يمكن أخدت وقت طويل عشان اعرف ايه الفرق بين العشرينات والتلاتينات. هتلاقي مقالات كتير بتمدح في سن التلاتين - أو مجموعة التلاتين - على إنها مرحلة لسه الواحد فيها شاب ولكن اكتسب خبرة كبيرة في الحياة. مقالات تحس إنها بتطبطب عليك يا غلبان يا عجوز ياللي كبرت وسبت العشرينات الغضة الجميلة..
الكلام عن خبرة التلاتينات حقيقي؛ بس مش مهم أوي كده. كل سنة بتزيد في عمرك بتزودك خبرة. مرورك بتجربة ورا تجربة أكيد بتتعلم حاجة.. بس الفرق الحقيقي والجوهري بين التلاتينات وما قبلها هو إزاي بتشوف نفسك وبتتعامل معاها.
في فترة المراهقة؛ إنت شايف نفسك انت اللي هتغير الكون وتصلح العالم.
في فترة العشرينات؛ بتفهم كويس أوي إن ده مش ممكن. وبتبتدي تعرف حدودك فين.. عيوبك ومشاكلك إيه. بس بتبقى متصالح معاها؛ شايف إنها طبع مش هيتغير وحقيقة عليك قبولها عشان تعرف تعيش.
في فترة التلاتينات بتكتشف إن حقيقي التغيير ممكن والتغيير حتمي. وتبتدي تبص لعيوبك على إنها لازم تتصلح عشان مش هينفع تعيش كده. وبتبتدي تتعرف على نفسك أكتر وتحكي معاها وتدور وتدعبس على ليه وازاي انت عندك العيوب دي؛ وبتتولد جواك رغبة قوية إنك تصلح العيوب دي.. وبتشتغل عليها فعلا. في التلاتينات إنت مش بتغير العالم، بس بتتعلم إن ممكن تغير نفسك ع الأقل.
No comments:
Post a Comment