غنى يا بهية.. انطباعاتى وحواديتى

حبيت اتكلم دلوقتى واقول عن الحفلة، بكرة هدعم التدوينة بلينكات، سورى.. التدوينة طويلة

:ايفوريا بهية

عندما يسجل مؤشر حالتك النفسية خطا راقصا بين نقط الإحباط والحماس واليأس واللهفة والحزن والفرح والقلق والسعادة.. إذا انا اتحدث عن معوقات ومسببات الإيفوريا التى وصلنا إليها ليلة ما غنت بهية وغنينا معها

سأحكى إذا عن انطباعى الشخصى لليلة الحفل، والأيام التى سبقت ذلك، وكواليس لا تسجل بكاميرا او تكتب فى ريبورتاج صحفى او تظهر على شاشة تلفزيون

لما قلنا يا حفلة... لم يكن يتوقع الكثيرون أنها ستنجح كل هذا النجاح، ولم يتوقع الكثيرون أن يتفاعل الناس معنا.. وأن تنتشر الدعوة كل هذا الانتشار.. وأن نحقق بالضبط ما أردنا من وراء الحفل

غنت بهية، وقبلها وجعت قلبنا.. الوقت ضيق، وحددنا الموعد ونشرناه.. ولم نكن اتفقنا بعد مع اى فرقة غنائية إلا مع عمر صاحب بلوج تجربة.. حتى عمر اختفى بعد ذلك وظهر يوم الحفلة. لم نجهز الملف الإعلامى الذى سيطبع على سى ديهات.. لم نطبع حتى الدعوات الشخصية لأسماء كبيرة فى عالم الصحافة، كل ما تم وقت اعلان الموعد، كان الاتفاق مع محمد عبدالقدوس على ان يستقبل مسرح نقابة الصحفيين الحفلة، وذلك بعدما رفضت ساقية الصاوى لأنها لا تتفق مع أفراد


تم توزيع المهام.. وكل محتاس فى مهمته فقط بسبب الوقت، كان على يحيى العبء الأكبر، ولكن مع اقتراب الموعد تمت كثير من الأشياء، ماعجزنا عن فعله فقط كان طباعة الدعوات الشخصية لكبار الشخصيات الاعلامية، اكتفينا بإرسال دعوات خاصة من خلال الإيميلات، ورسائل الموبايل، والمكالمات الهاتفية.. وعلى قد لحافنا. لا أستطيع أن أشعر بمدى الضغط الذى واجهه يحيى وأيوب وسيزر وشيماء وارابيسك، فأنا فى بيتى بنفذ مهامى كلها من خلال الجهاز بتاعى،

الليلة السابقة للحفل، نمت وكل ما كان ببالى هو ترقبى وقلقى وسعادتى، ونهضت من نومى بنفس الحالة من الترقب والقلق والسعادة، لم أنتبه إلى السيناريو الطبيعى لأى حدث مهم، وهو ظهور ما يزيد من حدة الأحداث، ويسبب لى اكتئاب وسدة نفس، كل هذا قبل الخروج من بيتى فى طريقى إلى الحفل

ما حدث هو أنى كالعادة عندما أصحو من نومى اجرى افتح الجهاز واشوف الميل والمدونة، ساق لى القدر من أحدثه شات ليخبرنى بأن هناك من المدونين من يرفضون الحفل، ويناهضونه، ويشككون فى النوايا.. تا تا تا تا

طب مين؟ طب طلعوا امتى؟ طب ليه دلوقتى؟ كل دا ومخى ابتدى يلف ويدور وكان قد وصل الاحباط وكسرة النفس إلى القمة

أتارى فى مسرحيات وأفلام من نوعية "مالقوش فى الورد عيب.. قالوله يا احمر الخدين"، المشكلة انى صدقت للحظة ان فعلا احمرار الخدين عيب فى الورد.. سذاجة بعيد عنك

ونزلت مصر، وقابلت دعاء العدل لنذهب إلى الحفل سويا..بالمناسبة فى يوم الحفل أيضا كان نفس يوم نزول أول عدد للدستور يحمل بين صفحاته كاريكتير لدعاء.. مبروك يا دودو. ذهبنا سويا للحفل بعد ما تأخرنا فى مشوار كان خاص بدعاء، وحكيت لها طبعا سبب ما تراه من تجهم على وجهى.. ما هو انا الحاجات الجوانية بتطبع على وشى وممكن على تصرفاتى وكلامى كمان

:حبكة دارمية.. بعقدة وفيونكاية

جاءت الثامنة.. موعد الحفل، وعدد من يجلسون فى المسرح بسيط جدا، يا نهار ابيض.. واعصابى تنفلت بزيادة، بى الكثير، والآن تكتمل العقدة .. فين الناس يا يحيى، فين الناس يا مريم.. لكن علمت أن الناس طبيعى تيجى متأخرة عن المعاد، على تمانية ونص يكونوا وصلوا..

الكلام اللى اتقال وحطاه فى قلبى وساكتة.. والناس اللى مش موجوده لسه.. والأمل اللى مزروع رغم كل ده جوايا.. كركبة

لا أعلم كيف مرت النصف ساعة، كل ما استطيع ان ارى نفسى فيه بحلول الثامنة والنصف.. كل البنات المشتركات فى تنظيم الحفل وكمان دعاء، نمسك بورقتى التعريف بالحفل ونوزعها على المتوافدين عبر باب النقابة.. كنا نتسابق، ونتلاحق.. وفوجئنا الناس جوه المسرح... الحفلة ابتدت.. ووثائقى المدونين خطف عيون الحضور.. وألهبت كفوفهم تصفيقا وتفاعلا مع ما تم عرضه.. حتى وصلت ذروة التصفيق والسخونة المحيطة بالجميع لحظة ان انتهى الوثائقى بنزول صور علاء ومالك وشرقاوى كمعتقلين.. هنا أدركت ان الحفل يصعد بسرعة التفاعل الوجدانى لفكرتنا الغير تقليدية نحو النجاح.. وكلمة فى ودانكو.... الساااااااااااااااااااااااااااااااحق

كمنظمين بالطبع لم نهنأ كثيرا بمتابعة فعاليات الحفل على المسرح، فالكواليس مليئة بالمحررين من الصحف ووكالات الانباء والفضائيات

:وغنت بهية تحت الجميزة.. صبحت الحالة ضى

ما شاهدته من الحفل كان جزء لفرقة "حالة" وهى اسم على مسمى.. قدمت عرض كستور ببيجاماتهم الكستور.. متنا على اديهم من الضحك، وختموا على موتنا الضاحك بدموع تسربت من أغنيتهم الأخيرة لمصر

استمعت أيضا لفرقة الجميزة، وبينما استمع إليها وبجوارى دعاء وصباح، نظرت فى الساعة فكانت قد تعدت التاسعة والنصف، لازم أمشى.. اقترحت على دعاء ان اتصل بأسرتى وأعرض عليهم أن أبيت تلك الليلة عند دعاء.. ترددت، ثم وافقت، أجرب هخسر ايه.. ردت على ماما، ولم يكن أبى بالبيت، اتفقت معها ان تخبر أبى واذا وافق، تدينى رنة، واذا لم يوافق تكلمنى.. وجلست أنتظر.. ربما عشرة دقائق مرت، رقص موبايلى على نغمته التانجو، ودعاء وصباح وأنا نترقب.. أشعر كأن النغمة طويلة.. لكنها لم تكن كذلك ، كانت رنة واحدة.. هى تلك التى تعنى الموافقة.. يا حلولى يا حلولى.. هقعد لآخر الحفلة يا حلولى

فرقة ضى.. لسه هشوفها لما يجينى فيديو الحفلة.. طبعا زى ما قلت كنا فى الكواليس اغلب الوقت، بس وصلنى انهم كانوا روعة وخصوصا لما غنوا للعادلى

كنا قبل اسبوع، فى مأزق نريد تدبير حفلة مدتها ساعتين.. لكن حفلتنا استمرت أربعة ساعات.. اختفى يحيى ولم اشاهده يرحل معنا.. رحل قبلنا، مختبئا من مجهود كبير، وضغوط من كل الجهات لم ترحم مجهوده كمن قام على أحسن وجه بدور ام العروسة بالضبط كما وصفه وائل عباس

لكنها كانت اجمل عروسة.. حفلة معارضة بنهكة مصرية، اتمت لنا ما أردنا.. أكدت تضامننا مع المعتقلين.. جمعت تبرعات لهم.. نشرت فكرة التدوين.. كانت ضمن محاولات الكشف المضاد للتعتيم الاعلامى عن قضية المعتقلين.. ولسه كمان الايام الجاية سيظهر تأثير الحفل، من خلال الصحف التى ستروى ما حدث والتقارير الاخبارية لاهم البرامج.. على شاشات التلفزيون،

بهية غنت.. وغنينا معاها بعلو صوتنا.. اتارى الغنا لسه بيسيب فى الحلق طعم المرار الى بتدوقه مصر.. اتارى الغنا مش بس غنا المساطيل ع الفضائيات


: لحظات.. كانت من حلاوتها

كل مرة الجمهور كان بيصفق بحماس

لما سمعت صوت غادى سامحونى.. عظمة على عظمة يا بنت، وكمان البنوتة اللى كانت معاكو.. اسمها ايه يا غادة؟ هى صوتها اصيل اوى

لما قابلت.. وبعد طول انتظار.. وعلى حين غرة.. دعاء كروان التدوين.. ديدي انتى كملتى فرحتى بالليلة

لما قلت لوائل عباس ايه رأيك فى الحفلة باه.. وابدى اعجابه بيها وسعادته لنجاحها.. وفى مناقشة جمعتنى بيه انا ومالك.. جت سيرة ان المدونين ماهماش حزب عشان تنزل الحفلة بإسم المدونين المصرين، وقلت احنا مجموعة من المدونين عملنا حفلة، وفى اخرها كل واحد هيروح على بيته، لا احنا قلنا جمعية المدونين المصريين ولا قلنا حزب المدونين المصرين

لما قابلت واحدة مصرية، المثال الجميل للصحفية النشيطة الجادة

لما شيماء قالت لى ، الناس عايزة السي.ديهات زى ما تكون لحمة.. انا استغربت بصراحة الناس عرفت منين موضوع السى ديهات.. فين وفين لما فى اخر الحفلة عينى جت على ورقة التعريف بالحفلة وفيها ذكر للقرص المدمج حوالى اربع خمس مرات.. ذاكرتى اكلتها البارومة

لما مريم شرحت لى الفيلم اللى ما شفتوش، فاكرينه.. الفيلم بتاع الورد الاحمر الخدين

ولما كنت انا ومريم واقفين بنتفرج على كستور فى حالة توحد تام مع ما يغنونه، وضحك للأرض مع ما يغنونه بردو

لما ناولت د.ليلى سويف ورقة التعريف بالحفل.. حضور دكتور ليلى ودكتور أحمد سيف كان مهم عندنا جدا

لما كل حد طلب منى اشرح له الموضوع ايه بالظبط.. وكل حد قال انه فتح مدونة جديدة او هيفتح مدونة خلاص

لما اديت لأحد الحضور ورقة التعريف بالحفلة وبيقرا العنوان قصادى.. من هم المعذبون المصريون؟!!!!، رديت عليه: معذبون مين.. مدونووون.. ورينى كده.. اه هى مدونوووون

:وأخيرا

هقول كلمة ملهاش لازمة لأن اللى بيحط فى دماغة فكرة، العالم بتاعه بيقف عندها ومش بتتغير، لكن هقول وأجرى على الله.. ولأنى بقالى فترة عايشة فى موود المواجهة ومبقتش أحب أسكت وأكبر دماغى ... ندرك اننا مجموعة من المدونين اقمنا حفلا لم نريد من وراءه غير اعلان تضامن مع مدونين عرفناهم من خلال مدوناتهم وتأثرنا بدخولهم المعتقل..ندرك أن الفكرة ليس لها توجهات ابعد من "ليلة" وكل واحد هيروح على بيته، لا هنروح تانى يوم الصبح نشهر الحزب الأورطى السلموقراطى للمدونين المصريين ولا حتى الجمعية التعاونية المشتركة للمدونين المصريين، كنا ممكن نعمل الحفلة تحت اى مسمى تانى، لكن اذا كانت الصفة اللى جمعتنا كانت التدوين، واذا كان هدفنا من الاساس هو اننا نقف ورا المدونين المعتقلين، يبقى ننزل على الارض بإسم تانى ازاى؟ واى اسم ممكن يكون اصدق وأوقع من الحقيقة... اننا مدونين.. ودى حلقة الوصل الوحيدة بينا.. وبعدين هى الناس ليه احكامها بتبقى مسبقة دايما؟ طب استنوا.. شوفوا.. فى ناس حضرت- مشكورة -الحفلة وهى معترضة عليها.. شافت بعنيها النجاح والتأثير ومعترفة بيه

-------------------
مش هنسى كلمة دعاء واحنا مروحين: الكل يا زيزى كان جميل اوى.. مختلفين فى افكاركو واتجاهتكو.. بس اتجمعتوا وعملتوا حاجة حلوة، بروح جميلة.. وعملتوها بضمير

وهذا ولم ينقصنا سوى رؤية جميلة الأسكندرية رومانتيك روز.. الحفلة كانت عايزاكى يا كوكى