتعدي وربنا مش هيضيع مجهودي..  وكتييييير ياما كانت بتضلم وترجع تنور تاني وربنا يكرمنا.  شغلي معجزة مصرية على أرض مصرية والنعمة :D

بس ساعات ببقى مستعجلة.. وده بيخليني مع يقيني إن الله مش هيضيع مجهودي إني أفضل بردو متوترة عايزة وصل للنهاية بسرعة.. أيا كانت.. صاحبتي قالت لي إني محتاجة أتعلم الصبر. الحقيقة فعلا أنا مش صبورة خالص؛ "ويدع الإنسان بالشر دعاءه بالخير وكان الإنسان عجولا" .. يمكن التجربة اللي بمر بيها الفترة دي هي اللي هتعلمني الصبر؟ يمكن.. يا رب إلهمني الصبر زي ما ألهمتني اليقين بعدلك وزي ما علمتني أحب شغلي وأخلص فيه..

أسألكم الدعاء بظهر الغيب