9/10/2016

أمنية واحدة

الموت بقى بالنسبة لي أمنية ورغبة شديدة بتزيد يوم عن يوم. مش من باب الاكتئاب خالص، بس من باب إن الدنيا دي متعبة ومش مريحة ومبقتش بحبها ولا بحب أي حاجة فيها وعايزة أغيرها. مش بس متعبة ليا، لكن متعبة لكل الناس وكل الكائنات.  شوف كم الفقرا والمرضى، شوف المآسي اليومية والأحزان والألم والتعاسة والفقد والعجز والظلم اللي البشر عايشين فيه. شىء فوق الاحتمال. تجاهل الأخبار عشان نقدر نكمل ونعيش مابقاش حل. ووجع الضمير تجاه كل البلاوي دي مابيحلش البلاوي.

 مش خايفة من الموت ولا خايفة أكون مش مستعدة أقابل ربنا. بقى عندي تسامح مع نفسي وتقصيرها وعارفة إني عملت حاجات حلوة وعارفة إن قلبي سليم، ومأذتش حد، ع الأقل مش عن قصد. وعندي يقين وعشم إن ربنا هيسامحني على أي تقصير أو غلطة أو ذنب. عندي حسن ظن بالله. وبالتالي مفيش حاجة النهاردة تخليني ما انتظرش الموت واتمناه.. مين ما يحبش يتمنى الخلاص؟

معقولة مفيش حاجة متعلقة بيها النهاردة؟
مفيش.
مفيش حاجة بتسعدك؟
لا.
مفيش حاجة مستنياها؟
لا.

وإذا كنت بحب شوية ناس فأنا أكتر حاجة مرعوبة منها إنهم يسبقوني للموت، فأنا عايزة اسبقهم واستناهم هناك
وإذا كان ليا دور ما في الدنيا، فأنا بحاول اعمل اللي عليا أهو .. لكن دا مايمنعش إني اتمنى على ربنا إنه ياخدني بقى

6 comments:

  1. ليه دايما مكتئبة .. الحياة فيها ناس تعبانة اكتر منك وعايشين
    أنا عمري 39 سنه .. ممكن نلعب لعبة .. نبدل مع بعض نصيبنا من الدنيا
    انا حبيت وانا في الكلية.. بعد ما خلصت اتجوزنا ... حلو كدة تبدلي ؟؟ بعد سنه من الزواج انجبت طفل جميل ؟؟ ها تبدلي؟؟
    الحكاية منتهتش بس هتوقف لحد ما تجاوبي بنعم ابدل أو لا مش هبدل .. علما بأني معرفش حاجة عنك

    ReplyDelete
  2. الحياة فيها ناس أكيد تعبانة أكتر مني، وربنا يقويهم ويقويني ويقويك.. بس ده ماينمنعش اني اتمنى اخلص من التعب :)
    اللعبة لطيفة ومغرية اني اجربها بس مش مرتاحة اني اقول معلومات عن نفسي ولا اني ابقى ببدلها مع حد انونميس.. بعتذر

    ReplyDelete
    Replies
    1. انا مقصدش اعرف حاجة عنك .. انا بس حبيت انبهك لان فيه ناس عندهم مشاكل اكبر من مشاكلنا ..اكمل لك حكايتي ..انا عشت ٦ سنوات في سعادة مابعدها سعادة ..وفجأة استلمت زوجي وابني من المشرحة ..حادثة سيارة ..تبدلت الاحوال فجأة حاليا اعيش مع امي وقريبتي سميرة ..متربية معايا من صغرنا ...تخيلي انا اسعد حظا من سميرة ..دي لها حكاية تانية مش وقتها..عيشي الحياة بمبدأ ماض في حكمك ..عدل في قضاؤك ..نحن في رحلة ستنتهي ..كلها ابتلاءات ولا حيلة لنا الا الصبر ..انما يوف الصابرون اجورهم بغير حساب ...بغير حساب من الخالق تبقى اد ايه ؟؟
      سلامي لك وتقديري لكل ما تكتبينه..نادية محفوظ

      Delete
  3. ولا يهمك ..مش الهدف من اللعبة اني اعرف عنك شيء ..اكمل حكايتي انا حاليا عايشة مع امي وقريبة لي متربية معايا من صغرنا ..سميرة ..هتسألي طيب فين زوجك وابنك ..استلمتهم من المشرحة حادثة عربية ..شفتي النقلة المفاجئة ..ايه رأيك تحبي تبدلي؟!! ..الحمد لله على كل حالة ..ولسه عايشة ..الحياة مستمرة ولازم نعيشها بحلوها ومرها .. الدنيا دار بلاء واختبار ..الراحة دي في الجنة ..طولت عليكي ..حكاية سميرة بعتبرها اصعب من حكايتي ..فعلا الواحد لما يشوف مشكلات الناس تهون عليه مشكلته ...سعدت باهتمامك وردك ..انا معجبة بكتاباتك واسلوبك

    ReplyDelete
  4. تمني الموت معناه انك مكتئبة. الاكتئاب زيه زي الانفلونزا مرض معدي وممكن يجي لأي حد بسبب أو من غير سبب اوعي تستسلمي لفكرة الموت لأنها ممكن تكون مغريةفي الزمن ده. افتكري ان الحياة حلوة. متعبة آه بس حلوة، وافتكري كمان انك عايشة عشان ربنا عايزك تعيشي، حاولي تخلي لحياتك هدف وتفتكري ان مهما كان اليوم صعب، بكرة هتطلع شمس يوم احلى. د

    ReplyDelete
  5. صباح الخير
    انتي فين ؟ بدخل مدونتك مش لاقية جديد ؟
    بحب اسلوبك ...ممكن تستمري في الكتابة؟

    ReplyDelete