8/25/2006

هو لا ميت ولا حى يا حكومة

شكرا لكل حد عزانى.. ويا جماعة الوفاة دى ملهاش علاقة بقطر قليوب.. دى حاجة تانية خالص
كنت كتبت بوست بعد حادث قليوب بعد العصر كده من نفس اليوم وقلت هحطه بالليل وبعدين اللى حصل حصل بأه واتلخمت.. مهم احط البوست ده بقى عشان انا متغاظة
----------------------

الحكومة دى عايزة محارق هولوكوست.. لا بيرحموا الناس ولا بيسيبوا رحمة ربنا تنزل، اقول ايه بس، الحادثة بتاعة القطارين المتصادمين فى قليوب مكنتش بس مصيبة لأهل الموتى والجرحى، لا كمان كانت مصيبة للناس الغلابة اللى حظهم مخليهم معتمدين على المواصلات فى شبرا الخيمة - محطتى كلية الزراعة والمؤسسة - اللى حصل انى كنت مروحة مع اختى من مصر، القاهرة يعنى، ودا طريقنا المفروض بناخد ميكروباص من موقف اسمه كلية الزراعة ودا بيمر على المؤسسة ودى مركز جامد جدا للمواصلات بين القاهرة والقليوبية.. جرحى القطار تم نقلهم لكذا مستشفى منهم مستشفى النيل، ودى مستشفى تابعة للتأمين موجودة فى المؤسسة.. يعنى بالظبط كده قصادها كل المواقف وكل الطرق اللى سدوها ووقفوها منهم لله اللى ما يتسموا ولا يوعوا يطلعوا فى التلفزيون تانى

انا مروحة مع اختى من مصر زى ما قلت، خرجنا من المترو وجينا نركب ميكروباص مالقناش ولا واحد.. ولا حتى اتوبيس ولا عجلة.. ولقينا امم من البشر واقفين، قلنا نتمشى شوية كده خطوتين قدام قد 200 متر نصطاد ميكروباص، واحنا مش فى بالنا ان البلد كلها واقفة.. كل اللى ملاحظينة ان الطريق المعاكس للطريق اللى احنا ماشيين فيه واقف والعربيات واقفة ورا بعضها مفيش اى حركة.. مشينا ال200 متر وفى ناس ماشية بردو فى الطريق.. رحنا لقينا جحافل بشرية بردو.. بصينا لبعض وضحكنا وقلنا هو يوم طويل الظاهر، وماوقفناش، قلنا نتمشاها لحد المؤسسة ودى حوالى 2000 متر ونوصلها - طلوع روح يعنى -، وطبعا كنا ماشيين وحاولينا وورانا وقدامنا طابور بشرى طويييييل

قول ربنا كان كريم معانا، ومن حيث لا نعلم لقينا مينى باص بينادى بنها.. يا مسهل يا رب، وجه وقف قصادنا اول ما نادى، ركبنا جرى وفى ثوانى المينى باص اتزحم.. طبعا لو مكنش وقف قصادنا مكناش عرفنا نركب، مشى المينى باص ولف وبقى فى الطريق التانى اللى هو واقف اساسا ، طبعا مكنش مهم بالنسبة لى المهم اننا لقينا كرسيين ان شاء الله نوصل الساعة واحدة صباحا

واحدة واحدة الطريق بيمشى ببطىء جدا، فين لما وصلنا بالظبط قصاد المستشفى.. لقينا الطريق قصادها مردوم عربيات سودة.. وفى اللحظة دى بالظبط كان الأخ الطويل اوى رئيس الوزرا - والله ما انا مسمياه - خارج من بوابة المستشفى وحواليه كتاكيت ببدل وشو جامد ، بقى انت بقى اللى موقفين عشانك البلد؟؟؟ حسبى الله ونعم الوكيل... انتو لا بيهمكم بشر.. لا ميتين ولا احياء... خطوتين كمان ولقينا زحمة عربيات سودة تانية وأحد الركاب ورايا بيقول.. " اهو واحد تانى ابن *** موقفين له الطريق" وخد عندك تعليقات من كل ركاب المينى باص على حادث القطار وعن الحوسة اللى محتاسينها دلوقتى فى المواصلات

ربك عجل بالفرج، والراجل الطويل مشى، والاشارة اتفتحت وكأنها زفة، كلاكسات م اللى ودانك تتوجع لها.. واتفكت الازمة.... اساسا اساسا طريق مصر اسكندرية الزراعى طريق ما يعلم بيه الا ربنا... اوحش طرقك يا مصر.. اختناقات مرورية دائمة وخصوصا عند كوبرى قليوب.. حوادث م اللى تخليك تقرا القرآن كله وانت خارج م البيت

ومش كفاية ان دا طريق غبى كمان عشان رئيس الوزرا يروح يزور المرضى فى المستشفى يوقف الطريق والأرزاق.. فى حكومة محترمة تعمل كده.. هى الناس رخيصة عندكو اوى كده؟؟

بلاش.. فى حكومة محترمة تسمع من الراديو بتاعها كلام مختلف عن الكلام بتاع التلفزيون ، كمان وزير النقل يقول معلومات، ومحافظ القليوبية يقول كلام تانى خالص وارقام تانية خالص

طيب لما ربنا يحكم علينا ونضطر نفتح النيل للأخبار لأن الحادثة محلية ومش هتابعها تفصليا قناة غيرها، يحترموا نفسهم بقى ويقدموا شغل نضيف، اسئلة هبلة، معلومات خاطئة، حتى مصور الكاميرا بيجيب مناظر مؤذية المفروض يعنى يرحم عنينا ، لكن دا كان بيتفنن فى البحث عن أشلاء وأجساد معجونة بالقطر ويصورها

اما محافظ القليوبية العزيز بقى همه الوحيد انه يطلع يقول، انا بلغت الرئيس مبارك باللى حصل وهو متابع.. ماشى يا عدولة بلغنى بالتفاصيل اول باول يا حبيبى، ياللا باى بقى وبينا موبايلات

المحافظ تانى، يقول ان كل عربيات الاسعاف اللى فى المحافظة اتجهت لمكان الحادث.. دا معناه مثلا - لو كان كلام صحيح - ان لو حصلت اى ازمة ما او اى حد احتاج عربية اسعاف فى بقية المحافظة مش هيلاقيها؟؟

اللى اعرفه كمان ان اى حادثة بيتحط لها كوردون ويتمنع اى بنى ادم من الاقتراب، ويبتدى الناس بتوع الانقاذ يشتغلوا، انما تشوفوا المنظر على النيل للاخبار، الناس واقفة حوالين وبين وفوق القطر.. ناس بتتفرج وناس بتشيل وناس واقفة قصاد الكاميرا.. مولد وصاحبه غايب

وبعدين مع عدم احترامى لكل الفاسدين اللى ماسكين الحكومة، يقيلوا رئيس هيئة السكك الحديدية ليه؟؟ الراجل لو مسئول يوقفوه ويحققوا معاه، انما يقيلوه كده بعد كام ساعة من الحادثة، دا اسمه ظلم.. واذا كان فى حد المفروض يقال من غير محاسبة يبقى وزير النقل ورئيس الوزراء.. ولو فيهم واحد حاسس بحرقة قلب الناس، كان قدم استقالته

25 comments:

  1. لو جينا نتكلم عن الاهمال , موجود من زمان وفى كل حتة , وكل مرة بنقول نفس الكلام وبعدين ولا اكن حاجة حصلت

    لو جينا على اتصال المحافظ , ماهو لازم يتصل ماهو قصر مصر الجديدة مش اكتر من سنترال كبير , وبعدين ذاكان بيمشى المفاوضات ويشوف الحرب بالتليفون مش هايطمن على حادثة بالتليفون - وعلى رنات بقى ياعدةلى , كل حادثة ادينى رنة علشان اجهز كلمة

    لو جينا لقفل الطرق , ياستى دى بسيطة , على لااقل ابو طويلة ماقفلش وسط البلد , زى مابيعمل دايما

    لو جينا للناس ومصالحهم , والله على رأى واحد " انت من قلة مندسة اسمها الشعب " مصالح مين , انا الشعب والشعب انا

    ReplyDelete
  2. انتي بتتكلمي في موضوع مبيجيش علي بالهم خالص
    يا بنتي دا لما صاحبنا بيعدي القاهره والجيزه كلها بتقف

    والله يا بنتي لو في دم وحساسه كنا سمعنا عن الاستقالات دي كتير من زماااااااااااااااان

    علي فكره انا مش عارفه اكلمك خالص يا زيزي موبايلي في حاجه بايظه انا بعتلم ايميل موصلش ولا ايه؟؟؟

    ReplyDelete
  3. فعلا عندك حق المفروض وزير النقل يستقيل كفاية المصايب ال حصلت في عهده
    الاول حادثة العبارة وبعدين قطر قليوب واليوم ال بعده على طول كان في حادثة قطر تاني بس كانت صغيرة اتجرح فيها اتنين
    طبعا ده غير الحوادث ال بتحصل على الطرق السريعة كل يوم

    ReplyDelete
  4. بصي يا زينب....انا معاكي ان الحكومة مهملة وفاسدة وبنت ستين كلب...بس احنا برضه مشتركين في الخطئ....طيب بالراحة هاقولك اهه ازاي.....فيه واحد ساكن في العمارات اللي قدام الحادثة اتصل بالاسعاف فال.......اللي قاعد في الريسبشن رد عليه وقاله:انت بتهزر عالصبح؟اقفل السكة! والعربيات وصلت للمكان بعد حوالي ساعة ونص(تقريبا بعد ماخدوا اذن الريس)وبعد الزيطة بتاعة الحادثة بحوالي يوم حصلت حادثة اصغر اتصاب فيها اتنين(طبعا مش هايحخدوا اي حاجة علشان ماكنش فيه ضجة) وكمان في سوبر جيت عمل حادثة في سيناء كان متروس يهود وفي دقايق وصلتلهم زفة اسعاف من مصر واسرائيل(اسرائيل لوحدها دخلت 40 عربية)وبعد ده كله الناس ساكته...شفتيش مظاهرة لاهل المصابين والقتلي؟...طبعا لا.....علشان احنا شعب يتمتع بعقيدة متسامحة لدرجة الهبل.....احنا بيحصل فينا زي ماليهود بيعملوه في لبنان(قاعد في بيتك هاتموت تخرج من بيتك تموت برضه)وبعدين تفتحي التلفزيون تلاقي شيخ متخلف طالع يهدي في الناس.....يبقي نستاهل ولا لا؟

    ReplyDelete
  5. انا نسيت اقول حاجة....انا ساكن في عمارة علي يمين عمارة المرشد بتاع الاخوان وعلي شمالي البرج اللي كان ساكن فيه سافيرنا اللي ادبح(الله يرحمه)لما جه احمد ابو الغيط يعزي عيلة السفير الشارع وقف....انا ساكن في شارع متفرع يعني مش في سكته(مش شارع عمومي يعني)يعني جاي يقرفنا بقصده....وساعة الانتخابات بتاعة مجلس الشعب الاخوان جم عملوا مظاهرة للصبح وانا في ثانوية عامة وساكن في الدور الاول ومابعرفش اذاكر من صوت الشارع الاول اصلا....الافظع بقه...زايام الامتحانات المرشد جوز ابنه وعمل الفرح في الشقة بتاعته...3 ايام بلايليهم في وسط امتحانات ثانوية عامة وانا مش عارف اذاكر....البلد ديه مافيهاش احترام للخصوصية ولا لحقوق البشر....انا في رمضان اللي فات (اليوم اللي قبل الاخير)كنت داخل الشارع بتاعي انا وابويا بالعربية (حوالي متين متر)والله العظيم قعدت ساعة ونص واقف مكاني وبعدين رحنا نركن علي بعد اتنين كيلوا....ده كله ليه؟جامع جديد فتح صوت المقرئ حلو الناس جاياله من بولاق والحدايق وانا اصلا في مدينة نصر.....الشارع كان متروس عربيات.......ديه ثقافة متخلفة دسها النظام الفاسد والناس بقه بالنسبالها الزحمة والصوت العالي ده حاجة عادية جدا..........شكرا

    ReplyDelete
  6. لو أهمل عامل في السكة الحديد .. الناس كلها حتقول دة غلبان..
    لو أهمل مدير عام في السكة الحديد الناس كلها حتقول دة كبش فدا.. دة غلبان..
    لو أهمل الوزير حيقول معنديش ميزانية ، واطبخي يا جارية كلف يا سيسي.. دا أنا غلبان..

    بالمنطق دة حنكتشف إن مفيش إهمال ولا حاجة ، ويمكن إبليس يطلع هو لاخر .. غلبااااان!

    ReplyDelete
  7. زيزي في كام نقطه احب اوضحها:-

    أولا : ان لو عملوا كردون علي الحادثه واستنوا بتوع الانقاذ كان القتلي بدل 58 كانوا بقو الف وتنميه تمنيه وخمسين
    لان الانقاذ جه بعد ساعه

    ثانيا : انا مش عارف الشعب المصري ده النداله اللي فيه جايبها منين مش كفايه ابو طويله بيزور المصابين لأ وكمان عايزينه يقف ينظم المرور ... طمع لأ اخص عليك يا شعب

    ثالثا: انوا ما شفتوش زحمه انا ساكن جنب المطار ولما الغالي مجرد انه يفكر يتحرك بس المنطقه عندنا كلها بتتقفل ولا حركه ونفس الكلام لو كوندي ولا اي حلوف تاني جاي زياره

    ReplyDelete
  8. تصدقى انا استغربت اوى من خبر اقالة رئيس هيئة السكة الحديد لانه حاجة من الاتنين اما مظلوم ومالوش ذنب وفى الحالة دى حرام يقال عن منصبه واما هو السبب و فى الحالة دى بقى واجب يتحقق معاه ويتحاسب ويعاقب مش اقالته هيا العقاب الكافى
    اما بالنسبة لموضوع تشريفة الوزرا والناس اللى بتعطل المرور انا مقدر مع انى مش من القاهرة بس هقولك على حاجة اكتر جبروت من كده
    انا من المنصورة
    و السيد المبروك حفظه الله ورعاه وزاده طغيان علشان ياخده اخذ عزيز مقتدر كان نازل عندنا علشان يفتتح مجمع المحاكم الجديد
    المهم
    قبل زيارته بييجى شهرين
    مسكوا الطريق اللى هيمر عليه بسلامته
    اسفلت واعمدة انارة ( الطريق كان طول عمره خالى من الانارة لو مات فيه قتيل ما حدش هيحس بيه) دلوقتى ما شاء الله بقى الليل فيه زى الضهر
    كل ده معروف
    انما نفاجأ قبل زيارته بيومين بجيش من الشرطة بيمشط الطريق بيت بيت وقناصين على اسطح العمارات وبهدلة للى رايح واللى جاى برغم ان المنطقة كلها مصالح حكومية بيتوجه لها الناس على مدار اليوم
    و فى يوم الزيارة بقى
    ممنوع عربية واحدة تمكشى ع الطريق مش اثناء مرور الموكب وبس لا كمان لحد ما يحل عنا بسلامته
    والناس قعدت فى بيوتها يومين لا شغلة ولا مشغلة
    وسواقين التاكسى قالوا ناخد اجازة ونريح نفسنا من الهم والمواطن غلبان لا قادر يقضى مصالحه ولا قادر يقول حاجة واحنا لا عايزينه يجيلنا ولا يوعى ييجى تانى انشالله يا رب
    لما قريت موضوعك افتكرت قصة شهيرة لامير المؤمنين عمر ابن الخطاب
    غير قصة حكمت فعدلت فامنت فنمت يا عمر
    هيا قصة الخليفة وهو بيمر بمجموعه من الصبيه لما شافوه كلهم جروا الا واحد
    فلما ساله عمر ابن الخطاب لماذا لم تجرى مع الباقين
    فقال له الغلام
    لم تكن الطريق ضيقة فاوسعها لك , ولم افعل ما اخاف منه فافر منك
    فابتسم عمر وقال الحمد لله الذى اعز الاسلام بهذا الصبى
    وفى النهاية كل حاجة فى البلد بقى تنرفز وتتعب الاعصاب جت على الشوارع وموكب الوزير

    ReplyDelete
  9. طيب ده رئيس وزرا...يعني هه ياللا نمشيهاله المرادي...بس ايه هو وضع ماما سوزان الدوستيري علشان الناس تتعطل لما تيجي تعدي....وبعدين علي فكرة نظيف ده علي الاقل بيعطل طريق واحد...لكن بسلامته الحمار بتاعنا او ابنه جمال حبيب الملايين لما يجوا يعدوا بيعملوا كذا موكب....كتموييه يعني وكل الطرق بتتقفل

    ReplyDelete
  10. هتكلم عن الاعلام في الحادثة دي
    انا شفت في احد اللقاءات التلفزيونية المستشارة الالمانية وهيا قاعده متكتفة عادي خالص مفيش رجل على رجل وواحد قدامها لابس نضارة سودا ومرصوع وحاطط رجل على رجل ورجله قربت تتحط في وشها
    تعرفوا ده مين .. مقدم البرنامج
    وكمان بسمع عن وزراء في انجلترا بيقفوا في الطابور
    وعن وزرا بيمشوا في الشوارع وبيركبوا عجل
    عادي ماهو موظف زي اي موظف

    ReplyDelete
  11. اول حاجة:عاوز اتطمن عليكي يا زينب...مالك مابقتيش تردي علي التعليقات كده ليه...انتي عيانة ولا ايه؟
    تاني حاجة انا عوز اعقب علي كلام احمد:لو افتكرت امن سنتين وزيرة خارجية دولة اوروبية(مش فاكر انهو دولة ومش عاوز افتي)لما اتقتلت وهي خارجة من سوبر ماركت بسكينة...كانت من غير اي حراسة وخارجة عادي جدا تعمل شوبينج.....وابو طويلة ده يوقف شارع بحاله...ليه يعني؟

    ReplyDelete
  12. عربى
    انا كويسة الحمد لله جدا، بس والله كان بقالى 36 ساعة ما فتحتش الكمبيوتر لما بقيت هتجنن، وااول مافتحته اهو برد على التعليقات
    --------------

    انسان
    انا بجد يومها قرفت اوى، يمكن الانى مش من سكان القاهرة فمجربتش قبل كده معاناة المرور اللى يتقفل عشان واحد مهم بيعدى
    --------------

    شيماء
    الاميل وصلنى بس انا مشفتوش غير بعدها بكذا يوم الانى ما فتحتش الهوتميل كتير.. ما انتى عارفة، ابقى ابعتيلى اى حاجة بعد كده على ياهو او جي.ميل - وهبعتلك النهاردة الايميل اللى فيه اللينكات :)
    -------------

    هيرو
    لما كنت بسافر كل يوم على طريق مصر اسكندرية ده كان لازم كل يومين تلاتة امر على حادثة جديدة.. والمسافة اللى بسافرها على الطريق ده كلها على بعضها ما تجيش تلاتين كيلو تصور بقية الطريق بأه
    --------------

    عربى
    انت بتحكى مأسى يا بنى.. بس حتى المظاهرات دلوقتى مبقتش تجيب فايدة نهائى.. دول حتى يمكن ما يعفروش ان فى ناس عملت مظاهرة عشان حاجة.. يبقى ممكن يفكروا اننا جوانا غضب كبير كده
    ---------------

    قلم جاف
    لا يا قلم انا مااقصدش برفضى لاقالة رئيس هيئة السكك الحديدية انى بعتبره كفش فداء.. انا اعرف ان اى حد مشكوك انه غلطان يتحقق معاه ولما يتم اثبات اهماله يتحاسب.. انما لما يقيل، فهو لو مش غلطان يبقى اتقدم كبش فدا، ولو غلطان يبقى بيحموه من الحساب بالاقالة وفى كلتا الحالتين دا ظلم.. لأننا لا نصرناه ظالما ولا مظلوما
    ----------------

    نور
    طيب الناس بتوع الانقاذ وصلوا المفروض بأه عشان يتم الانقاذ بشكل سلس وعلمى يبعدوا الناس.. يعنى مثلا هما مش جايبين عدد كفاية ومحتاجين الشعب اللى معندوش اساسا ثقافة الاسعافات الاولية يساعد فى الانقاذ؟؟؟
    --------------

    aichany
    حاجة زى كده بردو حصلت ايام ما افتتح مكتبة اسكندرية.. اخلو المنطقة من السكان وادوا طلبة المدارس والكليات والمجاورة والموظفين اجازة اسبوع، ليا بنت خالتى حكيت لى الحكاية دى ايامها بقيت بضررب كف على كف... ما قصة سيدنا عمر بردو دايما تيجى على بالى لما اسمع عن اى حد بيمر فيوقف مرور الناس.. فعلا حكمت فعدلت فأمنت فنمت يا عمر
    --------------

    احمد
    كفاية يا احمد ما تحسرنيش على حالنا اكتر ما انا متحسرة.. المسئولين عندنا بيشوفوا الاسئلة الاول ويعدلوها قبل ما يتسئلوها

    ReplyDelete
  13. عندك حق في كل كلمة قولتيها
    البلد دي عاوزة حملة نظافة علي اعلي مستوي تلم كل الي مسكنها في الزبالة

    ReplyDelete
  14. احنا شعب مسكين
    عارفه الناس اللى كانوا حولين القطر دول كانوا اول ناس بتحاول تنقذ لحد مالقوات المسلحه وصلت وألأسعاف أصل الشرطه بتاعتنا تخصص تعذيب مواطنين
    ملهمش فى أنقاذ النفوس البريئه
    كل مدى مالوضع بيتعقد
    أنا بفكر أهاجر
    أيوه أجى عندك بنها
    نبعد عن الزحمه
    بس انتى كل يوم رايحه جايه
    بين القاهرة وبنها هو المشوار مش طويل
    أنا كليتى كانت فى أسكندريه
    وأتبهدلت فى المواصلات
    سلميلى على أختك
    سلام رايحه أتغدى

    ReplyDelete
  15. فوضى
    مشكلتنا إننا بلد فوضوي جداً يا مصرية
    فوضى في إدراة ممتلكلتنا
    وفوضى في معالجة الأزمات
    وفوضى ومعاها فساد يعني داهية وبتدق على دماغنا كل حبة
    ربنا يعينا وياخدهم وقطر يدوسهم البعدا

    ReplyDelete
  16. مش هعلق علي أي شئ ف الحادثه "او المهزلة" ان صح التعبير لان الكلام فيها زي عدمه .. الحمد لله ان خطيبي يومها كان مسافر القاهره و مالقيش حجز ف القطار و ركب السوبر جيت .. الحمد لله رب العالمين .. انما هرد علي نقطة أقالة رئيس هيئة السكك .. ده شئ طبيعي لان ضروري يكون فيه كبش فداء .. لازم حد تطير رقبته علشان الناس تهدي .. و قال يعني الناس هدت .. بالزمة وزير المواصلات ده جبلته ايه ؟؟ كام حادثه مواصلات السنه دي و هو ف الطراوة ؟؟

    الشئ الاهم من كده .. ان الرئيس أمر بدفن الجثث علي نفقة الدولة .. شفتوا الهنا اللي احنا فيه ؟؟؟؟؟

    مش عارفه اقول ايه بجد .. و الله ما قصروا .. لكم الله يا مصريين !!

    ReplyDelete
  17. المهم البقاء لله..ولو اني موصلنيش خبر الوفاة "اللي ملهاش علاقة بالحادثة" لكن حبيت أعزي يعني..لله ما أخذ وله ما أعطى وكل شيء عنده بمقدار، ولا أراك الله مكروها في عزيز..

    ReplyDelete
  18. القطر هوَّ المُتهم
    ________


    اللى مات -- مات واندفن
    والحكومة ( الله يكافئها) سدّدت حق الكفن
    والمصابين ع السراير مرتاحين
    والملايات النضيفة
    والكبرتات الجديدة بتتفرش
    لجل تبقى الصورة حلوة ع الشاشات
    كل لحظة نشوف وزير بيقول خلاص الأمن أصبح مستتب
    واتنظح دم الضحايا م البرك
    والنشاط الوقت عادى فى (السكك)
    كام وزير ( الله يعينهم) قدّمولنا احصائية عبقرية باللى ماتوا
    واللى لسة
    وبفصايل دم كل المتصابين
    وبعدد كل اللى شافوا الحادثة من فوق السطوح
    كام وزير الله يعينهم
    كل حبّة يغيّروا فى الإحصائية
    مرة حذف وألف مرة بالإضافة
    و (التضامن لاجتماعى ) حددت كام ألف لولاد القتيل ،
    والمصاب رح يتعفى من دفع حق القطن والشاش والفتيل
    *****عبدالناصر حجازى *****

    ______________________________

    يا جماعة الأمر محزن
    والسؤال :
    هى روح المصرى أرخص حاجة ليه ؟؟
    شفتها ف بورصة جنابه والله مش وِصلت جنيه
    والجبان إبن الــ مواطن بالفساد مادد إيديه
    والخراب فى ضلوعنا يسجن
    ياجماعة الأمر مُحزن
    والسؤال :
    إمتى هايغور من قُصادنا ؟؟
    والاجابة بسيطة جدا كلمة واحدة ( إن أردنا )
    إن صرخنا بشوق وهِمة
    بس كرباجه المُزيف , زِيفُه قاتل
    وإغترابنا من بلدنا أيوة مُمكن
    ياجماعة الأمر مُحزن

    ******* محمود البنا ******

    ReplyDelete
  19. أشكر ..مجرد ..انسان
    لأنه لم ينسب هذا الكلام الحلو لنفسه وذكر لنا .. المصدر
    رومانتيك روز ..كلمة بالزمة خطأ كده هيا بالذال بالذمة
    آسف لأني انتزعت حق التعليق من صاحبته فقط اردت الشكر في الاولى والتوضيح في الاخيرة

    ReplyDelete
  20. انتي رجعتي في كلامك بالنسبة ل"بتكون"ولا ايه...مالك يا بنتي مش مهتمة بيها كده ليه ومنفضلها علي الاخر

    ReplyDelete
  21. lo shofty Salah SALEM el sob7 ya benty hatkrahy el 3esha weli 3aishenha w eli 3aizen y3eshoha... bel monasba el Blog bta3tek feha something wrong w everytime i open it my Antivirus catch a backdoor worm n' alert me! check el 7ekaia di coz it may causes harm to other's PC's, salam w tesba7y 3ala WATN.

    ReplyDelete
  22. أشكرك للفت النظر و التوضيح و التصحيح يا احمد .. أفادكم الله :)

    ReplyDelete
  23. روح المصري رخيصة
    مش بس عشان الحكومة مسترخصاها
    عشان احنا مسترخصين بعضنا البعض
    و
    عشان روح غير المصري رخيصة برضك

    مش عاوز اتفلسف كثير
    بس انتم عارفين؟
    انا ساعات بحس اننا بنجني اللي بنعمله
    وانا مش بشيل العبء من علي الحكومة والوم الضحية

    بس فيه حاجة غلط
    مهما بنعمل فيه حاجة غلط

    ReplyDelete
  24. الكلمة ايد الكلمة رجل الكلمة باب
    الكلمة نجمة كهربية في الظلام
    جاهين

    ReplyDelete
  25. ناردين
    ماشى حملة نضافة، مش مهم هوللوكست، اى حاجة بس تتغير
    ----------------

    اوسا
    تشرفى وتنورى يا اوسا.. انتى بنوتة لذيذة على فكرة ودمك خفيف :) اقولك بالهنا و الشفا، متأخر بس عادى بالهنا والشفا لكل غدوة وفطار وعشا وايس كريم كمان
    ----------------

    حائر
    المشكلة انهم ما بيوش ناحية القطر، ندعى بقى الطيارة تقع بيهم
    ----------------

    رومانتيك روز
    مش عارفة اقولك ، انتى اكتير حد عارف انا قرفانة ازاى اليمين دول.. عايزة اعمل حاجة.. اى حاجة.. اخبط راسى فى الحيط حتى
    -----------------

    يحيى عياش
    ربنا يكرمك يا عياش :)
    -------------------

    مجرد انسان
    فعلا رب ضارة نافعة للادباء، دايما مؤمنة ان الادباء ما بينتعشوش الا مع المصايب :) وبصراحة كلامك يوجع.. ميرسى اوى

    -----------------

    احمد
    اتفضل البيت بيتك، خد راحتك وعلق على اى حد واى حاجة .. براحتك يعنى
    -----------------

    عربى
    لا مارجعتش فى كلامى، وهرد على كل تعليقاتك هناك، انا بس بنسى
    هى بس مشكلة بتكون انها مخصصة لحاجات معينة، مش حكاية اهمال او اهتمام، حكاية ان بتكون عملاها عشان اكتب عن الحاجات اللى اثرت فيا ، وبصراحة الواحد ما بقاش قادر يقعد يفكر مع نفسه ويتأمل اى حاجة، يفوق من عبارة يدخل فى قطر
    --------------------

    عز
    انا معرفش والله ايه حكاية الباكدور وورم دى، فى كذا حد قاللى على حاجة زى كده بس مش بيظهر عندى خالص، ومعرفش اعمل ايه، او ايه الحل

    لو حد يقدر يساعدنى.. فليتقدم ربنا يخليكوا :))
    --------------

    بن عبدالعزيز
    وانت مبقتش عارف ايه الحاجة الغلط يا شريف؟ ايه الحاجة الغلط؟؟
    ----------------

    طارق
    متشكرين يا طارق :) ولو انى مش فاهمة ايه العلاقة
    :D

    ReplyDelete