يا تبنولهم بيوت.. يا توفرولهم الكلل

الفرق بين البلد اللى عايشة فيها وبين البلد اللى بشتغل فيها زي الفرق بين السما والارض، مع انى ما طلعتش السما ولا اقدر اقول انى عايشة مية فى المية ع الارض، لكن اعتقد ان فى فرق كبير بينهم هو نفسه الفرق بين البلد دى والبلد دى. أول الفروقات اللى لاحظتها هو شكل المتسولين هنا وهناك، ويمكن من اكتر الحاجات اللى بتضايقنى فى القاهرة هو شكل المتسولين وتفننهم وقدرتهم الرائعة فى ايذاء عينيا. أول شهور ليا فى القاهرة كنت بشكل تلقائى بغمض عنيا و يمكن مع الوقت اتعودت ما اغمضش . عندنا الشحاتين مختلفين عن كده، بردو هدومهم مبهدله وكده، ويمكن الواحد منهم ييجى جمب البيت ويقعد يقرا قرآن او بس يمد ايده فى الشارع بمنتهى الصمت والسكون، وطبعا عددهم اقل من كده بكتير يمكن ماكنتش باخد بالى ان فى عندنا شحاتين غير كل فين وفين، انما فى القاهرة كل يوم بشوفهم وفى طريقى بقيت عارفة اماكنهم كويس.. هنا ولدين صغيرين على باب المترو قاعدين بمناديل، وبعد المغرب بتبقى ست وبنتها هما اللى قاعدين، وبعد كام متر واحده ست عجوزة جدا وكركوبه اوى اوى بتقطع قلبى عليها ولو مر يوم ماشفتهاش بقلق عليها، وكمان كام خطوة واحد تانية عجوزة بس فيها الرمق شوية.

ساعات لما اشوفهم الصبح اقعد افكر ايه اللى رماهم ع البهدله دى، ويا ترى الزمن عمل فيهم ايه، لما الواحد يلاقى نفسه متكلفت فى هدمه سودة وكام حته قماش لاففهم على راسه بيتغطى بيهم من البرد والشمس وعيون الناس، وللا هما اصلا مابقوش ياخدوا بالهم من عيون الناس.. وللا بقت عيون الناس هى الرزق اللى بيستنوه، ما هو لما حد يشوفهم بعنيه بجد مش هيقدر يعدى من غير ما يطلع من جيبه اللى فيه النصيب وهو بيلعن الظروف وقلة الحيلة والبلد والحكومة والحال اللى لا يسر عدو ولا حبيب ويتمنى على الله ان لو بإديه كان يعمل بيت كبير يلم فيه كل الناس دى، العجوز فيهم قبل الصغير.. هى يعنى الست فيهم محتاجه ايه فى اخر حياتها غير سرير ان شاء الله مشترك ولقمه تسد بيها الجوع

هو انا بشحت لهم كده؟ برقق قلبكم عليهم؟؟

اصل انا متغاظة من الحملة اللى ضد المتسولين، واللى بتشجع الناس انهم مايدوش فلوس للمتسول لأنهم بيعتبروا ده تشجيع ليه، وقال ايه بأه.. دا ضد سمعة مصر وبيبوظ السياحة، قال بدل ما يحلوا مشاكل المتسولين واللى اكترهم اولاد شوارع وعيال لسه فى عمر الزهور بس دبلت قبل اوانها، بيمنعوا عنهم ايد الناس اللى لسه عندها رحمة

طيب اصلا الولد اللى فى الشارع وبيمد ايده، والست العجوزة والست اللى شايله عيل وبتسرح بيه وكل الشخصيات دى ، ايه اللى رماهم على الشحاته والبهدلة والتفنن فى استدرار عطف الناس الا الأمر من كده، هو السبب فى كده مين؟ مش النظام اللى بيسرقهم كويس اوى، هو مش السبب فى كده الاقتصاد اللى بايظ والتعليم وابواب الرزق المسدودة قصاد الناس، لما بقى الفقرا فى مصر عدد رمل الصحرا، والناس بقت تنام الليل من غير عشا، لأ وبقوا بيموتوا من الجوع كمان

يبقى دلوقتى لما تتقفل قصادهم كل الطرق ويمدوا ايدهم فى الشوارع للناس - حتى لو منهم نصابين - مانرحمهمش ونتهمهم كمان بتدمير السياحة، بلا نيلة بقينا عاملين زى اللى ييجى ايام مجاعة ويقولك طبق حد السرقة ع الى يسرق

انا مش عارفة اقول ايه، الحملة دى من اغبى الحملات اللى سمعت عنها

-------

عنوان التدوينة: من عبارة على لسان اللمبى/محمد سعد