10/25/2006

ذا بوبس: التعذيب فى مصر

فى التصويتات حامية الوطيس الجارية الان على الارض الالمانية المباركة "ذا بوبس" ارجو من كل من ينتمى للتدوين بمدونة او متابعة او تقدير او رفض حتى، انه يصوت لمدونة الاستاذة نهى: التعذيب فى مصر.. هى مرشحة فى قسم مراسلون بلا حدود

وبكل امانة انا بدعوكم تصوتوا لمدونة التعذيب فى مصر، مش لان نهى صاحبتى وكده، لكن انا اعرف كويس اوى المجهود اللى بتبذله نهى عشان تقدر تجيب اخبار فى منتهى الدقة والواقعية وفى موضوع حساس جدا زى التعذيب فى مصر

اول ما عرفت نهى سألتها سؤال.. انتى بتجيبى اخبار التعذيب دى من مجرد حكايات وحواديت وشهود.. قالت لى لا ، دى تقارير موثقة
ومش ممكن انزل فى المدونة حاجة مش مؤكده.. دا لأن كمان نهى صحفية وعارفة قيمة واهمية الخبر الموثق

وكمان لأن موضوع فى خطورة التعذيب دا لازم يكون كلام موثق.. مش هنرمى بلانا على ملايكة الداخلية وأمن الدولة يعنى

ولما سألت نهى بردو انتى ايه اللى خلاكى تعملى مدونة متخصصة بس فى فكرة واحدة وهى التعذيب فى مصر.. اشمعنى التعذيب يعنى

قالت لى لأن التعذيب دلوقتى على ايد الشرطة بقت حاجة عادية عند المواطن المصرى، مش بيحس انها انتهاك لحقوقه وكرامته.. بقى التعذيب والضرب والاهانة حاجة عادية جدا لما تصدر من اى حد فى الشرطة

نهى كانت بتتكلم عن مثال بسيط اوى لما حد مثلا يتضرب علقه فى ليلة فى قسم شرطة مصرى.. حتى لو كان هو اللى رايح يقدم البلاغ

كمان نهى بتدور على اخبار التعذيب المتعلقة بالمعتقلين ولو تصفحتوا المدونة هتلاقوا فعاليات كمان بتحاول تغطيها خاصة بالجزء دا من التعذيب

الاكتر من كده ان نهى هى المسئولة الوحيدة عن المدونة.. هى اللى بتجيب الاخبار وهى اللى بتنزلها.. وانا بصراحة كنت متصورة فى الاول ان المدونة دى وراها مجموعة من المهتمين بحقوق الانسان وكده.. وان جيش من المحررين ورا الاخبار اللى بتنزل تقريبا بشكل يومي

صوتوا لصالح مدونة نهى.. مش عشان كل اللى انا قلته ده.. لكن لأن التعذيب فى مصر قضية محتاجة نلقى عليها الضوء.. .. ودا هيشجع نهى تستمر لما تلاقى مننا رد فعل او صدى للى هيا بقالها شهور بتعمله

فى كمان اصدقائنا المدونين فى قسم "افضل مدونة بالعربى" هتلاقوا مدونين عرب ومصريين جامدين اوى.. ادخلوا صوتوا لهم.. بصراحة الاختيار بينهم صعب اوى :) ربنا معانا ومعاهم

من غير بقى ما تضيعوا وقت .. ادخلوا هنا على صفحة التصويت..
هتلاقوا قسم مراسلون بلا حدود
Reporters Without Borders Award


اختاروا مدونة التعذيب فى مصر وهى مكتوبة بالألمانى معرفش ليه
Folter in Ägypten


18 comments:

  1. المنافسة رهيبة..لكن بشوية مساعدة ممكن فعلا المدونة تبقى الأولى بلا منازع :)))

    بعد ما حطيت صوتي بقت في 3 مدونات واخدين 119 صوت، منهم مدونة التعذيب في مصر :)

    ReplyDelete
  2. اولا كل عام وأنتم بخير

    وثانيا : ان شاء الله هصوت للمدونة وهعمل مجهود فى الدعايه ليها

    وثالثا : حلو اللووك الجديد للمدونه بتاعتك

    وتقبلى تحياتى

    ReplyDelete
  3. I have already done that. It is one of the blogs I follow, and it has indeed a very worthy cause.

    ReplyDelete
  4. أنا فعلا أعطيت صوتى منذ قليل لمدونة التعذيب فى مصر وهذاأقل مجهود نعمله من أجل هذه القضية يا سادة.... فقد رأيت بأم عينى فى التسعينات كيف كان الشرطى يعذب ويتلذذ !!! و كيف كان المصرى يتعذب و يئن !!! ..يجب أن يعلو الصوت لمنع ذلك

    ReplyDelete
  5. انا صوت زى ماحضرتك طلبتى يا فندم
    بس انا طالب منك بما ان ليكى صوت مسموع
    ان يتم التصويت لحواديت رحاب
    لأن مدونتها تستحق اكثر من ذلك
    شكرا


    http://hadouta.blogspot.com/
    اقرءوا هذه المدونة و انتم حتعرفوا

    ReplyDelete
  6. انا عملت دعاية للتصويت بتاع موقع ...التعذيب فى بر مصر
    علشان يبقى الموضع تمام
    و انت كمان ظبطى تصويت لموقع حواديت رحاب

    ReplyDelete
  7. عباس العبد

    مدونة رحاب من اهم واجمل المدونات المصرية فعلا، وزيها من نفس المدونات المنافسة مدونة إيهاث وعمرو عزت وجار القمر، وبشكل شخصى انا بحب المدونات دى كلها، ومش هقدر اشجع على تصويت مدونة واحدة معينة على حساب المدونات التانية
    انا الاختيار بالنسبة لى كان صعب جدا
    وطبعا مش هقول انا اخترت ايه فيهم
    :)

    ReplyDelete
  8. آديني عملت بلوج على ( بلوج سبوت ) يا ستي..و خرجت من الظلمات إلى النور .. و قلتلك قبل الإفتتاح كمان علشان الشربات و الذي منه...

    ReplyDelete
  9. كل سنه وانت طيبه يابنوته
    ...................
    التعذيب قضيه مهمه بس المدونات مش كفايه هي اكيد خطوه مهمه بس مش كل حاجه

    ReplyDelete
  10. This comment has been removed by a blog administrator.

    ReplyDelete
  11. سلام ...كيفيك انشاء الله بخير والله يا عمي انا ما عرفت كيف بدي اصوت الكتابه مو مفهومه بس رح اخلي الاولاد يساعدوني وتشكري على تعريفي بمدونه جديده والله يكون بعونا وبعونكم ويعيد كل الغياب

    ReplyDelete
  12. عباس مشكور والله المدونه كتير حلوه

    ReplyDelete
  13. كل سنة وانتي طيبة
    فين العيدية يا طنط؟


    هو ليه بلو مش بيظهر عندها غير موضوع قديم؟

    ReplyDelete
  14. كل سنة وانت طيبة
    وعيد سعيد
    ان شاء الله كلنا هنصوت للتعذيب في مصر
    مستني زيارتك لمدونتي
    =================
    الامبراطورية المفقودة
    عالم مختلف
    www.lost-empire.blogspot.com

    ReplyDelete
  15. مش عارف ليه يا زينب لما اجي اعمل بابلش بيحصل ايرور...وبعدين الاقي البوست متسيف في البوستينج بس مش ظاهر في البلوج...ولازم اخلي منجي يعمل بابلش
    ممكن تساعديني؟

    ReplyDelete
  16. خلاص العيب عرفته وظبطه
    اوعي تقوليلي شاطر خالص
    :)

    ReplyDelete
  17. علي فكرة يا زينب حكاية التخرش بتاعة وسط البلد هاتنزل عدد الجمعه اللي جاي عند بابا في اخبار الادب
    هم كانوا لسه ماعرفوش ولا ايه مش فاهم(اهمال مهني)بس الظاهر الحكاية هاتتحرك بعد العاشرة مساء

    ReplyDelete
  18. بجد يا احمد
    يا ريت تنزل
    وتبقى انت واخبار الادب شطار خالص :))

    ReplyDelete