جاتوه الفقرا وهدية كمان

لقيت نفسي فاضية شوية قلت اقولكو على حاجة بقالي فترة بشوفها وبنسى اقول. بس الأول احب اعرفكم إن التدوينة دي غالية جداً لأني بكتبها وأنا أعصابى هتنهار خلاص. أصل الكي بورد بتاعتي باظت وبتهنج الجهاز ففصلتها وجهازي النهاردة من غير كي بورد، طبعا هتقولولي وبتكتبي أزاي التدوينة دي. وأكيد اللي مش هيسأل السؤال ده هيكون عمل زيي وافتكر إن أول ما اتعلمنا ويندوز عرفنا إن في كي بورد ابليكشن موجود فى اكسيسوريز اكسيسابيليتي فأنا ضرب في دماغي أجرب أشوفها كده. وطبعاً أنتو عرفتوا دلوقتي سبب الإنهيار العصبي الوشيك. هتقولولي طيب إيه اللى جبرك تكتبي تدوينة دلوقتي ماتستني لحد بكرة لما تجيبي كي بورد جديدة ، أصل المشكلة كمان إن شغلي واقف بسبب الكي بورد ومش لي مزاج أشتغل بالكي بورد العورة بتاعة ويندوز فقلت أهو أتسلى بيها وأدون.

المهم أنا بأه هتشل وخصوصاً مع المدخلات اللى بتحتاج شيفت. ومع ذلك بردو مصرة إني استخدم الألفات المهمذه وعلامات الترقيم. يعني أنا بردو هشلني قريب من دماغي اللي ماشية شمال دي.

المهم بأه كنت عايزة احكيلكوا على عربية نص نقل مقفلة وجواها قطع جاتوه مكشوفة على المارة في الشارع ويافطة متعلقة على العربية ... اليافطة بتقول:

دستة جاتوه 4 جنيه
دستة جاتوه لوكس 6 جنيه
تورتة صغيرة 5 جنيه
تورتة كبيرة 7 جنية
وكمان هدية

طبعاً مش شبه الصورة دي بالمرة

هااا! أسيبكم تتأملوا اليافطة وللا أكمل كتابة. عموماً هكمل عشان على ما اكتب سطر واحد هتكونوا فقتوا من الصدمة.
دلوقتي لما دستة جاتوه يا بشر تبقى بأربعة جنيه تبقى مش ممكن تكون مكوناتها هى المكونات الطبيعية للجاتوه الطبيعى يعني استحالة يكونوا استخدموا بيض واحنا عارفين إن البيضة بخمسين قرش وعن خبرة مطبخية الجاتوه بيتعمل بالكيكة الإسفنجية ودي بتاخد في وشها سبع تمن بيضات. وكمان مش ممكن تكون اتعملت بالدقيق المخصوص للجاتوهات ولا غير المخصوص كمان. دا كيلو الدقيق العادي بجنيه وستين قرش حسب أخر نشرة أسعار من مامتي العزيزة. وطبعا مش معقول يكون استخدم لبن أو بودرة الكريمة بتاعة التذويق.. استحالة،

إلا إذا.. إلا إذا كل المكونات اللي استخدمها مسروقة أو انتهت صلاحيتها ومحلات الحلوانية رموها

ما هو مش ممكن يكون دى حاجات تتعمل بتكاليف طبيعية وتطلع بالأسعار دي. وماعتقدش إن يكون فى حد دمه خفيف مسك اليافطة الصدمانة العدمانة بتاعتهم ومسح الصفر من على يمين كل رقم. دا أنا بقالى رمضان بطوله بشوفها. كمان منظر القطع نفسها باين عليها الفقر والنشفان.. ماتفتحتش النفس أصلاً

لا حول ولا قوة إلا بالله وكمان الناس بتقف تشتري. أنا بجد خايفة عليهم. دي أكيد حاجات مضرة وبايظة. باين عليها متاكلة قبل كده

لو حد يعرف حد بتاع تموين مسؤول قولوله يركب المترو وياخد خط شبرا وينزل كلية الزراعة. أول ما يخرج م المحطة هيلاقي العربية واليافطة

أنا تعبت م الكتابة أوى. اخدت ساعة إلا ربع أكتب في الكام سطر دول. عشان تعرفوا إنها تدوينة غالية.. أغلى من الجاتوه