8/17/2006

التدوين .. قلت مرة انه ميدانى

أوكى، لازم أعترف إن التاج ده كنت نفسى أوى يتمرر لى.. وأخيرا لست أدرى افتكرتنى ومررته ليا.. ميرسى أوى يا بلو.. نبتدى الشغل

هل انت راضى عن المدونة شكلا وموضوعأ؟

مدونتى شكلا، غير راضية عنها دلوقتى، هى حالة الرضا بتدوم عندى اسبوع اتنين تلاتة بالكتير، انا عايزة اغير شكلها، بس حاسة
اليومين دول انى عايزة اشحن افكار جديدة ، فهضطر اخليها كده شويتين تلاتة اربعة

اما على مستوى المضمون.. اه جدا، اعتقد انها بتعبر عنى، والكلام اللى بكتبه بيطلع من جوايا.. ودا اللى بيحقق لى الرضا، كمان
محصلش انى تعديت الحدود اللى مقتنعة بيها ودا مهم ويرضينى، اما عن اسلوب الكتابة فاللى بيضايقنى انى ساعات ببقى عايزة اتكلم
فى الموضوع جد اوى وكأنى مقضبة الجبين وحاجات كده بس بتقلب معايا للاسلوب البيتى ده :) مش كده احسن؟

هل تعلم أسرتك الصغيرة بأمر مدونتك؟

أسرتى الصغيرة وأسرتى الكبيرة كمان. من زمااان.. كل البيت عارف عن المدونة، حتى قعدوا معايا واتفرجوا على حلقة الجزيرة عن المدونين.. ما انا حكيت لكو، ساعات اقرأ لماما بعض اللى باكتبه وممكن اقولها التعليقات اللى جت ع بوست ما ونتناقش. كمان بوريها تصميم المدونة كل ما اعمل واحد جديد، وفترات بخفى سيرة المدونة خالص ومش بجيب سيرتها.. و اخواتى بحاول اقنعهم يقروها ويعملوا مدونات، بس هما ملهمش فيه، كمان بقية العيلة عدد منهم عارفين، واخيرا ليا خالى اقنعته يفتح مدونة بس مش عارفة هينفذ امتى

هل تجد حرجا فى أن تخبر صديقا عن مدونتك؟ هل تعتبرها أمرا خاصا بك؟

أصحابى أغلبهم عارفين إن عندى مدونة.. ومعتقدين انى هروح فى داهية بسببها.. ودا بيثير ضحكى كتير، فى اصحاب مالهمش فى
النت خالص فمش بيبقى فى مجال انى اقولهم اى نشاط ليا ع النت اساسا، حكاية امر خاص بيا دى مش موجوده من اول ما فتحت المدونة، حتى " بتكون" يعرفوا عنها، حتى اختى وبنت خالتى مستنينى اكتب عنهم فيها على اساس انهم من الشخصيات اللى اثروا فيا ههههههههه

عموما انا بقيت عاملة زى وكالة اعلانات متحركة من اجل التدوين عموما، اى حد جديد بتعرف عليه - او قديم- بقوله سمعت عن
التدوين؟ طيب تحب تدون؟ طيب كذا كذا كذا.. واقعد اشرح

هل تسببت المدونات بتغير ايجابى لافكارك؟ اعطنى مثال فى حالة الاجابة بنعم؟

ياااه السؤال ده اتسألته كتير.. واجابتى بقت واحدة.. اه التدوين ادانى ابعاد وزوايا اوسع واكتر لمواضيع كتير.. بقيت على يقين انى لو
كتبت رأى ما استحالة استحالة الاقى مية فى المية موافقة عليه.. ودى اجمل حاجة، انك تتخلص من فكرة انك واثق تماما ان كل الناس
هتوافقك، وبقى طبيعى ان الاقى رأى تانى.. بالعكس بقيت بفرح، لأنه معناه انه فتح لى زاوية جديدة للموضوع، وممكن جدا اقتنع
برأيه، وحصلت والله وبعترف ساعتها

هل تكتفى بفتح صفحات من يعقبون بردود فى مدونتك ام تسعى لاكتشاف المزيد؟

دلوقتى - ومن زمان بردو- بكتفى بحاجتين.. لو حد جديد بيعلق عندى بشوف هو مين واتعرف على مدونته.. ومجمع منال وعلاء
طبعا بلاقى عليه كل الناس.. اقرا موضوع ما ولو شدنى بدخل اكمله، وكده.. من زمان مش بسعى لاكتشاف مدونات بنفسى.. كسولة
شوية

ماذا يعنى لك عداد الزوار.. هل تهتم بوضعه فى مدونتك؟

من اول يوم وانا حطه العداد.. وبقى ادمان انى ابص عليه كل ما افتح المدونة.. زى ما بلو بتقول بيبقى مؤشر يومى عن مدى شعبية
تدوينات عن غيرها، ولو انى مع الوقت بقيت بحس ايه البوستات اللى هتجذب الجماهير وايه مش كده

هل حاولت تخيل شكل اصدقائك المدونين؟

لا مجاش فى بالى.. اصلا حكاية التخيل دى للمبتدئين ع النت عموما.. اى حد بيبتدى الف باء شات مثلا.. وكده، انما امثالى مش بقوا
ياخدوا فى بالهم خالص، كمان لما اقابل حد من المدونين لايف مش بحسه مختلف لأنى اساسا مارسمتش صورة فى خيالى

هل ترى فائدة حقيقة للتدوين؟

اوكى.. سؤال جامد ده.. ممكن اقول ان الفائدة دى بتختلف من مرحلة لمرحلة.. بس طول ما فى فايدة عائدة عليا من التدوين فانامستمرة فيه، مثلا انا ابتديت مدونتى مجلة - لو تفتكروا- وكان هدفى انى اكون مسئولة عن حاجة بتصدر فى شكل مجلة واظبط الجرافيك بتاعها وصورة مع كل موضوع وبتاع.. بعدين لقتنى بقيت اهتم اكتر انى اقول رأيى... يعنى ممكن يكون دا مش هدفى فى البداية بس المياه الراكده اتحركت وبقى عندى قدرة انى اكتب بصراحة رأيى فى اى حاجة.. بالعكس كمان اكتشفت انى بعرف اعبر عن افكارى وارتبها صح وانا بكتب.. دا يفرق كتير عن لو دخلت مناقشة لايف مع حد يمكن ماسترش ومعرفش اعبر عن رأيى كويس. انما لو قرا رأيى فى بوست غالبا هيلم بكل جوانب رأيى والمناقشة هتبقى ابسط بكتير.. يعنى دلوقتى التدوين بالنسبة لى وسيلة فعالة للتعبير عن رأيى.. و]دى اهم فايدة عادت عليا، انما على المستوى العام.. انا بعمل كل جهدى ان التدوين ينتشر ويقدر يكون فى يوم من الايام نبض حقيقى للشارع ورأى عام بجد.. ودى هتكون اهم فوايده

هل تشعر ان مجتمع التدوين مجتمع منفصل عن العالم المحيط بك ام متفاعل مع احداثه؟

اها اها اها اهااااا... هو منفصل ومش منفصل.. بمعنى ان اى حاجة بتحصل فى المجتمع هتلاقى صداها فى التدوين طبيعى... انما هو كعالم بحسه خاص ومختلف عن المجتمع الأرضى.. مهما كان لسه النت فى مصر غريب وبيستخدمه عدد قليل جدا.. وكتير الاقى ان اللى يأثر فينا كمدونين - او مستخدمين للنت بشكل عام ويشغلنا - مالاقش له اثر على الارض

يعنى لو وضحت أكتر اقول ان دبة النملة على الارض بيتسمع صداها على النت، انما احيانا كتييير بتنطلق دعوات على النت لا تصل
لأهل الارض ابدا

هل يزعجك وجود نقد بمدونتك؟ ام تشعر انه ظاهرة صحية؟

اولا انا من الناس اللى بتصدق بسهولة، بمعنى لو حد انتقد مدونتى فى حاجة بصدق على طول وبتفاعل مع النقد ده وبحترمه بما انه طلع قلبه عليا وكده.. عموما اكيد النقد ظاهرة صحية.. حاجة واحدة بس اللى تؤلمنى، لو حد انتقدنى وضمن انتقاده ألفاظ خارجة..ساعتها بحذف التعليق لأنى زى ما انتو عارفين برفض الألفاظ دى.. وببقى متضايقه ان صاحب التعليق مفكر انى شلته عشان النقد مش عشان اللفظ.. بس ولا بيهمنى، هو لم يحترم القواعد بتاعتى يبقى تطبق عليه احكامى

هل تخاف من بعض المدونات السياسية وتتحاشاها؟ هل صدمك اعتقال بعض المدونين؟

لا، دول اصحابى :)).. وبعدين ايه تعريفك للمدونات السياسية؟؟ اللى يتكلم فى السياسة؟ ما شاء الله علينا كلنا بندلى بدلونا.. انما لو قلت مدونات سياسية بحق وحقيق يتعدوا ع الصوابع، واكيد طبعا بهتم اقرالهم .. بيوسعولى مداركى يا ناس، ومش كتير من المدونين بيعمل كده
الاعتقالات صدمتنى اه. بس مش لأنهم مدونين.. لكن لأن من الناس اللى تم اعتقالهم اعرفهم بصفة شخصية او حتى بالصفة التدوينية.. وطبيعى اتخض عليهم.. بس توضيح بسيط، الاعتقالات اللى حصلت كانت بسبب المظاهرات وليس بسبب تدوينات لهم.. يا جماعة ما تطفشوش الناس من التدوين.. لم يحدث ان اعتقل مدون مصرى بسبب ما يكتبه على مدونته.. حتى عبدالكريم لما اعتقل بسبب تدوينة ما، كان لانه قام بطبعها وتوزيعها على الناس.. بقت منشور يعنى

هل فكرت فى مصير مدونتك فى حال وفاتك؟

لا مفكرتش، بس اهى فرصة افكر.. لو حصل ومت يعنى - واكيد طبعا دى بقى مافيهاش تسعة وتسعين وتسعة من عشرة- طبعا مش هلحق اكتب خبر وفاتى :) انما اختفائى هيكون داعى لمدونين كتير يسألوا عليا ويكلمونى واهلى يردوا عليهم ويقولوا لهم الخبر وهما هيقولوا، المفروض يعنى.. كمان لو سمحتوا لما تعرفوا كده، علقوا عندى فى اخر بوست وقولوا انى مت.. وادعولى واقروا الفاتحة،
وعموما هسيب مدونتى للتاريخ وحسنة جارية على روحى

مين اكتر مدونين أثروا فيك؟ وليه؟

اممم اوكى هما
"ليديز فيرست"

أرابيسك: مينفعش اقول انى اتأثرت بمدونتها بس وبكل ما تكتبه، انا كمان اتأثرت بيها هى شخصيا.. اتقابلنا كتير ودخلنا مع بعض فى مشروعين، واحد منهم استمرينا فيه للنهاية.. لما بقعد اتناقش معاها بقول ياااه.. اهى بنوتة سكر و بتفهم فى السياسة وفى غير السياسة. امال ليه معندكوش ثقة فى المرأة

لست أدرى: على قد عفويتها، على قد صراحتها وجمال تدويناتها.. بلو من اوائل الناس اللى اتعرفت على مدوناتها وهى بالنسبة لى من
الحرس القديم :) عموما اى حد ابتدا تدوين قبلى بيكون من قدماء المدونين بالنسبة لى.. بحس انها على شفا حفرة من التدوين.. ممكن تسيبه فى اى لحظة - زيي -، مش عايزاها ابدا ابدا تقف عن التدوين.. اوعى يا بلو

دعاء كروان: ديدى عارفة كويس اوى انا نفسى تعمل ايه لكتابتها.. عايزاها تاخد خطوه اكبر من مجرد التدوين (مع احترامى للتدوين) بس بجد دعاء بتكتب حلو اوى اوى، فى بيتنا التدوينى اديبه جامده يا ناس

أرابيسك ولست أدرى ودعاء.. بيرسخوا إيمانى بقضية المرأة أو بمعنى اصح.. مكانة المرأة

وبعدين "مينز" يا مرسى

وائل عباس.. بعتبره رائد الصحافة الشعبية ، معرفش حد قبله بصراحة.. نزولة الشارع وتقصيه للاخبار وقيامة بالتصوير .. ومن ثم التعليق والتوضيح والتبصير بالفساد اللى فى مصر.. الوعى المصرى كانت الدافع الاول اللى خلانى افتح مدونة

بن عبدالعزيز.. ويمكن هو عارف انه من المدونين المهمين بالنسبة لى، وعارف انى بتمنى يرجع يكتب ويحلل ويناقش ويتكلم عن فكرة الاصول الاسلامية تانى وغيرها مواضيع كتير، ويسيبه من الاحداث الجارية شوية.. لانه لما بيكتب حاجة فيها تحليل بيبقى اكثر هدوءا واقل انفعالا واكثر اقناعا، ولما بيكتب وهو منفعل ببقى عايزة اقفل المدونة على صباعه

يحيى عياش.. ما شاء الله، دايما اقرالك استفيد منك، كمان اسلوبك بيعجبنى اوى، مش بتكتب الا اذا كان موضوع شدك تكتب فيه ،
يعنى ملكش دعوة بالموضة :) كمان بيبقى رأيك اضافة فى التدوين مش شبه حد ومش متأثر بحد.. ودايما رايق

زرياب.. اعتقد ان وجوده مهم لكتير من المدونين.. ومدونته شبه ادمان حتى لو مكنتش بعلق عنده كتير، اساسا انا بقى تعليقى قليل اوى فى المدونات كمان مش معقول كل مرة اقول جميل وهايل بس :).. اسلوب زرياب مميز جدا سواء وهو بيكتب بخفة دم -وللأسف بقى نادرا- لكن بيضحكنا حتى تبدو نواجذنا واللوز كمان، و لما يحط رجل على رجل ويبقى اديب بنضارة.. فى كلا الشكلين عميق.. طبعا احيى تجربته الرائدة.. سيرة زرياب.. ورائدة دى ليها مستويات كتير

مين من المدونين بتحس انه شبهك؟

لست أدرى.. بصراحة كده.. من زمان بحس ان رأيى يشبه رأيها. وكل حاجة هى اتكلمت فيها ببقى رأيى من رأيها.. يمكن نختلف بس حول مدى تفاعل المدونين مع بعضهم، غير كده كله تمام سعادتك.. ويمكن وانا بقرا اجاباتها على الاسئلة لقيتها نسخة من رأيى
عشان كده خطر فى بالى اطرح عليها السؤال ده واللى هى بدورها ردته عليا :) انا كمان نفسى اوى اقابلها

آخر سؤال: تحب تسمع ايه؟

اوكى... اليومين دول بسمع ام كلثوم، وخصوصا.. من أجل عينيك، وبالذات وهى بتقول: أم تخوفت من اللوم فآثرت السكينة

اكتب اسماء خمسة مدونين ليقوموا بهذا الاستقصاء بعدك

23 comments:

  1. حاضر يا ستي من عنيا الاتنين انما مخنوقه ليه هقلك بس علي جنب علشان محدش يسمعنااا

    :D

    ReplyDelete
  2. الاجابات كان حلوة اوي وانا من المؤمنين بتغير النظام لان اصلا النظام دكتاتوري وبتهيالي هيحصل ثورة قريب
    ابويا قالي مرة مش الظلم هو الي بيولد الثورة لكن الاحساس بالظلم هو الي بيولد الثورة وانا شايف ان الناس خلاص مش طايقة
    واشكرك علي مدونتك الجميلة وخصوصا اني لسة جديد في مجال التدوين

    ReplyDelete
  3. ايه يا زيزي الكلام السكر ده:)
    لأ ومنك انتي بالذات له قيمةو غلاوة خاصة
    شكرا أوي ع التاج و هأرد على طول

    ReplyDelete
  4. علم يافندم :))
    و هارد عليه ASAP

    ReplyDelete
  5. بجد البوست و الموضوع جميل قوي .. تغيير للمود جه ف وقته و بطريقه لذبذه قوي ..

    انما فيه حاجه انا ملاحظاها .. جمله "يدلو بدلوه" دي منتشره علي البلوجات اليومين دولا بشكل مش طبيعي .. بقت بتفكرني بتعبير "الشرق الأوسط الجديد" أو "الفوضي الخلاقة" .. لعله خير يا جماعه !!

    :))

    ReplyDelete
  6. إجابات جميـلة
    والأفكار المطروحة في مدونتك دائمـاً متميزة
    اتمنى لك التوفيق

    ReplyDelete
  7. " بن عبدالعزيز.. ويمكن هو عارف انه من المدونين المهمين بالنسبة لى، وعارف انى بتمنى يرجع يكتب ويحلل ويناقش ويتكلم عن فكرة الاصول الاسلامية تانى وغيرها مواضيع كتير، ويسيبه من الاحداث الجارية شوية.. لانه لما بيكتب حاجة فيها تحليل بيبقى اكثر هدوءا واقل انفعالا واكثر اقناعا، ولما بيكتب وهو منفعل ببقى عايزة اقفل المدونة على صباعه
    "
    منتي قفلتيه علي صباعي كثير
    لحد مقطعتيهم كلهم
    :)

    بصي هو انا كدة
    انفعالي وهدوئي جزء من شخصيتي
    واللي بكتبه بيكبرني او يصغرني
    بيقدمني او ياخرني
    وكل تجربة واقعية
    بتضيف
    واما بكتب فيها
    بتعلم منها
    لاني بسمح للاخرين يردوا ويعلقوا
    ويعرفوا وينتقدوا
    ويطحنوا

    امال فكرك اي فكرة او امر بتكلم فيه جه منين؟
    لازم اقول اللي جوايا
    الاول
    يحصل رد فعل عليه
    يتضبط
    يحصل تفكير اكثر
    انضج اكثر
    وهكذا
    وكل ده بيفيد رؤيتي الاوسع
    للامور من مرجعية اصولية دينية مؤسسة علي الاسلام
    لولا الاحداث
    ورؤيتي الشخصية ليها
    ثم تعبيري عنها
    ثم رد الناس عليها
    ثم قراءة المزيد
    ثم دراسة وبحث
    ثم التامل في كل ما سبق
    ما كنت وصلت لاي شئ حتي الان

    وبالتالي ربنا يعينك علي :)
    بس علي الاقل سيبيلي صباع اكتب بيه ابوس ايدك
    :)
    جزاكم الله خيرا
    ربنا يكرمك ان شاء الله

    ReplyDelete
  8. طموح بلا حدود
    مين صنف مدونتى سياسية؟؟؟
    انا مصنفتهاش كده
    وكمان انا اتكلمت فى حاجت كتير اوى غير السياسة، ومقدرش اعتبر نفسى بتكلم فى السياسة.. السياسة كده تخسر
    :)
    ----------------

    شيماء
    اوك يا باشا..
    ----------------

    ناردين
    اهلا اهلا فى التدوين وفى بنت مصرية
    -----------------

    ارابيسك
    هستنى اجاباتك اللى على طول :)
    -------------------

    بلوروز
    :)) ميرسى يا بلوروز انك قبلتى دعوتى
    -------------------

    رومانتيك روز
    لو تلاحظى انى غيرت المود بقالى فترة.. بمعنى ان المود اللى كان سائد لبنان.. وانا من فترة بطلت كتابة عن لبنان.. كتابة العاجزين مابقتش ترضينى
    -------------------

    ماشى
    نورت يا فندم المدونة.. شكرا على رأيك واتمنى تكرر الزيارة.. فى ايدك اتنين كيلو برتقان ماتنساش
    :))
    ----------------------

    بن عبد العزيز

    :)))) تعرف انا كنت عايزة اسحب النقد دا ليك.. وماكتبوش.. بس انا اتعودت اكون صريحة واتعودت انك بتقبل كل حاجة بصدر رحب.. واتعودت اننا نختلف ع النقطة دى بالذات.. بس انا كتبتها مش عشان تغير طريقتك.. انا بكتب رأيى لانى احتاجت افرق بين اللى بيعجبنى عندك واللى م بيعجبنى.. مكنتش منتظرة انك تاخد مواقف دفاعى زى ما بقيت تعمل فى الفترة الاخيرة

    اى .. اى.. اى.. هتحدفنى بإيه على كلمة "دفاعى" المرة دة
    D:

    تعرف يا شريف.. انت ما تعودتش تلاقى نقد وتقعد تفكر فيه شوية.. اعترف.. لما تقرى نقد بتفكر فيه خمس دقايق على الاقل؟ وللا ردك بيبقى فوررررررررررى؟؟

    ReplyDelete
  9. يا الله
    اروح وأرجع الاقى اسمى فى البوست كل دة

    انا كمان نفسى اقابلك قوى قوى قوى ونفسى غادة (مع نفسى) ودعاء كروان.. وسامية ورحاب... ماتيجو يا جماعة نتقابل فى مرة والله تبقى جامدة جدا


    ايه بس كدة او كدة.. انت اساسا -لاء دى بجد- من الناس اللى بحترم رأيهم قوى... عشان بيطلع الكلام بحماس وايمان من جوة كدة..

    بس مم.. اقول ايه تانى.. اه
    ماتخافيش... واضح انى راشقة بلوجز
    لا تقلقى

    تصبحى على كل خير يا احلى بنوتة مصرية

    ReplyDelete
  10. أول بنت مصرية عرفتها على بلوجر
    ودايما دايما باعتز بيكِ
    مش عارفة ليه انا بعيدة عن مدونتك بالتعليقات
    رغم انى مدمنة ليها

    حاسة انك اضفتِ للتاج أهمية بردك عليه
    لأنك بجد والله من المدونين اللى باعتبرهم جامدين يا زيزى

    انا من الماضى
    ارجعى بذاكرتك ل ورا
    ابعد
    من ييجى سنة ونص كدة
    انا حسن الهلالى
    يوووه
    قصدى حلم

    سلام بأة

    ReplyDelete
  11. معلوماتك كانت جد ممتعة، ومفيدة..فياريث نعمل أو نفكر بها بس إن شاء الله نناقش تلك الأفكار مع أنفسنا..
    مأعجبني لست بنت مصرية هو لمن تترك مدونتك بعد مماتك؟!! بالتأكيد. فكرك صائب جدا .
    أشكرك جزيلا الشكر، وفي إنتظار المزيد..
    تحياتي لك.

    ReplyDelete
  12. عودا حميداً للتفاعل ...وهذا ما تعودنا عليه فى مدونتك الموقرة

    مجرد فكرة أتت إلى ذهنى و أنا أقرأ هذه التدوينة ...ممكن أقولها

    بإختصار شديد ... ومن خلال قاعدة البيانات التى تقدمينها يا بنت مصرية عن المدونين و عالم التدوين

    ممكن ننشىء رابطة بإسم رابطة المدونين العرب ؟؟؟؟؟؟؟؟؟؟؟؟؟
    مطروح للمناقشة
    والسلام عليكم

    ReplyDelete
  13. بلو

    اوكى، انا متحمسة جدا نتقابل كلناااااا.. بنوتات بلوجرز كتير اعرفهم وقابلتهم وممكن جدا ييجوا :) رتبى الموضوع وانا معاكى
    :))
    ---------------------

    حلم
    القلوب عند بعضها يا حلم :) انتى بتفكرينى بنفسك ليه ، هو انا نسيتك.. احنا اتنين بيضمنا حب السويس :)
    -----------------

    اومرزوك
    ميرسى :D
    ----------------
    سعدنى
    شفت باه .. ادينى بسمع الكلام

    بالنسبة للرابطة.. طيب دى نعملها ليه؟ ايه فايدتها يعنى؟
    وللا تقصد مكان تتجمع فيه كل لينكات المدونات العربية.. لو كده هتلاقى فى كتير زى تدوين وتوت والشامل
    -----------------

    زيتونة
    خير يا جميل
    انا معايا رقمك، انتى نسيتى وللا ايه :) هكلمك بكرة اول ما اصحى عشان دلوقتى واحدة ونص صباحا
    :)

    ReplyDelete
  14. Re :" تعرف يا شريف.. انت ما تعودتش تلاقى نقد وتقعد تفكر فيه شوية.. اعترف.. لما تقرى نقد بتفكر فيه خمس دقايق على الاقل؟ وللا ردك بيبقى فوررررررررررى؟؟ "

    هممم
    ساعات فوري
    وساعات يوم كامل او اكثر
    وساعات مبردش خالص

    علي حسب
    فيه نقد بيكون صح من وجهة نظري طبعا
    وساعات بحس انه غلط
    بس بسمع للكل
    مش شرط استجيب فوريا
    لكل كل كلمة نقد
    تؤثر ولو بعد حين

    ReplyDelete
  15. زيتونة شرقية
    انتي اختفيتي شهور

    انتي بخير؟

    ReplyDelete
  16. انا عايز اسالك سؤال محير بقالي كتير اختلفت عليه انا واخويا(نصر مصر)انتي البنت الاسكندرنية اللي كانت في برنامج المدونون علي الجزيرة؟

    ReplyDelete
  17. الحقيقة لا أقصد بالرابطة مجرد مكان لتجميع الأسماء و المعروف أنها حتى ليست أسماء حقيقية ...ما أقصده بالرابطة هو شىء أقرب لمفهوم الجمعية ...ويكون لها ممثلون حقيقيون وليست أسماء مستعارة ..مثلها مثل رابطة الأدباء أو رابطة المحامين العرب وهكذا...ولا نستبعد أن يمتد الحلم مستقبلا ليكون للمدونين نقابة .....مجرد حلم ...و أنا شخصيا أومن بمبدأ تحقق الأحلام ومشروعية الحلم

    ما زال للحديث بقية و ما زال المشروع مطروحا للنقاش

    ReplyDelete
  18. بنوتة مصرية البوست حلو جدا و إجاباتك فيها خفة دم و روحك حلوة على فكرة أنا كل يوم تقريبا بعدى على مدونتك من ضمن مجموعة مدونات تحديدا بعدى عليها يوميا و مدونتك بتعجبنى كتير بس دى اول مرة اعلق فيها على بوست عندك

    ReplyDelete
  19. زيزي الكلام جميل والرد رائع بس انا زعلان بجد لأن سويدي بعتلك التاج من الأول بس شكلك مابقيتيش تيجي عنده

    ReplyDelete
  20. عربى

    هههههههههه طيب محتار ليه :) انا هقولك
    اولا سلم لى على اخوك :) ثانيا مش انا اللى ظهرت فى البرنامج دى كانت شاهيناز صاحبة مدونة واحدة مصرية
    ------------

    سعدنى
    طيب ايه اللى ممكن تحققه الرابطة دى؟ ايه اهدافها؟ ازاى تقدر تحقق اهدافها؟
    -----------

    رانية
    ميرسى يا رانية على مرورك وتعليقك الجميل
    وميرسى كمان ان مرورك عرفنى بيكى وبمدونتك :)
    ------------

    نور
    انا اللى زعلانة من نفسى من ساعة ما قلتلى.. انا بروح والله.. اذا مكنش عشان سويدى يبقى عشان الاغانى اللى بيحطها :P
    بس اهو بقى اللى حصل، عينى ما جتش على دعوته ليا وكمان بزور المدونات على فترات دلوقتى، اكتر حاجة متبعاها المجمع، انا رت اعتذرتله فى المدونة وربنا يسهل ويتفهم موقفى
    ميرسى يا نور انك نبهتنى

    ReplyDelete
  21. انا اول مرة ادخل مدونتك لكن هي شكلك مدونة سمبتيك ولذيذة

    ReplyDelete
  22. زيزىىىىىىىىى
    طبعا مش هاقعد اقولك اجابتك جميلة ومعرفش ايه
    انتى عارفة رأيى فى كل كلمة بتكتبيها من ايام قهوة كتكوت
    :D
    اما حكاية التاج فا انا مش زعلان والله كلنا واحد سواء انا او لست ادرى او اى حد بعتهولك فا كلنا فى مركب واحدة
    المهم نعرف الاجابات
    :P
    بس ابقى زورينى من وقت للتانى بس عشان انا مش مشترك فى مجمع منال وعلاء

    ReplyDelete
  23. انا عايز اكلمك على خاص يا بنت مصرية بس مش عارف ازاى مش لينك خالص اقدر عن طريقة ابعتلك اى حاجة..على العموم هى اسألة خاصة بالتدوين وعمل المدونة يا ريت تساعدينى ودة ايميلى يا ريت تبعتيلى علية او تكتبيلى ايملك اية linkinpark@maktoob.com وانا مستنى ردك ..ها مش هقوم من على الجهاز غير لما يجيلى ايميلك يلا ربنا يستر مأخللش من كتر القعدة

    ReplyDelete