6/08/2007

بعد العاصفة ما انتهت: هو يعنى ايه خدامة؟

هو انا اول ما قريت الخبر اتضايقت ومعجبنيش الكلام ده، ان عائشة عبد الهادى -وزيرة ايه؟- مضت اتفاقية مع السعودية ان مصر تصدر لها عشرين ألف خادمة

أثيرت القضية - وانفضت بتراجع الوزيرة -، وظهر استياء الناس لسببين
الأولانى هو منظر مصر، اوسمعتها يعنى، البرستيج بتاع بلدنا بعد ما كانت بتصدر دكاترة ومهندسين ومدرسين بقت بتصدر خدامات
السبب التانى مخاوف من تحرش السعوديين بالخدامات

طيب خلينا فى السبب الأولانى، هو دا اللى جه فى بالى الاول، بس ان جيتو للحق انا اتضايقت من نفسي بعدها اكتر، يعنى اتضايقت انى اتضايق ان مصر تصدر خدامات.. هو ايه الفرق بين الخدامة والدكتورة؟ ليه الدكتورة افضل مكانة واكرم اجتماعيا واشرف طبقياً؟؟ ليه الخدامة اقل شأنا دايما؟ هو احنا مش بنقول ان الناس سواسية؟ وان الواحد مايعبهوش عمله ولا مهنته طول ما هى مهنة شريفة وحلال؟ مش الخدامة دى ليها كرامتها وشرفها ودورها اللى بتأديه فى المجتمع؟ ليه بنقول كلام كبير كده ونرجع نعتبر ان دى اهانة لمصر انها تصدر خدامات ؟؟؟ فين بتوع حقوق الانسان يدافعوا عن حق الخدامات وكل اصحاب المهن "المهانة بواسطة عجرفتنا"؟

اذا كان سبب رفض اللى عملته الست عائشة هو اننا بنتكسف من المهنة دى ومعتبرين انه كان مجد وفخر لينا اننا نصدر للسعودية مهندسين ودكاترة ومدرسين ودلوقتى سبة فى جبين المكانة المصرية اننا نصدر خادمات.. اذا كان كده يبقى اللهى ييجينا ويحط علينا طالما بنفرق ما بين شرف مهنة وشرف مهنة

واذا كنا بنحب نقعد ع القهاوى ونتباهى اننا اللى بنينا السعودية واننا اللى علمناهم ونتضايق لو بعتنا خدامات عشان بعد سنة هيقول السعوديين ان مصر بتشتغل خدامة عندها.. تبقى دى هيافة وشغل دول عربية بيعانوا من مراهقة متأخرة.. ونبقى نسينا ان المصريين لما سافروا قبل تلاتين سنة ولحد دلوقتى سافروا عشان الفلوس - ودا مش شىء يقلل من مكانة البنى ادم، حقة يدور على الفلوس والعيشة الكريمة - وعشان بترول السعودية اللى غرف وادالهم ، يعنى مكنش شغل لله وللوطن، ومش حسنة بتديها مصر للسعودية

اللى "مؤرقنى" اكتر ان دا كان رد فعل تلقائى، انك اول ما قريت الخبر اقتضبت حاجبيك، وشعرت بغصة فى الحلق وضيق فى البلعوم، دا معناه ايه؟

هل الشعور الطبقي متوغل فينا لهذا الحد؟
هل فعلا غلبت ممارسة الفكرة " الطبقية" على ترديد فكرة "المساواة" وسيطر الزيف على الاصل؟
هل بنفضل طول عمرنا نقيس قيمة البنى ادمين بنوع المهنة اللى احنا حطينا لها ترتيب اجتماعى فى جدول المنظرة والتباهي؟

هو مش سيدنا "أنس بن مالك" اللى بنذكره كصحابي جليل ولما تيجي سيرته ندعى له ونقول "رضي الله عنه" واللى كان احد اهم واوثق رواة الحديث الشريف، مش كان هو معروف انه "خادم الرسول صلى الله عليه وسلم" وهذا الخادم الصحابي كان واحد من أعلم العلماء فى الدين؟

مش الخدامات دول هما "المرأة العاملة" اللى فى مصر اللى الواحدة منهم بتبقى فاتحة بيت، بتجرى على اولادها ويمكن باباها وماماتها واخواتها واحتمال جوزها كمان.. مش هى بطلة فيلم زى "أحلام هند وكاميليا" ؟ مش بنعيط على حال هند ونتأثر بظروف كاميليا؟ ، بلاش كده.. مش بنزعل من شادية لما تستعر من مهنة امينة رزق امها فى فيلم التلميذة وبنعتبر ان شادية هى الشريرة فى الفيلم وان امينة رزق ست مكافحة ومناضلة فى سبيل لقمة عيش بالحلال؟؟ مين فيهم اشرف؟ مش بردو بتستحمل تقعد تسمع المحاضرة الى بتقولها امينة رزق فى الاخر لأنك عارف ان كل كلمة بتقولها المفروض انها الصح وانها المنطق وانها الفطرة

المهنة اللى تشرف مصر هى المهنة اللى صاحبها يأديها بضمير، ويخدم بيها الناس.. كان وزير او غفير
واذا احنا كمصريين ما رسبناش الفكرة دى فى ضمايرنا يبقى نسكت باه ونبطل كلام على الحكومة اللى بتهين المصريين وبتسحل كرامتهم فى مصالحها ومكاتبها قبل اقسامها ومعتقلاتها

like 7koma like sha3b

---
اما عن السبب التانى وهو الخوف من التحرش الجنسي، فعموما هنا وهناك واحد.. حتى مصر سبقاة دايما

like masr like so3odia


20 comments:

  1. لما يكون مستوى الثقافة عند الناس اللي هاتشتغل عندهم هو نفس الكلام اللي بتقوليه ده يبقى مافيش مشكلة وعجاكي
    العيب .. لكن ياستي المجتمع بتاعنا والمجتمع اللي هاتروح عندهم نظرتهم للوظيفة مش كده بل يمكن اسوأ كتير من نظرتنا .. دي مهنة وضيعة حقيرة مهينة مذلة دي وجهة النظر السائدة ولما تكون دي وجهة النظر السائدة يبقى افضل لينا ولكرامتنا نقفل علينا بابنا وبلاش منه الباب ده

    لما واحد عربي قاعد معاه ند بند وبيقولي الخدامة بنت الحرامية عملت وعملات ولا أنا مثلا نمت معاها آسف في التعبير .. بيكون الموقف بايخ

    ماتقوليلش رد عليه وقوله كذا وكذا

    ومثال العمالة المغربية التي تعمل كوافيرات وباديكيرات وماإلى ذلك شوفي النظرة ليهم إيه شوفي النظرة للمغربية وهي الجنسية العربية الوحيدة التي يتم الخوض في أخلاقياتها طوال النهار والليل عشان تسربوا للدول دي من بند زي ده

    المنحرات في كل بلد لكن عندما نكون مصدرين لها لبلاد أخرى هنا الامر جد خطير .. كل فتيات الليل التي تحصل لى بضعة جنيهات سوف تنتهز هذا البند وتذهب لتحصل على آلاف الدراهم والريالات في نهاية الشهر

    والنبي كفاية العملية مش ناقصة

    ReplyDelete
  2. طبعا لما نتفق على الفكرة ونرجع للاصل فى احترام وتقدير المهن مش هتكون فى مشكلة، وانا معاك جدا فى اللى بتقوله، انا بس اتضايقت من نفسي ومن الفكرة السائدة واللى اتمنى تتغير، معرفش ازاى وامتى.. بس دا مش معناه انى بقول انا نشحن خدامات دلوقتى للسعودية.. انا بقول نغير تفكيرنا كلنا.. نحترم الناس دى
    :)

    ReplyDelete
  3. سبب غضب الشارع المصرى ... مش النظره الدونيه للخادمه..... لكن الواقع هناك بيقول ان الخدمات الفلبينيات هناك منتهكين ويتعرضن للتعذيب.... الاتفاقيه الى قامت بيها الوزيره كانت بدون ضمانات وباجر اقل من الفلبينيات!! دكتور مصرى اتصل من السعوديه فى احد البرامج وقال ان حقوقه ضايعه مع الكفيل فما بالك بامراه فقيره طحنتها الظروف وتعمل تحت رحمه سعودى يرى انه اشتراها بفلوسه!!

    ReplyDelete
  4. مصرية
    احقاقا للحق انت كل اللى كتبتية صح
    وتعليق احمد شوقير صح وتعليق دعاء صح

    تفسيرى ـ انت بتتكلمنى عن مجتمع حط خطوط واضحة ومتفق عليها مش كدة وبس دة وضع ليها قوانين ـ المجتمع الامريكى بينفذ اللى انت كتباة بالحرف
    وللعلم معظم الامريكان بيخدموا نفسهم اللى محتاج خدامة بيطلبها من شركة ومعروف مقدما اية اللى مطلوب منها بتروح تعملة حسب الاتفاق ـ متكنش جاية تغسل غسيل مثلا ويطلب منها تنظيف الحمام ولا تلميع الارض ولا تخلى بالها من البيبى راح تسيب الشغل وتمشى وتقول انا جاية للغسيل فقط ورغم انها مشيت راح يدفعلها صاحب البيت الاجر المتفق علية لانة اخل بالعقد ـ خلاصة الكلام الخدامة موظفة
    ***
    يبقى لو عايشة فى امريكا كلامك صح
    وفى الحالة دية مش عيب ان اى ست تشتغل خدامة بس غالباالخدامة بتكون من الطبقات الفقيرة اللى حظها من التعليم قليل او من المهاجرين اللى مبيعرفوش انجليزى وليس لديهم خبرات فى اى مجال ـ وللعلم الخدامة بتكون جاية الشغل بسيارتها الخاصة كويس كدة ـ تحياتى

    ReplyDelete
  5. لو كانوا رايحين امريكا كنت أنا وافقت
    عشان كذا حاجة
    1. مهنة الخدمة في البيوت مهنة شريفة زيها زي اي حاجة في المجتمع الامريكي
    اما السعودي والمصري والعربي مش كدة
    2. فيه قوانين ف امريكا بتحمي البني ادمين اما في السعودية ما فيش خاصة العاملات

    3. ال 20 الف حيرجعولك حوامل يا عندهم أيدز
    مش عاوز اقوللك علي احصائيات السعودية اللي زي الاطران
    انتم عارفين ان السعودية بتعمل كشف اجباري علي اي عامل او عامل من الخارج بيخشوا السعودية خاصة من دول شرق اسيا
    زي الهند وباكستان وسيرلانكا والفلبين وبنجلاديش

    البنت بتخش خالية من الامراض كلها
    وبترجع بيها
    اقوللكم ارقام واللا اخضكم؟
    الارقام دي حقيقية
    دي من الشغل اللي شغال فيه
    الاحصائيات قدامي
    وكان فيه ازمة سياسية قريبا بين السعودية والفلبين
    اقوللكم ليه
    الفلبينيات الشغالات بيخشوا بصفر ايدز للسعودية
    ويرجعوا بنسبة 30 % منهم عندهم ايدز

    اغني كمان يا زينب ؟

    ايوة عندك حق
    طبعا
    المجتمعات العربية وبالذات المصرية بتستعر من الشغالة والمهنة بتاعتها
    وكل اللي هاممهم ان سمعة مصر ومش سمعة مصر وكلام خايب

    بصي بقة انا نفسي اكتب في الموضوع ده من زمان
    بس احتمال اتمنع من دخول السعودية
    :)))

    الحقيقة ان اللي حتروج السعودية كخادمة
    يا إما تتعامل كجارية وعبدة ويحملوها فوق الطاقة
    يا إما يتم اغتصابها بشكل يومي كمان
    يا إما حتتطرد زي الكلب لو حصل اي مشكلة وملهاش حقوق

    انا شايف بقة ان الحكومة المصرية متمنعشي
    اللي عارفة كل ده ولسة مصممة تروج
    تروح
    الفلوس ساعات اولي
    نعمل ايه
    بس يكون الكلام واضح

    السعودية دولة مليانة متناقضات من الداخل
    وظلم العمال وخاصة النساء شئ عادي
    والاسوأ هو التعدي الجنسي اللي الكل مش عاوز يتكلم عنه

    طبعا جدو ف امريكا وعارف انا بقول ايه وفاهمه
    وكلامه انا موافق عليه كله

    وطبعا شقير جاب من الاخر وقال اللي فيها
    ولو بلدنا دي بلد محترمة
    وبتعرف ترجع حقوق مواطنيها
    كان يبقي فيه كلام تاني

    اي تعاقد خدامات حيكون تجارة رقيق ابيض للاسف
    صدروهم لامريكا
    وانا اقف بيافطة تأييد عند مجلس الشعب واضمنلكم انهم يرجعوا زي ما راحوا وحقوق متصانة
    ومعاهم فلوس
    وفي اسوا الاحوال
    يرجعوا
    even

    ReplyDelete
  6. طبعا مهنة الخادمه مهنه شريفه زيها زى الطبيبه و المهندسه والمحاسبه وغيرها ومحدش يقدر يقول غير كده
    بس فى اكتر من نقطه احب اوضحها علشان تعرفى ان اللى مضايق اى واحد مصرى من خبر زى ده مش لأسباب طبقيه على الإطلاق
    اولا : لو كان الخبر مثلا تصدير موظفات للعمل بالسعوديه منهم مهندسات و خادمات و طبيبات كان يبقى الخبر طبيعى لكن معلش لما يبقى الإتفاقيه على خادمات بس يبقى ده معناه ان احتياج السعوديه للمصريات يقتصر على خدمة البيوت او على الأقل ده اللى هيتبادر لذهن اى واحد فينا

    ثانيا : معاكى زى ما قلت ان الخادمه امراءه شريفه تسع الى كسب رزقها لكنها تلجأ الى ذلك ان لم تكن معها المؤهلات التى تسمح لها بالعمل فى وظيفه افضل حالا لها يعنى رغم كل شىء تعتبر مهنتها مهنه متواضعه باعترافها شخصيا و مفيش خدامه نفسها تبقى خدامه لكنها مضطره فهل الحل بدل من عمل منح لتدريب الخادمات على اى حرفه يكسبوا منها زى الحياكه و التطريز او يدخلوهم فصول محو اميه و يخلوا الخادمات لهم حد ادنى من التعليم يقدروا يشتغلوا اى شغلانه غير انهم يكونوا خادمات فى بيوت ناس تانيه انهم يصدروا البنات دى تشتغل خادمات بره
    وصدقينى خادمات كتير نفسهم ما يشتغلوش شغلتهم و بيقارنوا نفسهم بست البيت اللى هما شغالين في بيتها خادمات و
    يقولوا دى احسن مننا فى ايه
    ثالثا :مع احترامى لأهل الخليج فى نبره مش كويسه لما بيتكلم بعضهم على مصر و اهل مصر و اعتقد ان حاجه زى دى هتزود الأسلوب اللى بيتكلموا بيه عن البلد
    رابعا : و انتى ماتضمنيش ان البنت اللى هتروح تشتغل خدامه ان صاحب البيت ما يتحرش بيها و يجبرها كمان على اقامة علاقه معاه و دا يا اما تحت ضغط الاغراء المادى او التهديد بطردها من البيت اللى بتعمل فيه و دا يفرق كتير فى الغربه عن مصر يعنى لو فى مصر الخدامه تقدر تسيب الشغل فى بيت بسهوله فى بلدها لكن فى الغربه بقى هتقول هى ساعتها طب اروح فين بس وساعتها عندها حق فهى غريبه فى مكان غريب ما تعرفش فيه حد
    طب ليه من الأول نبهدل بناتنا و لا احنا شكلنا هنكون زى الفلبين اللى اقتصادها مبنى من الدولارات اللى بتحولها الخادمات الفلبينيات للبلد

    ReplyDelete
  7. لقد صدمتني كلماتك الأخيرة ، ولم أتوقعها منك ، فبينما أعجبني تناولك للموضوع من زاوية لم يتناولها غيرك ( على الأقل أنا لم أرى أحدا تناولها بهذه الكيفية ) ، وبينما الأفكار بدأت تتشكل في ذهني للمشاركة برأيي في هذا الموضوع ، فاجأتني نهايتك التي لا يتوقعها الكثير من بنت مصرية ، والتي أحبطتني تماما ،
    فإذا كان التحرش موجودا في مصر ، فما هو حجمه ، وكم مرة يحدث ، ثم أليس من الممكن للمرأة أن تتجنب أماكن التحرش ، أو تترك عملها إن كان يعرضها لهذا ، أو حتى تجلس في بيتها إن لزم الأمر ... أما السعودية فلن أخبرك عن التحرش فيها فالكل يعرف ما يحدث هناك ، ولكن سأخبرك عن مجتمع مازالت فكرة العبودية تسيطر عليه ، سأحدثك عن مجتمع قبلي جاهلي ، لن أبالغ إن قلت أن معظمه يعتبر غير الخليجي مهما كانت جنسيته أو دينه أو سنه ، هو أٌُُممي ( ولمن لا يعرف الأممي فهو لفظ يطلقه اليهود على غير اليهودي وهو يتساوى فيه مع باقي الكائنات الأخرى من حيوانات وبهائم ) ، وُلد فقط ليخدمه ، فالرجل يصبح عبداً والمرأة تكون مما ملكت يمينه ، وفوق كل هذا مازالوا يطوقون رقابنا بقانون الكفالة ، إللي هوّ متعملش أي حاجة ، اوتستخرج أي ورق ، أوتفتح حساب في بنك أو تستخرج رخصة قيادة ، أوتروح أو تيجي أو ..أو .. إلا بإذن السّيد كفيلك ، يعني الست اللي حتيجي تشتغل عند حد فيهم متقدرش تسيبو أو تسافر أو تروح شغل تاني أو حتى تخرج برة بيتو إلاّّ لمّا يرضى عنها ويسمحلها , ويسمحلها ليه وهو شايفها لقمة طرية ، وقدّامو ليل و نهار ويعمل اللي هو عايزه ومحدش بيكلمو، وكلّو بالقانون وبرضاء الحكومة المصرية .
    كلمة أخيرة : ليس معنى أن التحرش موجودأ في مصر من قبل فئة قليلة منحرفة (شعب أو من ضباط شرطة) ، يبقى خلاص نكون ملطشة لكل شعوب الدنيا .
    هذه وجهة نظر واحد شغال في السعودية وشايف اللي بيحصل هنا ، وصدقيني ، أنا لم أتضايق ( عندما أثير موضوع الخادمات ) من أن يقولوا أن المصريين شغاليين خدامين عند السعوديين ، لأنهم فعلا بيقولوها من غير أي حاجة، ولكن ما آلمني أني أتخيل كل واحدة رجعة بلدها شايلة إبنها على كتفها .

    ReplyDelete
  8. كلام جميل بس محدش هيفهمه. على فكرة دي أحد المتناقضات الكثيرة في حياتنا, انا شغال في السعودية وبقول الطبقية مش موجودة نهائي عند ماركات كثيرة أذكر منهم على سبيل المثال الفلبينيين: ممكن يعيشو عائلات في نفس الشقة (المصريين - مستحيل) , ممكن واحد يكون مدير مصنع - والله دا مثال حقيقي - والتاني يكون بيعمل شاي وقهوة: يوم مسح ونظافة الشقة على المدير تلاقيه بيمسح وييجي الفراش اللي عنده في العمل يدخل يقوم المدير يحط له الممسحة عشان يمسح رجله, شوف في المطاعم الفلبينيين يؤدون عملهم حتى اذا كان مسح وكنس بدون كسوف ولكن المصري أو السعودي مثلا تلاقيه مايعمرش أبدا في شغلانة زي دي حتى لو الراتب كويس حتى لو فيه ترقية حتى لو جابو له شارون ستون جتنا ستون نيلة.. إيهاب

    ReplyDelete
  9. لقد أوفيت أيها الجنتل
    تحياتي

    ReplyDelete
  10. في البداية انا بحيك علي كتاباتك الجميلة واسلوبك الجميل الانيق ولكني
    اختلف معاكي تماما فيما كتبتيه في هذا الموضوع واعلل لك بعدة اسباب
    اولا الغريزة الانسانية الموجودة فينا كبشر والا بتقول انا واخوي علي ابن عمي وانا وابن عمي علي الغريب فان هذا المثل بكل ما يحمل من معاني يتجلي في هذا الموضوع بمعني انني حين اري او اسمع عن عمل سيء لبنت بلدي من ابن بلدي قديكون ردي سلبي او ابرر تصرفه اما اذا كان من شخص غريب لم اسكت حتي لو وصلت للموت وهي دي النخوة والا رايح تلاقيها متوفرة جدا فينا كمصرين ولو ما كنتش موجود فينا كنا زمانا لسا محتلين من الغير الي الحين ولكن تاكدي اننا كرجال مصرين شرفاء لا نريد ان ننكس رؤسنا في الرمال ولو طلنا بان كل سيدة تكون في بيتها مصانه وكلفنا بمهامها لفعلنا ولكن اذا قدر لها العمل فلتعمل في بلدها بين اهلها وتكون رمز للعفاف والكرامة انا مما لا يؤيد فكرة عمل الشغالات المصريات في الخارج واقسم بالله هذه غريزة في نفسي لا اتحمل ان اري بنت بلدي في مكان مهانه
    لاتهوني علي يا بنت بلدي وافديك بدمي
    ومثلما قال احد الشرفاء ولو علي جستي مش رايح تتم هذه الصفقة الخاسرة
    لانه عار علينا كل العار في اتمامها

    ReplyDelete
  11. اعتقد ان وجود التحرش بمصر لا يعتبر مبرر ان لا نخاف علي بناتنا في الخارج خاصة ان البنت في الخارج لن تعود لبيتها في نفس ساعة التحرش مثلما الوضع في مصر في الخارج البنت تبيت في بيت المتحرش نفسه و ممكن متقدرش ترجع بسبب نظام الكفاله
    بالاضافه الي انها غير مختلطه بغيرها من الناس المصريين لان عملها داخل بيت مما يزيد من خطورة الوضع اذا كان فيه خطر
    اعتقد ان المنع واجب

    ReplyDelete
  12. انا مبسوطة بصراحة من التفاعل ده، وان كل اللى علق متفق معايا فى تقدير دور الخادم/ الخادمة فى المجتمع
    دا اولا، وكده خير

    ثانيا، انا شايفة اغلب الردود على تنوعها بتدور حول الرفض التام لرفض الخادمات للسعودية بالذات، وفى تصوركم انى انا لما كتبت التدوينة دى موافقة على سفرهم هناك
    والحقيقة مش كده، انا كنت مركزة ومحددة فى نقطة واحدة بس هى - ومن ناحية اجتماعية اصولية ان صح التعبير - نظرتنا كبنى ادمين للخادمة
    اتمنى بس ن النقطة دى تكون واضحة، مش معنى انى كتبت تدوينة برد فيها الاعتبار للمهنة وبعتذر عن قصورى فى التفكير تجاههم للحظة ما وانى اكون بكتب تدوينة تدعو لتسفيرهم للسعودية
    بردو عشان ما يسأش فهم التدوينة، انا لما هاجمت طريقتنا المصرية فى التهكم والتعالي على السعوديين، بحاول اخلص من جوانا الخصلة دى، حتى لو للأسف هى موجودة فى السعوديين نفسهم ضدالمصريين/ والكل بيتعالى على الكل

    اوكى استوضحنا الفكره كده.. انا اسفة جدا انى لاقيت نفسى فى موقف ببرر فيه رأيي او بوضحه، بس الظاهر فعلا انى خانتنى بعض التعبيرات، او مركزتش فى الفصل بين النقطتين.. يمكن

    ----

    الجنتل
    لما كتبت الجملة الاخيرة، كانت تهييسة مش اكتر عشان مكنتش اصلا عايزة اكتب عن السبب التانى لأنى خلفيتى فيه مش قد كده، ومعنديش معلومات موثقة زى اللى رصدها بن عبدالعزيز فى البلاوى اللى بتحصل فى السعودية، فكانت جملة هزار مش اكتر.. بفكر بيها كمان ان المشكلة عندنا فى مصر.. بما انى صدمت لما حصلت اول مرة وكانت كارثة بالنسبة لى تهون بعدها كل الكوارث

    بس:)


    ----
    بن عبد العزيز

    غني يا فريد
    :P

    هو بعد اللى قلته فى غنا
    يا لهوى على كده

    ReplyDelete
  13. اسعد الله اوقاتكم
    اعتذر لان التعليق ليس له علاقة بالموضوع
    اريد فقط ان اشكرك على المجهود الذي قمت به بتعليمنا التدوين وطرقه
    شكرا لك
    هناك مشكلة بسيطة وهي كيف علي ان اضيف الصوت او الاغاني على المدونة
    ارجو منك المساعدة
    وشكرا
    اية كمان في مشكلة تانية
    حاولت ان اغير شكل المدونة ووجدت الكثير من التامبل، ونجحت بالتغيير ولكني اكتشفت ان لايأوت بتاع المدونة اختفى ولم اعد استطيع ان اضيف او اغير من المضمون او التقاسيم للمدونة ما الحل؟؟
    ولك مني جزيل الشكر

    ReplyDelete
  14. يا مصرية.. دائما مواضيعك قوية وملهمة

    الدنيا ساس
    مليانة ناس
    والبنت سابت الكراس
    تشتغل عند الناس
    قالت لا مساس
    والحياة أشخاص
    لكل دور حساس
    قلتلها والوسواس؟
    للشرف ينداس
    قالت لا مناص
    كده كده منداس منداس
    ضاع الإخلاص
    مات الإحساس
    شوف التلفاز
    المجتمع باظ
    باعوا الألماظ
    وإشتروا الخناس
    وأدمنوا الأنفاس
    الرحمة يا ناس
    الرحمة يا ناس

    ReplyDelete
  15. الحقيقه الموضوع اكبر من انه يكون نظره طبقيه او الحط من قيمة عمل شريف ..
    المسأله والسؤال هنا .. ايه اللى وصل الشعب المصرى لحالة انه يبعت بناته تشتغل خادمات عند محدثى البترول او غيرهم .. بالعكس لو وافقنا على ده بشكل عام يبقى بنرسخ الطبقيه وبكره نشوف دول بهوات وساده ودول خادمات وشغالات .. النقد يجب ان يوجه الى حكومتنا الرشيده .. وبكره نقول وايه يعنى لما نبعت حريمنا يتسولو ويشتغلو شحاتات .. ما هى برضو مهنه فى عرف حكومتنا .. ولا ايه ؟؟؟

    ReplyDelete
  16. انا بصراحة بعانى من شئ خطير وهو انى بفكر من ناحية نفسى اكتر مابتعب نفسى وافكر فى شئون حد تانى
    وبفكر هو ايه اللى هاييحصل لو القرار اتنفذ وتاثيره ايه على باقى طبقات المجتمع
    اذا كنا نحن واهالى المنطقة بنعانى من الخادمات لأن طلباتهم عالية جدا
    فخادمات اليوم الواحد علشان يجوا ينظفوا الشقة فى اليوم عايزين على الاقل 40 جنيه فى اليوم ده غير بعض النثريات يعنى بتاخد من مرتب الطبقة الوسطى اللى احنا بنمثلها 200 جنيه فى الشهر من كل شقة وهى بتروح لحوالى 6 شقق يعنى مايقرب من 1200 مرتبها بس من التنظيف فى الشهر
    وده طبعا غير شغل مسح العربيات اليومى وبتاخد عليه من صاحب عربية 10 جنيه فى الشهر وكل بواب ومراته على الاقل ماسكين 6عربيات يعنى وزد 60 جنيه فى الشهر
    وكل ده غير الطلبات اللى بتشتريها لأصحاب العمارة وبقشيش وسمسرة لانها اكيد بتجيب الحاجة بسعر قبل الفصال ممكن يدخلها فى 100 جنيه كمان
    يعنى دخلهم الشهرى 1370 جنيه
    وطبعا المبلغ ده مش بيجيبوا منه هدوم ولا أكل ولا بيدفعوا مية ولا كهرباء ولا غاز لان سكان العمارة بيعطوا للبوابين ومراتتهم لبس وحاجات روبابيكيا كتير وطبعا هما بيبيعوها وياخدوا اللى محتاجينه بس

    يعنى قاعدتهم فى مصر احسن مليون مرة واحنا خايفين من تاثير القرار ده علينا

    اما موضوع العرب وصورتنا ادامهم انا كان لى صاحبة سعودية واتخنقت منها لانها كل شوية تقولى اصل احنا كل خدامين البيت والجناينية والعمال مصريين لاننا بنحب مصر
    بس طبعا انا عارفة ومتاكدة انها مش قصدها تتكلم على مصر قد ماقصدها تتكلم عن الخدامين المصريين اللى عندهم

    تحياتى لك

    ReplyDelete
  17. بنوتي الحلوه كل الاراء السابقه ركزت علي جزء معين و هو رفضهم للسفرالمصريات خدمات للسعوديه و انا معهم و اكيد انتي كمان كما وضحتي في تعليقك الثاني بس انا شايفه الموضوع من رؤيتك الاي كتبتها و محدش عايز يركز عليها و هي نظره المجتمع و نظرتنا احنا نفسنا للمهنه و الحقيقه و الصراحه بتقول ان اغلب اصحاب العقول و الافكار العربيه بتبص فعلا بصوره سئيه لهذه المهنه و سيبك بق من شغل الافلام الشغل شرف و جد هي ده الحقيقه الاغلب بيشفوه متدنيه و ضعفيه و فقيره وده مش بيقتصر علي مهنه الخادمه بل هي نظره تشمل كل الوظائف البسيطه زي الزبال و الكناس و الساعي وده بسبب نظرتهم و فكرهم عن العمل نفسه احنا بنركز علي شكل العمل عشان هو الاي بيوضح وضع هذا الشخص من اي طبقه هو و مستوه الاجتماعي ايه مش بنبص علي قيمه العمل و اهميته عشان كده طول ما نظرتنا للاعمال اي كان حجمها او تكوينها يكون بالفكر ده عمرنا ما هانتقدم و لازم طبعا كل الاي يعلق هايشيد بقيمه العمل مهما صغر عشان اعتقد اغلب المدونون اصحاب عقول و هايكون رايهم عقلي اما اغلب الناس بتفكر بطريقه ده فعلا

    ReplyDelete
  18. موضوع الخادمات المصريات موضوع في غاية البساطة عرفين ليه لأن اي شاب وأنا منهم لما كنت بدور علي شغل بعد ما خلصت الجامعة كانت جميع المحلات أو حتى الشركات طالبه فتاة حسنة المظهر تجيد التحدث بلباقة وفي بعض الأحيان تجيد التحدث بالإنجليزية واتسخدام الكمبيوتر وفي بعض الأحيان الناس اللي طالبه الإعلان بتزودها شوية في بعض الطلبات الخاصة حبتين مش ثلاثة.

    يعني فيها ايه لما هما عايزين يوردوا خدامات في ستار شيء أخر بدل ما هما شغالين في محلات وشركات ويطلقوهم إلى آفاق العالمية

    لكي الله يا مصر وحماكي يا أم الدنيا

    ReplyDelete
  19. بصراحه يا جماعه انا اول مرة اكتب رد فى مدونة
    ويشرفنى يكون هنا

    المهم
    نظرة المحمتع وبصراحه اسمحولى اقول
    النظرة الغبيه للناس على اساس وظايفهم هى السبب
    وكمان فيه حاحه

    البنت او الست اللى هتشتغل فى البيوت
    هتشتغل ليه
    ترفيه ولا محتاجه فلوس عشان تعيش هى وولادها


    دى نقطة
    النقطة التانيه
    مكانة مصر

    بصراحة انا اتفلقت من الكلمة دى
    امريكا فيها خدامات
    وفرنسا واوربا
    حدش قال مكانتنا راحت ؟؟؟
    وكمان لو الدوله تعرف توفر فرص عمل مكنش ده حالنا
    والسلام ختام

    ReplyDelete
  20. المشكله مش فى شرف المهنه المشكله هى نظرة اصحاب الاعمال السعوديين الى المصريين - يعنى بعد ما كنا بنصدر مدرسين ومهندسين واطباء وبيتعينوا مديرين على باقى الجنسيات وخصوصا الهنود والباكستان - اليوم صار الهندى والبكستانى مديرين والمصريين مرؤسين واصبحت الخادمه الفلبينيه مكلفه ودا ليه لان البلاد الاخرى كالهند وبكستان اهتمت بالتعليم ونهضت به نهضه عظيمه والنتيجه علماء هنود لكن فى مصر التعليم اصبح حقل تجارب وكأن الطلاب فيران تجارب اهم وظيفه لهم بعد التجربه هى الموت او التخلص منهم بعمل دورات لهم فى السباكه او اى حرفه بعد ان وضعت الاسره كل ماتملك لتعليمهم الموضوع موضوع كيان دوله وحكومه ناجحه او فاشله وكل دا تحت سمع وبصر رئيس الجمهوريه اللى مشغول بتأمين ملكه وتوريثه

    ReplyDelete