اضراب عمال المحلة..التعتيم الاعلامي..ودورنا لو لينا دور

أكتر من عشرين ألف مصري.. منهم رجاله وستات وأطفال كمان.. عاملين اضراب

واخد بالك.. اضراب يضم عشرين ألف بني أدم. ولا بني أدم منهم له اي خلفية سياسة ولا نشاط سياسي..كلهم عمال.. عمال غزل المحلة

الاسعار النار.. المرتبات القليلة..الحقوق الضايعة، العشرين ألف بني ادم اتحركوا وقالوا لأ..احتشدوا وعملوا اضراب.. لأن مابقاش في لقمة عيش

خبر زي ده،المفروض يكون مانشيت في الصفحات الأولي للجرايد.. ويكون اول خبر في نشرات الاخبار.. ويكون حديث الساعة في برامج اللت والعجن

بس الحقيقة غير كده ..

الاكتر من كده.. ان ادارة المصنع بتعمل لعبة قذرة ضد العمال، وامن الدولة محاصر المكان دلوقتي.. ومش بعيد تحصل مجزرة ما، وتروح ارواح

مش هتف من بقي واقول "فال الله ولا فالي" لأن التعتيم الاعلامي ده معناه ايه؟؟ كام واحد في مصر يعرف موضوع اضراب عمال غزل المحلة؟؟ ازاي الدنيا مش مقلوبة

مصدر واحد لحد دلوقتي اللي بيجيب اخبار العمال.. وصور..وفيديوهات كمان، مدونة كريم البحيري واسمها عمال مصر

وبما ان ما باليد حيلة.. وما عنديش غير حتة صفحة على النت اللي فيها مليون مليون مليون صفحة زيها، بس انا هعمل اللي حاسة اني لازم اعمله.. هقولكوا ادخلوا على مدونة كريم البحيري واعرفوا الاخبار اول باول،تابعوها.. وقولوا للي حواليكو..
اخلقوا اعلام شعبي طالما، كل العصر اللى احنا فيه بكل امكانياته وبكل ادواته بيتأمر عشان نفضل مش عارفين حاجة

ادخلوا على مدونة كريم

ولو حد يقدر ينزل يتابع معاه ينزل... هاتوا خبر، صورة، فيديو، وانا وانت وكلنا ننشر الحاجات دي،نعرف الناس .. لما صورة يجبيها واحد تتنشر على ألف مدونة.. يشوفها ميت ألف بني ادم على الاقل، هنبقي عملنا حاجة والله..

النشر للجميع

حط الفيد بتاع مدونة عمال مصر في السايد بار عندك
هتقولي ازاي؟ سهل جدا
ادخل صفحة اللاي اوت بتاعتك
layout
هتلاقي طبعا نموذج للتصميم بتاع مدونتك، على ايدك اليمين اضغط
add a page element
هتظهر لك صفحة "بوب اب" دور فيها على عنصر اسمه
feed
اضغط على
add to blog
هتدخل على صفحة حط فيها الفيد بتاع مدونة عمال مصر وهو:

http://egyworkers.blogspot.com/feeds/posts/default

واضغط
continue
وبعدين هتظهر صفحة ،اضغط
save changes

وبكده هتظهر على مدونتك مساحة زي اللي ظاهرة عندي دي في اول السايد بار وفيها عناوين بتنزل اول بأول حسب كريم ما بينزل اخبار، تبقي فرصة الناس اللى هتدخل عندك تسمع وتعرف الموضوع

مش عايزين اعلام مبارك الريادي يفضل متحكم في ايه اللي نعرفه وايه اللى مانعرفوش... لازم نعرف ان في عمال دلوقتي بيدوروا على حقهم.. وان امن الدولة عايز يسكتهم... بطريقته

صور من مدونة عمال مصر

التراب الحي

خمسة يونيو.. لسه بطعم الهزيمة ونكهة الانكسار ، لأننا لسه ما أخدناش بتار الأسرى المصريين اللى اتقتلوا وهما عزل من السلاح.. من الوطن

انشروا على النت.. صوت الشهداء وعرفوا بقضيتهم، زنوبيا الجميلة عملت موقع عن الأسرى المصريين.. موقع مش للذكرى، انما لقضية لازم نحييها من تانى

انشروا الموقع

بالمناسبة كمان، الأستاذة نجلاء بدير فى عمودها النهاردة فى الدستور كانت بتتكلم عن كتاب هى قريته عن هزيمة يونيو، فى اخر العمود قالت كلمتين حبيت احطهم هنا، افتكرهم على طول، قالت:

رغم الهزيمة.. لم يهزم جيل الستينات.. فلماذا هزمنا نحن؟ ولماذا هزم الجيل الأصغر والأصغر بأثر رجعي؟
لماذا هزمنا بدون حرب؟ وهزمنا حتى أصبحنا لا نغضب من الهزيمة؟ وهزمنا حتى تمكنا من الاعتياد على الهزيمة والتحايل عليها