4/27/2006

مالك



أول مرة احس يعنى ايه حد تعرفه يعتقلوه.. انا مخضوضة.. وخايفة على مالك.. وخايفة على اللى معاه.. وخايفة على كل اللى اعتقلوهم، كأنى اعرفهم كلهم.. مش عارفة اساعد ازاى.. اعمل ايه.. اعمل ايه غير مجرد تعليق بانر او اعلان فى مدونة



وقفة القضاة 25 مايو 2006 احتجاجا على إعاقة الحكومة لقانون جديد للسلطة القضائية يكفل استقلالها

17 comments:

  1. أعتقال 18 من حركة كفايه امبارح
    وبدو بلبيس يهاجمون كمين للشرطه وقتلوا ظابط واتنين عساكر
    أهلاً بالفوضى

    ReplyDelete
  2. اولا:حمد الله علي السلامة...مبسوطة انك رجعتي.
    انا معرفش مالك ولا اي حد من اللي اعتقلوا...بس برضو متضايقة و خايفة عليهم..و مش مصدقة اللي حصلهم..بعتت ايميل لمدونة اسألها...ممكن اساعد ازاي..مردتش عليا...فلو حد قالك حاجة ممكن نعلمها...قوليلي..عشان انا فعلا مش عارفة و متضايقة اني مش عارفة اساعد.

    ReplyDelete
  3. كلنا خايفين جدا .. ومحدش عارف يعمل ايه ... حاولت طول الليل اتصل بمالك ومحدش بيرد ..

    كلمت كل المدونين اللي اعرفهم عشان حد يعمل حاجة مفيش فايدة ..

    لو حد يعرف ممكن نعمل ايه يقولنا ..

    ReplyDelete
  4. انا كمان معرفش مالك قوي .. دخلت عنده يمكن مره او اتنين .. ممكن حد يقولي هو معتقل ليه ؟؟ و منين اتاكدتوا انه معتقل ؟؟

    دايما بسمع الكلمه دي بس اول مره احس انها قريبه كده ..

    ReplyDelete
  5. رومنتيك روز :هو يا ستي معتقل علشان بيقول لا للفساد وبيتضامن مع القضاه وعرفنا غانه معتقل لان كتير مننا كانوا معاه وقتها

    ReplyDelete
  6. قرأت الأن في الوعي المصري عن أسماء المعتقلين و منهم مدونان و هما مالك صاحب (مالكوم إكس) و يحيى مجاهد صاحب (الله الوطن فاطمة).

    لا أعرف ما الذي يستطيع الواحد عمله بخلاف الدعاء أن يفك الله سجنهما .

    ReplyDelete
  7. فى العالم الافتراضى:
    فكرة 1:
    حملة المائة ألف وجه لإزالة نظام الطاغية مبارك

    فكرة 2:
    عايزين بانار عشان "اطلاق صراح مالك ويحيى مجاهد" ونتعاون فى نشره

    فكرة 3:
    الاعلام المصرى يتجاهل تماماً ما يحدث عند نادى القضاة. يا ريت حد يفوقه

    فكرة 4:
    والنبى حد يبعت لمنظمة حقوق الانسان وCommittee to Protect Bloggers
    وللجرايد ووكالات الانباء

    فكرة 5:
    حد يبعت على مجموعة "المدونون المصريون"

    إعملوا حاجة، إصحوا بقى، بكرة سيتم إعتقالنا جميعاً حتى وإحنا فى بيوتنا لو فضل النظام على كده

    بنت مصرية، أنا حاولت أبعت لبعض الوكالات بس للأسف مضر أسافر بعد دقائق ومش عارف هأرجع أمتى

    ReplyDelete
  8. كنت قريت -مش فاكرة فين- تصحيح ان يحيى مجاهد مش اعتقلوه، حد يأكد الخبر


    حاولت اتصل بمالك بس الرقم خارج الخدمة - متوقع- وكلمت المدونين اللى اعرفهم، ومعرفتش حاجة


    بس من شوية عمرو فى تعليق ليه عند بن عبدالعزيز قال


    مالك ودفعته من المعتقلين يعرضون حاليا على نيابة أمن الدولة في مصر الجديدة. الاحتمال الأغلب الأمر بحسبهم 15 يوم على ذمة التحقيق. الدفعة التي سبقتهم (محمد الشرقاوي، وأحمد الدروبي) نقلوا من قسم الخليفة إلى طرة.

    5000 إخواني في الشارع، ومصادمات مع الأمن.



    ----

    نيرو: احنا ممكن نشتغل فى اقتراحات رامى لحد ما نشوف ايه الجديد
    ---

    رامى: انا بعت على الجروب، بس المفروض يتعمله ابروف بيتهيئلى

    كمان هبعت على كل الناس اللى اعرفهم واللى معرفهمش، على قدما اقدر

    بالنسبة للبانر، اوكى ان هجهز واحد

    بالنسبة لفكرة شريف، عايزة ترتيب، هتابع هناك عنده

    ، ربنا يخليوا لو عرفتوا اخبار جديدة قولولى

    ReplyDelete
  9. انا دمي فاير
    ومحبوس في البلد بنت الكلب دي ومش عارف انزل

    دمي فاير دمي فاير

    ReplyDelete
  10. كده تمام...طيب هنوحد الأيميلز ولا كل واحد يقول اللي هو عايزه ولا ايه..و انا هحاول ابعت لكل المنظمات اللي عندي العناوين بتاعتها

    ReplyDelete
  11. وانا معاكي وبارفع صوتي جنب صوتك وبقول هما ليه كانوا ساكتين طول عمرهم وليه مرة واحدة صحيوا من النوم مالناس طول عمرها بتتاخد ظلم في المحكمه وياما في الحجز مظاليم خلاص لما حد منهم يتجرجر يعملوا فيلم انا بارفع صوتي جنب صوتك وعايزهم يرجعوا البيت بس يرجعوا كل المظاليم المرميين في السجون

    ReplyDelete
  12. رساله من حركة شايفنكم

    من فجرا يومنا هذا الموافق(27 ابريل 2006) توا جدت كاميرات شايفنكم في قلب الحدث..الجمعيه العموميه لنادي القضاه لنقل احداث حيه و ردود فعل فوريه لما قد تؤل اليه الجلسه التأديبيه المقامه ضد كل من المستشار هشام بسطويسي و المستشار محمود مكي..ايماناً منا بدعم مسيرة استقلال القضاء...
    وعلى الرغم من ان الجلسه قد تم تأجيلها بسبب عدم اخطار المستشارين و عدم وصول اي ورق لهم يوضح ما سوف يتم التساؤل عنه معهم حتى صباح هذا اليوم...الا ان ردود الافعال كانت اقوي من ان تتجاهلها كاميراتنا..
    فمنذ ان صاحبنا القضاه في تمام الساعه العاشره صباحاً اثناء مغادرتهم لنادي القضاه و ذهابهم الى محكمة دار القضاء العالي قابلنا العديد من المسيرات التي تؤيد القضاه و تثبتهم على موقفهم النزيه..فأمام نقابه الصحفين وقف المئات من المتظاهرين..(صحفين مع مواطنين (في مسيره مؤيده لاستقلال القضاء..هذا غير الاعداد التى لم نستطع ان نحصيها التى تتظاهر امام نقابه المحامين تطالب بايمان بضروره استقلال القضاء..و قد تهافت على كاميراتنا العديد من المتظاهرين و كأنهم يطالبونا بأن نشهد على موقفهم و نوصل تلك الشهاده لكل مواطن في بلادنا..
    وبسبب كل تلك الحشود المتظاهره في رمسيس و شارع 26 يوليو و عبد الخالق ثروت و صولاً بشارع شامبليون فوجئنا بتلك الحشود الامنيه الجباره و التى وصلت الى 80 عربيه امن مركزي..و كان كل همهم هو ان يمنعوا و صول المواطنين المتظاهرين عن الوصول الى القضاه الذين جاءوا ليؤيدوهم ..السؤال هنا..لماذا كل هذه الاعداد من رجال الامن المركزي؟...و لماذا هذا الاصرار ان يبعدوا المواطنين عن القضاه لدرجة ان يلجأوا الى ضرب العديد من المتظاهرين و القبض على آخرون.؟ و لماذا اثناء التظاهر منعوا كاميراتنا من الاقتراب من نادي القضاه؟......
    اليوم...يعد نقطه هامه و مؤثره في مسيرة استقلال القضاء برغم كا ما واجهناه من صعوبات امنيه..و ستستمر حملتنا بالرغم من اي شيء حتى الخامس و العشرين من مايو...و سنظل مسلطين كاميراتنا و اعيننا على كل ما يحدث...و سنظل شايفنهم بكل تعسفهم و تجوازتهم و ننقل لكم_ بأمانة المدافع عن العداله_ ما يخطو اليه وطننا الآن نحو التغير الحقيقي....فتتضامنوا معنا...
    نحن شعب يُسلب منه اهم و ابسط حقوقه..العداله!
    فلا عداله بدون قضاء نزيه..و لا نزاهه لقضاء دون استقلاله!
    فتضامنوا معنا من اجل وطن يستطيع كل مواطن فيه ان يؤمن ان هناك عداله....

    ReplyDelete
  13. ليا اصحاب كتير جدا احمد ماهر وعلى الفيل وحماده فيصل واسلام حنفى و عماد فريد اعرفهم من مده اعتقلوا ادعوا ان ربنا انه يرجعهم بالسلامه

    ReplyDelete
  14. بخصوص البنر انا عملت واحد يا ريت يعجبكم
    وخليته لكل المعتقلين مش بس المدونين
    http://moa6n.blogspot.com/2006/04/blog-post_28.html

    ReplyDelete
  15. أولا فكره البانر فكره هياله وفكره البادج بتاع استقلال القضاء وربنا يكرمنا ونشوف اليوم اللي الواحد يبقي ماشي وهو مطمن ان فيه قضاء يحميه من كلاب السلطه ....انا طالب منك طريقه وضع البادج بتاع استقلال القضاء .وألف شكر علي كلامك الرائع ده

    ReplyDelete
  16. نور

    رابط وقفة القضاء هتلاقى روابط كتير فى الصفحة بتاعته فى الاخر

    http://www.gharbeia.org/judiciary-25-may/

    ReplyDelete
  17. ما قاله قضاة مصر الشرفاء لشايفنكم يوم لجنة الصلاحيه


    هشام بسطويسي....قال"الشعب عنده وعي كفايه وفاهم كويس ايه اللي بيحصل و فاهم ان قضية استقلال القضاء و نزاهته تهم كل مواطن.....القضيه مش قضيه قاضيين بيتحاكموا !!"

    و قال ايضاً" حشود الامن...جيا تحمي النظام من الشعب"

    و قال لنا الخضيري عن حشود الامن الكبيره" الحشد الامني يدل على على ان الدوله لا تفكر بالمنطق المطلوب...و ده لأنها للأسف بتفكر بعضلاتها"

    و اضاف" المسأله مش خاصه بالقضاه دي قضية الشعب المصري كله"

    و بعد ان تم الاعتداء على محمود حمزه كان لنا معه حوار كامل في مستشفى كليوباترا و هذا اهم ما ورد فيه

    قال محمود حمزه لشايفنكم مستنكراً ما تعرض له من اهانات و ضرب" القضاء ده ايه؟ ايه رمزه؟ ..العدل طبعا..و لما يهان العدل بالطريقه دي...مش دي رساله للشعب..رساله بتقول: مش هما دول اللي بتقولوا ان هما صوتكوا" شما اشار الى وجهه المصاب و قال " اهو بالجزمه ...بالجزمه"

    قال لنا ايضا محمود حمزه وهو يغالب دموعه.. " انا لما دخلت المستشفى في الطواريء...انكسرت اوي و صعبت نفسي عليا جداً..ولكن بعد ان جاءني تليفون من مواطنه تؤيدني و دعت لي لم اعد اشعر باي الم في جسدي"

    و عندما اكد حمزه ان مصر في حاجه لكل شخص و كل وسيله اعلام من اجل تدعيم حركة القضاء سالناه هل اتى لك اي تليفزيون حكومي منذ اصابتك فضحك بمراراه و قال"لم يأتي اي تليفزيون حكومي بل بالعكس دا انا لما شفت التليفزيون المصري لقيت نفسي متهم"
    و اضاف"و لما و صفوا اللي قام بالاعتداء ....كان ناقص يقولوا عليه مختل عقلياًًً!!!!!!!!"
    و عندما سألناه عن مدى ايمانه باستقلال القضاء...قال" اكيد هيستقل القضاء الرئيس وعد بكده...هل يجوز ان رئيس الجمهوريه وهو اعلى الهيئات القضائيه يوعد ما يوفيش؟؟...مش معقول..انا مش متخيل انه مويفويش بوعده!!!"

    و في نهاية حديثه وجه كلامه لرئيس مبارك قائلاً:" قانون السلطه القضائيه مش هيأثر على اي سلطه اخرى..
    ارجوك ..ارجوك...انهى الازمه...لن ينهيا غيرك!!!"

    ReplyDelete