5/26/2006

عن الوثائقى وبابا وماما

وثائقى الجزيرة عن التدوين كان تحفة.. هايل.. وجميل

مش هشرح طبعا اتكلموا عن ايه بالتفصيل، اكيد كلنا كنا بنتفرج على الحلقة، تصوروا ان بابا وماما اتفرجوا معايا على الحلقة

لا دى بجد اللى خطوة هايلة.. انا لما قلت لهم فى وقت سابق عن الحلقة ، اهتموا وقالولى ماشى هنتفرج، بس ماحسيتش انه كان اهتمام حقيقى، وخصوصا ان احساسهم بالتدوين سلبى، سلبى بمعنى ان فى الاول انا بلعب ع النت -الموضوع مش مهم- ودلوقتى سلبى بردو من ناحية انهم عايزنى افضل بعيدة عن الاحداث.. واياااكى تكتبى حاجة توديكى فى داهية

طبعا وهما بيتفرجوا معايا ابتدوا ياخدوا بالهم ان الموضوع جامد شوية.. مظاهرات.. واراء سياسة.. وتصوير وضرب وسحل.. ووائل عباس.. كل ما ييجى يتكلم.. "بسسسسس اسمعوا وائل عباس".. او مثلا.. اهو مالك اهو.. هو ده اللى قلتلكوا اعتقلوه.. او علاء.. اهو .. علاء ده لسه ماخرجش، ودى منال مراته.. ودا محمد الشرقاوى.. طلعوه ورجعوا تانى النهاردة واخدوه

مش عارفة اوصف احساسى بمشاعرهم.. هما مبسوطين ان فى شباب كده.. ومع ذلك عايزينى افضل بعيدة بردو.. "زيزي انتى لأ".. "زيزي مين، هو انا اطول اعمل حاجة زيهم.. هو حظى كده.. لو كنت عايشة فى مصر.. ولو كنت بشتغل فى مصر زى الاول".. طول الحلقة على كده.. بس الحاجة الوحيدة اللى اعتبرها مكسب النهاردة، انى قربت جدا احصل على موافقتهم بحضور الحفلة.. بناءا على تأكيداتى انها والله حفلة غنا مش مظاهرات وبهدلة، "حتى شوفوا هما بيغنوا فى الوقفات بتاعتهم.. مش بيعلموا حاجة".. خلال يومين ان شاء الله هكون اقنعتهم.. ادعولى
-----------------------------------------------
المفاجأة بأه.. قبل ما اكتب التدوينة دى، كنت فى مجمع منال وعلاء ولقيت مالك نزل اول تدوينة له بعد فك سراحه.. صباح حر على عيون كل المعتقلين


17 comments:

  1. يا خسارة مشفتش الحلقة دي..
    :(
    ياريت يكون حد سجلها، ونحمل أجزاء منها حتى.

    ReplyDelete
  2. و مدونة بنت بصرية برضوا كانت منورة الحلقة .. لانها ببساطة أفكار بنت مصرية و براء كان زى العسل و خصوصا و هوه فى الجامع و مالكوم كان واضح جدا ... المهم انا اتفرجت على الحلقة مع ماما و ماما للعلم امينه لجنة فى الحزب الوطنى و سبحان الله اتفاجئت باللى شايفاه و لما دموعى نزلت لما شوفت مالك و صعب عليا قوى انه فى الحبس و الحلقة فيها كلامه المتسجل من فترة بتقولى انت بتعيط ليه بقولها لا ابدا اصل البطل دة محبوس ابتدت تحس فعلا ان فى مأساه انا بقة التغيير عندى فى البيت شاكله قادم قادم و البوجلرز اقتحموا بيتنا امبارح

    ReplyDelete
  3. لا بجد يا عبده باشا فاتك كام يوم حلوين من عمرك :)


    مستر جيمى هود
    التغيير قادم قادم لا محالة
    :)

    بس على فكرة انت تقصد واحدة مصرية
    اصل فى اتنين، لا فى تلاتة دلوقتى
    واحدة مصرية
    وبت مصرية
    وانا = بنت مصرية

    اللى انت شفتها بأه كانت شاهيناز عبدالسلام = واحدة مصرية

    ReplyDelete
  4. نفس الاحساس بالظبط ونفس التعليقات
    انا من اول اليوم وانا قاعد احكي لأمي واخواتي عن الحلقة وهم منفضين
    ودايما بسمع نفس الكلمة منهم "انت قاعد ع النت تضيع وقت"
    اخواتي امبارح لما شافوا الحلقة معاية وشافوني متحمس وكل ما يطلع حد على الشاشة اقولهم ده مالك صاحبي وده عمرو عزت اللي قعدت معاه هو مالك في قهوة في وسط البلد يوم ما رجعت البيت متأخر وزعقتوا معايا
    وده وائل اللي وريتكم الصور على الموقع بتاعه.
    وكان في لقطة لما كانوا جايبين اعتصام التحرير واحنا بنغني وفجأة لقيت اخوية الصغير بيقولي "ايه ده انت اهوووو" كنت واقف جنب مالك وهو بيغني
    بجد كان احساس جميل جدا لما تلاقي ان اللي بنعمله ده له فايدة وانه مش لعب عيال زي ما بيتهمونا.
    ورغم اني لسة جديد في عالم التدوين بس حسيت اني لازم اشد حيلي واشارك اكتر، لدرجة ان امي قالت لي هشتري لك كاميرا ديجيتال عشان تشارك أكتر وتصور زيهم، بعد ما كانت بتقول ان ده لعب عيال، بجد انا فرحت جدا لما شوفت الحلقة وفرحت اكتر لما لقيت ان لها تأثير على أهالينا اللي دايما حاسين ان كل حاجة بنعملها بعيد عن المذاكرة تبقى تضيع وقت وضد مستقبلنا.

    ReplyDelete
  5. اعتقد يا زيزي هو يقصد ان مدونتك هي اللي نورت الحلقة مش انت
    اصل مدونتك ظهرت
    :))

    واحدة مصرية بقى انا ماشفتهاش, هي ظهرت امتى؟؟؟

    ReplyDelete
  6. الحلقه كامن فعلا تحفه وبجد وضحت حاجات كتيره كانت محدش يعرفها من اهلينا علي الاقل ان النت مش كله لعب وتنطيت

    بس بجد وانا بتفرج قلبي وجعني وانا شايفه مالك وعلاء وشرقاوي وانا عارفه انهممحبوسين
    كنت ساعتها عرفت ان شرقاوي رجعو قبضو عليه بس مكنتش لسه عرفت بالتعذيب والبهدله الجديده

    بس بجد دي خطوه حلوه قوي قوي للمدونين

    ملحوظه صغيره انا شفت البرنامج من الاول للاخر ومشفتش مدونه بنت مصر لكن اللي ظهرت فعلا دي شهيناز مدونه واحده مصريه دي المدونه الوحيده اللي ظهرت من مدونات البنات

    ReplyDelete
  7. الحلقة فعلا كانت هايلة إنما للأسف ماما و بابا مسافرين
    أجمل حاجة لما واحد من المحللين اعترف إن المشكلة طلعت مش في الشباب إنما في إدراكنا لأنهم كانوا فاكري كانوا فاكرين إننا منفضين لكل حاجة

    المهم أيوب بيقول إنها هاتتعاد يوم الجمعة الساعة تمانية و يوم السبت الساعة واحدة الظهر

    ReplyDelete
  8. وخصوصا ان احساسهم بالتدوين سلبى، سلبى بمعنى ان فى الاول انا بلعب ع النت -الموضوع مش مهم- ودلوقتى سلبى بردو من ناحية انهم عايزنى افضل بعيدة عن الاحداث.. واياااكى تكتبى حاجة توديكى فى داهية
    zezey kol ele 7awalena w el kobaar 7'sosan
    mn gwahom motafat7een"3nde"
    bs 3la ra2 7ad a3rafo
    yeshofo wlad el nas el tanya kda
    laken wladhom la2
    kolo 7'ayef
    bs bgad ana kaman kont mabsota
    w 7asa bfa7'r
    feh amal feh amal
    w yareet ykon lena door
    kfaya t3mel 7aga mo2men w mktane3 beha
    7ata law kanet sar7'et e7tgag

    ReplyDelete
  9. محمد محرز

    دا معناه اننا نوعا ما كسبنا ناس جداد فى صفنا.. مجرد حلقة فى التلفزيون.. ممكن تغير وجهات نظر كتيرة.. لناس كتيرة.. مبروك عليك الكاميرا الديجيتال :)

    -------------
    بلو روز

    تفتكرى :)) هى فعلا ظهرت حتة صغنتوتة اوى قد كده ههههههههه

    واحدة مصرية ظهرت بعد وائل لما ظهر فى الاول.. وصورت والخلفية كانت بحر اسكندرية الجميييييييييل

    --------------
    شيماء
    خطوة حلوة وقوية جدا.. كمان سبقتها خطوة السى ان ان لما جابت عن اعتقال علاء

    -------------

    ارابيسك
    انا هنزل بوست بمواعيد الاعادة دى، عشان اللى مالحقش يشوفها يشوف

    -------------

    دنانير
    اهلا ،نورتى مدونتى :)
    انا كمان متحمسة جدا وعايزة اعمل حاجة، وكويس ان الحلقة دى جت فى وقتها

    ReplyDelete
  10. اجمد حاجة فى الفيلم كانت الموسيقى
    انا حسيت انى عايز اعمل اى حاجة مجنونة
    تانى حاجة انى عرفت الشخصيات الحقيقة للمدونين وده ادانى احساس انهم مش شخصيات كارتونية بتكتب باسامى مستعارة وخلاص
    تالت حاجة انها زى ما التعليقات بتقول انها "عرت" الاهالى امام انفسهم
    وده فى حد ذاته انجاز عظيم جدا جدا جدا بس برضه لسه عندهم استعداد يغيروا افكارهم عن الانترنت عشان "الكلام الجاد والسياسة" بس انما اى نوع تانى من الكلام ماظنش
    وده عيب الفيلم الوحيد ان هو ركز على المدونات السياسية فقط رغم التنوع النسبى لمواضيع المدونات

    ReplyDelete
  11. مشاكس
    اعتقد ان الوثائقى كان واضح فى انه بيتكلم عن المدونين كصوت معارضة جديد وليش برنامج تعريف بالتدوين وماهيته واشكاله

    هما كانوا صرحاء ومحددين جدا.. العنوان بيظهر ان الجانب السياسى من التدوين هو اللى هيسلطوا عليه الضوء,, ودا اللى حصل

    ReplyDelete
  12. ايوة انا كنت باتكلم على المدونة انها ظهرت اما عن رياح التغيير على رائيك هيه جايه جايه

    :d :d

    ReplyDelete
  13. وائل عباس هينزله

    ReplyDelete
  14. عزيزتى
    خوف الآباء على الابناء شيئ طبيعى ولن تحسى بذلك الا عندما يكون لديك ابناء...ارهاب السلطة هو الذى يؤدى الى هذا الخوف..تتصورى عمر الكلام دة ماكان موجود فى مصر اقصد الخوف اتذكر اننا كنا نخرج فى مظاهرات ضد عبد الناصر سنة68 وكنا نهتف ضد انور السادات واتذكر منها
    انور انور ياسادات اين قانون الحريات وكان السادات ايامها رئيس مجلس الشعب وكانت اهالينا تعلم اننا سوف نخرج فى المظاهرات ولكن هذا الحجم من الخوف لم يكن يتملك اهالينا ..اما فى عهد هذا المبارك والذى يتم فيه السحل فقد فاق ذلك كل تصور وان غدا لناظره قريب

    ReplyDelete
  15. الظلم وكم من مات ظلما او مدافعا عن المظلومين ناجي العلي "حنظله"مات غدرا وسلاحه في الدفاع عن الظلم هو الكاريكاتير مات اطلق شاب مجهول النار على ناجي العلي في لندن بتاريخ 22 يوليو عام 1987 فاصابه تحت عينه اليمنى ، ومكث في غيبوبة حتى وفاته في 29 اغسطس 1987، ودفن في لندن. ولم تعرف الجهة التي كانت وراء الاغتيال على وجه القطع.

    دفن الشهيد ناجي العلي في مقبرة بروك وود الإسلامية في لندن وقبره يحمل الرقم 230190 وقبره هو القبر الوحيد الذي لا يحمل شاهدا ولكن يرتفع فوقه العلم الفلسطيني

    ReplyDelete
  16. بصراحه الأسم عجبنى الى هو غنى يابهيه
    وقررت اعمل مدونه واسميها الأسم ده
    وانتى ليكى فضل كبير فى ده
    الحمد لله
    ghanyyabahia.blogspot.com

    ReplyDelete