4/24/2007

ماتخدش في بالك

أنا متوقعة أموت "إثر" كعبلة من على سلم، ما هو حاجة من اتنين يا إما اتكعبل على سلم ما فأقع ماحطش منطق، أو إنى اموت فى حادثة عربية على الطريق السريع

لما بفكر فى نهايتي ممكن تكون ازاى الاحتمالين دول بس اللى بييجوا فى بالى
الاحتمال الأول عندى من زمان، لأنى متعودة اتكعبل ع السلالم، ودا بيخلنى امسك فى الترابزين اوى، وانزل بحذر.. بحذر شديد يؤدي للكعبلة احيانا

الطريقة التانية دى بأه بقت بتطاردنى فكرتها لأنى بسافر كل يوم وكل كام يوم الطريق يتعطل نتيجة حادثة على الطريق، وبالتالى الاحتمال قائم بنسبة اكبر من غيره، وبالنسبة لى اكتر من غيري اللى مش بيسافروا كل يوم

أما رغبتي بأه - وطبعا الرغبة تختلف عن التوقع - فأتمنى إنى أموت من غير ما اخد بالي، معرفش ازاى، بس اغمض عينى وافتحها الاقيني بينى ايدين ربنا

طبعا دا مش بعد عن الواقع او نرجسية زايدة تخلينى افكر انى ممكن اموت بشكل مختلف عن الطرق الطبيعية لموت المواطن المصري فى القطر المصري، الاحتمالات مازالت قائمة وهى الأقوى رغم كل شىء، يعنى اذا كنت بسافر كل يوم وبطلع وبنزل سلالم كل يوم فدا لا يزيد من كفتهم ويقلل من كفة السرطان او فيروس سي او انفلونزا الطيور او الالتهاب الكبدي الوبائي او حتى القطر رغم انى مابركبش القطر

31 comments:

  1. دع الاقدار تفعل بنا كما تشاء
    ربما يلاقينا علي درب السفر شئ من هناء
    وربما نظل هكذا دائما تعساء

    ReplyDelete
  2. المفروض انك كمواطن مصرى اصيل عندك اكتر من فرصه للموت مع تنوع كل طريقه
    وفى ابسط الفروض الموت كمدا وغيظا
    او بسكته قلبيه

    ReplyDelete
  3. يسعدنى أكون من أوائل المعلقين

    أنا كمان موضوع الموت دة شغلنى كتير

    بس يعنى متخافيش طالما إنك فى مصر قدامك إختيارات كتيرة للموت تقدرى تختارى منها , من أول حوادث القطورات لحد الطيارات , دة غير حوادث أنابيب الغاز ... إلخ

    متقلقيش يا زينب الحكومه مبيفتهاش حاجه .. حتى موته المواطن
    سلام

    ReplyDelete
  4. أحب اطمنك اننا بلا فخر أول دوله في العالم يموت فيها المواطن في حادثة قطر و هو مبيركبش قطورات أصلا يعني متحمليش هم الموضوع ده خالص

    ReplyDelete

  5. وما تدري نفس ماذا تكسب غدا وما تدري نفس بأي أرض تموت

    خفي على نفسك شوية يا سيدتي

    تحياتي لك من ماناساس البلد

    ReplyDelete
  6. عمرو كان نشر حاجة لمساعدة المواطنين في مصر عموما
    http://gharbeia.net/ar/node/110

    ReplyDelete
  7. لكل اجل كتاب فلا تشغلى بالك ، فقط موتى على الحق

    ReplyDelete
  8. يا سلام؟ لا نسيتى حاجه مهمه

    الاسانسيراللى على الشمال :
    http://foolab.org/node/1559

    بعد الشر عليكى

    ReplyDelete
  9. ندعوك الى اول تجمع للمدونين عن الحب
    kate3a.blogspot.com

    ReplyDelete
  10. المشكله مش انك تموتى ... المشكله هل الموت لواحده كفايه سؤال محتاج لاجابه
    كنت اتكلمت عن نفس الموضوع بس بشكل تانى
    ادعوك لزيارة مدونتى للمره العشرين
    mazaag.blogspot.com

    ReplyDelete
  11. المهم أن نحيا حقا
    ونموت على الحق

    أما أين ومتى ففي يد الله وحده

    وعلى كل فالموت محيط بنا في كل وقت
    وهو يرانا من حيث لا نراه

    أما الحقيقة فهو أن الانسان في الواقع لا يموت
    حين نولد يكتب علينا الخلود إلى الأبد
    يعني الحياة قدر لا مفر منه
    فوق الأرض أو تحتها

    ReplyDelete
  12. اسباب المتو في مصر اعتقد انها صارت اكثر من غيرها من الدول
    و في تحركاتي علي الطرق لاسباب عمل ايضا باتوقع احيانا صدمة سياره او اصطدام سيارتي بسياره اخري
    تحياتي

    ReplyDelete
  13. مش عارفة انا تصورت ان لو حد علق على الموضوع ده هيحكى عن توقعاته بالنسبة لنفسه
    :)
    بس دا محصلش

    mohamed hamdy
    لا انا مش قلقانة من الحكومة، انا عايزة اخلص عليها خلاص

    Boody
    يا خطوة عزيزة، يا نهار نادى، منور

    the groom
    انا مش مصعبة المسائل عشان اخف على نفسى، الحكاية كلها انى بفكر فى الحاجات دى ببساطة، زى ما بتفكر هتتغدا ايه النهاردة او هتلبس ايه بكرة
    :D


    msameer
    اسانسير ع الشمال!، انت بتقول فيها.. طيب ابقى اسأل منال على حكايتى مع الاسانسيرات اليمين والشمال
    :D
    وطبعا الف حمد الله على سلامتك

    ReplyDelete
  14. تخيلي انها فعلا فكرة غريبة
    بس الاكيد ان الواحد نفسه يموت من غير ما يتعب او يتبهدل ومن غير كمان ما يتعب اللي حواليه وينغص عليهم حياتهم
    بس المعادلة دي فعلا صعبة لان الواحد نفسه مايموتش فجأة من غير مايكون عامل حسابه
    بس ارجع واقول الاعمار بيد الله
    تحياتي ليكي

    ReplyDelete
  15. الموت هو الحقيقه الغائبه عن كل الظالمين علي وجه الارض .لو فكروا أنهم سوف يصبحون جيفه لما عاثوا في الارض فسادا.أتمني لكي طول العمر المبارك فيه.

    ReplyDelete
  16. بعد الشر عليكى اكيد
    طوله العمر ليكى
    بس بما انك مصريه فيا حظك السعيد
    اختيارت الموت قدامك كتيره
    فى كل الانواع وزى ما تحبى
    سرطان شغال
    التهاب كبد مفيش مانع
    حادثه قطر موجود
    كله هتلاقيه
    بس اللى موعدكيش بيه هو كعبله السلم
    اصلها مش مقيده فى الدستور:)))
    تحياتى

    ReplyDelete
  17. الموت حق علينا وكلنا طبعا حنموت بس في ناس مثلك بيفكروا فيه اكثر من غيرهم
    وطبعا انا من هؤلاء الناس
    فيا ترى احنا حنموت ازاي وامتى وفين
    الله اعلم
    اتركيها لربك

    ReplyDelete
  18. الغريب أننا كشباب بنفكر فى الموت كتير
    كأننا ليس لنا الحق فى الحياة
    كرهنا الحياة
    أصبحنا نفكر فى الموت أسهل ما نفكر فى الحياة

    والموت فى مصر سهل وبسيط وببلاش
    يعنى برنامج وراء الشمس بتاع الجزيرة الضابط بيقول للامين طالما ضربت نار كنت قتلته عشان ميفتحش بقه

    ببلاش
    كلب وراح

    يا زينب الموت جاى جاى
    المهم نستعد اننا نقابله
    امشى فى طريقك زى ما انتى بتقولى الحق ومش بتخافى

    وعمر مديد باذن الله فى الخير

    ReplyDelete
  19. تعددت الطرق والموت واحد
    كلنا هانموت بس المهم قبل ما نموت نعمل حاجه الناس تفتكرنا بيها بعد ما نموت

    تمتصني أمواج هذا الليل في شره صموت

    وتعيد ما بدأت.. وتنوي أن تفوت ولا تفوت
    فتثير أوجاعي وترغمني على وجع السكوت
    وتقول لي: مت أيها الذاوي... فأنسى أن أموت

    تحياتي

    ReplyDelete
  20. لا اله الا الله

    يعني ربنا سبحانه وتعالى يهديكِ وبلاش الكلام ده

    يا ريت توحدي الله وتستعيني بيه وتستعيدذي من الشيطان

    وبتمنى اشوف بوست احلى من كده

    ReplyDelete
  21. عارفة احلى حاجة اننا كلنا حنموت مفيش حد احسن من حد فى الحكاية دى ولا رئيس جمهورية ولا غفير بس بقى الفرق فعلا بيبقى فى الطريقة الطرقتين الى قلتى عليهم بعاد شوية عن الواقع دلوقتى فلله الحمد بقى الحكومة بقت بتخلى الناس كلها تموت بفعل الصدمة العصبية او السكتة القلبية

    ReplyDelete
  22. يا ساتر يارب
    ليه الفال ده ناو
    ده النهاردة عيد ميلادى

    ReplyDelete
  23. أولا بعد الشر عليكي يا زيزي "مع ان الموت مش شر" .. بس برضة مش عارفة مودك لما بيغمق كده بحس بمغص و قبضة ف قلبي .. فُكيها يا بنتي ..

    ثانيا تعددت الاسباب و الموت واحد .. و ربنا يكفينا كلنا شر موت الفجأة و يرزقنا توبة و نطق بالشهادة قبل ما روحنا تخرج ..

    ثالث حاجه .. انا شخصيا متوقعة أموت متكهربة .. لاني بخاف من الكهرباء جدااااااااااااا .. بتجنبها علي قد ما اقدر و مع ذلك حاسة اني هموت متكهربة !! و الله اعلم ..

    رابع حاجه بقي .. انا مبسوطة انك بعتي بوست "حتي و لو كان غامق و مش بلون الربيع" و انك رديتي علي شوية تعليقات .. خليكي بالجو :)

    ReplyDelete
  24. ايه الحكاية
    هو كل اللي يخاف من حاجة
    يتوقع انه يموت بيها
    !:)

    على فكرة
    أحيانا يخاف الانسان من شيء فيحدث له
    فيقول لنفسه صدق ظني
    وحدث ما كنت أخشاه
    ولكني أعتقد في نظرية أن للفكر الإنساني طاقة تجتذب ما نفكر فيه
    لذلك تجد الانسان المتفائل سعيد الحظ
    والعكس صحيح، المتشائمون كثيرا ما تصدق الأحداث سوء ظنهم

    وتوقعوا الخير تجدوه
    كلمه فيها حكمة انسانية خالدة

    هناك أيضاً كتاب قديم مشهور
    As a man thinketh
    وهو كتيب صغير وفكرته الأساسية هي هي
    كما تفكر تكون

    الموضوع بس هو كلما طرأت مثل هذه الأفكار والمخاوف على الذهن
    قاوميها بأفكار معاكسة متفائلة
    وفكرنا ليس مادة قدرية متحجرة
    ولكنه قابل للتشكيل والتعديل

    ReplyDelete
  25. مش عارف ده تفكير عادى ولا انتى مكتئبه
    بالنسبه لى اللى بفكر فيه اكتر من هموت ازاى هو بعد الموت هيحصل ايه
    واللى بيخوفنى فى الحياه اكتر من الموت نفسه هو المرض يمكن بحكم مهنتى واللى بشوفه فيها
    بس انا فى رأيى ان الواحد يخلى الموت فى باله دايما بس فى الخلفيه كده عشان برضه يعرف يعيش

    ReplyDelete
  26. تتعدد الأسباب و الموت واحد
    بعيدا عن الموضوح
    حبيت اشكرك علي كيف انشأ مدونة
    و شرف ليا أني أكون متعلم علي اديكي

    ReplyDelete
  27. اعراض مرضية
    الشعور دة بيدل على اكتئاب حاد وحالة حزن مقيم ونظرة يأس من الحياة
    انصحك بمشاهدة قناة السودان وقناة الاسرة لمدة شهر وبعدين الشعور هيتغير الى الاحسن والحياة هتبقى وردى وبمبى وعصافير وفراشات
    واللة الحياة حلوة
    واحلى مافيها اننا نتمسك بالامل
    ونحافظ على علاقتنا مع اللة ونثق بكل ايمان فى ان اللة سنجينا ويفرحنا ولن يكسر خاطرنا
    الحياة حلوة
    وحلوة جدا

    واحد زعلان جدا

    ReplyDelete
  28. ههه

    حلو اوي الاحساس ده

    السلام مع الموت شيء جميل

    اعتبار الموت جزء من الحياة زي عيسي في غرفة تري النيل

    المهم
    ادخلي عندي عاوز اسمع رايك

    ReplyDelete
  29. انا برضة بتكعبل كتير على السلالم

    ReplyDelete
  30. انا بقة من زمان و انا حسة انى هموت بالسرطان
    ربنا يستر :)

    ReplyDelete
  31. فكرتينى وانا صغيرة كنت بقول ياريت أموت ساعة مالقيامة تقوم علشان مااقعدش فى التربة
    بس لما كبرت وقلت أكتب وصيتى لاقيت نفسى بكتب أول حاجة فى الوصية انهم يدفنونى فى ترب صلاح سالم علشان على الطريق
    وعلشان ترب العائلة ضلمة وماحدش بيروح هناك كتير

    ReplyDelete