1/21/2006

من الهامش أحدثكم

إشارة: عن معرض الكتاب الذى لم أتجول فيه، وبطولة الأمم الأفريقية التى لم أشاهدها.. والفكرة التى تدحرج من فوق رأسى لتنزل على عينى.. آه يا عينى

باختصار شديد، كنت فى المعرض بالأمس، وعلى علم بأنه سيغلق أبوابه الساعة الثالثةعصراً. وكان موعد مناسب لى حتى أعود منزلى مبكرا، ولكن فى الساعة الحادية عشر (وكسر) بدأوا فى غلق الأبواب أمام الرواد، وإخراج من دخل الآن وحالا ودلوقتى وإلا... هنقفل عليكو نيههاهاهاهااااهاها

كنت فى داخل المعرض، ولم أتجول بعد فيه. علمنا أن هناك اعتصام للناشرين، وقفوا البيع ورفضوا الإغلاق. ولكن البعض استمر فى البيع والبعض أغلق منفذ بيعه ورحل، كانت الرغبة لدى أنا وأرابيسك فى الانتظار والتجول فى المعرض (لم أعرف رغبة بقية المجموعة)، حتى لو قفلوا علينا.. مكالمة صغيرة لبابا وماما.. قفلوا علينا عاااااا وانا ماليش دعوة عاااااا والنبى معلش.. يعنى انُط من السور؟ .. عالى

لكن هذا لم يحدث، خرجنا من باب رقم ستة، الباب الذى يفتح كل خمس أو عشر دقائق لإخراج مجموعة من المحبوسين جوه. كنا نعلم أن الحدث بالداخل ولكننا رأينا تزايد الناس القادمة لزيارة المعرض

لم أنوى أن أكتب ما شاهدته، فالحدث بالداخل.. ولكن اليوم أعتقد أن مواقفا صغيرة عند باب ستة حدثت

-
كنا واقفين بنتفرج الصراحة
-
الناس القادمة فى تزايد
-
تشير أرابيسك لرجل وزوجته وأطفاله، البنوتة لابسه لبس العيد يا ناس.. باين عليه
-
وقفت سيدة تعترض وتناقش أحد رجال الأمن فى حدة، والتف حولها عدد من الناس.. انتى بتتكلمى فى ايه يا ست، دى الأوامر من فوق
-
حاول أحد المحاضرين - لندوة من المفترض ان تدار بالداخل- ان يدخل ولكن محاولته بائت بالفشل ، يعنى لحد ما مشينا
-
الوحيد الذى رأيته يدخل واحد شعره أصفر وعنيه ملونة وفى رقبته كارنيه. تحليلى: البلد بلد سياحى وتحترم السياحة حتى فى أحلك الظروف وبما ان شعره اصفر صفار السياح فليذهب الآخرون الى الجحيم. دا غير انه كان ماسك كارنيه، ويلوح به، بلد كارنيهات صحيح
-
بس خلاص مفيش حاجة تانى، مش بقولكوا الحدث بالداخل.. وانا لحد دلوقتى معرفش ايه اللى حصل فى الداخل ده

على طول شارع صلاح سالم الذى مشينا فيه بعد ذلك، عربات الأمن (دى بطولة يا ناس) وعربات الكوكاكولا (ماركة اشتم واشرب) وعربة تنظيف (بيغسلوا الشوارع) وبعض الذاهبون الى الماتش (بعرفهم من الاعلام المصرية فى اديهم)ه

وروحت بيتنا .............

كنت ناوية اتفرج على البطولة ، وشفت فعلا لحد عرض المظلات الأهطل ده، ولكن (النوم سلطان) وانا ماعزش عن النوم نفسى .لم اشاهد الماتش والاحتفال، ومن قبل لم اتجول فى المعرض.. مع انى كنت مخططة ألِف فى المعرض واروح اتفرج على الاحتفال

وبعد

علاقة: عندما استيقظت اليوم شعرت أنى أقف على هامش، هامش حقيقى متسع وكبير جدا ويبدو أنه هامش عريض نسبته الى نسبة بؤرة المتفاعلين كالنسبة بين الجالسين فى مدرجات ستاد القاهرة وبين نسبة المتصارعين على الكورة فى الملعب
.
.
.
بصرف النظر: هو التغيير بييجى منين؟ الهامش وللا البؤرة؟ آه يا عينى، لأ لأ.. دى بتوجع أوى

12 comments:

  1. طب كويس انك قلتيلى عشان لما اروح اروح يوم يكون فيه الزيارة سواريه
    بدل ما يحبسونى هناك
    ولو نفسك تشوفى الحفل الاهطل ممكن تقرأى تقريرى بالصوت والصورة لفاعليات الحفل المبجل
    هىهى وسلميلى ع الكورة يا "بنت مصرية"...

    سلاماتى ليكى دايما

    ReplyDelete
  2. دا احنا يظهر اتقابلنا هناك
    انا كنت هناك الساعة 11و ربع و ماعرفتش ادخل فرحت استنى صاحبتي التي سبقتني في الذهاب و دخلت و لم تستطع الخروج

    و انتظرتها عند باب 6 و شفت الصحفي الاجنبي اللي معلق كارنيه لما سمحوله لوحده بالدخول

    ReplyDelete
  3. زيزي.. نسيت اقول لك.. الالوان الجديدة حلوة جدا كالعادة
    بالـــ
    right side
    باين عندى واقع تحت البوستات
    وعلى فكرة انا عندى كدة على
    firefox and internet explorer
    فشوفى اللازم عشان الحلو يكمل بقى

    ;)

    ReplyDelete
  4. انا لو منك كنت غيظت بتوع المعرض ورحت اى مكتبة فى وسط البلد ولفيتها حتة حتة هههههههههههههههه يلا معلش خيرها فى غيرها
    وبالنسبة بقى للاحتفال على رأى لست أدرى كان فعلا احتفال اهطل ههههههههههه وموسيقى غريبة مالهاش معنى شغالة طول الاحتفال

    وبالنسبة لكلام بلو روز انا حاسس انها فاتها نص عمرها تبقى واقفة جمب بنت مصرية وما تعرفش انها جمبها يااااااااا انا لو منك انتحر يا بلو :D والمفروض بقى واحنا ماشين فى الشارع نميز نفسنا بعلامة عشان نعرف بعض اللى بنكتب فى البلوجرز يعنى ممكن نحط وردة حمرا او منديل احمر زى رامى قشوع :P

    ReplyDelete
  5. بالنسبة للماتش والإحتفال إقدر أقولك ماتشوفيش وحش
    أما بالنسبة لسؤالك عن التغيير بييجى منين ؟؟؟ من الهامش ولا من البؤرة؟؟؟ فاقدر أقولك انك فاهمه غلط .... التغيير بييجى من العتبة

    ReplyDelete
  6. يا سلاااااام أنا بقا معرفش إن معرض الكتاب إتفتح أصلاً إلا النهاردة من بسبس دة بالنسبة لمعرض الكتاب
    أما بالنسبة لبطولة الأمم الأفريقية فأنا قررت إني مش هتفرج على كورة تاني خالص بالا حرقة دم
    أما بالنسبة للتغيير فأنا مع أيوب بييجي من العتبة

    ReplyDelete
  7. بجد وحشتوني و وحشني التعليق علي تفاعلاتكم الجميله و الحقيقيه علي الاحداث ..

    معرض الكتاب بسمع عنه كتير بس عمري ما حضرته و علشان كده مش حاسه اني زعلانه ولا متظلمه زيكم .. يمكن لو جربته اقدر اتجاوب ..

    اما عن الافتتاح و الماتش .. فحدثوا ولا حرج .. أقل ما يوصف بيه الافتتاح انه متواضع جدا و ضحل .. و الماتش رغم اننا كسبنا بس الدفاع كان شُرك و سترها معانا ربنا .. و حسيت ان ابوتريكه جاب الجون بس هو مش موجود ف الماتش اصلا .. ماشفتوش ولا حسيت بيه الا لما حط الجون .. ازاي معرفش ..
    عموما .. مش كل مره تسلم الجره و ربنا يستر ف ماتش المغرب ..

    بالمناسبه .. هو الماتش امتي ؟؟

    التغيير بيجي من العتبه ؟؟ ممممممممم .. يمكن ..

    ReplyDelete
  8. الماتش يوم الثلاثاء الساعة 8 إن شاء الله انا قريته كدة والله اعلم

    ReplyDelete
  9. لستُ أدرى

    يا كسوفى قدام دول العالم المتحضر ودول العالم التالث ودول العالم السفلى،

    انا على فكرة عندى اكسبلرر مظبط السايد بار ومفيهوش مشكلة، بس هحاول اشوف بردو واظبط
    -------

    بلو روز
    يا اهلا يا اهلا نورتينى فى البلوج وخطوة عزيزة يا بنتى
    مفاجاة جميلة اننا كان فى نفس المكان ومنعرفش، دا انا كان معايا خمسة بلوجرز تانيين غيرى
    --------

    سويدى
    انت ضحكتنى باتنين جنيه النهاردة، بقالى زمان ماضحكتش
    حلوة اوى حكاية اغيظهم والف فى المعرض،

    انا اللى حظى وحش انى ماعرفتش بلو روز
    بس ان شاء الله تتعوض مرة تانية

    ------

    أيوب وتاتى

    بأه التغيير بييجى من العتبة، طيب فين بأه فى العتبة.. عشان اروح اجيب
    --------

    رومانتيك روز

    شكرا يا حبى على الوصف التفصيلى للماتش، انا كده مشناقصنى حاجة، لست ادرى وصفت الاحتفال وانتى علقتى على الماتش.. بس بردو مالقتش حد يقولى ايه اللى حصل جوه المعرض

    بقولك ايه .. تحبى اجيبلك شوية تغيير م العتبة، هروح اول ما يوصفولى المكان ---------

    ReplyDelete
  10. يلا .. ما علينا
    دى اسمها قمة التنظيم وده العادى فى بلدنا
    شوفتى كمان كنج تووت كاتب ايه عن المهزلة دى
    وبالنسبة لبلو روز انا كمان زعلانة اننا ماتقابلناش لكن باقية ان شاء الله
    تسلم ايدك يا زيزى

    ReplyDelete
  11. طب ايه رايك بقى يا زيزى انى مضحكك النهاردة بخمسة جنيه كدة يبقى فى باقى 3 جنيه هاتيهم لو سمحتى

    :P

    ReplyDelete
  12. دوللى

    تسلمى يا جميل، ان شاء الله فى اى حدث بعد كده نحاول نتعرف على البلوجرز الموجودين، ممكن ننفذ اقتراح قشوع :))
    ---------

    سويدى

    هما اتنين جنيه وبس، دى تعريفة.. انت هتضحك عليا
    ومع ذلك لو قلت نكتة تانية ممكن اديك نص حنيه كمان

    ReplyDelete