6/05/2007

درجة حرارة مصر المرتفعة

أنا سمعت النهاردة فى الراديو، دكتور بيتكلم عن الاحتباس الحراري، طبعا الموضوع ده ابتدا يطفو على السطح وبشكل ما الناس ابتدت تعرف عنه، كلام صح او كلام غلط، طراطيش كلام او معلومات تفصيلية المهم ان مصطلح الاحتباس الحرارى، او الانحباس الحرارى اصبح مصطلح متداول بدرجة ما.

المهم الدكتور ده كان بيتكلم عن خطورة الاحتباس الحراري، ما علينا مش هنقعد نشرح المصيبة اللى مستنية كوكب الارض وسكانه لما تزيد درجة حرارة الأرض، ولا التلج اللى هيدوب ومستوى المياه اللى هيزيد واليابس الى هيغرق ويختفى تحت سطح البحر - بما فيهم خمس جزر فى الهند راحوا خلاص بسبب الاحتباس، ولا هنتكلم عن تأثيره على بقاء حيوانات او حشرات بعينها ولا ان نوع الحرب فى المستقبل هتكون على المية وكده


اللى لفت نظرى - بعد ما انا مخضوضة من خطورة الموضوع ده - ان الدكتور قال اننا ممكن فى مصر ننجح فى تخفيض درجة الحرارة خمس درجات.. ازاى بأه؟ هو قال ان كل مصري لو دفع جنيه واحد نقدر بتمن الجنية نشترى عشر شجرات جازورين، الشجرة منهم ببريزة.. الشجر ده بيكبر بسرعة ومساحة الاخضر بتاعته كبيرة وبيمتص كميات هائلة من ثانى اكسيد الكربون وينتج لنا الاكسجين بالمقارنة بغيره من الشجر.. لو المصريين باه دفعوا كل واحد من جيبه جنيه وابتدينا نشترى الشجر ده ونزرعة حوالين المدن - سياج اخضر - هو قال اننا محتاجين كام مليون شجرة، انا مش فاكرة الرقم بالظبط، بس يعنى دى الشجرة بعشرة صاغ

يعنى احنا نقدر نساهم فى معالجة الاحتباس الحرارى ونقدر ننزل درجة حرارة مصر خمس درجات لو الشعب المصري زرع حوالين بلاده شجر من ابو بريزة

طيب ايه المشكلة فى ان دا يتحقق؟

هو انا مش عايزة ابقى متشائمة، بس بجد لو دا حل ياريت نقدر نعمله وماتوقفناش مشاكل من نوع.. اننا كشعب معندناش ثقافة التبرع، اعتقد ان بشىء من الوعى الناس هتقدر وبدل ما الواحد يدفع جنيه هيدفع عشرة فبدل ما الواحد يجب عشر شجرات يجيب مية..

المشكلة التانية ان الموضوع ممكن ينزل كمشروع تحت رعاية وزارة الزراعة او تكون هى مسئولة عنه اول عن اخر، ودى مصيبة لأن المشروع كده هيبوظ، لو مش بسبب السرقة يبقى بسبب البيروقراطية، يبقى الافضل ان جمعية تتعمل عشان تحقق الهدف ده، الجمعية تبقى مسئولة بس عن زراعة شجر الجازورين حوالين مصر.. ودى عملية فيها العمر كله

ثالثا، ممكن تتفتح سوق سودة لشجرة الجازورين، فيزيد تمنها بشكل سعارى لربع جنيه ، او يزيد بشكل اسطورى تراجيدي احتكارى لعشرة جنيه مثلا.. كارثة فعلا، بس ساعتها ممكن ندخل فى دوامة منع الاحتكار والمحاكم والقواضى وكده ، بس ربنا معانا

رابعا، هنحتاج اعداد كبيرة من الشباب اللى ممكن يساعد فى زراعة ورعاية الشجر ده لحد ما يكبر ويتولى مسئولية نفسه... طبعا لو فتحنا باب التطوع مش هنلم اكتر مية ميتين فرد، اممم بس ممكن نشتغل الطلبة بتوع المدارس الثانوى والكليات فى النوع ده من التعاون والمجهود الوطنى الاجتماعى البيئوى.. والافضل طبعا انهم يحصلوا عى مكافئات عشان نقدرنلاقى عدد كبير من الشباب المستعد يقضى وقت ومجهود فى الحكاية دى.. طبعا مكافئاتهم محتاجة تبرع من ناس تانية . هاها

خامسا، طيب نروح لمين عشان ناخد منه فلوس؟ طلاب المدارس والجامعات... اصحاب السيارات، كل واحد يدفع تمن كام شجرة تمتص الرصاص اللى بيخرج من عربيته، نقف لهم فى اشارات المرور مثلا، الناس فى المستشفيات هيبقوا حابين يتبرعوا ولو بجنيه ويدعوا ربنا يشفيهم بالصدقة الجارية دى.. الكام واربعين ألف بنى ادم مصري اللى على فيس بوك.. انتو.. انا.. مين كمان؟

انا عايزة اخفض حرارة مصر خمس درجات

27 comments:

  1. موضوع هام جدا

    والافكار التي قمت بطرحها ممتازة وتحتاج لجهد كبير

    الناس ليس لديهم مانع للتطوع او التبرع ولكن لو تولت اي جهة حكومية الاشراف على الامر سيتحول لسبوبة كبيرة ويتم نهب كمية غير عادية من التبرعات

    يذكرني هذا بمشروعات النظافة التي كانت تنظمها المحافظات وكان النهب شغال على ودنه صراحة.

    الشعب محتاج لتثقيفه بيئيا بالاضافة لاستثارته حميته للتبرع والتطوع

    فالناس تفهم جيدا التبرع للايتام والمرضى

    لكن التبرع لزراعة اشجار امر يحتاج لتوعية في البداية بخطورة الاحتباس الحراري وعمل مقارنة بين درجات حرارة مصر من قبل والآن لتقريب الصورة في ذهن الناس

    ReplyDelete
  2. فكرة جميلة جدا بس تنفيذها مصر صعب
    الشعب هيقول ده شغل الحكومة و طبعا الحكومة هتقول هو احنا عارفين نأكلكوا عشان نزعلكو شجر
    ثقافة الشعب هنا مش هتخلى ده مشروع شعبى
    يعنى مثلا فى لندن زرعوا حواليها حزام اخضر
    بس فى مصر احنا بنكسر الشجر فى الشوارع
    الموضوع ممكن يقوم بيه مجموعة شباب متحمس انا شايف ان المادة مش مهمه لو كل واحد دفع 15 جنيه مثلا هيكونوا كويسين
    بس انا مش متفائل خالص ان ده يحصل هنا مش فى مصر
    المشكلة مش مشكلة فلوس
    المشكلة اكبر من كده
    شكرا لعرض للموضوع
    و اتمنى ان فيه حاجه تحصل زى حملة مثلا و أنا مستعد اشارك
    وشكرا

    ReplyDelete
  3. انتظري بقى قضية فساد وسرقة ونهب في صفقة شجر الجزوارين
    دة لو لتعملت اساسا
    عموما
    الحكومة على ماتوافق ع الموضوع دة وتعمل لجنة هتنبثق عنها 3 لجان هيكون البحر المتوسط دخل في المحيط الهندي
    والنيل اتحول لاخدود افريقي
    تحياتي ليكي

    ReplyDelete
  4. الموضوع مهم جدا فعلا
    اول مرة اسمع الكلام ده
    بس من بكره ان شاء الله هاشوف المختصين
    و اسأل في الموضوع لحد ما افهم كل حاجة فيه
    و هاقدم طلبات لجمعيات خيرية و اقدم طلب لوزارة الزراعة يمكن حد يتكفل بادارة الموضوع
    هامشي في الموضوع ان شاء الله
    و انا متأكد اني هالاقي شباب يساعدوني
    لاني انا كمان عايز اخفض حرارة مصر خمس درجات
    تحمست جدا للفكرة
    ربنا يبارك فيكي و يحفظك على الموضوع القيم
    و لا تيأسي حاولي أنتي الأخرى
    سلام

    ReplyDelete
  5. أوافقك على أن أول خطوة هى إنشاء جمعية لتولى الأمر. ولا أعتقد أن مسألة التبرعات ستمثل أى مشكلة لو إستطاعت الجمعية أن تدير شؤنها بشفافية وأن تؤدى عملها بذكاء يكسبها ثقة الناس.
    التبرعات ممكن تأتى من مصادر كثيرة من الداخل والخارج وأهم شىء فى رأى هو إيجاد وسيلة "ذكية" تجذب المسلمين والمسيحين للمشاركة معاً فى هذا العمل بصورة واضحة من خلال المساجد والكنائس... أشياء إيجابية كثيرة ممكن تتحقق من خلال هذا المشروع. أنا عن نفسى ممكن أقدم كل ما أستطيع فى هذا العمل الخيّر

    ReplyDelete
  6. الحفل الجاى لاسكندريلاّ يوم 11/6/2007 بالجامعة الأمريكية فى انتظار تفاصيل أكثر


    بعدها اسكندريلاّ هتكون موجودة يوم الجمعة 29 يونيو على مسرح الجنينة من9-10 مساء


    المكان: حديقة الأزهر طريق صلاح سالم الدراسة جميع العروض مجانية بخلاف تذكرة دخول الحديقة (5 جنيه) للمزيد من المعلومات www.mawred.org
    الحفل التالى سيكون فى ساقية الصاوى 11/7/2007 ضمن مهرجان (أجازة بجد ) التى تقيمه جمعية تنمية بلا حدود أيضاً التحديث بالتفاصيل مستمر

    ReplyDelete
  7. ثقافة مندثرة
    انا عاريزة اخفض درجة حرارتى ل 5تحت الصفر

    ReplyDelete
  8. ثقافة التطوع مندثرة
    انا عايزة اخفض درجة حرارتى ل 5تحت الصفر

    عفوا الكوممنت السابق ينتمى لى

    ReplyDelete
  9. طبعا زيادة الأشجار خصوصا في المدن في الدلتا و وادي النيل امر مطلوب و مفيد، و هيلطف من الجو و يقلل التلوث، و محتاجين مجهودات فيه، لكن المشكلة الحقيقية في تغير المناخ (الاحترار العالمي) هي في نوع الطاقة ال بنستخدمه.

    معظم طاقتنا في مصر جاية من حرق الوقود الأحفوري (النفط و الغاز الطبيعي) و دا سبب الاحترار العالمي لإن حرق الوقود الأحفوري هو ال بيطلق ثاني أكيد الكربون في الحو، و ثاني أكسيد الكربون بنسبة مرتفعة أحد أسباب تغير المناخ.

    الحل هو إننا ننتج ثاني أكسيد كربون أقل. يعني نقفل النور و احنا خارجين من الأودة، و نستعمل لمبات موفرة للطاقة (أرخص و أنضف)، و نسعمل ماية سخنة أقل، و نركب عربيات أقل، و نحاول نعرف إذا ممكن نولد كهربتنا من الشمس و الهوا، و نحافظ على الغابات القديمة في أفريقيا و آسيا و الأمازون، و طبعا نزرع شجر في مدن مصر.i

    ReplyDelete
  10. اول حاجة احب اقولها ان مصر هي من اكتر دول العالم اللي هاتضر
    في دراسة بتقول ان اول حاجة هاتغرق غير الجزر طبعا هي دلتا الانهار واول نهر دلتاه هاتغرق هي دلتا نهر النيل لانه من اكتر الدلتات اللي منخفضة فبد ماتصيفي في اسكندرية هاتصيفي في شوبرا او ولو ليكي حد في المنوفية الحقي سلمي عليه:)

    بس حكاية مشاريع الاشجار المليونية ديه اتعملت مليون مره في مصر وزرع الغابات وي وي ده كله بيبوظ لان بيئة مصر لا تصلح للغابات ولو فكرنا في حكاية الحائط الاخضر ده محتاجة ملايان لو مش مليارات لان المدن كبيرة وبالذات القاهرة الكبري وعلشان تتسقي مش هانحط جنب كل شجرة واحد عاوزة ري بالخراطيم والحوارات ديه كلها محتاجة فلوس كتيير
    وبعدين مين قالك ان درجة حرارة القاهرة لما تنخفض هايأث جام احنا بعيد عن القطب والكوارث اللي بتجيلنا بتبقي بسبب امريكا والدول الصناعية اللي فوق عند القطب يعني شوفي امريكا اكبر دولة بتساهم في رفع درجة الحرارة ومن الدولالقليلة اللي مش موقعة علي كيوتو والكوارث الللي بتجيلها قليلة نسبيا وصغيرا بالنسبة لكوارث زي مجاعات افريقيا وتسونامي اسيا
    هانشوف في قمة الجريت ايت هايتغطوا جامد علي امريكا وامريكا ممكن توافق لانها محتاجة تتنازل عن اي حاجة في سبيل موافقة الدول ديه علي الدرع الصاروخي
    اللي هايأث اكتر لو عملنا ضغو علي امريكا وصدقيني ممكن بالتعاون مع منظمات عالمية وملايين المدونين حول العالم ده ممكن يغير شوية لان الانظمة الغربية ديه فرافيري وومكن نضغط عليها بسهولة

    علي فكرة معرفتش اعمل اكاونت في فيس بوك ده خاللص مش عارف ليه

    ReplyDelete
  11. أعتقد ان حكايه الوعى دى غير صحيحه نوعا ما
    لان فى كتير مش عندهم وعى أو حتى سابق معرفه بالموضوع المطروح
    وحتى لو عندهم معرفه فهنقابل مشكله الرغبه فى وجود حل
    فى نوع من أنواع الكسل الاجتماعى عن الشعب عندنا
    الناس مش عايزه تساعد فى اى تطوع لو كان هيكلفها لو حتى جنيه
    فى روح انهزاميه عند كتير عايزين يشاركو وروح لامبالاه عند أكتر مش فارقه معاهم
    الى جانب طبعا موضوع ان الحكومه تتولى الموضوع وتبقى هى المسؤول عنه
    ده فى حد ذاته معناه نهايه الموضوع قبل بدايته
    أعتقد ان الموضوع محتاج حملات توعيه كبيره جدا مع محاوله لاثاره روح التطوع عن الناس مع طبعا اختيار جهه مسؤوله عن الموضوع بعيد عن ايدى الحكومه والسرقه والنهب والروتين
    الموضوع مميز
    تحياتى

    ReplyDelete
  12. اعتقد ان ثقافة التبرع اختفت بسبب الفقر لكن لو مبلغ صغير جدا مثل هذا فلا مكان للادعاء بالفقر هنا
    لكن شجرة الجازورين ممكن الاقيها فين لو حبيت ازرعها بنفسي؟
    هنا ممكن تكون مشكله ايضا الناس وعيها تافه جدا بالامور البيئيه علي اساس ان اخطارها لا تظهر الا بعد اجيال و الناس بيقولوا احنا ولاد النهارده
    يعني مش هيعتبروها مشكلتهم لانهم مش هيعانوا منها و لا هيحسوا بيها
    هيفكروا في مشاكلهم الانيه فقط

    ReplyDelete
  13. يا جماعة ، انا بتكلم فى حاجة انا عارفة انها صعبة وليها عوائق كتيرة اوى، بس مش عارفة ليه عندى امل

    ------
    علاء
    طيب ما تحط محاولاتك على محاولاتى ونبتدى نعمل حاجة
    ايه رأيك؟
    دا ايميلى
    zeinab7[@]gmail[dot]com

    او بمعنى تانى، ساعدنى انى اعمل حاجة، لانى بلا حيلة ولا معارف فى المحروسة، معرفش اروح فين واجى منين لما احب امشى فى موضوع زى ده.. ممكن؟
    ----

    عمرو غربية
    يبقى احنا محتاجين كمان وعي بيئي.. مش فى جمعيات مهتمة بالبيئة بردو؟

    ---
    عربي
    فعلا من الللى عرفته بردو ان كل دلتا فى العالم معرضة لاخطار الغرق
    بس انا عندى امل معرفش ليه اننا ممكن نعمل حاجة

    الاكونت على فيس بوك سهل، جرب تانى كده.. بس على فكرة بياكل الوقت وانت عندك امتحانات
    انا قفلت الاكونت بتاعى بعد كام يوم ادمان
    :)

    ReplyDelete
  14. أنا كمان عايزة اخفض درجة حرارة مصر و اجمل شكلها ...
    أفكارك جميلة و تحياتى للفكرة جدا

    ReplyDelete
  15. عملته خلاص بس مافهمتش حاجة
    هو زي هاي فايف كده؟
    عالعموم مافيش اجن مني في الامتحانت انا خارج الناهردة اللي هو الخميس وفيه امتحان السبت
    ما ما جنونة
    :)

    ReplyDelete
  16. فكرة جميلة يا بنت مصرية.

    و انك بعدتي فكرك عن المؤسسات الحكومية من الاول دى نقطة بداية جيده جدا

    ثانيا :ممكن تشوفي جمعية زي جمعية رسالة ..حتى ممكن تقابلي دكتور شريف عبد العظيم نفسه و تعرضى عليه الفكرة و اعتقد انه ممكن يتحمس للفكرة ..

    ثالثا: ساقية الصاوي من الاماكن المهمة اللى ممكن تروج للموضوع كويس ..

    رابعا : جمعيات صناع الحياة ايضا من الاماكن اللى ممكن تتبنى الفكرة عمليا .. ادخلي على منتدى الاستاذ عمرو خالد و اكتبي الموضوع ده منتدى صناع الحياة و هتلاقى ان شاء الله اقبال جيد و عملي مش مجرد كلام ..

    تحياتي للفكرة ..
    و يا ريت اقدر افيد

    ReplyDelete
  17. لحلوح بحاله يفتح الله مفيش حلول من غير دفع

    للأسف مفيش وبردو مفيش حد عاوز يدفع

    ReplyDelete
  18. فكرة جميلة جدا بس تنفيذها مصر صعب
    والناس تقول احنا لقينا ناكل عاشان نزرع سجر وليه الحكومة متعملش كده وموضوع الاحنباس ده في كل العالم مش في مصر بس

    ReplyDelete
  19. واضح أن الموضوع دا لفت نظر ناس كثير، و دي حاجة كويسة طبعا.

    لكن كما أوضح صاحب الأشجار أن الأشجار ليست وحدها الحل. الحل في البيوت و السيارات و المصانع؛ وسائل إنتاج و استهلاك الطاقة و أسلوب حياة الناس.

    يعني كم واحد و واحدة مستعدين يغيروا حاجات هم متعودين عليها كل يوم، مش بس يزرعوا شجرة و يسيبوها.

    ReplyDelete
  20. الجمعيات البيئية، زي باقي المجتمع المدني، قدرتهم متواضعة على خلق خطاب يواجه المشاكل الحقيقية و يفهمه الكثيرون. طبعا الواحد لازم يبدأ من ال متاح، و يحسن منه. النقطة ال لازم تفضل في بالنا طول الوقت هو إن الوعي البيئي من التشجير و النظافة، لكن طريقة حياة و اختيارات استهلاك و تفكير في الآخرين.

    لازم الواحد يفهم إن عنده خيارات، و إنه يقيم الخيارات ال قدامه. كلنا ممكن نقلل من استهلاكنا في معظم الحاجات، و نمتع استهلاكنا في حاجات مش قليلة. طريقة الحياة ال معظمنا ال تقريبا كل الغرب (و معظم ال بيقروا الكلام دا) عايشين بيها غير مستدامة. يعني احنا مش بس بنستلف من المستقبل علشان نصرف النهار دا، دا احنا كمان بناخد نصيب الفقرا و نمنعهم إنهم يعيشوا زينا. ليه؟ علشان نمط حياتنا ما يسمحش.

    ReplyDelete
  21. أحمد غربية
    هو انا ممكن اعمل ازاى جمعية او شكل قانوني يعنى، يخلينى ابدأ اعمل كل ده.. من اول توصيل خطاب الوعى البيئي لحد زرع الشجر؟

    ---
    عمرو غربية
    خلق خطاب... هى دى

    بالمناسبة كمان، جاوب على السؤال الى وجهته لأحمد بردو :)
    ساعدونى

    ReplyDelete
  22. شجرة اية اللي ببريزة

    دة رغيف العيش بربع جنية

    و المطلوب زراعه غابات استوائية في مساحات شاسعه حوالين القاهرة اللي هي اكثر مدن العالم تلوثاً و الشتلات دي تحتاج لسنوات حتى تنموا
    و اكيد التكلفة للشجرة اضعاف اضعاف البريزة اللي بيتكلم عنها دكتورك العزيز اللي بأشك انة بيرفع بانجو او مصاب بالزهايمر و عايش ايام الملك فاروق و البريزة من 80 سنة مثلا

    ReplyDelete
  23. الوعي البيئي ممكن تبدأيه من غير جمعية. من هنا على المدونة. أحسن طريقة إنك تتعلمي حاجة هي أنك تعلميها لغيرك.

    الجمعية نفسها من أكثر من تمثيل قانوني لجماعة من الناس، يعني الجماعة هي ال ضرورية. الجمعية مش دايما.

    للحصان الأسود: آخر مرة دورت كانت شتلة الجازورين الجديدة بثلاثين قرش، يعني مش بعيدة قوي. البانجو بيدخنوه. ال بيترفع هو البرشام.

    ReplyDelete
  24. كويس والله ان قضية الإحتباس الحرارى بدأنا نهتم بيها هنا لإننا من اكتر الناس اللى ممكن يصيبنا الضرر
    وانا معاكى فى موضوع التشجير ورغم انه مش كافى الا انه خطوه رائعه كبدايه
    وممكن يتعمل حمله للتبرع علشان التشجير و الموضوع مش مكلف بس محتاج دعايه وجهد و اخلاص
    شكرا يا مصريه على موضوعك و يا ريت نهتم كلنا بالموضوع ده

    ReplyDelete
  25. معلش يا عمرو

    والله انا لابشرب بانجو ولا حشيش و لا بارفع برشام

    هههههه فا مش باعرف انهي الفاظ مع اية بالضبط

    بس اللي عاوز اقولة ان لو الشتلة ب30 قرش و الشتلة دي طبعا قدامها سنين علشان تبقى شجرة وارفة فيها كم من الاخضر يكفي انة يعمل تمثيل ضوئي يبدد جزء من ثاني اكسيد الكاربون

    يعني انهم اكيد مش حايشتروا شتلات جازورينا من ام تلاتين قرش و يستنوها 3 او 4 سنين مثلا بل حايشتروا شجر كامل و بكميات اكيد مش متوفرة في السوق المحلي اللي عندة عدد قليل من الشتلات و الاقبال عليها طبعا ضعيف جدا فسعرها قليل
    لاننا شعب لا يهتم في مجملة بالخضرة و التشجير و كان في الستينات كم الخضرة في شوارع القاهرة و المدن اضعاف ما نحن علية الان

    المهم ان اكيد الانتاج المحلي من الشتلات اللي ب 30 قرش ليس بالملايينو سيضطروا للاستيراد و بسعرو تكلفة اكثر, و سيرتفع سعر المطروح بكتير عن التلاتين قرش

    عارف زي حكاية حديد التسليح

    كلة جري عالتجمع الخامس والعبور و المدن الجديدةو بيشتري اراضي و حركة البناء و المعمار منتعشة فأدت إلى عدم كفتية المطروح من الاسمنت و حديد التسليح و تضاعف سعرة عشرة اضعاف في اقل من سنتين

    تحياتي

    ReplyDelete
  26. فكره عجباني

    اوي

    ايه رايكم

    نشوف الموضوع مع

    جمعية رساله

    انا هاحاول اعرض الموضوع عليهم

    و يا رب خير

    ReplyDelete
  27. 4
    طبعا الفكرة ممتازة ، بس للأسف أنا دايما متشائم و باحب احسب كل حاجه
    كلام الحصان الإسود صحيح عن زيادة سعر الشجر اللي هايبقى عليه اقبال
    المكان اللي حوالين المدن ده كلام كوميدي جدا ، هو فين الأرض الفاضية اللي حوالين القاهرة؟ حدود مدينة نصر و الطريق الدائري؟ و لا حدود المعادي؟ كل دي أراضي ملك لأفراد و شركات ، و حتى لو هي أرض ملك الحكومة ، و لو زرعناها ، بعد كام سنة العمران هايتمدلها و تتقسم و تتحول لأراضي قابله للبناء
    كلام عمرو و احمد غربية صحيح تماما ، الطبيعي انك تحاول تمنع سبب الضرر ، مش تسمح بيه و بعدين تحاول تعالجه
    كمان الشجر ده هايكون ليه ميزانية كبيره للصرف عليه و تشذيبه و ريه ، و بالتالي ثمن الشجرة هايزيد عن العشر قروش أو التلاتين
    اهم حاجه و سايبها للآخر عشان افرسكو ، سوزان مبارك حاطه يافطه ضخمة على الطريق الدائري عند التجمع الاول ، و بتعلن بداية مشروع الحزام الاخضر حول القاهره ، يعني فيه فعلا ناس ابتدت تعمل المشروع ده ، أو شبه له ، بس بدعم حكومي مش بدعم شعبي

    ReplyDelete