6/20/2010

بخصوص الثانوية العامة

كل سنة في نفس المعاد نفس السيناريو..
العيال بتوع الثانوية العامة يدخلوا يمتحنوا.. وأمهاتهم مستنياهم على بوابة المدرسة بره.. يخرجوا يعيطوا ويصوتوا ويصرخوا وينهاروا ويغمى عليهم.. تنزل تغطية البرامج بالليل بتجيب مناظر العيال المنهارة.. وتنزل تغطية الجرايد الصبح بصور العيال المنهارة.. يطلع الوزير يقول إنهم هيراجعوا الامتحان ولو في صعوبة هيتم إعادة توزيع الدرجات..

وهكذا كل سنة.. بلا توقف.. بلا أي تغيير.. موال اسود ومنيل وملل ومقرف

المشكلة يا سادة مش في الامتحان.. ولا في الأسئلة.. نفس العيال دي بتمتحن امتحانات أغبى من كده في السنوات اللي قبل الثانوية ومحدش فيهم بيفتح بقه لو حتى نقص خمس وللا عشر درجات عن اللي هو متصور إنه هيجيبه

إنما الثانوية العامة.. واللي النص درجة فيها بتخسف بالعيل الأرض او ترفعه.. والعيال وأهاليهم بيتصوروا إن مستقبلهم متعلق بمكاتب التنسيق اللي بتقف ع الواحدة.. كل ده بيخلق الرعب والخوف من فقدان مجرد نص درجة.. وأغلب العيال اللي بتخرج منهاره وبتعيط هو اللي بيجيبوا أصلا درجات عالية ومش مستعدين يفقدوا درجة وللا اتنين

الموال ده هيفضل مستمر مهما اختلفت صعوبة أو سهولة الامتحان.. لأن المشكلة مش في الامتحانات

أنا بردو عشت الأيام دي.. وكنت بروح أعيط على درجة وللا نص درجة.. بس الحقيقة اللي اكتشفتها إن مكتب التنسيق مش هو اللي بيحدد مصيرك في الحياة.. حتى وإن بدا الأمر كذلك في أول الأمر، لكن شوفوا مصائر الناس بعد ما بتخلص كلياتها بتختلف كتير إزاي وبتفاجئهم.. أنا مثلا خريجة كلية تربية ولكن بشتغل مصممة مواقع، وأعرف ناس خريجي طب وصيدلة وهندسة وفنون جميلة وحقوق وتجارة اشتغلوا في مهن مختلفة تماما عن اللي درسوه

طبعا أنا صعبان عليا أربع سنين من عمري قضيتهم في تعلم حاجات ماشتغلتش بيها.. ولو إن بردو انا اتعلمت حاجات أثرت شخصيتي ومعرفتي العامة لأن في كلية التربية بندرس فلسفة وعلم نفس وصحة نفسية .. ولأني لغة انجليزية فانا كمان درست دراما ومسرحيات وروايات وشعر .. المهم دا مش موضوعنا

موضوعنا إننا محتاجين نغير طريقة تفكيرنا ونظرتنا للثانوية العامة ومفاهيم زي: مكتب التنسيق، التعليم الجامعي، المستقبل، المصير.. ومحتاجين أكتر نؤمن بنفسنا وبقدراتنا اللي مش بتقدر تقيسها امتحانات الثانوية العقيمة المعتمدة على الحفظ

ولكل طلبة وطالبات الثانوية العامة.. استرجلوا شوية.. انتوا لسه ياما هتاخدوا على دماغكو

16 comments:

  1. المشكله مش في الطلاب يا زينب
    المشكله فب الاهالي اللي بيفهمونا انو الثانويه العامه نهاية احزانك في الدنيا وبعدين ممكن زي ما قلتي حياتك كلها تتغير

    معاكي حق "استرجلو شويه"

    كيفك يا زوزو؟ ان شالله تكوني تمام، مشتاقلك والله :)

    ReplyDelete
  2. أنا مشتاقالك أكتر يا ميسو :)
    انا كويسة الحمد لله، انتي أخبارك ايه؟

    عندك حق طبعا، الاهالي طبعا سبب مباشر :)))

    ReplyDelete
  3. والله هايني يا عزيزتي بطبّش:)
    الحمدلله على كل شيء

    داحلين على طلوع:)

    بس الحمدلله انو اخبارك كويسه على فكره يا زينب البوست هاد جاي عالوجع:)

    ReplyDelete
  4. كلنا اتوجعنا من الثانوية وسنينها :))
    ان شاء الله دايما بخير يا ميسو..

    ReplyDelete
  5. بعد 7 سنين من إنهائها، برجع لورا بلاقي إن كل ده عبث.

    أنا على وشك إنهاء كلية الطب، اللي فرق معايا بجد مش وجودي في وسط (الطب) في حد ذاته، لكن المرحلة الانتقالية للنضج النسبي اللي من المفترض نمر بيها، ودي مش مرتبطة لا بمكتب التنسيق ولا بالكلية اللي بندخلها.

    الشخص القاصر في تفكيره هو اللي هيفضل دايمًا واقف عند نقطة (أنا مادخلتش الكلية اللي أنا عايزها) والحقيقة إننا مابنعرفش بنحب حاجة أو بنكرهها إلا لما نجربها، فكل الدوشة دي بلا معنى لأن ماحدش في العيال-16 سنة- عارف هو عايز ايه فعلا حتى لو اتصور العكس، دي كلها رغبات أهله ومحيطه اللي اتزرعت فيه من غير ما يحس.

    بحمد ربنا إني ماكنتش من العيال اللي أهلها بتوصلها لحد اللجنة، ولا كان حد له دعوة بطريقة مذاكرتي ولا تنظيمي لوقتي. كل علاقتهم بالامتحان كانت:(عملتي ايه؟ والمادة الجاية امتى؟) يمكن ده من الحاجات الأساسية اللي دخلتني طب أصلًا لكن ماحدش واخد باله!

    ReplyDelete
  6. المشكلة في تراكمات الصدأ اللي على عقول البعض
    وطبقية التعليم اللي افرزت مصطلح كليات القمة اللي مش موجود في اي حتة في العالم الا في ثقافتنا وعقولنا احنا
    المشكلة في نظرة الاستعلاء من "حملة" الشهادات ذات المجموع الخرافي لطابور المرحلة الثالثة
    المشكلة في نظرة الكثيرين لبعض المهن على انها وجاهة اجتماعية مهما ادّعوا العكس...ومهما ادّعوا انهم أكثر تحضرا أو تظاهروا ان افقهم أوسع من كدة

    المشكلة في شحنة الاحباط العام اللي خلت المعظم بيعتبر
    الثانوية العامة هي "القشة الأخيرة" اللي لازم يتعلق بيها للحاق بركب "المميزين اجتماعيا"

    احنا عايشين في وهم كبير قوي

    ReplyDelete
  7. انا شايف العيب فيما بعد الثانويه العامه ازاى ان اجابتك على سؤال فى اى ماده ممكن تاثر على مستقبلك الدراسى وتخليك متدخلش كليه انت عايزها

    مشكلة الثانويه العامه ان مجرد ورقة اسئله ممكن تغير مسار حياة بنى ادم

    يبقى احنا عايزين نغير طريقة دخول الجامعات بحيث ميبقاش التقييم على امتحان واحد اخر السنه

    ReplyDelete
  8. اختى العزيزة التعليم فى مصر سىء للغاية وخاصة التعليم الثانوى

    ReplyDelete
  9. المشكلة أن اللي بيقرأ التدوينة ديه بيكون غالباً طالب، فمش بأيده حاجة!

    لكن فعلاً المشكلة الأساسية في الطلاب و أولياء الأمور

    ReplyDelete
  10. التعليم الخاص أفضل

    ReplyDelete
  11. عزيزتي بنت مصرية انا مجرد زائرة وارد فقط شكرك على مساعدتي لأني إستفدت فعلا من توجيهاتك لإنشاء مدونتي الخاصة وأتشرف بمرورك وأتطلع لمعرفة رأيك والإستفادة ببعض النصائح
    شكرا على الإفادة thanks
    مدونتي هي الراية ليست بيضاء

    http://flagnotwhite.blogspot.com

    ReplyDelete
  12. ياريت تكتبي عربي فصيح هيبقى احسن
    ياريت نعتز بلغتنا

    ReplyDelete
  13. كل سنه ونفس الموال بتاع الثانويه موجود

    ReplyDelete
  14. استرجولو شوية فعلا ياما هتاخدوا على دماغكم , وتتصدموا اكتر , ممكن تكون الثانوية العامة في بلدنا هي جزء من الاعداد النفسي والجسدي والعصبي لشبابا وبنات مصر , وتهيئتهم للقادم الاسود من ايامهم

    " دعوة لزيارة مدونتي الالكترونية " عرق جبيني "ـ
    http://3ara2gebeny.blogspot.com/

    ReplyDelete
  15. حاضر هسترجل السنتين الجايين دول :D
    رفعتي من روحي المعدنية

    ReplyDelete