عن الموت.. وعن اللى بيحبوا الموت

يوم الخميس اللى فات، رحت مع زمايلي فى الشغل نحضر صلاة الجنازة على أخو واحد زميلنا، والصلاة كانت فى مسجد السيدة نفيسة

دى تانى مرة أصلي فيها صلاة جنازة، الأولى كان من زمان، كنا فى اسكندرية وقتها ورحنا نصلى الجمعة وبعد الصلاة كان فى صلاة جنازة، مش فاكرة اوى احساسي كان ايه وقتها.. بس الاكيد اننا كنا عايزين نخلص عشان نجري ع البحر :)ه

أما الخميس اللى فات ، كانت فارقة معايا صلاة الجنازة جدا، كالعادة فى اى مواقف زي دى بكون اكثر تماسكا من اللى حواليا وانا اللى بقعد اطبطب عليهم، وبعدين لما خلصنا صلاة الظهر وابتدا الامام يشرح كيفية صلاة الجنازة، مخي وقف عند الجزء اللى بيقول، اننا ندعو للميت باخلاص عسى ربنا يرزقنا بناس تصلي علينا وتدعي لنا باخلاص لما يحين معادنا.. ياااااه، من زمان مفكرتش فى موتي، وفى اللحظة دى اللى ببقى مش هحتاج من حد اى حاجة غير الدعاء، وان صلاة الجنازة هى احلى هدية ممكن تقدم لميت.. ساعة الصلاة انا كنت بدعي وانا متخيلة ان انا اللى بيصلوا عليا، دعيت للميت جامد واخلصت فى الدعاء على قد ما قدرت

اول ما خلصنا صلاة، كان قراري انى احاول بأى شكل اول ما تيجي ظروف زي دى تانى انى ما كسلش عن صلاة الجنازة، وانى اروح اصلي عشان ربنا يرزقنى باللى يصلي عليا ان شاء الله

المهم بأه، انا لفت نظري جدا المسجد وموقعه.. لأنى انا اعرف السيدة نفسية، قريت عنها.. ودى أول مرة أزور المسجد ده.. مين مايحبش آل البيت، ويعشقهم كمان، قريت عن السيدة نفيسة ازاى كانت حياتها وازاى ماتت وازاى أطلقوا عليها "نفيسة العلم" وازاى أئمة عصرها كانوا بياخدوها عنها العلم

حجت حوالى تلاتين مرة، وتزوجت وأنجبت وكانت مسئولة عن شئون بيتها بجانب علمها وتفقهها، ولما نزلت مصر، الناس خرجوا يستقبلوها من ع الحدود.. وقعدت فيها كتير والناس كانوا يروحوا يزوروها وياخدوا من علمها لحد ما حست انهم بيشغلوها عن العبادة فقررت ترحل عن مصر، وطبعا الناس شق عليهم جدا ان دا يحصل، وفى الاخر عُرض عليها انها تستقبل الناس يومين بس فى الاسبوع، وبعدين وافقت واستمرت فى مصر إلى ان توفاها الله

أستاذها كان الإمام مالك، وقرأت عليه الموطأ، والتقت بالإمام بن حنبل، وكمان كان الامام الشافعي دائم الزيارة ليها ، وكان بيثني على علمها ويسألها الدعاء لربنا ، وكانت من وصية الامام الشافعى ان السيدة نفيسة تصلي عليه لما يموت، وفعلا نفذت وصيته

ولما جت توفت.. مش هحكيلكوا طبعا حال المصريين لما عرفوا خبر وفاتها، انا لما اقرا سيرتها لازم اجى عند الجزء دا وابكي، هى حفرت قبرها بإيدها وكانت مستعدة ان الموت ييجي فى أى لحظة وكانت تقعد فى قبرها تقرا القرآن لحد ما ختمته مرات كتيرة جدا فيه، اعتقد هنا ان معنى القبر بالنسبة للسيدة نفيسة مختلف كتير عن اللى اتعود الناس عليه، هى هنا بتعتبره مكان جميل ومريح و"روضة من الجنة" وان الموت هو الباب اللى يتفتح لها عشان توصل بأه للدنيا الحقيقة، وتشوف اكتر حد ممكن اى حد يكون متشوق انه يشوفه.. وترتاح بقربه