7/01/2007

الزيـــارة

كيف يكون هذا الشعور عندما تستيقظ من النوم وقد زارتك فى الأحلام جدتك الراحلة؟
أنا لم يزرني راحلين فى أحلامى قط.

لم تأتني جدتي التي تزور أمي وخالاتي وخالي وبعض من جاراتها.. وتكثر الزيارات إلى أختي. حتى بن بنت خال والدتي زارته فى منامه.. ولم تزرني أبداً.

والغريب أنها تزور أختي حتى فى المواضيع التي تخصني أنا. فعندما أرفض عريساً تزور أختي لتحرضها على اقناعي، فأضحك وأقول لها: "اللى عايز يقول لي حاجة، يجيلي أنا".

وعلى هذا فأنا تصلني رسائلها من خلال وسيط :) والتي أتعامل معها بمنطق أنها جدتي التي اعتادت أن تكون السيدة صاحبة الشخصية القوية والمؤثرة والتى تنصح حفيدتها ليس إلا، وبالتالي فهذا ليس توجيها إلاهيا لأقوم بفعل ما لا أريد وما لا أقتنع به.

ولكني أظل أتسائل ما هو هذا الشعور عندما يزورك أحد الأموات فى المنام؟ كيف يكون استقبالك لهذا الحدث؟ شخص رحل عنك منذ عشرة سنوات أو أكثر، تنظر فى صوره على فترات زمنية متباعدة لكي لا تسقط ملامحه من ذاكرتك وتنمحي فى زحمة الأحداث والوجوه اليومية. ثم يأتيك على حين حلم وفي ظل الحركات السريعة للعينين وبعد أن شقت لك مغازل النوم الطريق إلى منتجع النوم العميق تجد هذا الراحل أمامك يطمئنك أو ينصحك أو يحذرك أو يبشرك.. أو حتى يلتقيك لتملأ عينيك من وجهه الذي تشتاق إليه وكفى.

16 comments:

  1. ايه دا انا اول واحد حرد

    يا لااااااااااااهوي استر يارب

    عموما هناك من اتمنى ان يزوروني
    فبعد وفاه والدي في فبراير اللي فات
    ونظرا لاني كنت مسافر فكانت اخر مره شفته فيها كان ديسمبر
    ولحد دلوقتي ما زرنيش الا مره واحده بس
    وما اتكلمش فيها
    جه اخد جركن ميه ومشي !!!!!!ومحدش يقولي يعني ايه لاني معرفش
    لكن وصلتني منه رساله عن طيرق وسيط هههههههههه زوجتي انه بيتكلم معايا
    فزياره الاموات للاحياء بتحصل وبيعقبها مشاعر الحنين القويه اوي اوي اوي للشخص اللي زارنا في المنام

    عموما ربنا يرحم امواتنا جميعا
    ويتغمدهم برحمته
    ولا يحرمن من رؤياهم في المنام

    ReplyDelete
  2. برافو يا زينب
    بجد يوست مميز

    الناس التي تأتي في الاحلام تأتي حسبما تفكري فيهم فوجودهم بالنسبه لكي لن يكون مفأجاه مثلما تجدي من لا تتوفعي وجوده قجأه أمامك في الحلم

    ReplyDelete
  3. لم اري من الاموات احد تقريبا سواء جدتي اوجدي او خالي ..الخ

    لكن
    رأيت ابراهيم

    الشاب الذي كتبت عنه مرة ومات في حادث سيارة
    رحمه الله

    رأيته قبل أن آتي الي مصر
    وهو يرحب بي
    ورايته من اسابيع وهو يطوف بحصان ويبدو عليه الحيرة

    وافضل من رايت من الموتي
    عمر ابن عبدالعزيز

    وده كان حلم جميل جدا
    كان فيه يبكي ويقول
    يا شريف ..غلب العدل كل شئ

    بس حلوة
    اللي عاوز يقوللي حاجة يجيلي انا
    :)

    ReplyDelete
  4. ممكن يجيلى فى المنام شخص راحل بس يكون كان لى علاقه بيه جامده
    يعنى انا كنت بحب جدى اوى
    واحيانا يجيلى بس دايما بشوفه على اساس انه كان مسافر
    واعد اقول طب بدنا نرجعله الورث
    هنرجعهوله ازاى وفى بيوت كتير وحاجات بعناها
    الوقتى هيزعل مننا
    وحاجات عبيطه كده
    وتحياتى

    ReplyDelete
  5. مجرد خيالات سريعة متقطعة وقليلة جداً لامعنى لها.. لايمكن إعتبارها زيارة

    يعنى تقريباً ماشوفتش حد من اللي ماتوا لى فى المنام رغم إنهم كتييييييير. يمكن السبب إنى لا أترك نفسى أفكر كتير فى اللي ماتوا

    بس دائماً أدعو لهم بالرحمة

    هو ده اللي أقدر أقدمه لهم وهو ده اللي هم فى حاجة له وغير ذلك لا أعتقد فى وجود علاقة بين الأحياء والأموات

    ReplyDelete
  6. الموضوع ده عادي جدا وانا من تاريخ وفاة والدي ووالدتي من ثماني سنوات وهما يزوروني في المنام بصفه تكاد تكون منتظمة ولما اعرف انهم يكونوا زعلانين اقرا ليهم سورة يس واترحم عليهم والغريب انهم يشاركوا الواحد في تصرفاته وكانهم خايفين عليه حتي بعد وفاتهم ربنا يتغمد والد اي برحمته فهو نعم المولي ونعم النصير

    ReplyDelete
  7. منذ وفاة والدي رأيته كثيراً في المنام

    الطريف أنني رأيته بعد موته بأيام قليلة وكنت في الولايات المتحدة منذ ستة أشهر
    جاءني وقال لي: هل عرفت أنني مت؟
    فقلت له نعم علمت
    !!!!!!!!!!

    وبخصوص العرايس والعرسان
    رأيته مرة بالفعل يقول لي أنه يدعو الله ألا أتزوج فلانة
    وكانت فتاة أهتم بها وأريد الزواج منها
    ثم أشار إلى امرأة غير واضحة المعالم
    وأعطاني ورقة قائلا أريد أن تتزوج هذه
    فنظرت في الورقة فوجدت اسم صديق لي
    !!!!
    فقلت له مندهشاً يا بابا ده اسم واحد صاحبي
    وانتهى الحلم دون أن يعطيني تفسيراً

    دائماً ما تقول والدتي أن رؤيا الميت حق

    ولكن الأحلام كثيراً ما لا تكون قريبة التفسير
    غير أن الرؤيا حقيقة
    وسورة يوسف كما نعلم تثبت هذه الحقيقة مرتين
    مرة رؤية يوسف والثانية رؤية الملك

    ReplyDelete
  8. عمرها ما حصلت معايا بصراحة
    بس اكيد شعور جميل تذكر الناس دي
    بوست جامد
    تحياتي

    ReplyDelete
  9. اسكندراني اوى
    لا بجد يعنى ايه؟ يعنى ايه ياخد جركن ميه ويمشي؟ دا حاجة حلوة وللا حاجة حلوة
    :D

    ------
    محمد مفيد

    ميرسي يا محمد
    :)
    يمكن اكون مش بفكر في جدتي جامد بس كمان هى بتيجي لناس يمكن مش بيفكروا فيها خالص، وبعدين هي وحشاني فعلا، ماتجيش تطل عليا ليه

    ---
    بن عبد العزيز

    يااه يا شريف، انا كنت متصورة ان امة لا إله إلا الله من الاموات بتزورك بما ان كل الناس بتحبك
    بس طبعا انت ذكرت اتنين اكيد مهمين عندك اوى، انا فاكرة ايام ابراهيم الله يرحمه انت كنت مأثر جدا ومكتئب، وطبعا عمر بن عبد العزيز كان واحد من الناس اللى حققوا العدل بين الناس والعدل بالنسبة لك ميه وهوا
    :)

    ---
    محمد جادو
    هههههههههههه انتو كان عينكو فى الميراث من قبل ما يموت وللا ايه
    الله يرحمه

    ----
    عدى النهار
    والمغربية جاية.. تتخفى ورا ضهر الشجر
    وعشان نتوه فى السكة شالت من ليالينا القمر
    :)))
    معلش مقدرش اسمع كلمة عدى النهار من غير ما افتكر اغنية حليم
    احم، خرجنا بره الموضوع.. فعلا، انت قلت المفيد.. الدعاء بالرحمة

    ---

    ASSAD EBN ELFORAT
    كمان زيارات منتظمة، هايل جدا
    ربنا مايحرمك منهم ابدا
    ويرحمهم ويلحقنا بيهم على خير

    -----
    محمد شدو
    هههههههههههههه ههههههههههه
    اسم صديق يا محمد..هههههههه لا بس اطمن، اسم الصديق فى المنام نصره والله
    هههههههههههه

    بس بجد بأه، انا مؤمنة ان فى رؤى وكده، بس انا شايفة انها محدودة وقليلة انما اغلب احلامنا بتكون احاديث نفس
    يعنى بالنسبة لى بعرف انا بفكر فى ايه فى عقلي الباطن من احلامي
    يعنى تقارير اخبارية عن نفسيتي بالدرجة الاولى
    بس المشكلة انى مش بحلم كتير، او لو اتكلمنا علميا وبما ان البنى ادم بيحلم كل يوم بس الفكرة فى انه بيفتكر او لأ، فانا مش بفتكر دايما احلامى، قليل اوى اوى
    ودا بيضايقنى لأنى معتبرة الاحلام دى كنز، كفاية انها كانت السينما الاولى فى العالم قبل ما يخترعوا السينما
    :)

    ----

    علاء
    انا كمان بيتهيئلى انه هيكون شعور جميل
    ربنا يزرقنا رؤية احبابنا

    اه وكمان، ربنا يرزقنا رؤية سيدنا محمد عليه الصلاة والسلام، يارب والنبى يارب

    ReplyDelete
  10. والله ما انا عارف معناه ايه الحلم ده

    لكن عموما يعني انا لا اؤمن اوي بموضوع تفسير الاحلام دي

    بس لعله خير

    ReplyDelete
  11. ناس كثير بتحبني؟
    وبقوا اموات :)

    طب البركة في الاحياء بقي
    لحسن حصفصف علي مافيش

    بالنسبة لعمر بن عبدالعزيز
    انا مش بس بحبه
    عشان العدل والكلام الكبير ده
    بس اصل اسم ابوه زي اسم ابويا
    :)

    او انا اللي اسم ابويا زي اسم ابوه

    وعشان انا اقربله
    حسب الروايات

    ReplyDelete
  12. لا لا لا يا شريف، انت فهمتها ازاى كده
    انا مقصدش كده خالص
    الله يسامحك


    اما بالنسبة لسبب حبك لعمر بن عبد العزيز، فعادى يعنى في ناس كتير عندها اسباب غير تقليديه لحب الناس والاشياء
    :P

    ReplyDelete
  13. الميت لما بيزور الحى بيكون معاه رساله او طلب غالبا هو ان تذكرهم والترحم عليهم.. وقراءه بعض القران على ررحهم انا بالنسبه لى.. شفت ابى بعد ما مات باسبوع بيقول لى قولى لفلان وهو احد اعمامى انى مش هاسامحه على عمله معايا.. وبعد كدا عرفت اشياء رهيبه عملها عمى مع ابى فى غيابي.. فيا ريت اللى يشوف حد من اهله ميت يوهب له شئ من القران.. بوست حلو.. بنت القمر

    ReplyDelete
  14. اختى بنت مصريه الحقيقه ان الاموات فى دار الحق واحنا فى دار الباطل يعنى نصيحه مجرد نصيحه حاولى تفكرى فى الرموز اللى فرسائل جدتك ومتخديهاش سخريه كلها واترحمى عليها واقرى لها قران .. وبالنسبه لموضوع العرسان اعتقد ان صلاة الاستخارة ممكن تكون احسن بكتير

    ReplyDelete
  15. أن يأتيني أحد الذي رحلوا في منامي هذا يعني بالنسبة لي أنني أكثر قربا من ذلك الذي رحل
    ويمنحني حالة من الشفافية والسلام الداخلي التي تستمر فترة ما
    عندما يزورنا الراحلون يحولون الموت إلى طمأنينة
    دعواتك أن يزورني من أحبهم
    تحياتي

    ReplyDelete
  16. ءاحساس غريب وبيتغير بنوع الحلم نفسه
    لانك ممكن تشوف الشخص الي مات في الحلم وكانه لسه مماتش وساعتها احساسك في الحلم هيبقي عادي جدا
    وساعات هتبقي عارف انه مات وهتحس انك نفسك تمسك فيه ومتصحاش
    وممكن يكون الحلم مقبض وفيه احساس الموت

    انا باشوف الناس الي ماتوا بس مش كتير

    ReplyDelete