2015

اتعلمت حاجات كتيرة أوي في 2015.. ساعات بحس إن دي أكتر سنة فهمت فيها حاجات عن نفسي وفهمت فيها حاجات عن العلاقات البشرية والعلاقة مع الله.

اتعلمت مثلا ازاي أبطل احس إني مسؤلة عن كل اللي حواليا وإزاي امنع نفسي من الاستمرار والاستثمار في علاقات الاهتمام فيها مش متبادل لأنه بالظبط كأنه حرث في البحر..

اتعلمت ماتكسفش اقول لأ .. من أول مرة ومن غير توتر ومن غير ما اعمل للناس ألف حساب.

اتعلمت اني لازم ابذل مجهود في الاهتمام بالحاجات اللي بجد بتبسطني واني اخططلها زي ما بخطط لشغلي او اي حاجة تانية.. يعني السفر والتصوير والسينما بيسعدوني، هستجيب لهم وهخططلهم وهعملهم مع أصدقاء أو لوحدي (لسه تجربة السفر لوحدي دي).

اتعلمت إن الأمنيات اللي مابيستجبش ليها ربنا ده بيبقى في مصلحتنا.. وعن تجربة ربنا بيعوض بالأحسن منها. إحنا أحيانا بس مابنشوفش أو بنبقى محبطين ومتشعلقين في الفراغ فمش مستعدين نشوف.

اتعلمت أثق في ذكائي ونظرتي للأمور أكتر. حاجات كتير حصلت كانت بتثبت إني كنت ببقى صح أحيانا كتيرة بس بسكت ومش بعبر عن وجهة نظري بقوة عشان مش من طبعي اثق 100% فلما اللي قصادي يتصرف كأنه واثق 100% بقرر اتجاهل رأيي.

اتعلمت ماخافش من الموت وافضل اقول اني مش مستعدة واني عايزة ابقى احسن، آخر حاجة وصلت لها إني عمري ما هلحق ابقى مستعدة وإن ربنا عارف إني بحبه بإخلاص وصدق وإن الحب كفاية والرك على القلب السليم فأي تقصير مني ربنا إن شاء الله يعفو ويصفح..

في حاجات تانية زاد إيماني ويقيني بيها، زي إن الرزق في إيد ربنا مش في إيد حد تاني وإن الرزق مش بس فلوس إنما وجود أهلي رزق وصحتهم رزق وصحتي رزق واصحابي رزق والمحبة رزق والفيلم الحلو رزق والرحلة الحلوة رزق وساندوتش الفول المظبوط رزق وكرسي فاضي في المترو رزق واهتمام اللي بحبهم رزق ومكالمة  سؤال عن الاحوال رزق وتويتة فيها دعوة رزق.. وإن ربنا رازقني بحبه ليا ورحمته وكرمه معايا طول الوقت وباستمرار واني عاجزة تماما عن استيعاب ده وتقديره حق قدره بس ربنا غفور رحيم :)

شفت بعيني إزاي ربنا بيدبر لي الأمور فيحسن التدبير.. الحمد لله.

البوست قلب إيمان شوية بس هو في الحقيقة شبه إحساسي اليومين دول تماما.. إني إلى الله أقرب.

سنة جديدة سعيدة :)