لما الشتا

فى ناس بتحس بالبرد فى الشتا.. وفى ناس بتحس بالدفا

إنسان جميل ورقيق قلبه من جوه دافى والشتا بالنسبة له فرصة عشان يحس بدفا قلبه. أما البرد فهو مجرد إنذار إنه يلبس البلوفر وللا البالطو وللا الشال علشان يحوط على شوية الدفا دول

تلاقيه مبسوط وهو متدفى تحت البطانية فى جزيرة القطن - السرير يعنى على رأى واحد صاحبنا- وتلاقيه مبسوط أكتر وهو ماشى فى عز يناير وفى إيده أيس كريم بالشيكولاته وطرف أنفه وردى من البرد.. يعنى الشىء اللى القدر عليه البرد هو طرف الأنف والأيس كريم

بيعتبر إن اول يوم لنزول المطر يوم عيد لازم يقول لكل حد يقابله كل سنة وانت طيب، ولازم يرفع ايده للسما المفتوحة ويدعى ربنا يدومها.. يسمع الرعد ويبتسم أوى "ياعالم.. السما بتقول آمين" ه

شىء من الواقعية

اللى بيحس بالدفا فى الشتا هو الإنسان اللى عنده هدوم تقيلة، كذا طبقة لابسها بتخليه يقدر يقاوم البرد المرصرص والكولة خطت رقبته لقرب شفايفه وفى ايده كوباية الشاى أو النسكافيه أو الشوكولاتة، أما البرد هيحس بقسوته واحد هدمته اللى فى الصيف هى هدمته اللى فى الشتا وسقف بيتهم لو مكنش ساب البيت فهو عميل للمطر والسيول يفاجئوه فى عز نومه ولا أشطر ممثلين فى دور البطولة للفيلم الأوسكرى"زوار الفجر" بس الكلام ده لو عرف ينام من غير البطانية اللى مش عنده وكمان من غير العشا الدافى اللى مايملكش يعمله. البنى آدم ده لا دفا قلبه يساعه ويساع أهله ولا ممكن يكون جزء من أحلامه إنه ياكل آيس كريم فى عز يناير

وفى واحد بيستنى الشتا ييجى والبرد ينزل عشان هدومة يبقى لها الشرف تدفى بردان غيره ويبقوا اتنين دافيانين فى البلد.. زارهم البرد ودفتهم الرحمة
مش عارفة لو قولتلكوا كل واحد يدور على حد يهاديه بشوية دفا، كده الشتا هيفضل الأجمل.. وأول مطرة عيد... ويناير أحلى بالآيس كريم.... والسما بتقول آمين

------

إلى رومانتيك روز، طبقا للتوقيت المطرى الخاص بيا أقولك "كل سنة وانتى طيبة" ، انا فرحانة اوى بشوية المطرة اللى نزلت رغم ، انها لا محل لها من الإعراب فى نثرية السيول اللى عندك دلوقتى

------

حاجة أخيرة، دى كانت نتيجة التصويت على أجمل حاجة فى الشتا، وأعلن فوز المطر، مبروك لكل قطرة مطر ولكل ما ومن يمت للماء بصله

اضغط على صورة التصويت للتكبير