لما تبقى منتظر حاجة تحصل.. حاجة مهمة ومصيرية، والحاجة دي مابتحصلش، الأيام والأسابيع والشهور بتمر وكل شوية مشكلة تحصل أو مسألة تتعقد؛ وكل شوية بردو المشاكل تتحل والمسائل تتفك، بس يفضل الموضوع مطول وتفضل اللي منتظره يحصل ما بيحصلش. وكم المفاجآت والاحباطات والقرارات اللي لازم تاخدها والاعتبارات اللي لازم تفكر فيها. كأنك ماشي ع الحبل متشعلق في الهوا وكأن كل يوم روحك بتضيق.. بس كمان مفيش مكان بيكفي زعلك.. محدش عارف عنه حاجة عشان مش عايز تشيل حد همك.. واللي بيعرف بيعرف بس عشان ضغط عليك أو عشان في لحظة إنت مش قادر تفضل ساكت.. بس إنت غالبا بتبقى قافل على نفسك الباب ومابتكلمش حد وما بتشفش حد ومش مستعد حتى تبرر لحد أسباب اختفاءك .. الانتظار اللي بيخلي الصورة باهتة وكل يوم ملوش طعم.. حتى الأخبار السعيدة مش بتفرحك والخطط الشخصية واقفة ومؤجلة .. كل ده عشان الحاجة اللي منتظرها تحصل ما بتحصلش..
No comments:
Post a Comment