9/06/2010

يسقط الإستعمار الحكومي .. يسقط الإعلام المسموم

قال إيه في مسلسل الجماعة، الإمام حسن البنا أخد بعضه وراح للنقراشي يعيط ويقول له : الإخوان مكنش المفروض يعملوا في السياسية، وفيما معناه يعني.. المفروض يخلوهم في الدين وبس.

لوووووووووووووووووول

يعني وحيد حامد - بجهل جدير إنه يخلده في التاريخ باب hall of shame - بيخلي حسن البنا بيتكلم بلسان وبفكر واحد علماني،... كوميديا سوداء توقعك في الأرض من كتر الضحك

ليه الجملة دي مش معقول تصدر عن واحد زي حسن البنا؟ دا سؤال حلو

أولا، لأن فهمنا إحنا كمسلمين للدين وعلاقته بالحياة وما فيها من نواحي سياسية واقتصادية واجتماعية وكله بيلخص الفكرة في حاجة واحدة: إن الدين من عند ربنا ارتضاه لينا عشان نعبده وعشان نأمر بين الناس بالعدل
"وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ" صدق الله العظيم*١
وبيقول بردو:
"لَقَدْ أَرْسَلْنَا رُسُلَنَا بِالْبَيّنَاتِ وَأَنزَلْنَا مَعَهُمُ الْكِتَابَ وَالْمِيزَانَ لِيَقُومَ النّاسُ بِالْقِسْطِ" صدق الله العظيم*٢
الدين عندنا كمسلمين، مش بس صلاة وصوم وحج
الدين مش بس صبر وصدق وأمانة وأخلاق
الدين كمان بيأمرنا نعدل بين الناس.. وحط تحت الجملة دي كل حاجة تخليك توصل لتحقيق العدل، من وجود مجتمع، ونظام، ومسئولين.

إذا الكلام ده مش معناه سياسة أمال يبقى معناه إيه؟

يعني، مثل اللي بيقول إن الإسلام صلاة وصوم وتبسمك في وجه أخيك صدقة وبس.. مثل البطة العارجة

الدين في الآخر مجموعة من الأفكار بتهدف لصلاح الإنسان الفرد ولصلاح الجماعة أو المجتمع ولتنظيم العلاقة بينهم..

يعني الدين زيه زي أي حد مصلح اجتماعي أو سياسي بيحط أفكار شايف إن فيها صلاح للبشرية، زيه زي الإشتراكية والرأسمالية والوجودية وغيرهم كتير

الفرق بين الأفكار دي والأفكار دي هي بس المصدر، إن الدين من مصدر رباني، والأفكار التانية من مصدر بشري..

أنا لو صحيت الصبح لقيت نفسي شيوعية ولقيتني في مجتمع بايظ ومنيل ومحتاج إصلاح.. هفكر إني أخدم الناس وأوصل لمستوى مسئولية يخليني أخدمهم سواء المسئولية دي إني أبقى نائبة في البرلمان، أو عضوة مجلس محلي أو عملت حزب أو وصلت للحكم... الفكرة في الآخر إن عندي برنامج بيهدف لمصلحة الناس والناس بتختارني

نفس الفكرة.. أنا لو مسيت بالليل لقيت نفسي عاجبني الأفكار الإسلامية والطرح الإسلامي ووجهات نظره وطريقته في الإصلاح عجباني، هحب أخدم أهلي وحبايبي والمجتمع والناس وأروح أعمل حزب بردو أوصل للحكم

إيه الفرق بين الإتنين بأه حد يقول لي؟ حرام ع التوجيه الرباني، حلال للبشري؟؟

ثانيا: طبعا محتاجين نفرق بين علاقتين بين السياسي (رجل السياسة) و الدين - هما نفسهم اللي ممكن اقولهم على أي فكر تاني
- العلاقة الأولى، إن حاكم إبن تييييييت يستغل الدين في الوصول للحكم عشان هو عايز السلطة والنفوذ والفلوس وحب يستغل الناس للدين
- العلاقة التانية: إن واحد يكون مؤمن بإن صلاح الدنيا في الدين، وبيحاول يطبق المنهج يما يرضي الله

نفس العلاقتين تنطبق على أي فكر تاني.. فاكرين في مسرحية محمد صبحي "تخاريف" لما طلع يقول، أنا قريت كتاب الإشتراكية لحد النقطة اللي بتقول إن الحكومة يكون في إيدها أدوات الإنتاج ، وقفل الكتاب على كده.. هو استغل الإشتراكية عشان يلم فلوس وبس

إزاي تقدر تمنع الإنحراف ده اللي بيخللي الحاكم يتهبل في دماغه، هو إنك كشعب تقدر تقومه في أي لحظة وتقدر تشيله لما تشوف إنه اتلحس..

واحد زي الخليفة أبو بكر الصديق قال في خطبته لما تولى الخلافة:

أَيُّها الناسُ فَإِني قد وُلِّيتُ عليكم ولست بخيركم فإِنْ أَحْسَنْتُ فَأَعِينُونِي وإِنْ أَسَأْتُ فَقَوِّمُوني। الصِدْقُ أمانةٌ والكَذِبُ خِيَانَةٌ . والضعيفُ فيكم قويٌّ عندي حتى أرجعَ إليه حقَّه إن شاء اللّه، والقويّ فيكم ضعيفٌ عندي حتى آخذَ الحقَّ منه إن شاء اللّه.
أخدت بالك قال ايه؟ وإن أسأت فقوموني

نرجع بأه لحسن البنا، فالحج وحيد حامد رضي الله عنه عايز يقنعني إن حسن البنا ممكن يقول جملة ساذجة وهبلة زي الدين يفسد السياسة والسياسة تفسد الدين؟ كلمة سقيمة ، وتعميم لا يصدر من واحد زي حسن البنا أبدا أبدا أبدا

الجملة دي مسمومة مسمومة مسمومة، والناس هترددها بهبل وسذاجة وتعميم.. ويمشوا ورا كلام الحكومة اللي عاملة قانون تمنع فيه الأحزاب اللي ليها مرجعية دينية، يعني حزب زي حزب الوسط مش راضيين يدولوا تصريح عشان الحزب واضح وصريح في إن مرجعيته مرجعية إسلامية.. يعني أنا ممكن أعمل حزب بيدعوا للحياة على الطريقة الليبرالية ومقدرش اعمل حزب بيدعوا للحياة على الطريقة الإسلامية.. ويقول لك دي حرية!

-----

*١ الذاريات ٥٦
*٢ الحديد ٢٥


----

ملحوظة: هو انا محتاجة أقول إني مش إخوان مسلمين، وإني بس بقول الحق لوجه الله، لا أرجو ثوابا إلا منه؟

17 comments:

  1. ana fe3lan el mawdoo3 dah estafazeny ,, great great post

    ReplyDelete
  2. أنا معاكى أن المسلسل فيه اخطاء فادحه ,, بس د بالذات عايزه مراجعه :
    جمال البنا اخو حسن البنا قال فى كذا كتاب من كتبه و انا شخصيا متأكد انه قال كده ,قال "الأمام البنا ندم على انه تخلى عن الدور التربوى للجماعه و خلطها بالدين و نزلها الشارع "
    الكلام د على لسان جمال البنا اخو حسن البنا
    و فى سياق تانى قال جمال حماد,كاتب , فى مذكراته ان من اهم اسباب أغتيال البنا هو معارضته للنشاط السياسى للجماعه .
    د غير ان هيكل لمح لنفس الفكره د ف أكتر من موضع اللى هى ندم البنا على اقحام و خلط النزيه المجرد ف القذر المركب و معارضته لذلك التى قتل على اثرها
    أسف على الأطاله بس رأيك فى حجات كتير عايزه تتراجع

    ReplyDelete
  3. Love it ya Zei.. great analysis w ya reit el nas tefham ba2a

    ReplyDelete
  4. ماعرفش عن المسلسل حاجة غير الكلام المتداول على النت. لكن إحقاقاً للحق ، الشيخ الغزالي ذكر فى أحد كتبه أن الإمام حسن البنّا قال له شخصياً أنه لو الأيام رجعت به لكان غيّر أشياء كثيرة فى الجماعة. طبعا هذا الكلام ممكن جداً أن يأخذه شخص يريد التلاعب بالألفاظ ويؤوله كيفما شاء. لكن فى النهاية لا يمكن بأى حال تصوّر أن يكون حسن البنّا قصد به الإقتصار بالدين على أداء العبادات والتربية التربوية فقط كمنهج دائم للجماعة ، أو من منطلق فصل الدين عن سياسة حياة الناس والبلد

    غالباً الدراما لعبت شوية بعقل الأفندي الفنان المبدع فأخذ هذه الجملة والتى قد يكون لها مصدر آخر إلى جانب الغزالي ، وقرر توظيفها بما يخدم هدفه الأساسي من المسلسل

    تعليق جانبي: أعتقد أن جمال البنّا وهيكل مصادر غير موثوقة للأخذ منها فيما يخص الإخوان. أما جمال حماد فكلامه غريب جداً لأن المعروف والمثبت هو أن البوليس هو من إغتال البنّا

    ReplyDelete
  5. anaZAAAAAD

    بعد التعليق بتاع "عدى النهار" معنديش كلام تاني ممكن أقوله، طبيعي جدا من واحد عاقل زي حسن البنا إنه يراجع نفسه، ويمكن يطلع بحاجات هو حب يغيرها في أداء جماعة الإخوان، إنما المبدأ والفكرة الأصلة مش ممكن.
    زي ما قلت، الكلمة بتاعة الدين يفسد السياسة والسياسة تفسد الدين طالعة من بق واحد علماني.. دي مش إهانة على فكرة، بس العلمانية شايفة العلاقة كده بين الدين والسياسة.. عشان كده بقول مش ممكن حسن البنا يقول كده

    انا عملت زي ما قلت لي وقريت تاني اللي انا كتبته ومالقيتش حاجة انا عايزة اتراجع فيها

    تحياتي

    ReplyDelete
  6. ahmed, shokran ya fandem :)


    zeww, menawara ya gamil :)

    عدي النهار, الله ينور عليك

    ReplyDelete
  7. يا سلام لما حد اخوانى يبتدى يتكلم باسم الدين.... نشاز... آل يعنى لما يمسك الحكم هيطبف الدين باللى ليه و اللى عليه، مش زى أى حاكم دينى فى الـ800 سنة اللى فاتت... و الله احنا شعب ساذج و يستاهل

    ReplyDelete
  8. عبد الكريم مارديني10:49 PM, September 08, 2010

    إيه الفرق بين الإتنين بأه حد يقول لي؟ حرام ع التوجيه الرباني، حلال للبشري؟؟<<

    إزاي حد توجيهه رباني و مرجعيته ربانية هيتقبل النقد و النقض للتوجيهات والمرجعيات أو وضعها في وضع الند للتوجيهات و المرجعيات البشرية؟

    القناة الثانية تتمنى لكم صوماً مقبولاً و إفطاراً شهياً

    ReplyDelete
  9. ماريني
    منور يا كبير..

    البني آدمين عموما عندهم مشكلة في تقبل النقد سواء كان اللي بيؤمنوا بيه ده رباني أو بشري، بيتهيئلي ممكن نتفق على النقطة دي مبدأيا

    ثانيا: جزء من نجاح الدعوة لأي فكر سواء رباني أو بشري، هو القدرة على المناقشة والجدل.. واحد من أكبر أخطاء الحضارة الإسلامية في العصر العباسي هو منع الاجتهاد "التفكير" ومنع علم الكلام "الفلسفة والجدال" وبحرق كتب علماء المعتزلة وبهدلتهم
    ثالثا، الشك جزء من الإيمان.. مهم جدا إن الإنسان يكون قدرة ع الشك في أفعاله.. المراجعة يعني

    رابعا، كتير من الإسلاميين المعاصرين عندهم القدرة دي على تقبل المناقشة والنقد، إذا مش من باب الإيمان بأهمية المناقشة يبقى من باب إنه الدولة محجمة قدرتهم على "الفعل" وبالتالي مفيش قصادهم غير القدرة على "التنظير"

    خامسا وأخيرا، من حسنات كلية التربية اللي انا كنت فيها، إني كنت بدرس فلسفة.. وكان في كتاب، إظنه فلسفة مقارنة، بيقارن بين الفلسفات المختلفة ومن ضمن الفلسفات دي الفلسفة الإسلامية.. يعني كان بيحط الفلسفات كلها موضع المقارنة والنقد )مش معنى الكلام ده نقد العقائد الثابتة ولكن كل ما دون ذلك يمكن مناقشتة لأنه بيقع في نطاق فهمنا وتفسيرنا وتطبيقنا(

    طبعا الكلام ده مش هينطبق على ناس كتير، وحركات إسلامية متعددة (وغير إسلامية(.. لأنه زي ما اتفقنا في النقطة الأولى، دي مشكلة إنسانية عامة :)

    ReplyDelete
  10. «من أتى أبواب السلطان افتتن»
    حديث شريف
    لا مانع من تدين السياسه و لكن المشكله في تسييس الدين
    على الجفري بتصرف
    تاريخيا العلماء المسلمين الأجلاء بجد كانوا بيبعدوا عن السلطان و بيفروا منه ما عدا علماء السلطان طبعا
    أنا مش عايزه افتي في الدين لكن عمري ما استريحت لفكرة الاسلام السياسي دي
    دايما الموضوع بينقلب الى متاجره بالدين
    و انا مؤمنه بدور الدين اجتماعيا مش سياسيا
    و بغض النظر عن تفاهة مقوله " السياسه تفسد الدين و الدين يفسد السياسه" فهي فيها قدر كبير من الصحه بغض النظر عن قائلها

    ReplyDelete
  11. qrique

    خلينا نفرق بين نقطتين، إن عالم دين يشتغل بالسياسة، وإن رجل سياسي تكون مرجعيته إسلاميه

    أكيد الفرق واضح.. مش عايزين الأول، إنما التاني مش مرفوض أبدا

    يعني ما ينفعش مثلا رجل دين شتغل بالطب، إنما اكيد ينفع إن الطبيب تكون مرجعيته إسلامية، وعنده من المعرفة الإسلامية ما يكفي

    تاريخيا بردو، عصر الخلفاء الراشدين كان أعدل وأقسط عصر بعد عصر النبي صلى الله عليه وسلم، وكان طبعا خلفيتهم كلهم إسلامية، وكلهم كانوا بيحكموا بما أمر الله. نفس الكلام ينطبق على عمر بن عبدالعزيز الخليفة الأموي الوحيد اللي اعتبره الناس إمتداد لعصر الخلفاء الراشدين.

    أما الحديث، فإذا كان صحيح فهو تنبيه مهم إن الناس ماتفتنش، بس أكيد هذا السلطان نفسه لو تخلق بخلق الإسلام وطبق حكم الله عن حق هيكون فيه الخير للشعب.. صلاح الحاكم صلاح للرعية

    ReplyDelete
  12. كلامك سطحي قوي ..يعني ايه مفيش فرق بين أني أعمل حزب ديني و أوصل للحكم و بين أني أعمل حزب مدني و أوصل للحكم .. لأ طبعاً ده فيه بتاع سبعة مليون فرق

    الحزب الديني ها يبقى كله من المواطنين المؤمنين بدينك - طبيعي يعني - معناه أن في تمييز أوتوماتيكي حصل بين أولاد دين الحزب بتاعك و أولاد دين الكلب التانيين

    المعارضة في الحزب الديني غالباً ها يتم تفسيرها كمعارضة للدين اللي بيمثله الحزب و بالتالي تعتبر تكفير صريح

    الحزب الديني ها يتبنى بطبيعة الحال تفسير مُحدد للدين ، و الأديان زي ما إحنا عارفين - حمالة أوجه .. يعني تفسرها كده يمشي و كداهوه يمشي بردك و طبيعي جداً أن الحزب الديني ينقي التفاسير اللي تيجي على هواه و لو مكانش ده متاجرة بالدين .. يبقى نسميه أيه ؟

    بقية السبعة مليون فرق معنديش وقت كافي أذكرهم

    ReplyDelete
  13. على باب الله

    الحقيقة أنا بشكر حضرتك إنك كلفت نفسك وضيعت وقتك ترد على كلامي السطحي.. حقيقي مكنش في داعي تبذل مجهود ترد على تخاريفي

    الفكرة بتاعة حزب ديني وحزب مدني نصباية كبيرة أنا ماشتريهاش.. لأن لنفرض إن كل الأحزاب أحزاب مش دينية.. كل الالوان والأطياف ماعدا الديني.. تفتكر يعني إن كل أتباع الأحزاب دي مش متحيزين كل للحزب بتاعه، وبيعتبر التانيين ولاد كلب؟ طبعا إلا من رحم ربي من اللي بيقول "لكم حزبكم ولي حزبي" …الإنتماء الأعمي ممكن يتواجد في اتباع الأحزاب، زي ما ممكن يتواجد في اتباع الأديان، وبالتالي إقصاء الأديان من معركة السياسة والحياة مش هيضمن للإنسانية راحة البال

    ثانيا إنت بتفرض إن لو بقى في أحزاب دينية، هيبقى في مثلا واحد بس للإسلام؟.. مش ممكن طبعا، على قد ما في من فرق وتيارات اسلامية هتلاقي.. ايه المشكلة في التنوع البشري والفكري، سواء مرجعيته دينية (اي دين) او فكرية (اي فكر).. انا عارفة ان كلامي غريب على اللي بيكرهوا الأديان وشايفينها سبب كل المآسي الإنسانية، وكلامي غريب بردو للمتدينين اللي شايفين الدين في الجوامع وبس وإن البعد عن السلطان غنيمة

    إذا كان خوفك من الحزب الديني هو الإنتماء الأعمي، فدي مشكلة إنسانية لازم تتحل، يروحوا لدكتور نفسي مش تحجروا ع الاحزاب الدينية!

    ReplyDelete
  14. بسم الله الرحمن الرحيم
    عزيزتي زينب .. السلام عليكم .. أهنئك ألف مرة على كلامك الذهب , الموزون .. فأنا فعلا إستفدت من طرحك كثيراً ولنقل (إتكيفت ),مسلسل الجماعة بكل ما فيه من مجهود فني .. لا يختلف أي مثقف قرأ ولو كتابين عن فكر جماعة الإخوان أو عن حسن البنا.. أنّه مجرد هرطقة دينية سياسية درامية مهلبيّة .. تمت كتابته وتنفيذه , لأهداف غير خفيّة, و بتوجيهات أمنية, وعرض في تلك الفترة الزمنيّة , لبرمجة العقول الغبيّة, ليخدم أهداف فئة معنيّة , قبل الإنتخابات اللي جايّة
    إذاً فالمسلسل لا يستحق فعلياً أي تعليق ..
    إذ كيف نعلق مثلا على تقرير يقدمه ضابط من إيّاهم عن شاب تم إعتقاله في وقفة إعتصامية لشباب جمعية التغير .. هل يمكن أن يتضمن أي موضوعية ؟ هل سيقول عنهم أنهم شباب مصري أصيل يحمل فكراً جديداً ومخلصا للنهوض ببلده التي يحبها ؟؟؟؟ طبعاً مستحيل , فهذا المسلسل كذلك ..
    وبرغم أني مواطنة أوروبية فإن جذوري المصرية المتدينة تدفعني لمتابعة أخبار البلد .. كلما أمكنّي ذلك ..
    وإحقاقاً للحق, فإن النماذج المعاصرة للدولة الدينية بما فيها من ديكتاتورية لاتمت لحقيقة النظام السياسي في الإسلام بأي صلة.. من غلوّ ٍ ديني ٍأحياناً وعِمالة لأعداء الدين أحياناً أخرى , لها دور كبير في توجس الناس من التسييس الديني أو التدين السياسي .
    ويكفي هنا أن نقول: ليست قاعدةً أنّ أي نظام سياسي مبني على قواعد دينية سيكون إيران أخرى أو صومال أو طالبان أو حتى السعودية (أو حتى إسرائيل , فهي أيضا دولة دينية )خاصة إذا كانت أفكاره مستنيرةو متطورة وتقوم على رجال دولة وساسة محنكين ومتدينين يعرفون كيف يسترشدون برجال دين مستنيرين ويفهمون لعبة السياسة فبذلك يحصل التكامل المأمول والناجح كما نجحت وبجدارة مثلا دولة عمر إبن عبد العزيز رحمه الله.. السياسي القدير والمتدين مع وزراءه من رجال الدين الأفذاذ الواعين بشؤن السياسة
    وشكراً

    ReplyDelete
  15. You have a good point here , good article .

    ReplyDelete
  16. سلمت يداكي اختي " بنت مصرية " على الكلام الصحيح مية بالمية ، اذا كنا نحن لسنا اخوانجيين ، فهذا لا يعني التهجم على الدين وعلى التاريخ ، بغض النظر عن الفكر الاخواني إلا انه حسن البنا رحمه الله اجتهد وحاول وهذا في ميزان حسناته حتى لو طريقته لم تعجبنا ، يا سيدي " على باب الله " اعتبره مصلح اجتماعي صاحب نظرية زيه زي غيره ولا هو حلال على ماركس وحرام على البنا ؟؟ عموما اختي انا حاولت اوصلك بس علشان اشكرك على مساعدتي غير المباشرة في انشاء مدونتي المتواضعة ، وان شاء الله نظل على تواصل وذلك لاني معجبة في اسلوبك في الكتابة ،، وفقك الله وسدد خطاك وجعل كل كلمة تكتبينها في ميزان حسناتك ان شاء الله
    دمتي بخير وكل عام وانتم بخير بمناسبة ذكرى انتصارات اكتوبر

    ReplyDelete