9/18/2006

تاج من يحيى وموشو.. المدون لما يسعد

تاج من يحيى عياش.. ومن موشو.. ياللا مخلوش الواحد يعرف يزوغ:

هل أنت عقلاني أكثر أم عاطفي؟

ايه ده من اولها كده تخبيط.. دا السؤال ده لوحده عشان يتجاوب عايز تحليل نفسى كامل عشان اتحدد كونى عقلانية وللا عاطفية، ومع ذلك هتجاوب معاك وهقولك انى "بناء على الاجابة دى يتضح انى عقلانية فى الاول وعاطفية فى الاخر".. جميل

صف شخصيتك فى خمس كلمات؟

صعب اوى السؤال ده.. ومع ذلك ممكن اقول انى اعرف عن نفسى انى.. خيالية جدا، متسامحة بهبل، ملولة بعنف، بفكر كتير، متسرعة اوى.. ، عموما اى صفة عندى بتبقى بزيادة شوية

اذا كان لكل انسان شبيه من الحيوانات, أى حيوان يشبهك؟

واو.. حلو السؤال ده.. يتفق من احترامى للحيوانات ككائنات مشاركة لينا فى الكرة الأرضية، ومع ذلك انا مادرستش عن صفات الحيوانات عشان اقول ايه اللى بيشبهنى، تقصير منى يمكن

ما هو لونك المفضل؟

والله على حسب.. يعنى فى اللبس احب الرمادى والبيج، وفى شغل الجرافيك جرافيك احب الاورنج، وفى الديكورات احب الزيتى والابيض، وفى الورد احب الاصفر، وفى البحر حب الازرق والاخضر.. وهكذا لكل لون مكان وحالة

هل أنت أجتماعى اكثر ام منعزل؟

اجتماعية لو اضطررت لذلك... افضل العزلة.. وافضل على العزلة الاجتماع بالمقربين

ماذا يشكل أصدقائك بالنسبه لك؟

اصحابى دول روحى روحى روحى.. نصى التانى من غير مبالغة ، والنص الاولانى كمان بالمبالغة

هل أنت مرتبط بعائلتك؟

دا سؤال يتوجه لواحدة زيي، يا بنى انا اتربيت فى الحضانة على اغنية
i love father, i love mother, i love sister and brother

هل أنت عصبى أكثر أم هادئ؟

دا اسهل سؤال.. عصبية

هل تفضل فصل الشتاء أم الصيف؟

لو السؤال مقتصر على الاتنين دول بس، هقولك احب الشتا اكتر، بس لو اسقط الخريف عمدا فاحب اقول انى افضل الخريف على كل الفصول.. وسبتمبر على كل الشهور (ماعدا مارس طبعا ) ههههههه

متى أخر مره بكيت فيها؟ولماذا؟

من كام ساعة كده... عادي يعنى، كنت قاعدة مع رشا صحبتى وافتكرنا رمضان وافتكرنا ان احمد اخوها كان بيحب يعلق الزينة والبالونات فى البيت احتفالا برمضان.. ودمعتين نزلوا.. وقرينا الفاتحة لما اتفكرناه.. بس

الضحايا بتوع المرة دي:

لا لا.. انا مش هعاقب حد المرة دى.. ولو ان كان فى حد عايزة اعاقبه بس ياللا رمضان داخل ودا العزيز الغالى

5 comments:

  1. انا احيك علي كتباتك الا فيها حاجات كتير بتمسنا وحسين بها بس للاسف ممكن نكون سلبين في التعامل معاها بس اكيد رايح يجي اليوم الا رايحين نتخلص من العادات السيئة الموجودة بكثرة في مجتكعنا لان احنا وبصراحة بيجمعنا حب مصر بس كمان اكيد ان في كتير مننا انظلم من العادات السيئة في مصر بس احنا علشان حبنا في بلدنا يا ريت كل واحد فينا يقوم بدوره علشان مصر تنهض ونقدر نرفع راسنا بين الامم
    علي فكرة اجابتك للتاج كانت ذات طابع دبلوماسي احنا عزين حاجات من جواكي وكمان عايزين اسئلة اكتر لان انا شايف انك بتعبري كويس عن بنات حواء واحنا ولاد ادم عندنا استفسارات كتير عايزن نعرفه منكم يمكن لو وحدنا افكارنا او علي الاقل التقينا عند نقطة معينة اكيد حاجات كتير رايحة تتغير
    معلش طولت شوية بس انا باطلب منك طلب اكتبي اكتر عن بنات حواء لا كلامك بيوصل فعلا
    الي الامام دائما

    ReplyDelete
  2. أدعوكم لزيارة مدونة الكاريكاتير
    http://www.caricatooz.blogspot.com/
    مع تحياتي
    د. أشرف حمدي
    رسام كاريكاتير

    ReplyDelete
  3. المهاجر

    شكرا على الكلام المشجع اوى ده :)

    اجابتى مش دبلوماسية خالص على فكرة، فى حد دبلوماسى يقول عن نفسه انه متسرع وخيالى
    هههههههه
    ---------------

    د.اشرف حمدى
    انا شفت المدونة فعلا ومبروك علينا مدونة كاريكتير جديدة

    ReplyDelete
  4. ازيك يا فندم :)
    انا آسف والله انا عارف انه تاج رخم :)

    ReplyDelete
  5. الله يرحم احمد وكل عام وانتوا بالف خبر

    ReplyDelete