5/25/2006

طفى النور يا بهية وصلى ع النبى



طفى النور يا بهية.. دعوة نطفى النور بكرة الخميس الساعة تسعة مساءا لحد عشرة مساءا تضامنا مع القضاة
اممممم، هى فكرة
فكرة حلوة
ومهمة
طفى النور يا بهية.. كل العسكر حرمية
بسسسس.. عشان اطفى النور، لازم اهلى يقتنعوا بالفكرة.. صعبة دى، والا هترسى على نور حجرتى بس
انا هقولهم.. ربنا يجعل كلامى خفيف، مستعدة اتحمل تريقة، او تطنيش، او مناقشة طويلة.. اه ه ه ه.. طويلة

هقول كمان لاصحابى.. كلهم.. مرسوم قصاد عينى دلوقتى ابتسامتهم العريضة: زيزى اوفرت... لأ الابتسامة عريضة اوى :( ه
اخر حاجة رشا صحبتى تفاعلت معايا فيها.. لما قلت لها ان فى مقاطعة للشركة المصرية للاتصالات .. يعنى كانت فكرة تبدو انها مؤثرة، مش هتكلم فى التليفون يعنى مش هغرم تمن مكالمة هتاخدها الشركة من عنيا ومن عين غيرى.. مع زيادة عدد المقاطعين.. الشركة يمكن تتلسع وتحس بالخطر

طيب لو طفينا النور يا بهية... تفتكرى الحكومة هتحس؟.. مش هتقول عملتوا خير، وفرتوا كهربا؟

تعرفى يا بهية، حتى لو قالت، حتى لو اهلى تريقونى، حتى لو اصحابى رسموا ابتسامة عريضة.. هطفى النور معاكى يا بهية.. عشان غيرى يحس بيكى.. لو الحكومة ماحستش -ودا طبيعى لأن معندهاش دم- فالناس ممكن تحس.. الناس لسه بتحس..اقل حاجة لما اقول لاصحابى ع الفكرة.. هيسألوا عن السبب.. هحكيلهم عن القضاة.. وكده يعنى، اضعف الإيمان... هطفى النور معاكى يا بهية

9 comments:

  1. ايه ده هيا الدنيا ضلمت كده ليه؟
    أكيد فيه حاجه
    بس ...بس ...بس الدنسا مضلمه بقالها كتير مش عارف يوم و اللا يومين
    سنه أو سنتين
    مش عارف أد ايه
    بيقولوا ان مصر ماعدش فيها كهربا
    يعنى مافيش نور
    حتى الشمس بقت مطفيه

    ReplyDelete
  2. رجاء حار .. زيزي اعدلي العلم الحبيب .. لو الحكومه زفت و النظام طين العلم ده رمز مصر .. زيه زي النشيد الوطني .. مش هنعمل زي اليسا ف اعلان بيبسي و بدال ما نغني النشيد القومي نغني نشيد بيبسي .. الثوابت لآ .. اتمني تكون غلطه لان عنيا رغرغت اول ما فتحت و لقيت العلم مقلوب .. انا حتي لما قريت البوست مالقيتش علاقه .. ما تقلبيش العلم لان مش الصح اننا نقلب الصح .. الاصول نعدل المايل و لو كل شئ بقي مايل و مقدرناش نعدله فالعلم لازم يفضل معدول برضه حتي لو حكمت اننا نمشي علي دماغنا و نتقلبله احنا ..

    انتي عارفه اني غرقانه ف الامتحانات و محتاجه النور .. بس و غلاوتك هطفي النور من 9 ل 10 ان شاء الله بس رنيلي يا زيزي الساعه 9 علشان اخد بالي ان الساعه 9 جت ..

    عندي سؤال .. هو الغرض الظلام فقط ولا قطع العلاقه بكل ما يمت للكهرباء بصله (التليفزيون - الكمبيوتر - شاحن الموبايل .....) ؟؟

    دعواتك ..

    ReplyDelete
  3. اسلام يوسف

    هى مصر فيها نور.. هيفضل فيها نور.. بس النور مستخبى اليومين دول


    رومانتيك روز
    الله عليكى يا كوكى
    معلش يا حبيبى ان اتسببت فى عنيكى اترغرغت
    وانا كمان بحطه مقلوب قلبى كان بيوجعنى، بيوجعنى فعلا مش مجرد كلام

    بس يا كوكى هى دى الفكرة اللى خلتنى اقرر اتجاوب مع دعوة وضع العلم مقلوب.. اننا لما نشوفه مقلوب.. قولبنا هتوجعنا
    هنفتكر مصر اللى وضعها مقلوب
    ومن كتر ما حالها مقلوب مابقتش قلوبنا تحس بيها

    العلم مش ثوابت.. العلم رمز لحالنا، ازاى العلم يبقى عدل ومصر مش بخير؟

    زى ما نقدر نمشى على دماغنا ونتعدل للعلم
    لازم نمشى على دماغنا ونتعدل لمصر :))

    معلش يا امل اذا كنتى كل مرة هتتألمى لما تشوفيه مقلوب، والله وا انا كمان
    بس عزائى ان ده بيصدم اللى بيدخل المدونة وبيخليه يفكر

    صباح الخير على عيونك يا احلى مصرية واحلى صديقة

    ReplyDelete
  4. صديقي حائر في دنيا الله كان اعترض على دعوة مشابهة طرحها موقع عشرينات.. وأنا بصراحة بأضم صوتي لصوته..

    بأفكارنا حنضلمها عليهم .. وبنقدنا الحقيقي اللي بيخربشهم وبيعورهم.. تطفية النور حتخلي كاتوبجي من دول يتريق علينا.. توليعه ع الآخر وتعلية الفولت حيضحك كل مصر عليهم..

    ReplyDelete
  5. العزيزة بنت مصرية : إحنا عايزين نطفى النور علشان بهية هى اللى تقيده و تكشف العسكر الحرامية ، عارفة لما النور يطفى إذا نجحت الحملة دى فى يوم من الأيام النظام مش هيحس بس ،ده هيموت فى جلده و فى الأغلب هياخدوا أول طيارة و يسيبوا مصر لأن ساعتها مصدر الخوف هيبقى سبعين مليون صحيح ساكتين و صابرين لكن لو إتحركوا هيبقوا طوفان ماحدش هيقدر يقف قصاده
    بخصوص العلم المقلوب أظن من المفيد إنك تكتبى معناه علشان الناس متديش المسألة معانى بعيدة عن المقصود ..تحياتى

    ReplyDelete
  6. انا طفيت النور ومش مهم يحسوا ولا ما يحسوش مهم مش بيحسوا من زمان بس هو تسجيل موقف مش اكتر وحزن على اللى حصل يوم الاستفتاء المنيل0

    وعايزين حته فوتو شوب لمبارك راكب حمار بالشقلوب
    احسن من العلم

    ReplyDelete
  7. والله يا قلم جاف ومحسن

    انا تضامنت مع الفكرة لأسبابى اللى انا مقتنعة بيها، انها وسيلة اعلامية خصوصا ان فى تعتيم على كل حاجة

    بالنسبة لى هى مش فكرة رومانسية او تسجيل موقف او قلة حيلة

    هى زى ما شرحت بالظبط
    اقل حاجة لما اقول لاصحابى ع الفكرة.. هيسألوا عن السبب.. هحكيلهم عن القضاة

    واحد من مصر، بيشرح نقطة تانية فى الفكرة، على اعتبار ان السبعين مليون هيتجاوبوا.. يا ريت. .بس اساسا كام فى المية من السبعين مليون يعرفوا؟ اعتقد ان دور مهم جدا هو التعريف بالقضايا

    ReplyDelete
  8. انا عدلت العلم
    لانى اقتنعت بكلام زانجولا فى تعليقه هنا

    ReplyDelete
  9. مش العلم فى التدوينة دى كان مقلوب ... حصله ايه ؟

    ReplyDelete