12/17/2005

لما الشتا


فى ناس بتحس بالبرد فى الشتا.. وفى ناس بتحس بالدفا

إنسان جميل ورقيق قلبه من جوه دافى والشتا بالنسبة له فرصة عشان يحس بدفا قلبه. أما البرد فهو مجرد إنذار إنه يلبس البلوفر وللا البالطو وللا الشال علشان يحوط على شوية الدفا دول

تلاقيه مبسوط وهو متدفى تحت البطانية فى جزيرة القطن - السرير يعنى على رأى واحد صاحبنا- وتلاقيه مبسوط أكتر وهو ماشى فى عز يناير وفى إيده أيس كريم بالشيكولاته وطرف أنفه وردى من البرد.. يعنى الشىء اللى القدر عليه البرد هو طرف الأنف والأيس كريم


بيعتبر إن اول يوم لنزول المطر يوم عيد لازم يقول لكل حد يقابله كل سنة وانت طيب، ولازم يرفع ايده للسما المفتوحة ويدعى ربنا يدومها.. يسمع الرعد ويبتسم أوى "ياعالم.. السما بتقول آمين" ه

شىء من الواقعية

اللى بيحس بالدفا فى الشتا هو الإنسان اللى عنده هدوم تقيلة، كذا طبقة لابسها بتخليه يقدر يقاوم البرد المرصرص والكولة خطت رقبته لقرب شفايفه وفى ايده كوباية الشاى أو النسكافيه أو الشوكولاتة، أما البرد هيحس بقسوته واحد هدمته اللى فى الصيف هى هدمته اللى فى الشتا وسقف بيتهم لو مكنش ساب البيت فهو عميل للمطر والسيول يفاجئوه فى عز نومه ولا أشطر ممثلين فى دور البطولة للفيلم الأوسكرى"زوار الفجر" بس الكلام ده لو عرف ينام من غير البطانية اللى مش عنده وكمان من غير العشا الدافى اللى مايملكش يعمله. البنى آدم ده لا دفا قلبه يساعه ويساع أهله ولا ممكن يكون جزء من أحلامه إنه ياكل آيس كريم فى عز يناير


وفى واحد بيستنى الشتا ييجى والبرد ينزل عشان هدومة يبقى لها الشرف تدفى بردان غيره ويبقوا اتنين دافيانين فى البلد.. زارهم البرد ودفتهم الرحمة
مش عارفة لو قولتلكوا كل واحد يدور على حد يهاديه بشوية دفا، كده الشتا هيفضل الأجمل.. وأول مطرة عيد... ويناير أحلى بالآيس كريم.... والسما بتقول آمين

------
إلى رومانتيك روز، طبقا للتوقيت المطرى الخاص بيا أقولك "كل سنة وانتى طيبة" ، انا فرحانة اوى بشوية المطرة اللى نزلت رغم ، انها لا محل لها من الإعراب فى نثرية السيول اللى عندك دلوقتى

------
حاجة أخيرة، دى كانت نتيجة التصويت على أجمل حاجة فى الشتا، وأعلن فوز المطر، مبروك لكل قطرة مطر ولكل ما ومن يمت للماء بصله
اضغط على صورة التصويت للتكبير

13 comments:

  1. فيه ناس نايمة ف شوارع عريانين فى الشتا
    و ناس تحت اللحاف نايمة و متكلفته
    و الكل مستحمل الساقعة ,, برحمة ربنا
    ما هو أصله بيدّى البرد على قد الغطا
    و عـجـبـى
    KING TOOOT

    ReplyDelete
  2. تذكرت هنا صلاح جاهين وهو بيقول:
    طلع الشتا وقفل الببان ع البيوت.....وجعل شعاع الشمس خيط عنكبوت.....وحاجات كتير بتموت فى ليل الشتا.......لكن حاجات أكتر بترفض تموت
    وعجبى

    ReplyDelete
  3. الشتا ده اجمل فصل ف السنه .. الشتا ينزل تلاقي كل شئ مغسول .. الارض و الشجر و المباني ..

    الرعد يرعد و البرق يبرق .. السما بتسبح بحمد الله .. سبحانك اللهم و بحمدك سبحان الله العظيم ..

    تعالوا اتفرجوا علي الشتا علي حق عندنا بقاله يومين ..
    بعينكوووووووووووووو

    ReplyDelete
  4. رجعت الشتوية، ضل افتكر فيي

    يا حبيبي الهوى مشاوير

    وقصص الهوى مثل العصافير

    لا تحزن يا حبيبي إذا طارت العصافير

    وغنية منسية ع دراج السهرية

    رجعت الشتوية

    يا حبيبي الهوى غلاب

    عجل وتعا، السني ورا الباب

    شتوية وضجر وليل

    وأنا عم بنطر على الباب

    يه

    ReplyDelete
  5. توت

    كنت مستنياك :))))
    ---------

    محمد وعوليس
    يا خبر يا اساتذه، جاهين وفيروز مرة واحدة

    ----------

    كوكى الجميلة
    اه، بتحنسينى كده
    ماشى، مش هاخدك معايا ناكل ايس كريم فى يناير انا وشيماء وهدى
    شوفى لك حد تاكلى معاه بأه

    ReplyDelete
  6. ما اجملة فصل الشتاء هدوء وسكون برد وثلج احيانا يكون مخيف لكن فى داخلة يكون الجمال وسر الانبهار بة فمن عشق الشتاء مع سهر الليالى لن ينساة ابداااااا


    شكرا فريق عمل بنت مصرية

    ReplyDelete
  7. الأيس كريم ما بيحلاش إلا فى الشتاء أصلاً :)
    أنا إمبارح أما الدنيا مطرت فرحت أوى برضه! تُحفة ما شاء الله

    ReplyDelete
  8. تامر

    فعلا، احيانا يكون مخيف واحيانا بتبقى مطمن بردو وسط الخوف ده

    ------
    ايمان
    انتى كمان من انصار الأيس كريم اللى فى الشتا
    :)))

    المطر بيفرح اوى

    ReplyDelete
  9. مش عارف ليه دايما فيه عندي علاقة ارتباط طردي بين الشتا والطيبة والنقاء واحيانا الدماغ النضيفة
    يمكن دي نرجسية!!!!!!!!!!!! بس بجد أنت أكدت نظريتي الي حد ما

    ReplyDelete
  10. عشقك ندى

    نظرية الدماغ النضيفة وللا النرجسية :)))
    نورتنا بأول زيارة

    --------

    مالك

    :)))
    لا بس انا رغاية ماينفعش الإبتسام بس هقولك كمان ميرسى

    ReplyDelete
  11. الشتا برد ورعد وحب
    والدفا يحلى لو الناس متجمعين
    اتجمعوا عندى فى
    www.mayehkomsh.blogspot.com
    لى عتاب على بنت مصريه
    لم لا تضيفى البلوج الخاص بى ما يحكمشى الى قائمتك؟

    ReplyDelete
  12. اهلا بيك يا خالد نورت البلوج

    ReplyDelete