1/11/2007

مكتبة القمة.. توجد لدينا جميع ملخصات تالتة آداب

كل سنة وانتو طيبين، اليومين دول موسم امتحانات، مش امتحاناتى طبعا انا خلصت من الموال ده من اربع سنين كده، انما اللى بيصعب عليا البنات فى المترو وهما ماسكين الورق أو الكتب اللى بيراجعوا منها، النهاردة كنت راكبة العربية وحظي كان حلو وقعدت، فكان انى قعدت وسط بنتين، البنت على شمالى كانت ماسكة ورق -تلخيص - وبتذاكر تقريبا حاجة فى التاريخ، اللى قريته كان كلام عن ظهور الحركات الاسلامية والاخوان المسلمين وحسن البنا، أنا قاعدة طبعا عينى على اللى البنت بتذاكره وهى مكنش عندها مانع بصراحة وهى ملاحظة اهتمامى ومتابعتى للى مكتوب واديتنى الفرصة دى بعد ابتسامتين كانوا بينا.. يعنى مثلا أول مرة أعرف ان حسن البنا استمر عشرين سنة متواصلة يبنى فى علاقات ويكون شبكة بشكل شخصى جدا وبمجهود فردى.. الشبكة دى تشعبت بشكل كبير قدر معاه يبنى جماعة الاخوان، وكمان الجماعة ليها قسم المفروض الواحد اللى بينضم ليها بيقوله، انا مش عارفة الحكاية دى موجودة لسه وللا لأ.. المهم قريت كمان ان الحركة كانت الافضل تنظيميا بالنسبة للحركات اللى جت قبلها او بعدها او اثناءها.. كلنا عارفين كده طبعا

على ايدي اليمين كانت بنت بتذاكر من كتاب ، كالعادة الكتاب ورقه غامق وردىء، وكان عنوان الصفحة "حركات رقصة الفرح" او حاجة زى كده يعنى، وبطول الصفحتين اللى قصاد بعض فى الكتاب بيوصف ازاى مجموعة من الراقصين بيأدوا رقصة الفرح دى.. وكان مرسوم كمان رموز للمجموعات وازاى تتحرك، سألت البنت.. انتى بتدرسى فى كلية ايه؟ ، قالت لى تربية رياضية، جميل، بتدرسوا رقص فى الكلية؟ قالت اه ووريتنى اسم الكتاب كان مكتوب عليه الباليه والرقص"...." مش فاكرة الشعبى وللا ايه كده، المهم ابتسمت لها وقلت لها وياترى بتاخدوا الرقص عملى وللا نظرى بس، ردت عليا لأ طبعا بندرسه عملى، قلت لها.. ربنا معاكى فى الامتحان.. ابتسمت لى وهى بتقف عشان تستعد للاتجاه للباب والنزول، ابتسامتها القلقانة فكرتنى بالأيام اللى راحت ومكنتش اعرف انها قد كده جميلة.. وقد كده فاتت بسرعة.. ياللا

27 comments:

  1. كاعاده بوست رائع زى كل تدويناتك
    بجد ايام الامتحانت دى المترو بيقى فيه العجب
    كله قاعد بيذاكر ويحفظ ومحدش فاضى يبص جنبه
    وانا طبعا من الناس دى
    واما حكايه القسم فى الاخوان تقريبا موجوده
    والمترو ده بيجمع شوفتى واحده بتقرا تارخ وبتذاكر عن الاخوان وواحده بتذاكر رقص هو ده المترو اللى موحد المصريين
    وعجبى
    وسلاااااااااام

    ReplyDelete
  2. تعرفي ان حسن البنا أصلا كان بيقابل الناس البسيطة في القهوة و يقعد يتكلم معاهم
    و أتباعه كانوا بيزيدوا يوم عن يوم بالطريقة دي؟

    أنا دهشت جداا لما قريت الكلام ده
    و فعلا جماعة الاخوان المسلمين - مهما يكن رأينا فيها ، فهي أكتر حركة يمكن منظمة جداا و متقنة في التاريخ المصري





    المهم بقى ، أنا غرت م البنت اللي بتدرس رقص في الكلية دي

    المفروض يعملوا دورات في كلية التربية الرياضية في الرقص

    ReplyDelete
  3. تعرفوا انى فعلا مش بعرف اذاكر الا فى المواصلات وبحاول اتغلب على الموضوع ده بالمشى انى امسك الورقتين اللى ملخصهم واقعد اقراهم واذاكرهم واراجعهم وانا بتمشى فى شوارع المنيا الجميله الهاديه ويا سلام بقى لو فى mp3
    ابقى بسمع الاغانى وانا بذاكر بتبقى مذاكره جامده اوى وبتنفع فى اوقات الازمات
    على فكره انا السنه دى فى ليسانس اداب وشدنى البوست اوى لانى بصراحه افتركت ان الموضوع بصحيح انه فى مكتبة تلخصيات لتلاته اداب وكده يعنى
    لكن يلا بقى حصل خير
    ويا ريت تدعولنا بالتوفيق واننا نعدى السنه دى على خير ان شاء الله

    ReplyDelete
  4. كل سنه و كل الناس "الغلابة" اللي لسه بيذاكروا بألف خير .. ربنا يجعلها أخر الاحزان ان شاء الله ..

    يا زيزي يا بنتي فيه ناس كتير بتتعب و الله .. بيذاكروا رقص و يمتحنوا فيه ؟؟ ربنا يكون ف عونهم .. و الله صعبوا عليا ..

    و عجبــــــــــــــي !!

    ReplyDelete
  5. دائما الأيام الماضيه هي الأفضل و الأيام التي نعيشها ليست كالماضي

    ReplyDelete
  6. أنتي ملكيش حل أنا كنت هكتب بوست عن نفس الموضوع تقريبا والمشاعر اللي بتعتمل في أنفسنا لما بنشوف حد مزنوق ومذاكر..
    بس برضه هكتبه إن شاء الله

    ReplyDelete
  7. علا ايام الجامعه اجمل ايام
    الواحد مبيحسش بجمالها الا لما تعدي
    فكرتيني بالذي مضى

    ReplyDelete
  8. يا سبحان الله

    كأنك كنت قاعدة ما بين حركتين .. حركات اسلامية و حركات رقصة الفرح وأنتى الشعب اللى فى النص محتار ما بين الأتنين .. كاره الرقص فى حد ذاته بس خايف الحركات الأسلامية تقوله الرقص حرام .. متهيألى نسبة كبيرة جدا جدا من الناس كده .. نسبة تفوق أى حزب .. الناس فى أعماق اعماقها بتحب الأخوان بشكل أو اخر لكن متوجسة منهم و اللى ساعد فى حب الناس للأخوان الفساد اللى مالوش حد و لا وصف فى كل حتة لكن اللى مخوف الناس من الأخوان سببه الأكبر عدم حيادية الأعلام المصرى فى مواجهة قضية الاخوان .. مثال فى برنامج زى حالة حوار .. أبسط قواعد الأحترام و أعنى بالطبع أحترام عقلية المُشاهد هى عرض الرأى و الرأى الأخر لكن لما بيهجموا الأخوان فى حالة حوار لا يمكن يستضيفوا حد من الأخوان يُرد على الكلام .. فى جُزء كمان من خوف الناس من الأخوان هو الأخوان نفسهم واسلوبهم و ساعات غموضهم أو غموض اللى مش فاهمين منهم ده غير حتة التاريخ و بدايتهم يعنى أنا مثلا اول مرة أعرف معلومة أن حسن البنا قعد عشرين سنة فى الأول وبمجهود شخصى كماااان .. و و

    بس كفاية كده عشان أطلع أتغدى

    تحياتى ليكى يا زينب

    ReplyDelete
  9. fnan_geology
    مش مشكلتى ان فى بنت بتذاكر تاريخ وبنت بتذاكر رقص.. دا جميل ودا جميل
    :) المهم ينجحوا ويستفيدوا
    ---

    شغف
    انا اعرف فعلا انه كان بيقابل الناس ويقعد معاهم بس مكنش عندى فكرة ان الموضوع ده استمر عشرين.. يا طولة صبره

    تعرفى يا شغف.. انا كمان غرت :) ياريت فى حاجة تعلم الرقص (بس تكون بنات فى بنات) زى كلية تربية رياضية كده، وتعلمنا كله بأه من اول البلدى لحد التانجو والصلصا
    ---

    احمد حسن
    غريبة، مع انى بصيت على عربيات الاولاد فى المترو مالمحتش ولو شاب واحد ماسك كتاب وللا ورق
    انا كمان لما كنت اذاكر احب اشغل الراديو، بس مكنتش اعرف اعمل كده ليلة الامتحان وللا قبله على طول، عشان بس اركز :))

    ---

    رومانتيك روز
    ما انتى عارفة يا كوكي الرقص متعب ازاى، دا حتى موصوف للى بيعلموا ريجيم، واللى عايزين يرموا الكسل عن جسمهم ويبتدوا يومهم بنشاط، والللى عايزين يفرحوا ويقضوا وقت سعيد.. طبعا مش مجال للمقارنة بين اى دراسة تانية.. بجد والله يا بختهم
    ---

    كراكيب
    فعلا، انا لما خلصت الكلية، رميت وراها قلة... بس سنتين تلاتة كده وحنيت لها اوى وحسيت انها فعلا كانت ايام اجمل من دلوقتى
    ---

    تسنيم
    كسفتينى يا بنوتة :) انا هستنى اقراك تدوينتك.. اكتبى يا بنتى ورينا المذاكرة بتعمل فى اصحابها ايه
    ----

    واحد من الناس
    طبعا الواحد لو فتح فى الكلام عن ذكريات الجامعة مش هتكفيه مدونيتين تلاتة :) بس الفكرة انها بردو مش هترجع تانى
    ---

    مبرمج حر
    مش حكاية حيرة.. ليه اخدتها انها حيرة?.. وليه تصورت انى واخدة موقف من اى من الحركتين?.. انا بس وصفت اللى لقيته والله فى المترو من غير ما ارمى اى رأى من عندى
    وبعيدا عن التدوينة دى.. اعتقد ان الرقص مفيش حد بيحرمه.. الحكاية كلها فى ان البنت اللى بترقص مين يشوفها وهى بترقص ومين لأ.. غير كده، كل البنات بترقص.. حتى اكثرهن التزاما او تشددا، بيرقصوا على الاغانى اللى بيصنفوها اسلامية

    تحياتى ليك انت

    ReplyDelete
  10. انا عارف انه من النادر اوى انك تلاقى ولاد بيذاكروا اساسا بس انا شايف ان دى ميزه فينا لاننا بنيجى قبل الامتحانات بكام يوم كده ونبدا بقى المذاكره اللى على حق و تلاقينا فى زمن قياسى انجزنا وقفلنا المواد وبنجيب تقدير احيانااما لما نيجى نبص للبنات هتلاقى انهم ممكن يعقدوا يذاكروا طول السنه واليوم بيومه ويجيوا فى يومين الامتحانات وتلاقيهم مقلقين وحالتهم حاله على الرغم انهم عارفين بس قدرات بقى
    الولد تحسى انه مش فارقه معاه عايز يخلص من الكليه علشان يلحق بقى يشوف حياته ويواجه الدنيا يعنى انا عن نفسى امنية حياتى انى اعمل دبلومة بس لو دخلت فى دوامة الدبلومه والجيش قدامى سنييييييييين لحد اما اخلص فى الوقت اللى هتكون البنوته جالها عريس فيه وجابت ولاد امامير وبنانيت
    لكن البنات الشهاده بالنسبه لهم سلاح بيحاربوا علشان يفوزوا بيه
    انا مش بعمل فرق بين الولد والبنت ولا حاجه بس هى دى الحقيقه اللى على الاقل موجوده فى المجتمع اللى عايش فيه

    ReplyDelete
  11. يعنى أيام ما كنا فى الكلية كنا كارهين الامتحانات والدكاترة والربطة والمذاكرة وكل حاجة .. وبعد ما اتخرجنا برضه مش عاجبنا ؟ دى الحكومة عندها حق بقى فى اللى بتعمله معانا. ما هى مهما عملت برضه مش هيعجبنا .. دا حتى الظابط اللطيف اللى كان بيطبطب على ضهر الراجل بس إيده طلعت فوق شوية احنا قلنا انه كان بيضربه على قفاه .. شفتوا التجنى..
    اثبتوا على حاجة خللوا الحكومة تحبكم وتنفذهالكم ..
    على فكرة بلوجك جميل يا زينب.

    ReplyDelete
  12. معقوله بيدرسوا تاريخ الإخوان فى الجامعه

    ReplyDelete
  13. انا لسه جاي من امتحان فيزكس وفيه ريلاشن باحفظ فيها طول الليل ونسيتها في الامتحان وهاموت
    مش لو كنت بادرس تاريخ كان يبقي احسن
    لو كنت بدات بلوجينج قبل تانية كان زماني قررت ادخل سياسة واقتصاد ودخلت ادبي بدل البهدلة ديه

    ReplyDelete
  14. الله يكون فى عون كل اللى بيمتحنوا
    المشكله مش فى النجاح او الفشل المشكله فى مدى الاستفاده من اللى اتعلموه
    مين منهم هيكون نجيب محفوظ التانى او زويل او حتى الريس متقال:)
    المهم ان البلوج بتاعك جميل خالص
    تحياتى لكى

    ReplyDelete
  15. يا جماعه مش مهم رقص ولا تالايخ

    الاتنين ليهم علاقة بمستقبل البلد


    lol

    .

    ReplyDelete
  16. اعتقد ان نموزج المزاكره بالمختصرات احد ادلة فشل نظامنا التعليمي الذي يقوم كما نعلم علي الحفظ و للاسف حتي في مرحلة الجامعه
    كان لنا استاذ بالجامعه يسمي هذه الطريقه في المزاكره باسم تربية المجترين
    اي ان الطالب يقوم بحفظ بعض الكتب ليقوم باجترار معلوماتها يوم الامتحان فقط ثم ينساها
    و بعدين كلمة امتحان وحدها غير مقبوله لانها مشتقه من المحنه
    -----------------------------------
    اقترح نسميه ابتلاء من البلوي
    ههههههههههههههههههههههههههههه

    ReplyDelete
  17. هههههههههههه

    فكرتنى يا ذوالنون المصرى بأستاذ كان بيقول أنتوا متعلمين بفلسفة الجردل , يالا كبوا الجردل فى الأمتحان و بعد كده أنسووووووووووووا كل حاجة

    ReplyDelete
  18. بوست جميل جدا
    بيعبر باسلوبك الجميل عن واقع حالنا في مصر ، والتناقض الكبير بين المجتمع ، لكن بصراحة انا ممرتش بمذاكرة المترو وكنت اتمنى كده في يوم لاني خارج مصر من سنين ويدوب بزورها من فترة للتانية والمذاكرة عندي كانت ايامي هي الراديو واذاعة ام كلثوم بعدها اسهر للصبح مع الاوبريتات الجميلة لصلاح شاهين وغيره ولو على ايامي اوبريت عن العنب مش عارف كنت حسهر اذاي ، لكن ارجع واقول ان كلامك فيه مضمون مجتمعنا المصريى بين التاريخ والدين والرقص ومش راح اطول عليكم ..
    سلامي

    ReplyDelete
  19. ضحكتني علي التشبيهات دي يا مبرمج حر
    ثقافة الجردل حته واحده !!!؟دا احنا بنتشتم شتايم!!!!!؟

    ReplyDelete
  20. وأى شتايم ده احنا أتهرنا شتايم من أساتذة الجامعة
    كان عندنا دكتور برضوه تخصص تسليخ .. يدخل يسخلنا كلامه و يطلع مبسوط بعد كده
    بعد ما حقق هدف من اهدافه فى الحياة , بس طبعا ساعات بيبقوا عندهم حق
    يعنى لما مثلا دكتور التسليخ يسأل يا جماعة عن حل لمشكلة معينة .. وحل المشكلة بيكون مثلا تركيب مضختين و المضخة بالأنجليزى يعنى بامب فيسأل يا جماعة نحل المشكلة ازاى فواحد يقوله نركب بامبين يا دكتوور .. فالدكتور أستلمه طبعا و عطا ليه درس فى اللغة العربية و الأنجليزية معا
    وسلخ بيه جميع نظم التعليم و أستخدم فلسفة الجردل كندعيم لوجهة نظره

    ReplyDelete
  21. يابنتي متقوليش كدة انتي في نعمة مابعدها نعمة بحسدك عليها..اللهم لا حسد يعني
    المهم ان القلق وانتي منتظرة كلمة تحدد مصيرك ومستقبلك شئ صعب وبيسبب ضغط نفسي فظيع
    احمدي ربنا انك خلصتي

    ReplyDelete
  22. ازيك يا زينب
    من فترة وانا ماسبتش عندك تعليق
    لكن الغريب اللى فى الامر ان حياة الجامعة وغيرها من مراحل تعليمية قبل كدة تعتمد وبشكل كبير على حاجة اسمها ملخصات

    وكأن الملخصات هى الكبسولة اللى بيخدها الطالب عشان يقدر يعدى السنه شيئ مؤسف

    ReplyDelete
  23. ربنا مع كل الممتحنين بس والنبى مفيش حاجة لكلية زراعة ولا اداب

    ReplyDelete
  24. حسن البنا ومجهوده الفردى لبناء الإخوان المسلمين 20 سنه؟
    والرقص وفنونه وحركاته
    وعجبى

    ReplyDelete
  25. كل فترة ليها حلاوتها
    أيام الجامعة كانت حاجة و شغلنا دلوقتى حاجة تانية
    انا عن نفسى بحب الشغل عن أيام الجامعة، علشان شخصيتى إتغيرت كتير أما اشتغلت

    ReplyDelete
  26. البوست جميل جداااا

    وفى فكرة جديدة كعادتك اسمحيلى ارفعلك القبعة...احتراما...

    ReplyDelete
  27. عفوا
    سؤال تقني
    لم أجد الإيميل
    فوضعته هنا
    لدي صور مفقودة من درسك الرائع كيف تنشئ مدونة على بلوجر
    http://bmadvice.blogspot.com/
    كيف أصل لها
    مع خالص الود
    doyouthinkgood@hotmail.com

    ReplyDelete