بلوتو يغمز

فقط.. لأنه لم يعد يناسب المواصفات القياسية
خرج بلوتو من حساباتهم.. لم يعد يطلقون عليه اسم كوكب.. وأصبحت قائمة المجموعة الشمسية بلا بلوتو

**** **** ****

فقط لأن مجموعة من علماء الفلك الأرضيين قرروا بعض الصفات والأرقام التي لم تنطبق تمام الانطباق على بلوتو. يستيقظ بلوتو ذات يوم ليقرأ فى الصحف التي لا تَكذب مانشيتاً عريضاً وخبراً تفصيلياً.. ليجد نفسه خارج سياج العائلة الشمسية.. محكوماً عليه بإسم المواصفات "القياسية" ألا يكون ضمن العائلة ولا يحمل اسمها بعد الآن.. لتسقط عنه الجنسية الشمسية، ويخرج عن ملة الرفاق.

على أنه لن يُترك فى حاله تماما، بل سوف يوضع فى بيت الكويكبات القزمة.. وهى المجموعة ذات المواصفات "القياسية الأخرى" التي تتماشى مع مواصفاته الحالية. عليه الآن أن يهجر المشترى والمريخ ونبتون وينهي علاقته بالزهرة ولا يرى عطارد وغيره من أصحابه في الأيام الخوالي، ليخلق صداقات جديدة مع أيريس وسيريس وربما القمر ديسنوميا.

لينسى إذن فكرة العودة وليتقوت بالذكريات، ويأخذ معه قبل رحيله كتابه المفضل وفرشاة أسنانه ودبدوبه الصغير وبعض من حبات اللبان بنكهة النعناع لترفع عنه توتر الوحدة الجديدة.

**** **** ****

يظن العلماء أن بلوتو صاحب العتمة والبرد.. عجوز لن يتحمل صدمة العمر المتأخر تلك، وهم مخطئون تماما، شلة العلماء التي تشرب نسكافيه فى الصباح لتقرر أحكام التهجير والإبعاد فى المساء.

ما يضيره -بلوتو- من حساباتنا الأرضية؟؟ إن هي إلا ورقة يحذف اسمه منها، ليوضع فى قائمة أخرى بورقة أخرى.. لن يتغير مساره بالطبع، ولن تتقطع علاقاته أو تتطبع إلا إذا أراد هو. ما يضيره من أنهم لن يقولوا الكوكب بلوتو وسيقولوا الكويكب بلوتو، هل يحط أو يزيد من قيمته وثقته بنفسه قرارات مجموعة علماء أرضيين فكروا في "جلسة مزاج" أن يطردوا بلوتو من على سطح ورقة بيضاء!!

عزيزي بلوتو.. لك يا صديقي زملاء كثيرون، يحكمون عليهم، فينقلونهم من خانة ليضعونهم فى خانة ثم ينقلونهم منها ليضعوهم فى ثالثة.. وهم -أمثالك يا عزيزي- لا يلتفتون لأحكام الآخرين.. فقط يسيرون كام يتراءى لهم الطريق.. وكما تبدو لهم الأحوال

اسمع ضحكتك الفلكية تأتيني عبر بلايين من الكيلومترات تفصلنا تعلق بها على كلامي بمرحك الجميل وترسم لي على وجه مجرتنا المشتركة "سمايلي يغمز" ه

نص ساعة توفير

سمعتوا عن كوبري قليوب طبعا

وطبعا ليه؟ عشان دا واحد من المشاريع "القومية" اللى محطوطة فى لستة "طبقا للبرنامج الانتخابي لسيادة الرئيس" واللى محدش من الشعب شافها بعينه، بس ما علينا المهم ان مشروع كوبري قليوب خلص يا رجالة، وافتتحوه كمان، وبقالي بتاع خمس ست ايام عايشة فى نعيم البرنامج الانتخابي ذاته

أصل الكوبري كان ضيق، رفيع كده وضعيف، وهو اول كوبري يقابلك وانت مسافر على الطريق الزراعي من مصر إلى الاسكندرية، وبالتالي كل العربيات اللى خارجة من القاهرة على الطريق بتفوت على الكوبري الضيق ده الاول،وطبعا عشان الناس مش بتسمع كلام الحكومة وبتنظم النسل، وعشان المشكلة السكانية انفجرت في وشنا خلاص، فالطبيعي ان الكوبري الضيق يتحول مع الوقت لعنق الزجاجة اللى بيقولوا عليه، واختك باه يوميا تعيش المعاناه دي لأنها بتمر من على كوبري قليوب كل يوم مرتين، مرة الصبح ومرة بالليل

قول أحيانا الصبح ما بيكونش فى اختناق مروري عند الكوبري إلا مثلا خمس دقايق او عشر دقايق،إنما الذل الحقيقي بشوفه بعيني وأنا مروحه، لما نقعد يا مؤمن ما لا يقل عن نص ساعة عند الكوبري، والمفروض انى اخر اليوم، يعني مفيش نشاط ولا طاقة ولا استعداد لأي نوع لتعلم درس "طولة الصبر يبلغ الأمل" وخصوصا انه درس يومي

يبقى من حقي أكون أول الفرحانين بإنهم وسعوا كوبري قليوب، هتقولي بأه دا كان سبوبة فساد جامدة،هقولك مش مشكلتي خالص.. هتقولي دا حتة كوبري صغير لا راح ولا جه ما يتصرفش عليه السبعة واربعين مليون جنيه اللى قالوا عليها،هقولك انا بردو مبسوطة بالكوبري..وكمان عايزاك تبقى مبسوط معايا.. أصل أنا وفرت من ورا عملية تكبير الكوبري دي ،نص ساعة بحالها، كل يوم

انت متخيل؟؟

نص ساعة يا بني ادم بقولك، نص ساعة كانت بتتقطع م اللحم الحي كل يوم، ومعرفتش ابدا اتأقلم مع نظرية "الصبر جميل يا جميل" ومع ذلك مكنش عندي أمل إنى استرجع النص ساعة دي.. حتى أثناء ما كانوا شغالين فى الكوبري، وشايفة بعنيا التقدم اليومي الباهر لتنفيذ بند من بنود البرنامج الانتخابي لسيادة الرئيس، مكنتش مصدقة إن توسيع الكوبري يحل المشكلة ويرجع لى النص ساعة بتاعتي تاني

بس لما دا حصل، ولما عيشته أول يوم، وبقيت حاطة إيدي على قلبي تاني وتالت ورابع يوم من القلق والخوف لأصحى من الحلم الجميل ده، ولما بقيت كل يوم بعيش التجربة الممتعة والحالة الفريدة من قطع المسافة ما بين كلية زراعة لكوبري قليوب فى مدة لا تزيد عن عشر دقايق بعد ما كانت بتتقطع فى مدة لا تقل عن ساعة إلا ربع، وبقيت احس ان الميكروباص دا بساط الريح جميل ومريح.. والسواق هو فريد الأطرش بذاته وقلبه ومفتاحه.. شملتني حالة من الاطمئنان على النص ساعة بتاعتي وابتديت ما خفش انها تتقطع مني تاني

حتى إني دلوقتى بفكر أعمل ايه فى النص ساعة الجديدة على حياتي دى؟ تخيل توفير كل يوم نص ساعة.. يعنى احسن من توفير إريال خمسة وعشرين قرش للكيس.. نص ساعة يوميا يعني ساعتين ونص اسبوعيا لأنى مش هحسب حمعة وسبت طبعا، يعنى حوالي عشر ساعات فى الشهر

يا دين النبي.. عشر ساعات؟؟

اعمل فيهم ايه دول بس..اوديهم فين.. ايه الحلاوة دي يا بلد

النص ساعة توفير دي هتجنني، فكرة خرافية أنا عايشة فيها.. عايزة ابتدي اتعلم لغة جديدة مثلا، أو اتعلم حاجة جديدة تفيد شغلي، أو احترم نفسي باه وابتدي مشروعي المؤجل لحفظ القرآن الكريم، أو ممكن ابتدي افكر فعليا فى التحضير لمشروع كتاب مثلا وأكيد هلاقي دور النشر بتتتهافت عليا بصرف النظر عن مضمون الكتاب،عادي ما أنا عندي نص ساعة بأه أقدر فيها افكر فى مضمون شغال.. أو ممكن افكر اروح "جيم" بعد قطيعة دامت تسع سنين،..ييووو انا لو قعدت عملت عصف ذهني عشر دقايق كمان هطلع لستة لا تقل عن خمسة وعشرين عمل مؤجل ممكن تقضيهم نص ساعة فى اليوم

الأكيد إني هحاول استفيد من النص ساعة دي، دى اكتر نص ساعة فى اليوم اقدر احس بقيمتها، نص ساعة مجمدة وبحالة جيدة، عايزة الحق اربطها بعمل ما،مش عايزة افكها وابعترها وتتوه وسط ساعات اليوم

انما من الاخر أنا سعيدة بالكوبريييي..كوبري قليوب حبيبي.. يا كوبري يا كوبري... كوبري قليوب يا حبيبي

مصر فيها جاسوس

يا ترى لو اكتشفت جاسوس.. تبلغ عنه؟
بما اننا بنسمع كل فترة والتانية عن مصريين جواسيس لصالح المدعوقة اسرائيل، وبقى الموضوع مش مجرد حكايات قديمة من الستينات والسبعينات بتحكي عن بطل زى رأفت او جمعة، لا دى بقت مانشيتات عريضة ومحاكم وللأسف ابطالها خونة وعملاء وجواسيس، سواء بالصدفة او عن عمد، سواء اتضغط عليهم او راحوا برجليهم

طيب بما ان فى جواسيس بأه، افرض اكتشفت واحد، هتعمل ايه.. وفكر كويس فى الاجابة، انا مش بسألك عن الاجابة النموذجية، مش بقولك ايه اللى المفروض يتعمل، انا بسأل، انت متخيل نفسك هتتصرف ازاى فى الموقف ده؟

هو دا السؤال اللى كان شاغل دماغي اليومين دول - بجانب طبعا استعدادات العائلة لفرح حمادة ابن خالتي - ، الاجابة النموذجية بتقول ان سيادتك هتروح تبلغ عن فلان اللى انت شاكك انه جاسوس، او اللى انت متأكد بالادلة والبراهين وبما لا يدع مجالا للشك لديك ان فلان دا جاسوس، جاسوس بيبع عرض بلدك من اجل حفنة يوروهات.

طيب هو ايه اللى يخليه يعمل كده اصلا؟ ايه اللى يخليه يخون؟

لأ لأ لأ، استنى، انا حاسة بشىء من السخرية المكتومة ، كأنك عايز تقول ايه فى بلدنا يخلي الواحد ما يكفرش وما يخونش... لا لا مش هو دا الكلام
الاصل اننا مش بنتاجر مع الوطن، مش لما يدينا نديلة ولما ياخد مننا نضربه على دماغه، الاصل اننا بدل ما نخون، نصلح، او نسلم امرنا لله ونمشي بالستر كأضعف الايمان، انما الخيانة، لا اسمحلي.. الخيانة قطم وسط، ووجع فى النخاع

هو ايه اصلا اللى يخلي الواحد يخون؟ اكيد فى تركيبة معينة ، صفات انسانية ما بتخلي واحد عن التاني ليه قابلية الخيانة.. زائد ظروف وشوية ضغوطات، والطبخة تتظبط.. طيب ما احنا محتاجين نعرف معلومات كويسة فى الموضوع ده، عشان نقدر نكشف لو فى حد خاين حوالينا، لو فى جاسوس ماشي جمبك، عايش جمبك، يعرفك وبيصبح عليك كل يوم، بينك وبينه شغل او نسب، او حتى من اهلك.

انا دورت ع النت ولقيت حاجة بتتكلم عن المخابرات بشكل عام وعن صفات الجاسوس تحديدا حاجات منها: الذكاء و حسن البديهة والشجاعة واللباقة و حسن التصرف والنشاط والجرأة وقوة الذاكرة ويعرف كيف يعامل الناس، وكيف تناقش الآراء و صبور وهادئ الطبع وموفور الصحة وأن يفهم نقاط الضعف، وان يعرف كيف يوجد في غيره روح التعاون، وان يكون قادراً على تنظيم وإدارة وقيادة الآخرين وان يكون راغباً في احتمال المسؤولية وان تتوافر له القدرة على ملاحظة كل شيء، وعلى دقة تذكر التفاصيل، وان يكون قادراً على إعداد التقارير بمهارة ودقة و ان يكون قادراً على الخداع، والتضليل.

بس الصفات دى هى الصفات اللى تؤهله للقيام بالدور والاستمرار فيه مش الصفات اللى هى السبب فى تحوله لدور الجاسوس.. بس مايضرش ابدا، الصفات دى ممكن تخليك تفصل بين واحد جاسوس وواحد مش كده، يعنى تخيل واحد عنده كل الصفات دى .. يالهوى دا نشك فيه اول واحد
ياريت يا جماعة لو حد يعرف عن الخلفية النفسية للجواسيس مثلا يقولنا،

طيب ولو فعلا اتأكدت؟ او حتى فضل الشك جواك، وعمال تجمع فى قرائن، وشواهد لا ترقى لمرتبة ادلة قاطعة.. هتعمل ايه ؟ هتروح تبلغ؟ ويمكن يكون هو حد قريب منك او يهمك او يصدمك انه يكون جاسوس وساعتها مش هتبقى عارف تعمل ايه.. تنصحه يروح وللا احتمال لما يعرف يقتلوك، فتفكر انك تبلغ على طول، او انك تحط لسانك فى بقك وتسكت خالص، وتسيب الايام تكشفه... ها؟

انما لو سألتنى عن رأيي، هاقولك: تبلغ.. طبعا تبلغ
مش عشان انا بحب الاجابات النموذجية، بالعكس انا افضل التعبير الحر :) ، انما دا اللى انا متأكدة انى هعمله لو اكتشفت جاسوس.. اصل حرام عليا، دي مسئولية وربنا مش هيرضى ابدا انى اشارك فى الجريمة بالسكوت