4/30/2016

السعادة على مسافة رحلة

أنا عرفت إيه مشكلة رحلة مرسى علم.. بغبائي كنت أنا السبب في الحالة السيئة اللي وصلت لها هناك عشان ماكنتش بعمل أي حاجة.. كان هدفي من الرحلة إني أروح اقعد قدام البحر وخلاص وبالتالي كل الأفكار الحلوة والوحشة جت وبالتالي مابقتش مبسوطة.

لما طلعت رحلة الجلت الأزرق اللي كلها مجهود وتعب وفرهدة، مشي وتسلق صخور ونوم في الطل، انتباه مستمر اني ما توهش عن الناس اللي حواليا ومانساش أشىب ميه باستمرار، تركيز شديد يتلخص في فين هيكون موضع قدمي! ..  بس كان كل همي اني احط رجلي في مكان صح عشان اتحرك وعشان ما تتلويش وللا اتزحلق وللا اقع.. كان كل همي اني بفكر في اللحظة الحالية وبس... طبعا ده معناه ان أي حاجة تانية كانت منسية تماما. كل القلق اليومي والحاجات اللي مضيقاني والامنيات المتعلقة، كله كله اختفى قدام موضع قدم!

مفيش تفكير يعني في راحة بال يعني في سعادة.

قرار رقم واحد: أي رحلة بعد كده لازم يكون فيها فرهدة كتير وانتخة قليل. لو جبل هطلعه ولو بحر هنزله :)

2 comments: