إوجعهم وإلوى دراعهم وقاطع منتجاتهم

أول مرة أسمع عن فكرة المقاطعة كنت يا دوبك مخلصة تانية ثانوى وطالعة على تالتة، فى الصيف ده - كان صيف سنة 97 - اسرائيل وقتها أهانت سيدنا محمد - صلى الله عليه وسلم - واحنا اتصدمنا اوى لدرجة ان فكرة المقاطعة ظهرت، وجريدة الأسبوع واللى كانت فى أوائل أعدادها شدت حيلها جامد فى الحكاية دى، وكنت متابعة أخبار المقاطعة وبنفذها وكمان عملت كشكول عن الأزمة دى عبارة عن قصاقيص لمانشتات ومقالات الأزمة دى - اصل انا كنت غاوية حكاية الكشاكيل والقصاقيص دى :) زمان بأه

بس وبعدين المقاطعة نامت ، والناس نسيت. جينا لما كنت فى تانية وللا تالتة كلية الانتفاضة الفلسطينية كانت فى أوج تألقها، وفكرة المقاطعة ظهرت من أول وجديد، وقتها الناس كانت متحمسة اكتر واكتر انها تقاطع، وكنا بنطبع ورق المنتجات اللى المفروض نقاطعها ونوزعه، المقاطعة كانت مؤثرة لدرجة ان اغلب الشركات بقت بتحاول تضغط على الناس بعبارة هبلة اوى اللى هى " صنع بأيد مصرية" بس طبعا مش بيكملوا العبارة "وبفلوس امريكية" ه

وزى ما الانتفاضة نامت.. المقاطعة نامت.. وهبطت، بقت مجرد صوت ضعيف جدا. ومبقاش حد بيهتم

والسنة دى لما اللى قوم فى دماغ المسلمين فكرة مقاطعة المنتجات الدنماركية مستغل عاطفتنا الشديدة والمتعلقة بسيد الخلق.. وداس اوى ع الحتة دى، الناس اهتمت وقاطعت.. طبعا اكيد الحملة د كان وراها آلة إعلامية جامدة اوى وناس قصدت الحركة دى

ودلوقتى اسرائيل بتضرب لبنان - وفلسطين طبعا - وحزب الله - سواء اختلفنا او اتفقنا على موقفه - لسه قادر يواجه اسرائيل وزى ما بيقولوا "بيكبدها خسائر لم تتوقعها اسرائيل" وأغلب الناس مع حزب الله والمقاومة.. بالدعاء.. بالتبرع.. بالقلب.. بالتمنى ان حاجة تحصل تهز اسرائيل وتدحرجها توقعها على صف سنانها

"يا ترى لو قلنا يا مقاطعة .. الناس هتسمع؟؟"
دا كان اللى فى بالى لما امبارح صباح قالت لى على فكرة المقاطعة ، وقالت لى نعمل حملة.. واننا مش أقل من المدينة البلجيكية اللى اعلنت مقاطعتها لمنتجات اسرائيل.. صباح عايزة تنزل فى الشوارع بمطبوعات لنشر الفكرة، وتقف فى المترو وقصاد المحلات اللى بتبيع منتجات أمريكية.. انا كمان شايفاها فكرة كويسة، مين يحب ييجى؟ بس الأول انتو مقتنعين بفكرة المقاطعة؟

المقاطعة المرة دى غير مقاطعة الدنمارك.. دى مش اعلان موقف، ولا تبرئة ذمة.. دى لوى دراع.. اه والله لوى دراع، احنا كشعوب عربية نقدر نقلب موازين العملية كلها.. نقدر نخلى المقاومة أقوى، والنصر قريب.. نقدر نخسف باسرائيل الأرض، ونقدر نمحى فكرة الشرق الأوسط الجديد دى

المقاطعة لمنتجات أمريكا اللى بتساند اسرائيل - بتساندها بالموافقة والمال والأسلحة - هيغير ميزان القوة ويجعله فى صالحنا، كلنا عارفين ان العالم دلوقتى مبنى على تلة فلوس كبيرة اوى، اللى يقف فوقها هو الكسبان، لو سحبنا من تحت أمريكا تلها.. هنهزها ونهز موقفها، ونمنع صاروخ ينزل على أخواتنا فى لبنان وفلسطين - وكمينج سووون سوريا ، لو مغيرناش بإدينا الحال - صح؟

حد يقولى "طب اتكلمى على قدك" كلام كبير اوى اللى انا قلته ده.. صح؟ قال احنا واحنا قاعدين فى بيوتنا ممكن نغير الكون، ممكن نجيب النصر للمقاومة من غير ما نرفع سلاح، قال وكمان تبقى لنا اليد العليا من غير ما نغسلها فى بحر دم

بس انا بتكلم بالمنطق وبالتاريخ اللى المفروض نتعلم منه، هعتبر ان مقاطعة الدنمارك تاريخ نتعلم منه، رغم انى مش موافقة للآن على المقاطعة دى، لكن اغلب المسلمين تفاعلوا معاها وقرينا وقتها عن خسائر جامدة اطاحت بكوب اللبن الدنماركى، طيب بدل ما تكون المقاطعة مجرد تبرئة ذمة، نخليها المرة دى وجع لإسرائيل وتغيير لمصيرنا

حد تانى يقولى الاولى نقاطع منتجات الدول العربية اللى بتساند اسرائيل كمان.. هقولك يا عم دى مش هوجة مقاطعة وللا احنا عالم فاضية قاعدين نتكلم فى ادبيات ونظريات المقاطعة ولا ينفع اساسا نقاطع نفسنا يعنى، المقاطعة عايزنها مؤثرة فى تغيير مسار الحرب.. وهنا نتكلم عن مقاطعة منتجات أمريكا واسرائيل، طبعا حكام السعودية ودول الخليج لو عندها دم تعمل زى ما عملت ايام حرب اكتوبر وتمنع بترولها دا كفيل بإنهاء أى حرب ، بس تقول ايه لعالم ما تعرفش ربنا، وكمان النظام فى مصر لو عنده دم يوقف تصدير الغاز الطبيعى لإسرائيل، بس تقول ايه لعالم ماتقدرش تعيش من غير خيانة... اه خيانة، كلمة توجع بس حقيقة

حد كمان يفتكر التبرير الشهير لرفض أى مقاطعة.. "دى مصانع فى مصر وبتشغل أهالينا".... يا سلام يا سلام، والنبى دا مش تبرير ساذج بتحاولوا بيه تهدموا اى فكرة ممكن تكون مؤثرة؟ ومع ذلك ممكن ارد على التبرير ده انه: اغلب المصانع بتاخد ترخيص، يعنى تقدر فى حالة التأثر بالمقاطعة تلغى ترخيصها وتعتمد باه على نفسها بنفسها، ثانيا، مقارنة ظالمة اوى بين اهالينا اللى بيتقتلوا بفلوسنا واللى نقدر نمنع عنهم ده، وبين اهالينا اللى ممكن لو مصنعهم اتقفل ربنا يفتح لهم ابواب رزق تانية وهما فى النهاية وسط اهاليهم لا متهجرين ولا مات لهم حد، ثالثا ليه التبرير ده محدش سمع عنه ايام مقاطعة منتجات الدنمارك؟؟ اذا كانت اهانة سيدنا محمد صلى الله عليه وسلم توجعكوا اوى، فموت الأبرياء بلا اى ذنب يوجع سيدنا محمد ألف مرة

ها.. هتقاطعوا؟؟

اوكى... يعنى اتفقنا كده؟ هنقاطع كلنا.. مفيش كوكاكولا وبيبسى..؟ أمرك لله مش هتدخل ماكدونالدز..؟ هتقف فى صيدليتك اللى مقاطعة الأدوية الأمريكانى؟.. هتسيبك من موتورولا..؟ أنا وانت وكلنا.. احنا كتير اوى، فلوسنا هتأثر.. مقاطعتنا هتلون الحياة وتديها وش تانى جديد.. وش عيونه بتضحك، مش مكسورة فى ملاجىء وللا خيام

انا هراهن على كل واحد يدخل هنا ويقرا التدوينة دى.. هراهن على كل مدون يقتنع بالفكره و ينفذها وينشرها بين أهله ويكتب عنها فى مدونته.. هراهن على المتواليات العددية.. واحد يقنع خمسة والخمسة يقنعوا خمسة وعشرين والخمس وعشرين يقنعوا خمسة وسبعين.. وهكذا

طيب طالما كده بأه خد عندك الموقع ده "قاطع"، اخدته من يحيى عياش عن المقاطعة، دور فيه هتلاقى اسامى المنتجات اللى تقدر تقاطعها