5/28/2007

درس في الدين

قولى يا حضرت.. ايه احساسك لما تركب المترو وانت قاعد او واقف فى امان الله وتلاقى حد اتطوع من تلقاء نفسه كده، وابتدا يلقى على مسامعك الكريمة - ومسامع كل اللى فى العربية طبعا - درس دين.. حاجة زى فضل "الذكر" مثلا او "صفات الجنة" . انت ممكن تكون مسلم او مسيحي او مش واخد فى بالك، ممكن تكون بتقرا فى كتاب او بتقرا لك كلمتين من ملخص عشان هتروح تدلقهم فى الامتحان او بتفكر فى موضوع مهم، او حتى عندك صداع، او يمكن هلكان طول اليوم فى الشغل ومشتاق لقدر ما من الهدوء. او حتى صوت فلان ده صوت رنان ومزعج وبيوجعلك طبلة ودانك

بلاش يا حضرت، طيب احساسك ايه وانت راكب ميكروباص، والمفروض انك خلاص هتطلع ع الطريق الزراعى وتلزق عنيك فى اللون الاخضر او تحط راسك على مسند الكرسى وتغمض عنيك وتيار الهوا من فتحة الشباك البسيطة اللى جمبك ملطف الجو حواليك، واذا بعمو السواق يرزعك شريط بتاع العنب العنب، او البلح البلح، او عذاب القبر، او فتنة النساء

يا عالم.. يا هو.. دقيقة سكوت لله

26 comments:

  1. حاجة سخيفة جدا
    زى كده و انت قاعدة فى امان الله و تلاقى حد كده
    و انت تعبانة و هلكانة و مصدعة و قاعدة تقرى على الكمبيوتر و هوب
    تلاقى حد طلع بتدوينة
    اسمها
    درس فى الدين
    لأ ...فعلا
    حاجة سخيفة
    يا عالم
    دقيقة هدوء ....لله

    ReplyDelete
  2. عادي يعني يا زينب..
    إيه إحساسك لما واحد لا شفته ولا اعرفه يستخف دمه ويزاولك عشان ركبت معاه التكسي؟
    عادي برضو بناخدها بروح رياضية..
    إيه إحساسك لما واحد ييجي مش عارف يحشر مراخيره فين ويقول نتعرف، بنتعرف عادي..

    بصراحة احنا عموما معدناش طايقين بعض ولا طايقين نفسنا ولا عاد في تواصل باللسان..

    يعني مثلا مثلا..عايزة تقعدي في صمت، المفروض يكون طلبك منه انو يطفي الكاسيت ده شئ عادي على الرحب والسعة..عملتها مع سواق وطفاه..بس طبعا كان هياكلني..

    ReplyDelete
  3. الاخ عباس العبد
    والنبي اقعد لنا في حتة ناشفة

    اعتقد ان الكلام في الدين مش وحش للدرجة دي واقسملك احيانا بيبقي فيه واحد محتاج اللي يفكره بمجرد الكلمة


    انا شخصيا باركب المترو ولحد دلوقتي ماصادفتنيش المشكلة دي


    عموما في حل سهل قوي تروحي للبني ادم او البني ادمة اللي مضايقاكي دي وكلميها يمكن تقتنع بوجهة نظرك

    ارجو التوضيح لو كنت انا غلطان او مفهمتش صح

    ReplyDelete
  4. أشعر بالعجب من شعورك بالعجب. أليست تلك هي الحالة الآن في عموم مصر؟ أليست هذه هي العبثية الفوضوية التي نعيش فيها جميعًا الآن؟ لماذا تتعجبين؟ مصر التي تعيش في أفكارك ووجدانك ليست هي نفس البلد التي فيها انت تقيمين. سيدتي لقد أصبحنا حالة مستعصية على الفهم. الجميع الآن يعيش في جزر معزولة عن الآخرين. ليس بمستبعد اطلاقًا أن يهاجمك هذا الداعية الاسلامي المفترض في المترو إذا طلبتي منه الهدوء وبنفس طريقة سائق الميكروباص صاحب العنب.

    ReplyDelete
  5. احب ابشرك في اغنيه للخيار دلوقتي

    الخيار الخيار الخيار

    ReplyDelete
  6. ma3aky kalban wa kaleban, shaklan wa madmonan :) bas mesh bardo al mawdou3 da min zaman awee we al nas 7'alas used to have it.

    fa masaln al wa3z al magany da lo 7ad ra7 kalim al ragel 7ayo3oz yew3azak fee 7agat howa aslan mesh fahim 7aga feeha, walla yemkin al nas tekon mabsouta mino wala 7aga.

    2amma 3an zou2 sawa2een al microbus dee 7aga wad7a we saree7a :) 3ayzeen ner2a bel mostawa al thakafy we el fanny le nas keteera beside them :)

    bas isA fee 2amal we rabina youstorha ma3ana.

    ReplyDelete
  7. كتير جدا اتعرضت للموضوع ده
    أنى اكون قاعده فى مكان وبدون مناسبه تلاقى واحد طلع لوحده
    وبدأ يتكلم فى موضوع يختص بالدين
    وخاصه موضوع الحجاب الشرعى
    ويبدأ فى انتقاد لبس البنات
    واللى بيعملوه البنات
    وميسكتش أبدا مع طبعا التلميح للبنات الراكبه فى نفس العربيه أو قاعده فى نفس المكان
    من باب ان الكلام اليكى يا جاره
    أو سواق التاكسى الى بيشغل شريط دينى من الناس اللى بتزعق كتير كده ومتبقيش فاهمه هما بيزعقو ليه فى وقت يكون الواحد فيه مش مستحمل الصوت بس طبعا بيخجل من أنه يطلب من السواق يوفق الشريط ممكن يقول عليه كافر لا قدر الله لو طلب منه وقف شريط دينى
    عندك حق فى كلامك بجد
    يا عالم دقيقه هدوء لله
    تحياتى واحترامى

    ReplyDelete
  8. المشكلة بقى لو تلك الواعظة اللى في المترو الناس عجبها كلامها...
    هتلاقى البنات رايحين يسألوها في مسائل فقهية و هوه ده حرام و لا لأ و ايه رأيك في كذا و كذا ...
    و هي طبعا هتاخدها الجلالة و تحس انها الشيخ الشعراوي و هتفتى بغير علم ...
    أصل وضع الواعظ ده حلو أوي ...انك تكونى فوق و الناس محتاجالك و حاسين ان انتى يا سلام مثل أعلى ..حاجة كده تهبل
    الموضوع ده حصل قدامى كتير بالذات في المترو ...تلاقى بنت عادية رايحة تسأل واحدة في مسألة فقهية لمجرد انها لابسة نقاب مثلا و متعرفش انها ممكن أصلا تكون ما بتصليش ....
    هي العشوائية و التخبط اللى بلدنا فيهم بتقابلنا في كل شئ

    تحياتى

    ReplyDelete
  9. هاهاهاهاها:)))
    انا شخصيا مبعلقشي
    لحد مسمع كلام احس انه غلط
    الغناء بالنسبة لي مش مهم
    لان الناس بتستمتع بيه عادة

    اما الدروس الدينية
    فربنا يستر
    لو كان اللي بيتكلم فاهم اصلا بيقول ايه

    بس لو علي اللي مفروض يحصل؟

    مترو الانفاق مؤسسة حكومية
    لا ينفع فيها درس ديني ولا زار ولا حتي حبة بلدي

    ميكروباسات وتاكسيات دي صاحبها شخص عادي
    قد يكون له الحق في اذاعة شئ ما وللزبون حق في رفض ذلك
    ويتم الامر بالتفاوض

    حتي الان لم يحدث موقف معين يمكن ان اقيس فيه رد الفعل

    ولكن منكم نستفيد
    :))

    ReplyDelete
  10. اولا كفارة .. و عودا حميدا ..

    ثانيا .. حلوة دي .. انتي بتنتقدي اللي بيشغل شريط وعظ أو اغنية .. انتي ما شفتيش هوس التليفونات اللي عليها اغاني و كرنفال الرنات .. تخيلي لو بتركبي المكيف زي حالاتي كده لمدة ساعة رايح و ساعة جي .. تتمني من الصداع حاجة من الاتنين .. يا تنزلي تاخدي تاكسي " و يا ريت ما تلاقيش السواق بيدخن و شايل أوكرة الشباك" يا أما تتمني ان ربنا يرزقك بصمم مؤقت لحد ما تنزلي بالسلامة بدال ما تقومي تصرخي فيهم .. اخرسووووووووووا و اخرسوووووووووا المحروق اللي معاكم ده ..

    قلبتي عليا المواجع و فكرتيني بالمأساه و انا لسه راجعه من بره اساسا .. و بدال الاغاني و شرايط الوعظ و الموبايلات كان فيه عيال كمان بتزن و تعيط .. :((

    ReplyDelete
  11. في الحالة دي
    أقوم مركز جامد أوي أوي أوي أوي أوي
    وأستجمع كل قواي العقلية وأبص للكاسيت بصة جامدة



    يقوم الكاسيت مفرقع



    أما لو شخص هو اللي بيتكلم فممكن أسيبه يعيش

    ReplyDelete
  12. عباس العبد
    يعنى انت بتهزر وللا بتتكلم جد؟
    والنبى يا جماعة حد يقولى هو بيهزر وللا بيتكلم جد؟


    ارحم دماغك
    انى مابطقش حد وانا فى المواصلات دا حققى جدا واعترف بيه،اصلا مش بحب اتكلم فى المواصلات.. بس حكاية انى اطلب منه يطفي الكاسيت دى صعبة جدا..جربتها مرتين تلاتة،حتى مش بوقلة يطفيه بقوله يوطي الصوت.. ممكن ما يعبرنيش وممكن يوطيه نص دقيقة ويرجع يعليه تانى

    طيب يا مؤمن خد عندك دى..ركبت مرةالعربية وكانت فى الموقف ولسه العدد ماكملش يعنى،وكانت مشغلة قرآن.. وكمان كانت نسخة حلوة جدا مش دى صوت ولا بتاع..بس العدد كمل من هنا وطلع عمك السواق على كرسيه واتقفل الباب ودور العربية وقام راح قفل الرآن وشغل حاجة لحد من الاخوة الشيوخ اللى بيزعقوا .. ايه رأيك باه فى اللؤم ده


    عمرو امصري
    يا عمرو الكلام فى الدين مش وحش ابدا.. بس مين يقول وفين وازاى دى بيفرق جدا.. احنا ديننا مش بيتباع ع الرصيف ولا بيتسمع للناس قهرا فى المواصلات.. بذمتك طيب فين حق الطريق وحق الجار..مش اللى معاك فى العربية ده جار وله حق عليك.. مش الدين بيقول كده؟
    طيب لو مكنش كلام فى الدين ، لو حد طلع المترو مسك مجلة قعد يقرالنا اخبار الرياضة والفن وللا حتى السياسة.. مش اسمه ازعاج؟

    وكمان حاية انى اكلم النبى ادمه دى واقنعه بوجهة نظرى فيها قولان،ابسط حاجة هتبصلى بابتسامة ملائكية عريضة وتقولى انها مش هتجادلنى وهتنسحب من الجدال رغم انها على حق.. اه والله حصلت قصادى..طب اقفى يا ماما وضحى الحق اللى انتى تتكلمى عنه ده. هتلاقيها مصرة تنسحب من اللى بتسميه جدال،وهى مبتسمه جدا لدرجة ان الى حواليك هيتعاطفوا معاها ولما تنزل انت وتسيب العربية هيتكلموا من وراك وحش ويشجعوا ويقولولها اكملى بارك الله فيكي
    دا حصل قدامى بالتفصيل اول امبارح ودا اللى خلانى اكتب التدوينة دى

    ReplyDelete
  13. autoscriptor

    مش عارفة ،مجربتش حكاية المهاجمة،انما اللى شفتها قصادى هو ايثار الانسحاب مع الاقتناع بإن دا جدال


    شيماء
    وياترى يا اختى الكيلو منه بكام؟


    2 B || ! 2 B ®
    اهى حكاية ذوق سواقين التاكسي دى اللى مستعصية على الفهم .. انا مش عارفة بجد هما ايه اللى بيسمعوه ده..وهل هما لوحدهم بس اللى بيسمعهوه وللا فى فئات تانية؟
    وهل يا ترى السواق ده اللى بيبقى طول النهار على الطريق تحت الشمس وجمبه عربيات تانية وكلاكسات وعوادم سيارات وجو خنفة ،ازاى بيحط مع كل ده ذوق عالى اوى كده ويقعد يسمع فى خبط ورزع من نوعية اغانى الميكروباس دى


    ريموو
    والله انا بيتهيئلى نجمع شهادات من البهدلة اللى بتحصل لنا وندور على المواقف نوزعها يمكن يحسوا بينا
    :)


    الحلم العربي
    دا حصل فعلا قدامى.. او هى اللى تتبرع وتبتدى الكلام مع بنت جمبها مثلا وتفضل تتكلم فى الحلال والحرام

    ReplyDelete
  14. بن عبد العزيز

    مش عارفة انت بتركب المترو كل يوم وللا لأ، بس لو بتركبه كل يوم يبقى اكيد هتصادف حاجات من دى.. او يمكن دا بيحصل فى عربية السيدات بس؟؟
    مش عارفة..

    اما موضوع الغناء الى الناس عادة بتستمع بيه، فدا مش واقعى بردو.. فى غنا مزعج ومقرف وغبى ويجيب امراض وضغط عصبى وضغط دم وكل الضغوطات الممكنة.. وفى حاجات تانية اسمها فن بصحيح مش رزع وتخبيط فى الحلل

    دا البقر اللى هو حيوان بيفهم فى الموسيقى..لما بيمسع موسيقى حلوة بيزيد ادرار اللبن ولما بيسمع موسيقى صاخبة اعصابة بتتعب وبيتنرفز

    --
    رومانتيك روز

    بتزن وبتعيط؟ انتى كنتى فين من ورايا يا بنت؟؟
    ፡)
    الموبايلات.. يا سلام ع الموبايلات..شغالة بردو فى المترو،وبيقعدوا يسمعوا لبعض الاغانى اللى نزلوها جديدة بس لسه ما انتشرت الحكاية دى نوعا يا كوكى
    انما انا اتكلمت من اللى فاض بيا فيه


    --
    قنديل

    والله فكرة :P

    ReplyDelete
  15. يا سادة الموضوع هو سلوك شعب راح زي ما راحت الأخلاق والمبادئ والقدوة والإحساس - الإحساس يا ناس. أنا مصري مقيم في السعودية وبقول لحضراتكم: لو ركبت تاكسي انا اللي بقول للسواق يفتح الراديو أو لا يفتح ولا يمكن أجد السائق يتجاوز ويشغل لوحده العنب والمانجة والتفاح زي المحروسة فالخطورة أنها بقت ثقافة شعب... أما بخصوص وسائل النقل العام - أو ما شابه ذلك أيضا يستحيل يشغل السائق حاجة , ممكن يركب جنبك حمار مثلا يرغي يرغي وانت مش عايز تتكلم (ممكن جدا يكون للأسف مصري - وعايز يعرف حتى لون ملابسك الداخلية ولا مؤاخذه) الحل من وجهة نظري هو التعامل مع الواقع مثلا في المترو أحاول أجلس بعيد أو أبعد عن اللي بيدي محاضرة (في غير الوقت المناسب ) في التاكسي أحاول أكتم نفس السائق بذوق وخفه - أرجوك أنا دماغي مش مستحملة (مثلا) أو الأفضل أن يكون لديك سيارة خاصة وحينئذ لن تتعرض لهذه المآزق إلا في أضيق الحدود وهتعيش في هدوء وتموت في هدوء. ولكم التحية - أخوكم إيهاب

    ReplyDelete
  16. الموضوع اصبح زائد عن الحد كل واحد مش مش فاهم فى اى حاجه يتكلم فى الدين ويعمل شيخ
    كنت راكب ميكروباص قبل كده مع واحده زميلتى راح السواق مشغل شريط لشيخ من الشيوخ اياهم و مش عاجبه اى حد يتكلم
    كان فيه ناس قاعدين بيتكلموا ورا قعد يعلى صوتوا و يقوا مش عارف اسمعوا كلام ربنا و حاجات غريبه من النوع ده
    بس ليه كل واحد نفسه فى حاجه يعملها بيفرضها على الناس اللى حواليه
    الناس دى مبقاش عندها احترام لخصوصية اى حد يعنى مش كل الناس عابزه تسمع درس فى الدين و اللى عليز فيه مليون حاجه يستمع بيها لدرس الدين غير انه يسمع شريط فى ميكروباص او واحد بيتكلم فى مواصله عامه و بعدين انا ايه اللى يضمنلى اساسا ان ده بيفهم فى الدين علشان يتكلم فيه؟
    اعتقد ان الكلام فى الحاجات اللى زى دى له امان مختصه بده و ده لاحترام حاجات كتير كفاية احترام الدين نفسه

    و شكراً يا زينب لانك أثارتى الموضوع ده

    ReplyDelete
  17. الموضوع اصبح سخيف جدا
    وللاسف بالطريقه هذه تجعل بعض الاشخاص ينفرون من الدين وليس يتجهون اليه

    ReplyDelete
  18. علي فكره هو في حاجه اصعب من كل ده يا جماعه ان الواحدطول ماهو قاعد يلاقي حد متنح له قوي ومبرأ له طول الطريق لكن لو بيقول كلام في الدين ده شيئ كويس بس لو الطريقه مش عجباني هاخده علي جنب وافهمه وربنا يهدي بس هي فعلا ثقافه ان اننامش بنحافظ علي حريات وخصوصيات بعض زي اللي يقعد حاطط عينه في جرنال اللي جنبه

    ReplyDelete
  19. هاهاهاهاهاهاهاها
    يا زينب هانم ، من بوست سابق أنا أخدت فكره عنك انك تنكه ، و دي مش شتيه و الله ده وصف للشخص الدقيق في حياته المتطلب و الراغب لأفضل الأشياء ، و ده يا حاجه بينقرض في مصر أو بيصاب بالجنون في النهاية
    بلاش التناكه دي و حياة والديك - على رأي السعوديين - أخرتها وحشه صدقيني ، طب هاقولك أعملي زيي
    تقدري تعملي لنفسك أغنية ، مشهد سينمائي ، ذكرى حلوه ، سورة من القران ، أي حاجه تسترجعيها لما تحسي بالضوضاء دي ، طبعا في الأول الموضوع صعب ، و لما تلاقي نفسك بتعندي و تحاولي تعمليها غصبن عن المزعج اللي جنبك ، ممكن يحصلك حالة مؤقتة و قصيرة الأمد من الجنون المركز ، بس مع الوقت هاتنجحي في الفصل بين المزعجون من حولك و بين التناغم الذاتي بتاعك
    قال مزعجين قال

    ReplyDelete
  20. انا اري ان الانسان في المواصلات العامه له الحق في ان يستريح من اي اصوات و حسب راحته تماما خصوصا ان فيه ناس بتسافر مسافات طويله و بصوره مبكره جدا و بتكمل نومها غالبا في وسائل المواصلات و بيزعجها جدا ان الصوت يكون شغال لمجرد الوجود
    بخلاف ان فيه ناس بتشغله او بتتحمله رغما عنها علي سبيل التبرك به في الطريق لان الطرق خطره فنموت علي طاعه افضل من لاشيء
    هكذا يفعل بعض الناس
    لكن اعتقد انه خطا

    ReplyDelete
  21. لو درس دين ممكن اكون منزعج لو المكان مش مناسب بس ماقدرش اتكلم لانه رجل بيدعو لله

    لكن لو سواق مشغل اغاني اكيد هاقوله يبطل اللي مشغل بصنعة لطافة
    و لو مرضيش هاقوله اطفب الزفت ده يا اما تنزلني و مفيش أجرة

    و ساعتها تلاقي الركاب كلها اتشجعت و نطقت

    و عمار يا مصر

    ReplyDelete
  22. العافيه
    ولوى الدراع
    هتسمع يعنى هتسمع
    مبقاش فيه خطب حقيقيه فى المساجد فكل واحد عمل من نفسه خطيب

    ReplyDelete
  23. هههههههه فعلاً والله
    بقت حاجة طبيعية جداً

    ReplyDelete
  24. عزيزتى البنت الفرعونيه)المصـــــــــريه)
    أنا واحد من العصر الحميرى الجميل..إللى إنتهى وعدى وفات..فى هذا الزمن كان الحمار يحافظ على شعور أخيه الحمار يرضه..وده كان قانون ضمنى بينهم..تصـــــــــورى
    ألأغرب من كده أنه كان فيه وزاره حميريه إسمها(وزارة الذوق العـــــــام) وشوفى بأه عدد الحمير إللى كانت فيها تحافظ وتطبق الذوق على كل حمـــــــار؟؟
    الحمير كانت سعيده وماكان هناك شىء يعرف بالتلوث السمعى ولاالخطب العصماء التى تحث على الحجاب ومايضرش النقاب وإلا هلكتى ياأختى المسلمه..الحجاب عفه وطهاره!!يعنى ألأخوات القبطيات أخواتنا دول غير طاهرات ولن يدخلوا الجنــــــــــــــــه؟؟؟؟
    سلام:من حمار

    ReplyDelete
  25. طيب انا هاقولك علي حاجة اوسخ
    بصي ادخلي هنا والنبي
    http://nasrmisr.blogspot.com/2007/03/blog-post.html

    طيب هاقولك علي حاجة تعمليها سمعت ابويا بيقولها في التلفزيون
    ركب ميكروباص وهو اصلا من عادته انه بيراجع شوية حاجات او يقرا في كتاب وهو في المواصلات
    فسمع سواق الميكروباص شغل قرأن بس بيتقري بطريقة تهين القرأن اصلا بطريقة من بتوع القاعدة ولا ايه مش فاهم بس المهم انها طريقة فعلا مقززة مش زي الطريقة المصرية الواضحة ديه تحسي كده ان اللي بيقرا بيزن اصلا
    خدوا القسم وعمله محضر
    علشان الناس الواطية ديه تنتهي من البلد بقي

    ReplyDelete
  26. ياأهل المغنى وجعتو دماغنا, دقيقه سكوت لوجه الله

    http://alaa16.blogspot.com/2006/07/blog-post_20.html

    ReplyDelete