للأسف يعني

في حاجة كده عايزة أحكي عنها، بس مش عارفة ازاي.. هحاول

أصل أنا اكتشفت إني تقريبا كده عندي شعور مؤكد ويقيني إني لوحدي في الدنيا دي. بمعنى، إن كل تصرفاتي وقرارتي من سنين طويلة أوي بتتبني حوالين فكرة واحدة، إن أنا لوحدي ومتحملة مسئولية نفسي وإن مفيش حد معايا في المعادلة دي.. كأني في الكون ده كله لوحدي ماشية فيه. لازم أخد بالي من نفسي، ومن مستقبلي ومخاوفي وأحلامي وكل حاجة تخصني. وإن الشعور بالطمأنينة والسكينة لازم أنا اللي اشتغل عليهم بمجهود أكبر كتير من العادي، لأن أنا اللي المفروض أطبطب عليا وأنا اللي أطمني، وده شبه مستحيل.. وإن مفيش حد اقدر اعتمد عليه لا أهل ولا صديق. مع إن عندي أهل وأصدقاء، وأكيد يعني لو احتاجتهم هلاقيهم.. ابسط حاجة، لما بحتاج حضن ماما دايما بلاقيه. بس المشكلة إن أنا مابطلبش أكتر من كده. ليه؟ عشان شعوري إن أنا المسئولة مش حد تاني. انا بس بتكلم عن شعور داخلي بيخلي شعوري بالخطر متضخم أكتر يمكن من العادي، وشعوري بالأمل يكاد يكون منعدم.. وبالتالي قرارتي عدائية وقاسية وحادة في أغلب الوقت. كأني بصارع الحاجات لوحدي.. مش عارفة قادرة أشرح وللا لأ. أنا حاسة إن كلمة "لوحدي" دي طلعت بجد شعور عميق جوايا مسيطر على كل حاجة. كأنه هو أصل الأشياء عندي.

أنا مش مبسوطة بالاكتشاف ده خالص، وأتمنى يكون غلط.. بس كل الشواهد، كل تصرفاتي بتقول غير كده