كل وسيلة اتصال هي في الحقيقة وسيلة انقطاع.
فكر معايا كده، الأول الناس لما كانت تحب تطمن على بعض كانوا يزوروا بعض. بعدين ظهر التليفون والناس فرحت عشان هتعرف تتواصل أسرع. فاللي حصل انهم اعتمدوا ع التليفون في السؤال على بعض وبقوا يقللوا الزيارات والكلام وجها وجها.
بعد كده ظهر الانترنت، والايميل، والفيسبوك والواتساب فبقى أسهل انك تبعت للناس في أي وقت ويردوا عليك أسرع وأسرع بس مع الوقت مابقناش حتى نسمع صوت بعض.
طبعا مهارات الكتابة والنعبير النصي عن الاراء والمناقشات اللي من ورا الشاشة بقت مهارات عالية؛ قدامها ضعفت مهارات الكلام في التليفون والكلام والحكي والمناقشات وجها وجها..
والنهاردة عشان كلنا موجودين على فيسبوك وتويتر وواتساب فطول ما انت بتكتب بوستات وتعلق وتشير وتلايك فانت عايش وموجود ومش محتاجين نسأل عليك. الاختفاء لأيام طويلة هو الحاجة الوحيدة اللي ممكن تقلق الناس. حتى ساعتها مش هيتصلوا؛ هم هيبعتوا لك رسالة أو لو كسلانين اوي هيبصوا يشوفوا انت لاست سين امتى على واتساب ..
احنا كل واحد لوحده النهاردة مع إننا محتاجين نشوف بعض جدا.
No comments:
Post a Comment