5/07/2006

د.نهى الزيني فى العاشرة مساءاً

بالأمس، استضافت المحاورة المتألقة والجميلة (منى الشاذلى) فى برنامجها (العاشرة مساءاً) على دريم2، المستشارة الدكتورة (نهى الزينى)ه

كانت مفاجأة جميلة، وحوار أجمل

نهى الزينى سيدة مصرية، قامت بواجب، يُعد فضلا فى زمن كالذى نعيش فيه، كانت اول مرة استمع لها ولآرائها. كلماتها واضحة ومحددة وصريحة، لا تقبل عدة تفسيرات او أكثر من وجه. تنتقى ألفاظها جيدا حتى لا تفهم باى صيغة أخرى غير التى تقصدها. تحدثت عن موقفها فى الانتخابات المصرية، وما حدث للمستشار محمود حمزة، وارتباطها وتقديرها وتبجيلها للقضاء والقضاة، وامنيتها ان يتحقق للقضاء الاستقلالية الكاملة


تروى عن شعور المستشار حمزة وتألمه لما حدث له، يقول لها كما روت، كيف أجلس على منصة القضاء وقد (ضربت بالجزمة)ه

ترد على الاتهامات التى وجهت لها بشأن توجهاتها السياسية، وتوضح انها تختلف مع الأخوان المسلمين ، ولم تقدم شهادتها بالحق لأن المرشح المظلوم كان اخوانى، فهى سوف تدلى بنفس الشهادة اذا كان يسارى او اى توجه آخر، لأنها رأت ظلما يقع، ولأن هذا هو العدل وهذا هو حق الناخبين قبل أى شىء

يتطرق الحوار لرغبتها فى أن تكون المرأة قاضية فى مصر، تجلس على تلك المنصة وتحكم بالعدل الذى به الله سوى بينها وبين الرجل، وتضحك قائلة ان القضاة قد اختلفوا فى كل شىء واتفقوا على ألا تتولى المرأة منصب قاضية. انه مجتمع ذكورى لا يرضى لمرأة مثلها - وقد أطلق عليها الشعب المصرى امرأة بألف رجل- أن تكون قاضية. ليس بالضرورة نهى الزينى ولكن أى امرأة تستحق

هى تؤمن بأن المرأة مثل الرجل، لا تقل شأناً عنه بأى حال من الأحوال.. للأسف اذا كان الرجل لا يرون ذلك فهناك نساء لا يرون ذلك أيضاً، ولكن نهى الزينى تعرف أن الله عدل

كانت هذه هى نهى الزينى باختصار شديد، وكان هذا هو ملخص الحوار الذى ادارته منى الشاذلى بهدوئها المعتاد
-------------
كل يوم اتفرج على العاشرة مساءاـ اتمنى ان فى يوم يجمعنى ربنا بمنى الشاذلى عشان أقولها أنا بحبك وبحترمك جدا

22 comments:

  1. أختلف معكِ بالنسبة لمنى الشاذلي ، وأرى أنها عندما تستضيف بعض الضيوف ، خاصةً بعض الشخصيات المحبوبة من الرأي العام المصري .. فإنها تتعامل معهم على طريقة أميرة عبد العظيم في "ليلتي"!
    متى ستستضيف منى الشاذلي شخصية مكروهة في المقابل؟ عايزين نشوف طريقة إدارتها للحوار..

    في المقابل أعجبتني عبارة المستشارة نهى الزيني : أنا لم أخطئ حتى أعتذر.. وفي تلك العبارة القصيرة رسائل ذات مغزى عميق .. لمن كان له قلب أو ألقى السمع وهو شهيد..

    خالص تقديري

    ReplyDelete
  2. ايه السرعه دي البرنامج مبألوش كام ساعه خلصان........صباح النشاط


    بس أنا من رأي الحاج قلم في رأيه عن مني الشاذلي أنا كنت شايف امبارح انها برضه بترد علي لسان الحكومه ولا المريع تامر أمين -المذيع برتبه أمين شرطه- علي رأي الأصدقاء في الدستور والجميل بلال فضل وبمناسبه القضاء والقضاه اذا لم تقرأي عمود مواقف للأستاذ الرائع أنيس منصور أنصحك بقرائته ففيه الكثير عن أمثال البطله مني الزيني فقد كتب عن قاضي زاره محافظ المدينه اللتي فيها المحاكمه وربت علي كتفه قائلا مش هاوصيك ......فرفع القاضي الجلسه ورد علي المحافظ فكانت نهايته في مستشفي الأمراض النفسيه بدون كتابه اسمه في السجلات زياده في الأهانه .........يعني العمليه من زماااااااااااان

    ReplyDelete
  3. انا سبق و قلتلك رأيي ف مني الشاذلي قبل كده يا زيزي .. بس انا مش بكرهها ولا بحس انها "أميري و مع الناس التانيين" لكن انا بستثقلها شخصيا .. مع انها جميله و رقيقه .. بس سبحان الله .. الارواح جنود مجنده من تشابه منها تألف و من اختلف تنافر .. بس الانفراد ده يُحسب ليها و للبرنامج .. نهي الزيني لم تظهر من قبل في اي برنامج تليفزيوني و كان اول ظهور ليها امبارح ف العاشره مساءا ..

    و ان كنت لا "استهضم" مني .. فانا حاسه ان مني دايما بتلعب دور "محامي الشيطان" .. بمعني انها بتهاجم لما الضيف يكون بيدافع و تدافع لما الضيف يكون بيهاجم .. ده احساسي و انا من اللي مش بيتابعوا البرنامج قوي بس يمكن ده انطباعي من الحلقات القليله اللي تابعتها .. و الله اعلم !!

    نهي الزيني .. سيدة بألف رجل فعلا .. و ان تولت منصب قاضية أو حتي وزيرة العدل .. فأن المنصب لسوف يزداد قوة و شرفا معها و ليس العكس .. فقد نقشت اسمها بحروف من نور في سجلات التاريخ بضميرها اليقظ و جانب الخطوره الذي مشت عليه بكل ثبات فقط لاحقاق الحق .. و دائما ما يخلد التاريخ مثيلاتها .. و اتمني ان يكونوا بالمئات و الالاف و ربما بالملايين .. خالص تحياتي

    ReplyDelete
  4. متميزه يا بنت مصريه
    جميل جدا البوست

    منى الشاذلى شخصيه متميزة فعلا بس بحث انها بتلألأ يعنى كتير بتبقاش عارفه تقول ايه مش عارف بحس انها مش بتحضر قبل الحلقه انما بتعتمد على الارتجال انما هى افضل مزيعه مصريه فى رأيى

    لو ربنا جمعك بيها ابقى قوليلها ن فيه برده واحد اسمه محمد الطاهر بيحبك ويحجترمك

    شكرا

    ReplyDelete
  5. نسيت اقول حاجه مهمه بس
    بغض النظر إن نهى الزينى عمله نادره و بمليون راجل مش بألف إنما حكاية المرأه تبقى قاضيه دى فيها كلام مقولناش حاجه يعنى المرأه نصف المجتمع والبطيخ ده انما قاضيه؟؟؟ أنا شايف ان الكلام صعب
    شوفوا يا جماعه انا مش عايز حد يفهمنى غلط انا والله العظيم مقتنع مليون فى الميه بحقوق المرأه لكن ليا وجهة نظرى المرأه زى الرجل اوكى مقولناش حاجه بس فيه حدود حكاية قاضى دى بالذات صعبه وعموما دا رأى مبدأى يعنمى يا ريت تناقشونى فيه ونقنع بعض



    حاجه تانيه عايز اقولها ملهاش علاقه بالموضوع
    النساء بتوع حقوق المرأه ومش عارف ايه بأمانه انا مش بطيقهم ولما بييجوا على تليفزين ببقى عايز أولع فى ماسبيرو كلها بس لما يطلع حد زى نها الزينى وتتكلم لازم انحنى لها احتراما فعلا نهى الزينى بقت ام المصريين

    ReplyDelete
  6. قلم جاف

    أنا كمان عجبتنى جدا عبارة الدكتورة نهى، وكل تعليقاتها :)

    أما بالنسبة لمنى الشاذلى، انا شايفة انها لما بتستضيف شخصية محبوبة بردو بتوجه لها الانتقادات اللى قيلت فيها، وطبع منى الشاذلى عموما الهدوء، مابتحبش تكون حادة او جافة فى كلامها.. بتغلف سؤالها بخفة دم أحيانا-ودى اطتر حاجة بتعجبنى، وبتوصل للإجابة اللى هى عايزاها

    ثانيا هى فعلا عملت انترفيو مع شخصية مكروه، وهو كمال الشاذلى، بس بصراحة انا حسيت ان منى ماكنتش فى احسن حالتها اثناء محاورته، كان المفروض تحطه بين طرفى مقص، مش تسيبه يجاوب الىل يجاوبه ويرفض اللى مايعجبوش

    --------------



    نور

    صباح النشاط والحيوية :) والجبنة بالشطة عشان الدايت :(

    ، منى بترد بلسان الحكومة؟؟ هى لما اشتضافت نهى الزينى، المغضوب عليها من الحكومة، وحاورتها بشكل بروزت فيه تلك السيدة العظيمة كانت بكده لسان حال الحكومة؟؟

    ولما العاشرة مساءا بتقدم تقارير يومية عن حال الشارع المصرى، تقارير مش هتسمعها فى التلفزيون المصرى ولو بعد مليون سنة، تبقى لسان حال الحكومة؟

    اخر حاجة كانت تغطية مصورة جيدة للى حصل فى وقفة القضاة، بس السلبية الوحيدة فى الموضوع انهم ما اهتموش كفاية بعرض قضية المعتقلين- اقصد المختطفين- بالتفصيل، اكتفوا بالاشارة فقط

    اما تامر أمين، فانا اتفق معاك ومع بلال فضل ومع الشعب المصرى عموما

    ReplyDelete
  7. رومانتيك-حبيبتى-روز

    انتى عارفة انى بحبها بردو لله فى لله، سواء بتحاور حلو او وحش، سواء متحيزة او حيادية، انا بحبها وبس، وفعلا الارواح جنود مجندة

    بس تعالى هنا، مين قال بأة انها بتهاجم لما الضيف يكون بيدافع و تدافع لما الضيف يكون بيهاجم، مش يمكن دا تكنيك عشان تطلع فى النهاية بالاستفادة القصوى لصالح المشاهد، لو مكانها انا هعمل كده، الفكرة مش انى اطبطب على الضيف ولا اهاجمه، المهم انى اطلع بكل اجابات الأسئلة المطروحة


    --------------

    محمد الطاهر

    يوصل يا محمد :)
    انا كمان بعتبرها أفضل اعلامية مصرية وعربية

    كلام فى سركوا، انا بحب محمود سعد كمان، وشايفة انه محاور ممتاز، أفضل محاور مصرى وعربى كمان
    بس يا ساتر لو قلب على الضيف :)

    اخر حوار ليه مع مرشد الاخوان كان وحش جدا، مكنش صاحى ومعملش حوار جيد


    ، ندخل بأه فى الكلام الجامد اللى انت قلته عن حق المرأة تكون قاضية من عدمه

    انا عارفة ومتأكده انك بتقدر المرأة وانها نصف المجتمع والبطيخ ده، وانا كمانبتفق مع احساسك تجاه كتير من المنادين بحقوق المرأة

    بس خلينا نتكلم واحدة واحدة، انت مش متخيل المرأة تكون قاضية ليه؟؟؟
    انت ماذكرتش سبب واحد

    هل هو مجرد احساسك؟
    وللا لاعتبارات دينية؟
    وللا عشان اتعودنا على كده؟
    وللا عشان التجارب فى الدول الاخرى -سواء العربية او الغربية- اثبتت ان دى مهنة ذكورية خالصة؟ :)

    ReplyDelete
  8. رومانتك روز
    هي الحرفية تخليها تمثل في الحوار "الطرف الآخر" لو مش موجود
    يعني مش فكرة بتهاجم لو الضيف بيدافع او العكس
    الفكرة انها بتقول كل اللي ممكن يقوله طرف مضاد , عشان تسمع رد الضيف

    بنت مصرية
    انا بردو بصرف النظر عن احترامي الشديد لمنى الشاذلي باحبها لله في لله

    ReplyDelete
  9. ماشي ياستي حقك عليا بتتكلم بلسانها هي شخصيا لكن ايه رأيك في حلقة كوكو-كمال الشاذلي- كانت بتتكلم بلسان مييييييين؟؟؟

    هي فعلا عمليا قبول مش أكتر

    عموما اختلاف الرأي لا يفسد للود قضيه

    ReplyDelete
  10. اسمحوا لي اشارككم ...
    البرامج التي نشاهدها في غربه النفس و الجسد علي الشاشه ليست كما يجب ان تكون من حيث المضمون ... فلا الفضائيه المصريه و لا النيل للدراما تحسب علي الاعلام الحر الذى ينقل هموم و اهتمامات الشارع .
    يحسب للمذيعه التي ذكرتموها سبقها الاعلامي باستضافه الاخت الفاضله المستشاره و التي شرفت بتهنئتها هاتفيا من هنا وذلك عقب موقفها االذى يعكس ايمانا عميقا بالله عز و جل .
    نسئل الله جميعا ان يكون ايماننا مما وقر في القلب و.... صدقه العمل .
    و الله من وراء القصد .

    ReplyDelete
  11. تحيتى لكى يا بنت مصرية
    اعترف انك تكتبين بنبضنا وما يمس دواخل شعورنا وما حتى تحدثنا به أنفسنا إذا لم نجد من يسمعنا
    --------------------
    لا أعرف لماذا تحول الحديث الى منى الشاذلى بالرغم من كونها البطلة الثانية فى التدوينة ......على كل حال ما دام ذكر الجميع أراءهم ...فاسمحى لى ان ابدى لها كل إعجابى وتقديرى فهى تستحقه...فلقد جعلت للإعلام المصرى ولأول مرة مذاقا خاصا حلو الطعم ..أنسانا مرارة ما تذوقناه طول حياتنا من قنواتنا القديمة الاولى والثانية ...قد أستثنى ربما رائدة سبقت منى فى تغيير هذا الطعم ولكن فى نطاق المسموح بالاعلام الرسمى ..وهى رولا مصطفى خرسا
    -------------
    لقد غير البرنامج بكل ما فيه ومن فيه مفهومنا عن الاعلام المصرى ...فتحية للعاشرة مساءا ..ولمنى الشاذلى
    --------------
    أما منطق الرد من منى الشاذلى على لسان الحكومة ...فهو فى رايى ذكاء إعلامى يضمن من جهة حيادية الحوار ...ويحفز الحكوميين للاشتراك بالبرنامج باعتباره طرف نراه دائما متهما وان بدى لنا الكلام عكس ذلك ...ونستطيع أيضا أن نرى فى عيون منى الشاذلى وفى ابتسامتها التى تحمل الكثير من الذكاء والتعبير معانى لم تقال ولكنها لها الكثير من المعانى ...أما اسلوب نقد الضيف المحبوب لنا ..فاننى ارى انه اسلوب ذكيا حيث يبنى النقد دائما للمجهول مما يتيح للضيف الرد وهذا حق المشاهد وواجب الاعلام الجيد
    ---------------
    لقد أعطيت منى الكثير من الكلمات التى تستحقها ولكننى سأذكر القليل عن البطلة الأولى المستشارة نهى الزينى ...لأن الكلمات لا يمكن أن تعطيها حقها ...ويكفيها ما نالته من إحترام وتقدير الشعب المصرى بأجمعه ..والذى إتفق بكل توجهاته السياسية حتى أفراد الحزب الوطنى (حزب الأقلية) على أن هذه السيدة تعتبر وساما يعيد لنا بعض كرامتنا المفقودة
    ------------
    أخيرا وعفوا للإطالة فيجب الإشادة للمرة الثانية بمنى الشاذلى والعاشرة مساءا على اختيارها لهذا التوقيت شديد الذكاء والذى نحتاج فيه لتقوية العزم على مؤازرة قضائنا المصرى الذى نعتبره جميعا الملاذ الوحيد من المآسى التى يعيش فيها شعبنا منذ أكثر من ربع قرن ....وهنا يكشف البرنامج اجماع وحب الناس لهذا الرمز

    ReplyDelete
  12. نور
    استنى بس يا نوووور، انا فعلا علقت على حلقة كمال الشاذلى فى ردى على قلم جاف، ومكنتش عجبانى منى فى الحلقة دى خالص... بس لا اتهمها بإنها لسان حال الحكومة، هى مكنتش معاه، هى مكنتش عارفة تتكلم اصلا، هو استولى ع الحلقة والاسئلة والفواصل كمان :))
    الظاهر انه بأه طبع

    أيمن
    لا الفضائية المصرية ولا النيل للدراما، ولما تنور مصر بإذن الله، هتلاقى ان لا الاولى ولا التانية ولا اى قناة مصرية، ولا حتى القنوات الخاصة زى المحور ودريم.. اللهم دريم اتنين عليها كام برنامج حلوين: زى العاشرة مساءا ، وبرنامج ابراهيم عيسى وجمال الغيطانى ودمتم

    سعدنى
    شكرا على تعليقك، وما تبقاش تكسل وماتجيش، ومايهمكش من التعليقات الطويلة خالص :)
    يمكن الكلام اتحول على استاذة/ منى، لانها كانت منطقة شد وجذب، انما دكتورة/ نهى هى محل اتفاقنا جميعا

    منى كمان فيها ميزة جامدة جدا، انها مابتتنفزش على الضيف مهما كان عنيف او رغاى، يعنى مثلا فى حلقة امبارح استضافت (منى نوال حلمى) اللى فضلت تتكلم وتقاطع.. تقاطع الضيوف وتقاطع منى، بشكل مستفز، لدرجة انها نرفزتنى جدا

    ReplyDelete
  13. I agree that both of them deserve all the respect
    they both can give the best examples for women

    ReplyDelete
  14. معلش بقي يا زيزي .. العاشرة مساءا ممكن يكون احسن برنامج ف القنوات المفتوحه "الغير مشفره" علي الدش و لكن .. لو حد بيتفرج علي برنامج القاهرة اليوم علي قناة اليوم ضمن باقة الاوبت هيعرف كويس ان مني الشاذلي و برنامج العاشرة مساءا و غيرهم زي البيت بيتك مثلا ما هم الا انبثاق متواضع منه .. القاهره اليوم برنامج بقاله 7 سنوات و فعلا هو نبض الحدث و صانع للحدث .. و لم يكن و لن يكن هناك أعلامي بجرأة "عمرو أديب" و حنكته المهنيه .. لو حد اتفرج علي عمرو و هو بيعصر السفير الامريكي و الراجل شبه بيستغيث و بيقول انا مش بوش .. انا مجرد سفير .. انا مش سفير اسرائيل .. اسألوا سفير اسرائيل .. كنتوا الهبتوا كفيكم تصفيق ..

    ملحوظه مهمه .. أنا كنت بحب مني الشاذلي لما كانت ف الايه ار تي .. كانت بتقدم برنامج "لا تذهب هذا المساء" علي قناة الافلام .. كانت سُكر جدا و كانت بتشارك ف برنامج اسمه "مذيعين ف اجازه" و كنت بحبها قوي .. يمكن علشان اتحولت من برامج خفيفه لبرامج جديه حسيت انها بتلعب دور أوسع منها .. و يمكن علشان شُفت عمرو أديب ف الاول ما بقتش احس بأي مقدم "Talk Show" اخر .. الله اعلم ..

    اضم صوتي لصوتك يا جزرتي ف ان تحول الحوار من نهي الزيني لمني الشاذلي لان د/ نهي ما يختلفش عليها اتنين ف موقفها المشرف .. و ربنا يحميها و يجازيها خير ..

    تحياتي للجميع ..

    ReplyDelete
  15. مساء الخير يا جماعة
    انا يمكن واحد من الناس عايش على السمع .... وبس يعني ما عنديش تلفزيون ولا راديوا ولا الكلام اللي انتوا بتكلموا فيه .... بس ما ظنش ان المذيع لما يقف في صف فكرة هو حببها وينتقد فكرة هو مش حببها يبقى وحش ده انسان وليه تفكيرة واي انسان منا لو كان عنده منبر يكلم منه ها يقول اللي نفسة فيه وحا يحاول يعزز رأية
    اما عن العاشرة مساءا وان كنت لا استمع له الا اني اتا بع اخبارة واسمع انه برنامج قوي اعاد الحياه الى قنوات دريم التي عفا عليها الدهر واكل وشرب وغسل ادية ونشفها.....
    وفي النهاية احب ادعي على ثنوية عامة اللي قطعت هني التلفزيون والدش والفديو ....وادعي لخويا اللي فيها

    ReplyDelete
  16. me2
    welcome to B-M (bentmasreya ya3ny :) )
    يا اهلا وسهلا

    رومانتيك روز
    طب والله انا بحبها من قبل العاشرة مساءا، بحبها من ايام لا أرى لا أسمع لا أتكلم، وبعدين يا كوكى انا بحب منى.. بصرف النظر عن المقارنة بأى حد تانى

    ميليجى
    يااااه، انا فضلت اقرا التعليق عشان اعرف ليه عايش ع السمع.. اتارى اللى تتشك فى قلبها عندكو، ربنا معاكو ومع اخوك

    ReplyDelete
  17. ماشي يا ست زيزي .. بتحبي مني الشاذلي عليا و مش مكسوفه تقوليها كمان !! ربنا يهني سعيد بسعيده يا ستي ..
    :(

    ReplyDelete
  18. بصى يا بنت مصريه
    مش عارف بس بعيد عن الموضوع شكلى دمى تقيل او بستظرف اقصد يعنى انا حاسس ان انتو حاسين كده عموما لو انا كده فعلا قولى

    بالنسبه لمسألة انها ماتنفعش قاضيه لانها شويه بتتعامل بتعاطف مش بعقلها إنما مش دينيا نهائى
    طبعا لو القاضى لازم يكون عقلانى جدا دا رأي مبدئى يعنى اساسا ماكونتش رأى نهائى بالنسبه للحكايه دى

    ReplyDelete
  19. تولي المرأة القضاء دالة في نجاحها أكثر في مهنة المحاماة .. هذا رأيي .. وكلما زاد عدد المحاميات الناجحات بعيداً عن نهاد أبو القمصان ومنى ذو الفقار وغيرهن من بتوع المجلس .. كلما رفع من أسهم المرأة المصرية على سلم القضاء وثبت أقدامها وجعل دخولها منصة القضاء مسألة وقت وليس امتيازاً يمنح من القيادة السياسية..

    أما عن تحول الموضوع لمنى الشاذلي فذلك لاعتبارنا جميعاً - أعني من ناقشوا هذا الموضوع هنا وكثير من الناس - ما قالته المستشارة نهى الزيني مسلم به ، وهي شخصية شجاعة ومحترمة بكل المقاييس ، لكننا في الأخير نتحدث عن حوار تليفزيوني ، ليس من بطولة الضيف بل يشاركه فيه مقدم البرنامج بطريقة إدارته له وبأسئلته التي قد تكون موفقة في صنع نقاش حقيقي ، أو العكس ..

    ReplyDelete
  20. ماذا أقول؟؟؟؟
    مصرية حتى النخاع.
    اسمحي لي أن أهديكِ هذه الأغنية

    باعشق كل ما فيـــــــــــــكِ

    أنا باعشق سمار الأرض
    وباعشق حتى شوك الورد
    وباعشق.....كل مافيكِ
    لوابعد....قلبي يناجيكِ
    بأجمل معنى في كلامي
    وباحلم.....لو ألاقيكِ
    قُصادي
    أسمع صوت سواقيكِ
    عشقتك
    عشقت حكاويكِ
    حكاية...وحكاية...وحكاية
    لو أقدر أغني غناويكِ
    لاسمَّع...حتى طوب الأرض
    واسمعهم...
    يقولولي:
    تعيشي يا مصر
    ساعتها...لا الغربة تجرحني
    ولا غيرك يفرحني
    مهو انتِ حبيبتي يا بهية
    بازفِّك
    والطرب فيَّ
    مأصَّل....زي أجدادي
    هييجي من بعدي أولادي
    يدوقوا سلسبيل نيلك
    يغنوا:
    تعيشي يا بلادي
    ونعشق كل ما فيكِ
    في 29/8/2003 المنصورةـ مصر

    ReplyDelete
  21. رومانتيك روز
    لا ياكوكى ازاى تقولى كده.. انتى الحب الأول والأخير وانتى عارفة :) ربنا يهنينى بيكى :))

    محمد طاهر
    بالنسبة للتعامل مع الاشياء بشكل عاطفى.. اعتقد انها فكرة مردود عليها
    اولا: احنا دايما بنقول ان تطبيق روح القانون هى اداة القاضى الذكى والرحيم.. والرحمة من صفات المرأة -اكيد بتوافقونى فيها دى- يعنى روح القانون اقرب للمرأة كمان
    ثانيا: تفتكر لما المرأة توصل لمنصب قضاء.. مش هتكون اخدت خبرة جادة وواسعة من خلال شغلها وعملها كوكيل نيابة مثلا.. والحاجات دى بتطحن
    ثالثا: فى حاجة اسمها مستشارين.. يعنى الحكاية مش استئثار بحكم
    رابعا: التجربة خير برهان.. ليه مانجربش؟

    قلم جاف
    اوافقك

    مأمون
    اهلا بيك
    بس انت ماحددتش مين بالظبط اللى بتهديها الاغنية.. مين المصرية حتى النخاع.. منى الشاذلى وللا نهى الزينى.. انا بيتهيئلى الاتنين :)

    ReplyDelete
  22. الاخت بنت مصرية
    انا حقيقى احترم هذة الشخصية واكن لها كل حب وكل تقدير فى اول امرأة مصرية تقول لا للتزوير والمزورين..واعتقد ان شعبنا المصرى الاصيل سوف يكتب اسم نهى الزينى بكلمات من نور فى تستحق ذلك رغم كل المعاناة التى تسببت بسبب ذلك الا انها ابت الا ان تقول كلمة حق عند سلطان جائر فتحيتى اقدمها لهذة الفاضلة ولينصرن الله من ينصره

    ReplyDelete