2/28/2007

فقد

:كتبت التدوينة دى امبارح
لسه بكتشف نفسي كل يوم. بكتشف حاجات جديدة مكنتش اعرف انها جوايا، وبكتشف ان فى حاجات فكرتها ماتت او اتغيرت او اتطورت والاقيها زى ما هى

النهاردة كان اخر يوم ليا فى الشغل، هستلم شغل جديد فى شركة جديدة يوم الخميس. قلت انى لازم اخلى التلات اخر يوم، والاربع يبقى يوم فاصل كده. كنت طول الايام اللى فاتت لما تتيجي سيرة انى ماشية، افضل اقولهم انى هاجى كتير وهزورهم، واننا بقينا اصحاب ودى حاجة مايفرقهاش مكان ولا زمان. انا كنت بقول لنفسي كده وبسمعها كويس الكلام ده ودا اللى كان بيخلينى اتصرف طبيعى طول الايام اللى فاتت واقعد اضحك واقلب المواضيع هزار لما حد يحاول يقلبها دراما او حتى يأثر عليا انى اقعد ومامشيش

انا لما قررت اسيب الشغل واقبل الشغل الجديد.. كان سببى الوحيد هو انى اخيرا هشتغل فى الشغل اللى عايزة احترفه وقررت انى اركز عليه من اكتر من سنة. وانى اعتبرت انتقالى للشغل الجديد هو الخطوة اللى كنت مستنياها تحصل وانى مش معقول لما تيجي ماحققهاش. دا مش معناه ابدا انى مكنتش مبسوطة فى شغلى القديم.. ممم، بردو مقدرش اقول انى كنت طايرة بشغلى، بالعكس انا كنت بفقد ثقتى بنفسى جامد وبحس انى بطلع شغل وحش واحساسى من جوه دايما ان دا مش الشغل اللى عايزة اعمله، بس المكان والناس والجو هما كانوا اكتر حاجة شداني.. واكتر حاجة تخلينى اقول ان الخمس شهور ونص اللى فاتوا كانوا من اجمل اجمل اجمل ايام حياتى

طول النهار النهاردة حد يدخل الاودة اللى بشتغل فيها ويسلم عليا، ويقولى اراجع قرارى تانى ويتمنالى الخير لما يلاقينى مقتنعة ان دا افضل لى. مكنتش متصورة ان الناس مهتمة اوى كده، وانهم متأثرين اوى كده.. كانوا بيكلمونى بحب وود جميل اوى، كل ما يشوفوا وشي يفتحوا سيرة انى ماشية، كانوا مصرين يخلونى افتكر كل شوية انى ماشية. وكنت ببتسم ابتسامة عريضة واتلامض واحسسهم ان الموضوع مش كبير، لدرجة انى صدقت انى قادرة اتعايش مع الموقف واسيطر عليه. تصورت انى حد قادر يمر باحداث انتقالية من غير ما يكون ليها عليه تأثير. كنت مبسوطة كمان بنبرات صوتهم وهما بيكلمونى، والود اللى باين فى عينهم وطريقتهم فى مد ايديهم وهما بيسلموا عليا

مابكيتش لما رشا وريهام جم يبوسونى ويحضنونى وهما ماشيين والدموع تظهر فى عنيهم وانا قررت انى ماروحش معاهم عشان كان ورايا شغل لازم اقفله، توهت الكلام لما ريهام بتقولى انها مش متصورة انها هتيجي بكرة الشغل وما تلاقينيش فى الاودة معاها وتلاقى مكتبى فاضى، ما بكيتش لما ايمان بتقولى وهى ماشية ان هتتصل على طول بيا وان ارقامى كلها معاها، ولما رشا بتقولى انها هتتصل بيا كل يوم الصبح ، ولما محمد بيقولى انه هيفضل يدينى رنات، ولا لما قررت انى ما اخدش صور عم دهب ومرشدي والورد المجفف اللى معلقاهم ع البورد بتاعتى وقلتلتهم انى هسيبها يفتكرونى بيها. مابكتيش لما وليد فضل يقولى انه هيفضل ورايا لما يقنعنى انى افضل موجوده.. وان البلد دى احسن من غيرها. مابكيتش لما استاذ محمد المدير بتاعى نزل لاودتى وقعد معايا وكان مصر انى اسيب بقية الشغل وما كملوش.. وحشت دموعى جامد جامد لما قاللى ان باب الشركة مفتوح لى فى اى وقت انى ارجع، او انى ازورهم. وانى لما ازوره مش هيرحب بيا بس.. هو هيكون مبسوط كمان

قلبى كان بيدق جامد وانا بلم حاجاتى فى شنط، وبطلب من ياسر يعملى اخر كوباية نسكافيه بلاك ، بس ما خليتش حد يسمع الدق ده

فى الاخر لما طلعت لاستاذ محمد اسلم عليه، مكنتش عايزة امشى من عنده، ومكنتش عايزة ابطل كلام معاه، بس كان لازم اروح.. وانا فى الطريق كنت ماشية اتفرج ع المحلات، واشتريت ايس كريم ، وكنت ماشية بغنى مع نفسى وشغلتها خالص عن التفكير. بس لما قطعت تذكرة المترو ووقفت اسند ع الحيطة وانا مستنية القطر فوجئت بيا بعيط اوى، ودموعى بتنزل كأنها حنفية اتفتحت وكل الخمس شهور بيمروا قصاد عنيا مشهد مشهد، من اول مرة رحت فيها الشركة وقابلت فيها المدير بتاعى واتنقلت بين كذا اوده، وعرفت كل الناس اللى عرفتهم هناك واتعلمت كل الحاجات اللى اتعلمتها. بقى منظرى زبالة، وركبت عربية السيدات وبردو معرفتش اوقف العياط والمنديل داب فى ايديا وقعدت على الارض ادارى وشي، وبعدين هديت شوية ووقفت وكل الايام بردو مش راضية تمشى من قصاد عنيا، عيط تانى وشافتنى البنت الى كانت واقفة جمبى طبطبت على كتفى جامد وقعدت تكلمنى عن كل مشكلة ولها حل وان اللى يشوف بلوة غيره تهون عليه بلوته وان البكا والعياط مش بينفع بحاجة وان محدش يستاهل وقالت كلام كتير جميل اوى، انا نفسى اعرف اقوله كويس، بس اللى كانت بتقوله مكنش ليه دعوة بنوبة الفقد اللى كنت حاسه بيها، والايام اللى راحت وتستحق ابكى عليها والناس اللى حبيتهم ويستحقوا انى افكر فيهم. بس اتبسطت من كلامها ورقتها واخدت منها ورقة الاذكار اللى فيها دعاء فك الهم والكرب، اللى قالت اقعد اقراه واثق بالله ان همى وكربى هيتفك. ونعم بالله يا رغده... هى كانت اسمها رغده

ياااه طلعت انا زى ما انا. كل الحكاية انى بدل ما كنت بعيط قصاد الناس زمان، بقيت اصاب بنوبات مفاجئة من وراهم.. ومن ورايا



هفتقد ايه؟

خفة دم رشا وشكوتها اليومية من حياتها وعيطها على كتفي احيانا ومحيلتى اليومية عليها عشان تفطر عشان اللى بطنها ده ذنبه ايه

ضحكة ريهام المميزة جدا و اللى ياسر بيحاول كل يوم يستفزها عشان يخليها تضحك، وهى دلوقتى.. ابدا.. مصرة ماتضحكهاش قصاده

لما ارفع سماعة التليفون وتكون ايمان متصله بيا فتقول الللى عايزاه من السبيكر ومن غير ما تبتدى بالو او سلامو عليكو او اى صباح الخير,, كده خبط لزق

لما اقف فى البلكونة واقول انى لام اجيب زرع وورد واحطه فيها وبعدين انسى

لما يهفنا المزاج نجيب فول من على عربية الفول ونستمتع بافطار شهى مكون من فول فى عيش بلدى بالبصل والفلفل الاخضر الحراق .. رغم امتعاض البعض :))

لما اقعد انا وريهام نتصيد كلام استاذ محمد عشان نعرف هو متجوز وللا لأ، يعنى ريهام كانت تجيب اثباتات انه مش متجوز وانا اجيب اثباتات انه متجوز.. وفضلنا على كده فترة كبيرة لحد ما طلعت انا صح

لما وليد ييجى يتريق على الشركة ويقولنا اننا شركة خيال علمي

لما استاذ اسامة ييجي يصبح علينا ويقول: "تمانية واربعين صباح الخير" وانا ارد عليه واقوله: "تمانية واربعين ونص" اصل مرة كنت انا وريهام بنتناقش هو عنده كام سنة وايمان قالتله اننا بنظن انه تمانية واربعين من ساعتها وهو ماسكها لنا

لما اطلب اى حاجة من سامح، مهما كانت صغيرة او بسيطة وبعدها يحسسنى بالذنب وانى عملت خطيئة لا تغتفر فى حق المجتمع وفى حقه هو شخصيا، وبعدين يعمل اللى قلت له عليه ويطلع انه كان بيهزر معايا

لما اطلع اتنطط ع السلم واسمع رشا بتقول اهو ابو فصاده طالع اهو.. دا اللى هو انا

لما نصلى انا والبنات جماعة كل ضهر وكل عصر

وكمان لما اطلع لاستاذ محمد واكلمه فى الشغل وبعدين نتكلم فى كلام عام واسمع له وارد عليه واتعلم من خبرته وحكاياته اللى بيقولها.. وكنت اقعد ارغي معاه كتير اوى، انا اتعلمت كتير منه، الحاجة الوحيدة اللى مش بعرف اطبقها هى الثقة بالنفس، الراجل تعب معايا بصراحة فى الحكاية دى، وهو ما شاء الله - الله اكبر ثقته بنفسه عالية، على فكرة هو (افضل انسان انا عرفته فى حياتى)، وعلى فكرة كمان انا بقول (افضل) مش (من افضل) ربنا يبارك له فى حياته وشركته

هفتقد داخلى 23 استاذ محمد، 22 / 35 رشا، 41 ايمان، وانا كنت 47 وريهام 48

بحاول اصبر نفسى ان المسافة بينهم وبين شغلى الجديد عشر دقايق مشي او نص دقيقة تاكسي، وانى هزورهم على طول، يا اما الصبح افطر معاهم، او بعد الشغل اروح اقعد مع استاذ محمد... ما هو انا لو نسيتهم وللا بعدت عنهم ابقى خسرت ناس حبيتهم وايام جميلة عيشتها وانا مش مستعدة للنوع ده من الخساير ابدا

---
ودلوقتى بكتب: امبارح بالليل قبل ما انام قعدت افكر يا ترى انا اخدت القرار الصحيح؟
انتظروا معى الاجابة فى الايام القادمة
:D

29 comments:

  1. أمممممممم
    لفتت نظري المدونة دي النهاردة
    شكلها حلو
    :)
    وعجبني موضوع معرض الكتاب
    ------
    دي أول مشاركة يعني خارجة عن مجال الإعراب وقواعد الصرف خالص

    ReplyDelete
  2. هو ده حال الدنيا.. متندميش على قرار أخدتيه
    كل سلمة تطلعيهاوخطوة تاخديها لازم يكون قدامها بعض التنازلات
    إن شاء الله تلاقي كل اللي تتمنيه

    ReplyDelete
  3. ربنا معاكي يا رب .. بصراحة زعلت لما اتأكدت من انك مشيتي و من حاجه كمان و لو ان الريسك مش كبير لان وقت ما تعوزي ترجعي هترجعي .. ربنا يجعل العتبة الجديدة عتبة خضرا يا زيزي :)

    ReplyDelete
  4. شوفى يا زينب ..
    الشعور الى عندك دة شعور طبيعى , بيجيلنا كلنا لما يبقى فيع عشرة بينا وبين ناس بنحبهم , ولفترة طويله , انا مثلا ماسك شغل بسيط اوى وبحبه جدا وعارف انه هيخلص , ومن دلوقتى بحضر نفسى عشان مزعلش فى اليوم الى هيخلص فيه الشغل دة ...

    احساسك وبكائك دة علامه كويسه .. علامه انك لسه انسانه , وان تاريخ تحولك لزومبى او مصاصه دماء لسه مجاش , لكن هل يدل دة على ان قرارك غلط ؟ مظنش ... انتى الى عندك دة زى الاحساس الى بييجى لطلبه ابتدائى لما يسيبو مدرستهم ويروحو مدرسه اعدادى ... بيعيطو عشان بقالهم عشرة مع الاصدقاء والمدرسين والعاملين .. لكن هل بيندمو عشان هيتنقلو لمرحله تعليميه جديدة ؟

    استمرى فى خطك يا زينب , واعرفى ان شعورك دة مؤقت , والناس الى عرفتيهم مع الوقت هتعرفى انكم لسه صحاب وبتتقابلو . الفرق ان وسيله اتصالك بيهم اختلفت وبس

    ومستنيين نسمع جديد عنك يا ملاك البلوجر ...

    سلام .

    ReplyDelete
  5. اول هام انا زعلان منك بجد ثانيا انا بجد مش عارف ايه الموضوع معاكي
    انتي تربيه وانا كمان هتشتغلي يوم الخميس وانا كمان اول يوم وانا كمان بس دا اول يوم في شغل خالص متنسيش انا اصغر منك بس انا قلقان جدا ...تصدقي بالله انا كتبت نفس الموضوع في نفس مدونتي بس طبعا بطريقه تانيه...سبب زعلي انك مجتيش عندي المدونه وكمان اي سبب تاني وبس
    أنــــــــــــــا
    www.toto3alakaboto.blogspot.com
    spoony31_31@hotmail.com

    ReplyDelete
  6. طبعا خدتى القرار الصحيح عشان هتقابلى ناس تانى فى مكان تانى يحبوكى زى كده برضوه تانى لأنك أكييد بتصدرى ليهم قيمة وأطمئنان وراحة فى التعامل على أقل تقدير وبتبقى النتيجة أنهم يغمروكى بالحب الرائع ده .. يعنى أنتى مشيتى وهما معاكى وهتروحى مكان جديد تلاقى فيه ناس تانية وهتصدرى ليهم نفس القيمة و الأطمئنان والراحة فى التعامل وهتكون النتيجة أنهم هيغمروكى بحب رائع برضوه ده بالأضافة بقى لأنك هشتغلى فى الشغل اللى عايزة تحترفيه وده هيعينك أكتر على أنك تصدرى قيمة وأطمئنان وراحة مع أى أحد بيعاملك سواء فى الشغل أو بره الشغل وهتكون النتيجة برضوه أنهم هيغمروكى بحب .. أجمل حاجة أن الواحد يعيش مع اللى حواليه فى أنسجام وتناغم وحب متبادل وفى أعتقادى دى غاية من غايات الحياة أو على الأقل وسيلة عشان الواحد يعرف يكمل
    يعنى من الأخر هما مشوا معاكى مش أنتى اللى سبتيهم

    ReplyDelete
  7. الله يوفقك يا رب....
    http://www.thegoldrock.blogspot.com/

    ReplyDelete
  8. بعد السلام بص يا بنت مصر الى انتى فيه طبيعى جدا لانك حبيتى والحب مش سهل فصعب عليك الفراق ذكرياتك موقفك نقل مكتبك كل الى حصل فى الخمس شهور مش سهل تنسيى وبالاخص دى اول تجربه تقريبا زى اول حب عوامل سيكلوجيه خاصه بالانسان اما عن نقلك لمكان اخر بردو هو صحى اوى لان ربنا قل فى كتابه وخلقنا الانسان فى كبد اى فى عنا ومشقه يعنى الدنيا مش راحه بس احنا بنلقى الراحه فى وشوش بعض فى نفوس بعض وهى دى الحياه
    متنسيش تعزمى نفسك على ايس كريم على حسابك قبل متروحى الشعل الجديد

    ReplyDelete
  9. مستنين الايام الجاية معاكي
    بس بصراحة بعد كل اللي قلتيه اكيد هتحسي بصعوبة في الأول
    انا مرين بظروف مشابهة كل مرة كنت اغير فيهامكان سكني من مدينة لتانية ومن بلد لبلد
    واللي هتفضلي على اتصال بيهم هم اللي بيستمرو للابد انشالله بس هم نسبة صغيرة للاسف
    سلامي

    ReplyDelete
  10. اولا مبروك يا مصرية على الشغل الجديد ان شاء الله يبقى خير ليكي

    ثانيا الدنيا بتدي و تاخد ولازم نستغنى عن حاجة في سبيل حاجة تانية

    ReplyDelete
  11. انا افتكرت من كلامك فورا واحد من اكبر الايام التي حزنت فيها في حياتي
    يوم اخر امتحانات الكليه لاننا كلنا عملنا نفس اللي انتي عملتيه
    كلنا شباب و بنات بكينا او علي الاقل عيوننا كانت تملاها الدموع من الحزن علي الفراق الاجباري و المكتوب علينا جميعا
    و كمان افتكرت صديق لي في المدرسه التي اعمل بها انتقل الي مدرسه اخري منذ عام كامل و كان من احب الشخصيات الي قلبي في المدرسه رغم فارق السن بيني و بينه و الذي يزيد عن عشر سنوات لكنه فعلا كان بيعاملني كاخ اصغر له
    بعد ما هو ترك المدرسه اتي زميل اخر حل محله و انا و هو صديقان بصوره حقيقيه
    هتلاقي غير اصدقائك ناس اخرين هتحبيهم برضه
    تحياتي

    ReplyDelete
  12. rabna yeg3al el sho3'l el gedeed fat7et 7'eir insha Allah and creating new memories!! insha Allah

    ReplyDelete
  13. نرتبط بالأماكن وننتمي إلى البشر

    ربما يكون الابتعاد صعباً.. لكنه في بعض الأحيان ضرورة أو على الأقل محاولة للإبحار باتجاه عالم جديد وطموحات أكبر

    أياً كان قرارك..تذكري جيداً أنه في السفر سبع فوائد وفي اكتشاف آفاق أرحب سبعون فائدة

    المهم أن نكون على ثقة بأننا نريد التغيير نحو الأفضل

    ReplyDelete
  14. As salaam alaikum.

    I write. Come by inshallah.

    Wa salaama,

    nuh ibn

    ReplyDelete
  15. ربنا يوفقك فى شغلك الجديد

    ReplyDelete
  16. الحاجة اللى ممكن أقولها و تضايق دلوقتى، إنك هتيجى فى وقت و هتنسى كل الناس دى و الأيام الحلوة دى، و هتحسى ان العشر دقايق مشى دول كتير عليك و إنك مشغولة و مفيش وقت تزورى الناس اللى انت حاسه أنك لازم تزوريهم
    صدقينى كل شئ بيتنسى. أنا أصلى مجرب كل ده
    و اللى إنتى حاسة بيه جواك جامد أوى و مأثر فيك ، هيقل بمرور الوقت ،للأسف فعلا للأسف
    ساعات بتمنى إن المشاعر الحلوة دى -مهما كانت مؤلمة ليا- انها تستمر، لأنى بحس بصفاء روحانى نقى و جميل، لكن الحقيقة إنها بتروح و تخف بمرور الوقت إلى أن تتلاشى تماما
    أنا أصلى مجرب.صدقينى

    ReplyDelete
  17. مشاعرك رقيقة ولكنها لا تسيطر على سلوكك

    دى نعمة انك تحسى بالحنين لشىء وتقرر انك ترحلى برضه

    تحياتى على البوست الرقيق والجاد فى الوقت نفسه
    أرجو لك ان تسعدى بقرارك

    ReplyDelete
  18. أنا عاوزاكى تحضرى معانا اللقاء الشهرى للمدونين

    المشاركة النسائية ما زالت ضعيفة وأرجو حضورك معنا

    لمزيد من التفاصيل رجاء زيارة مدونتى

    ReplyDelete
  19. ربنا يوفقك فى شغلك الجديد..
    ..

    ReplyDelete
  20. هاى اذيك انا نونا كتاباتك بتعجبنى جدا
    اتمنالك التوفيق فى شغلك الجديد

    ReplyDelete
  21. اللقاء الثالث الشهري
    موعدنا فى دار الاوبراكوفى شوب الابداع - بجوار مسرح الهناجريوم الجمعة القادم الموافق9/3/2007فى تمام الساعة السادسة مساءا
    الدخول من البوابه الخلفيه لدار الأوبرا أمام النادى الاهلى ثم تتجه لمسرح الهناجربعد الهناجر نجد دار الابداع الوفىالكافيه بجوار دار الابداع

    كلمة السر

    ReplyDelete
  22. شكرا على تعليقاتكم يا جماعة
    اعتقد انى افضل حالا من الاسبوع اللى فات

    رحت تلات مرات لحد دلوقتى شغلى القديم وبزورهم اهو :(
    ومبسوطة جدا فى شغلى الجديد والناس اللى بتعرف عليهم
    اعتقد انها هواية عندى انى اعرف ناس جديدة كل يوم
    مع ان اصلا الشغل الجديد اعرف كتير من الناس بتوعه وكده
    :)


    ياسمين
    جميل اوى يا بنوتة
    عايزة احضر طبعا
    هعدى عليكى

    ReplyDelete
  23. عارفة القفد اللى حكيتى عنه ده
    جربته كتير و حسيت بيه اكتر
    اتمنى ربنا يوفقك
    و تقدرى على كل قرارتك
    ***
    هو ممكن احضر لقاء المدونين معاكم

    ReplyDelete
  24. اكيد انت اخدتى القرار الصح لان فى العمل لازم نتطور و نثقل مهاراتنا و دا واجب علينا مينفعش ان الجندى يتخلف عن الحرب علشان حبيبه و مع فارق التشبيه مينفعش اننا نكبت او نحد مهارتنا فى العمل علشان اصحابنا القدامى و اكيد انشاء الله هتتوفقى فى ناس جدد تضيفيهم لاصحابك القدام و يكون عندك حصيله اكبر من الناس اللى بتحبيهم و بيحبوكى و انا متأكد انك هتوفقى فى دا لان واضح انك انسانه محبه و دا واضح انك اثرتى فى الجميع و انك كنت بتبكى دا لانك انسانه يا ريت كل الناس تتعلم تبكى علشان يتعلموا يكونوا بنى آدمين من تانى اسف للاطاله

    ReplyDelete
  25. ياااة فكرتيني بيوم ماسيبت شغلي القديم وانتقلت للجديد

    مع شوية اختلافات طبعاً

    ربنا يوفقك في شغلك الجديد

    وبكرة تفتكري الكلام دة وتضحكي

    مصلحتك الشخصية فوق اي اعتبارات
    ان ااتعلمت كدة

    لكن العلاقات الانسانية بتستمر وزيارات زملاء العمل والذكريات حتكون سعيدة دايما ان شاء الله

    تحياتي

    ReplyDelete
  26. ياستى كل حاجه بتتنسي الحلو والوحش كمان انا شخصيا توهت نفسي فى شركة زي كده لمدة 4 سنين وكل ده عشان الأصحاب والزملاء كنا أسرة وأسرة جميلة كمان ، لكن ندمت لإني ضيعت 4 سنين من عمرى بلا فائدة سوى الأوقات الجميلة مع الزملاء والأصحاب فى العمل ، الطموح أجمل شئ إنشالله تكون كل خطوه ليكي بنجاح جديد
    مع تحياتي
    اسامه - مدير مالي يعمل بالسعودية
    osaimiothman@maktoob.com

    ReplyDelete
  27. اول حاجه حابه اشكرك علي انك السبب اللي خلاني اعمل المدونه دي ولولاك ماكنتش في يوم هعرف اعمل مدونه ولا حاجه مع اني لسه في البدايات وفي حاجات كتير صعبه عليا لكن بجد شكرا ليكي
    وتاني حاجه مدونتك اكتر من رائعه بجد مش مجرد كلام او مجامله وبيقولوا الكلام الي طالع من القلب بيوصل للقلب مش كده؟؟ اتمنالك كل الخيرفي حياتك

    ReplyDelete
  28. كل سنة و انتى مصرية يا بنت يا مصرية

    رجاء خاص

    تقراى البوست فى مدونتى بعنوان

    من سيدفع ثمن دم اسرانا

    و ليتك تتفاعلى معنا

    تحياتي

    ReplyDelete