9/24/2007

بص وطل: حوار مع دعاء



مش عارفة اقول ايه، او اتكلم عنها ازاي..اقول دعاء العدل صديقتي، وللا دعاء العدل رسامة الكاريكتير. بالنسبة لي هي دعاء اللى عرفتها من سنتين وكام شهر واشتغلنا مع بعض في مكان واحد لفترة وبعدين استمرت صداقتنا دي برغم من اننا ما استمرناش مع بعض في نفس الشركة وهي اتجهت للكاريكتير وانا اتجهت للعب بفوتوشوب وسي اس اس

صعب أوي بل نادر جدا انك تقابل حد عنده الدماغ بتاعة دعاء. بنت قوية، ومثقفة، ومستقلة،وعاقلة جدا ورزينة اوي.. لدرجة اني ممكن اتنطط غيظا من رزانتها دي ساعات، كمان هي مجنونة وطقة بس مايبنش عليها.. بيطلع الجنان ده في رسوماتها، انما دايما قراراتها عاقلة وواقعية.. مكس كده ماتعرفش معمول ازاي

هشام عبيه من بص وطل -المجلة الالكترونية- عمل مع دعاء حوار.. يسعدني جدا انكو تقروه وتتعرفوا على دعاء اكتر.. واللي منكم بيشتري الدستور اكيد عارف دعاء ورسوماتها.. هتلاقي كمان على بص وطل جاليري لمجموعة من رسومات دعاء

اكتر حاجة عجبتني في الحوار لما دعاء قالت: الكاريكاتير فيه نوع من التنفيس للرسام.. لأن جواه أفكار سودا.. لكنه لما بيرسم بيطلع جزء من الأفكار، وبالتالي بينقص من عدد المرضى النفسيين في البلد واحد!

الرد ده بيلخص النظرة الواقعية اللى عند دعاء والحس الكوميدي اللى بتتمتع بيه، اصلا دعاء من الناس اللي بيموتوني من الضحك لما نقعد نتكلم مع بعض ويكون مزاجها رايق.. او مش رايق، هو مابيفرقش معاها كتير

اممم اقولكو على سر.. اضغط هنا دي تدوينة كنت كتبتها زمااان عن زميلة ليا لقت قطة, الزميلة دي كانت دعاء. ومن بعدها بقت دعاء صحبتي وصديقتي

12 comments:

  1. ربنا يديم الود بينكم

    حلو موضوع ان المرضى النفسيين ينقصوا واحد

    ReplyDelete
  2. ايوه يا زينب
    انا فعلا
    قريت كتاب قاسم امين تحرير المرأه
    وكمان قرأت كتابه التانى
    " المرأه الجديده "
    وقريت بعض المقالات كان كتبها
    وقريت قصة حياته كاملة
    وقريت حوارات فى مجلات قديمه مع زوجته

    لأنى مش بحكم على حد من وجهة نظر متحيزة
    عايز اقولك ان معظم الاحاديث اللى ذكرها احاديث ضعيفه وفى منها منكر
    كمان كان بيستخدم تفاسير لأيات القران من مفسرين غير مشاهير

    انا قولتلك فى تعليقى ان هو اتجه لفكر هو نفسه مش فاهمه كويس
    هو كان ضحية لتعنت مجتمع وافكار خاطئه كونت داخله تحيز ضد الافكار دى ووجد بغيته فى الحياه الاوربيه

    لكن انت لو قريتى دعوته الى نزع الحجاب والتحرر من الملابس الخاليه من الزينه
    وان المرأه عليها ان تخلع الحجاب الذى لم يحجب فقط جمالها ولكنه ايضا حجب عقلها وارادتها

    تلك هى كلماته نصاً

    دعينا نتفق على عدة امور

    ان المرأه لابد وان تتعلم وان يكون لها ملكيتها الفكريه المستقله
    كما ان لها الحق فى العمل
    كما اننا لا نحجر على حريتها فى الحياة والتنقل والتعامل مع الامور اليوميه مثل الرجل

    ولكن حرية المرأه يجب الا تضر بالمجتمع ككل

    فالمرأه حره فى ان ترتدى ما تشاء بشرط الا تكون ملابسها غير محتشمه خارج المنزل والحشمه فى حد ذاتها لها معايير
    والمرأه حره فى ان تعمل وتتعلم لكنها ليست حرة فى ان تلفت اليها انظار الرجال وتخضع مهم فى التعامل
    وتلين معهم فى القول
    لأن مفسدة ذلك فى المجتمع ككل اكبر من فوائد عمل المرأه

    الموضوع كبير ويحتاج الى نقاش ربما اصيب وربما اخطئ

    انا بعمل بحث عن الموضوع دا وفى ناس مشتركه فيه لو تحبى تساعدينا

    ReplyDelete
  3. حزين
    الله يكرمك وشكرا على الدعاء الجميل

    بس عندي طلب، من فضلك التعليقات تتحط مع الموضوع الخاص بيها
    ماينفعش نتكلم في قاسم امين وكلنا ليلى في تدوينة غير ذات علاقة
    :)

    ثانيا
    من كلامك مش من حتة تانية :) قاسم امين اتكلم في كذا نقطة في موضوع تحرير المرأة، منها تعليمها، وكيفية معاملة الزوج لزوجته، وكيانها المستقل وعملها وحرية تنقلها و و و وامور تانية كتير، ومن ضمنها كمان فكرة الحجاب
    مكنتش قضيته الاولى والاخيرة هى الحجاب ماينفعش نلخص كل افكاره في نقطة واحدة ونيجي نرفض النقطة دي ونعتبر قاسم امين زفت بسببها
    امال فين اختلاف الرأي؟

    حسب ما فهمت من كلامك انك مع حق المرأة فى التعليم والعمل وغيره
    والراجل كان بيتكلم في كده كمان

    انا بس مش عايزة نبخس الناس حقها، احنا نقدر نسمع بعض ونتفق ونختلف ونفضل كلنا بردو مسلمين :D

    اهي دعوة للتعايش مع افكار الاخرين -اموات كانوا او احياء- طالما كلنا واقفين على أرض واحدة،واحسب ان قاسم امين كان واقف على نفس الارض دي
    والله اعلم

    ReplyDelete
  4. فعلا دعاء رسامة هايلة ودماغها جامدة وشغلها في الدستورجميل جدا
    شكرا على نشر الحوار الجميل

    ReplyDelete
  5. دعاء العدل فنانة موهوبة ...وربنا يخليكم لبعض دايما
    .............
    شاركي بإقترحاتك في
    http://elarasoly.blogspot.com

    ReplyDelete
  6. اولا انا باشكرك جدا على البوست ده
    ليه
    لانى اول مره اعرف ان دعاء من عندا-من دمياط يعنى-وكمان الحوار كشف اجزاء كتيره من شخصية الفنانه صاحبة الرسوم اللى بتمتعنا كل اربعاء على صفحات الدستور
    اشكرك للمره الثانيه

    ReplyDelete
  7. لا اجد ما اقوله..... سوى ربنا يخليكى ليا يا زيزى.... لن انسى ان اول رسمه نشرت كانت لديكى واول من شجعنى من اصدقائى كنتر انتى...... تفتكرى القطه راحت فين دلوقتى!!

    ReplyDelete
  8. قبل اعلق على الرئعة دعاء العدل ورسمها الجامد جدا اللى بيموتنى من الضحك اويجعلنى احزن كثيرا على احوال بلدنا

    وعلى فكرة انا بحب الرسمه بتاعت دعاء
    اللى انتى حطاها مع الموضوع ومسميها المصرى الاصيل (ومعلقها فوق سريرى عشان اشوفها كل يوم )

    اما بالنسبة ليكى فاحب ان اشكرك كثير على مجهود الجامد اوى فى كيف تنشى مدونة

    مع تحياتى

    أحمد مصطفى

    ReplyDelete
  9. انتى هاجرتى ولا ايه ؟؟؟؟؟؟؟



    هنكشفهم

    انتظرونا قريبا فى 1/11 هنكشفهم
    لنكشف معا اخطبوط الفساد فى مصر
    الراس معروفة ولكن الازرع تعمل فى الخفاء
    لنحاربهم معا
    نرحب بأى مقالات تكشف الفساد فى مصر
    او اراء تدعمنا او تنقدنا نقد بناء

    ReplyDelete
  10. السلام عليكم اتمنى لكل المدونين التوفيق ويسقط حسنى مبارك

    ReplyDelete
  11. اولا بتمنى لكم دوام الصداقة الان من النادر جدا وجود اصدقاء حقيقين اليومين دول .ودة فى رأيى الان الحياة فى مصر بفضل حكومتها بتحرض على الانعزالية لاجل المصلحة الفردية ؟؟؟!!انا معجب برسومات دوعاء وبتمنى اشوف الكثير من رسوماتها.....نور المصرى

    http://nourelmisry.blogspot.com

    ReplyDelete
  12. السلام عليكم
    لدي سؤال وليت احد منكم يا اعضاء بنت مصرية يجاوبني السؤال هو
    انا لدي مدونة جديدة وادخلت موضوعين لكنهما لم يدخلو التصنيف الذي انا عملته كيف اجع الموضوعين يدخلون تصنيف مدونتي؟؟؟
    وهذه هي مدونتي
    http://ahmedkbaany.blogspot.com/

    ولكم جزيل الشكر
    اخوكم
    احمد قباني

    ReplyDelete