6/30/2006

كل لووك وانتو طيبين



أجلت نشر التصميم الجديد لبنت مصرية لاكتر من.. تصوروا كام؟ دعاء العدل رسمت البنوتة الى على البانر دى من شهر نوفمبر2005، وانا ابتديت اجهز التصميم ده من أبريل، اها.. فى الفترة اللى كنت موقفة تدوين فيها :) ، لأنى طبعا كنت عارفة انى راجعة وانها مجرد اجازة.. المهم بردو مكنتش عايزة انشره دلوقتى، مكنش ليا مزاج يعنى.. بس فوجئت امبارح ان بلوجسبوت الله يعمر بيته وقع التمبليت بتاعى الأخير، وكل ما افتح بنت مصرية القى اللون الفحلقى اللى انا كنت حطاه خلفية ، ومفيش اى حاجة تانية.. وطبعا لأنى انسانة كسولة درجة اولى فمكنتش محتفظة بباك اب للتيمليت القديمة، وعليه، قررت انزل التصميم الجديد

طبعا واولا وقبل اى شىء، البنوتة دى رمز للبنوتات المصريات، مش انا يعنى، ومش شبهى لا من بعيد ولا من قريب :) انا حتى معرفتش انفذ مقترحاتى بخصوص البنوتة دى، انا كنت عايزاها لابسه كاجوال ووشها مدور مش وش حبة الألماس، وبتضحك اوى زى الهبلة كمان.. دعاء قالت لى اوكى، هى كمان اللى اقترحت فكرة الرسم.. يعنى البانر دا هدية من دودو .. ميرسى اوى اوى اوى يا دودو، فكرونى اكتب عن دعاء، من يوم ما عرفتها من سنة واحنا بقينا اصحاب اوى.. انتيم بمعنى الكلمة وبكل ما تحتوية من حواديت ومواقف وتليفونات ومقابلات وضحك ودموع وفرح وامل وقرب وكله كله.. بس طبعا الكلام ده عايز تدوينة او ثلاثية كده على قدنا

المهم بقى قبل الكلام ما يتوه اكتر من كده، جت دعاء بالرسمة دى.. وقالت لى ان الموود بتاعها خلاها رسمت كده، وان مزاجها كان كده، ودى رؤيتها.. طبعا انا مكنش ليا كلام تانى لأن ببساطة الرسم عجبنى جدا.. وتسلم ايدك يا دودو

الخلفية بقى اللى ورا البنت دى اختيارى انا.. والصورة اللى منزلاها مع البوست ده انا اللى عملتها متربة وقديمة كده.. لوك يعنى.. رايقة انا مش كده
اه كمان انا قلت بقى جو الصيف عايز حاجة اورانج فخليت التصميم غرقان فى شوب عصير برتقان زى ما انتو شايفين

23 comments:

  1. اسمحى لى اكون اول المهنئين
    تصميم شيك
    مبروك
    اسلام

    ReplyDelete
  2. Ya allah shu 7elweh!!! Kteer 7abeit il banner!

    ReplyDelete
  3. I love this new design,, it's really cute & well done :)
    i just still suffering when i open your blog,,, because browsing stops till it complete opening

    ReplyDelete
  4. تصميم أقل ما يقال عليه أنه رائع .. خاصةً البانر .. دعاء العدل بتثبت في البانر دة برسمة البنت اللي تعتبر اللوجو بتاع المدونة إنها طاقة كبيرة ، كل التوفيق ليكي وليها ..

    مبروك اللوك والمواضيع الجديدة..

    ReplyDelete
  5. تحفة..
    و أظرف حاجة القطة

    :)

    ReplyDelete
  6. زيزىىىىىى
    مبروووووك يا جميل التصميم الجديد جميل جدا والله
    وصورة البنت لذيذة موت
    والخلفية دى انا كان نفسى فى واحدة زيها عندى وكنت عمال ادور وادعبس وبم انى مش جامد فى الفوتو شوب ولا الهتمل فا طبعا محتاس بس ما علينا
    :D
    وبالنسبة للون البرتقالى
    انا اليومين دول عايز اروح اجيب كرافتة برتقالى عشان ماعنديش اهو منها البسها فى الشارع والبسها لما اكون فاتح البلوج عندك عشان ابقى شيك
    :P

    ReplyDelete
  7. هيا دعاء العدل مصممة كاريكتير جريدة الدستور تبقى صاحبتك0
    والله انتي محظوظة يا زيزي
    دنا نفسي الاقي بس ايميلها علشان اشكرها عالكاركتير المعبر والجميل اللي بتمتعنا فيه في الدستور
    عموما بلغيها تحياتي
    احمد العزيزي

    ReplyDelete
  8. Design Gameeel Gedan :))
    ana nefsy a3raf ezay a3mel ADD le banner fel index bta3 el blog ? at the TOP ya3ny ... :S dawart 3aleh fel alf ba2 tadwen msh la2eto .. can You help me ??

    mmm .. is really do3a2 working in el DOSTOR ?!

    thanks for this special blog ;)

    ZanGoola

    ReplyDelete
  9. mabrok ala el tasmem elgded

    ReplyDelete
  10. مبرووووووووووووووووووك .. التصميم تحفه يا جميــــــــــــــــــــــــــــــــــــــل

    ReplyDelete
  11. لوك حلو اوي انا معرفش القديم لاني اول مرة اخش عليك بس لوك مطرقع وحلو البرتقاني ده مناسب الصيف
    ومبروووووووك

    ReplyDelete
  12. مبروك الافتتاح

    اللوك حلو
    بس ضيق حبيتين

    محتاج تفكي التانية من الوسط

    او ممكن تبعتيه لاسطى عليش يأيفه

    بس بصراحة
    غير كده
    روعة

    وكمان اللوحة الام

    قصدي
    اللوحة اللي في بداية البلوج

    معبرة


    إلى الامام ...


    تحياتي

    ReplyDelete
  13. اوك التصميم رهيب تحفة والنبى كلمنى على الاميل بتاعى عاوزاك ضرورى أوى arwa_taweel@yahoo.com

    ReplyDelete
  14. islam
    الله يبارك فيك يا اسلام :)

    roba
    وزيارتك ليا شو حلوة كتييير يا ربا :))

    me2
    انا كمان اعانى من الموضوع ده، هحاول اظبطه، واخف السكربتات اللى مبهدله بيها المدونة :)

    قلم جاف
    ميرسى يا قلم، بالنيابة عن دعاء وبالاصالة عن نفسى

    أحمد
    اهى القطة دى حلت العقدة اللى عندى من القطط.. عشان بخاف اجى جمبهم فى الحقيقة ومن زمان كان نفسى يكون لى قطتى :))


    سويدى.. ههههههههه، هطقم على مدونتى يعنى :)


    مصريون بلا حدود.. يوصل


    zangoolaa
    بالنسبة للتسميبليت بتاع بلوجر هدورلك اشوف انا كنت بعملها ازاى
    واه.. دعاء بترسم فى الدستور


    شاب اسكندرانى
    الله يبارك فيك :)


    شيريهان
    ازيك يا شيرى وحشتينى :) انتى مالك شده ع الرجالة ليه فى مدونتك، هما يستاهلوا بردو


    مستر بيبو
    عود احمد يا بيبو.. التدوين كان مضلم من غيرك


    نوران
    واديكى نورتينى :)


    itstoolate
    وياخد كام اسطى عليش فى الموضوع ده :)


    أروى
    مين اللى يبعتلك بالظبط :S

    ReplyDelete
  15. اه ابعتيلى اميل علشان اعرف اميلك لانى مش عارفة ادخل على العموم انا على النت دلوقتى

    ReplyDelete
  16. مبروك...حلو قوي..البنوتة تحفة :))

    ReplyDelete
  17. حلو أوى ومبهج التجديد الرائع ده

    ReplyDelete
  18. التصميم تحفة ... ألف مبروك عليكى

    معلش جات متأخرة شوية ..إنتى عارفة السبب :)


    www.withoutway.info

    ReplyDelete
  19. لو سمحتي كنت عايز اسألك
    انا حاولت اعمل موضوع
    recent comments
    واستخدمت الكود مره من عندك من بلوج التعليم .. و مرة من الموقع الاساسي بتاع الهاك .. لكن في الحالتين كانت التعليقات بتطلع .. أولا مش مترتبه حسب الجديد .. يعني ترتيب اي كلام مع اني غيرت فورمه التوقيت زي ما هوه طالب .. وكمان بتطلع كلمة
    NANN
    جنب كل تعليق جديد ؟؟ عندك فكره ده سببه ايه

    بصراحه .. ياريت تبعتيلي الكود اللي انتي مستخدماه عندك بالضبط و اكون شاكر ليكي جدا جدا جدا

    ReplyDelete
  20. تصميم فوق الوصف .... متأخرة شوية بس مبرووك

    ReplyDelete
  21. على فكرة تصميمك ممتتتتتتتتتتتتتتاز

    يا ريت يكون فى تعاون بيننا

    مجلة العرب شبابية لكل الشباب العربى
    بنحاول نعمل اللى الصحافة معملتهوش

    نكتشف شاعر او قاصر او واحد عايز يعبر عن نفسة

    egywriter@yahoo.com

    ReplyDelete
  22. اولاً احب اشكرك علي أ ب تدوين ... تاني حاجة احب اقولك ان مدونتك من احمل المدونات اللي شوفتها .. و كل سنة و انتي طيبة

    ReplyDelete