يسقط الإستعمار الحكومي .. يسقط الإعلام المسموم

قال إيه في مسلسل الجماعة، الإمام حسن البنا أخد بعضه وراح للنقراشي يعيط ويقول له : الإخوان مكنش المفروض يعملوا في السياسية، وفيما معناه يعني.. المفروض يخلوهم في الدين وبس.

لوووووووووووووووووول

يعني وحيد حامد - بجهل جدير إنه يخلده في التاريخ باب hall of shame - بيخلي حسن البنا بيتكلم بلسان وبفكر واحد علماني،... كوميديا سوداء توقعك في الأرض من كتر الضحك

ليه الجملة دي مش معقول تصدر عن واحد زي حسن البنا؟ دا سؤال حلو

أولا، لأن فهمنا إحنا كمسلمين للدين وعلاقته بالحياة وما فيها من نواحي سياسية واقتصادية واجتماعية وكله بيلخص الفكرة في حاجة واحدة: إن الدين من عند ربنا ارتضاه لينا عشان نعبده وعشان نأمر بين الناس بالعدل

"وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ" صدق الله العظيم*١

وبيقول بردو:

"لَقَدْ أَرْسَلْنَا رُسُلَنَا بِالْبَيّنَاتِ وَأَنزَلْنَا مَعَهُمُ الْكِتَابَ وَالْمِيزَانَ لِيَقُومَ النّاسُ بِالْقِسْطِ" صدق الله العظيم*٢

الدين عندنا كمسلمين، مش بس صلاة وصوم وحج
الدين مش بس صبر وصدق وأمانة وأخلاق
الدين كمان بيأمرنا نعدل بين الناس.. وحط تحت الجملة دي كل حاجة تخليك توصل لتحقيق العدل، من وجود مجتمع، ونظام، ومسئولين.

إذا الكلام ده مش معناه سياسة أمال يبقى معناه إيه؟

يعني، مثل اللي بيقول إن الإسلام صلاة وصوم وتبسمك في وجه أخيك صدقة وبس.. مثل البطة العارجة

الدين في الآخر مجموعة من الأفكار بتهدف لصلاح الإنسان الفرد ولصلاح الجماعة أو المجتمع ولتنظيم العلاقة بينهم..

يعني الدين زيه زي أي حد مصلح اجتماعي أو سياسي بيحط أفكار شايف إن فيها صلاح للبشرية، زيه زي الإشتراكية والرأسمالية والوجودية وغيرهم كتير

الفرق بين الأفكار دي والأفكار دي هي بس المصدر، إن الدين من مصدر رباني، والأفكار التانية من مصدر بشري..

أنا لو صحيت الصبح لقيت نفسي شيوعية ولقيتني في مجتمع بايظ ومنيل ومحتاج إصلاح.. هفكر إني أخدم الناس وأوصل لمستوى مسئولية يخليني أخدمهم سواء المسئولية دي إني أبقى نائبة في البرلمان، أو عضوة مجلس محلي أو عملت حزب أو وصلت للحكم... الفكرة في الآخر إن عندي برنامج بيهدف لمصلحة الناس والناس بتختارني

نفس الفكرة.. أنا لو مسيت بالليل لقيت نفسي عاجبني الأفكار الإسلامية والطرح الإسلامي ووجهات نظره وطريقته في الإصلاح عجباني، هحب أخدم أهلي وحبايبي والمجتمع والناس وأروح أعمل حزب بردو أوصل للحكم

إيه الفرق بين الإتنين بأه حد يقول لي؟ حرام ع التوجيه الرباني، حلال للبشري؟؟

ثانيا: طبعا محتاجين نفرق بين علاقتين بين السياسي (رجل السياسة) و الدين - هما نفسهم اللي ممكن اقولهم على أي فكر تاني
- العلاقة الأولى، إن حاكم إبن تييييييت يستغل الدين في الوصول للحكم عشان هو عايز السلطة والنفوذ والفلوس وحب يستغل الناس للدين
- العلاقة التانية: إن واحد يكون مؤمن بإن صلاح الدنيا في الدين، وبيحاول يطبق المنهج يما يرضي الله

نفس العلاقتين تنطبق على أي فكر تاني.. فاكرين في مسرحية محمد صبحي "تخاريف" لما طلع يقول، أنا قريت كتاب الإشتراكية لحد النقطة اللي بتقول إن الحكومة يكون في إيدها أدوات الإنتاج ، وقفل الكتاب على كده.. هو استغل الإشتراكية عشان يلم فلوس وبس

إزاي تقدر تمنع الإنحراف ده اللي بيخللي الحاكم يتهبل في دماغه، هو إنك كشعب تقدر تقومه في أي لحظة وتقدر تشيله لما تشوف إنه اتلحس..

واحد زي الخليفة أبو بكر الصديق قال في خطبته لما تولى الخلافة:

أَيُّها الناسُ فَإِني قد وُلِّيتُ عليكم ولست بخيركم فإِنْ أَحْسَنْتُ فَأَعِينُونِي وإِنْ أَسَأْتُ فَقَوِّمُوني। الصِدْقُ أمانةٌ والكَذِبُ خِيَانَةٌ . والضعيفُ فيكم قويٌّ عندي حتى أرجعَ إليه حقَّه إن شاء اللّه، والقويّ فيكم ضعيفٌ عندي حتى آخذَ الحقَّ منه إن شاء اللّه.

أخدت بالك قال ايه؟ وإن أسأت فقوموني

نرجع بأه لحسن البنا، فالحج وحيد حامد رضي الله عنه عايز يقنعني إن حسن البنا ممكن يقول جملة ساذجة وهبلة زي الدين يفسد السياسة والسياسة تفسد الدين؟ كلمة سقيمة ، وتعميم لا يصدر من واحد زي حسن البنا أبدا أبدا أبدا

الجملة دي مسمومة مسمومة مسمومة، والناس هترددها بهبل وسذاجة وتعميم.. ويمشوا ورا كلام الحكومة اللي عاملة قانون تمنع فيه الأحزاب اللي ليها مرجعية دينية، يعني حزب زي حزب الوسط مش راضيين يدولوا تصريح عشان الحزب واضح وصريح في إن مرجعيته مرجعية إسلامية.. يعني أنا ممكن أعمل حزب بيدعوا للحياة على الطريقة الليبرالية ومقدرش اعمل حزب بيدعوا للحياة على الطريقة الإسلامية.. ويقول لك دي حرية!

-----

*١ الذاريات ٥٦
*٢ الحديد ٢٥


----

ملحوظة: هو انا محتاجة أقول إني مش إخوان مسلمين، وإني بس بقول الحق لوجه الله، لا أرجو ثوابا إلا منه؟

اضراب عمال المحلة..التعتيم الاعلامي..ودورنا لو لينا دور

أكتر من عشرين ألف مصري.. منهم رجاله وستات وأطفال كمان.. عاملين اضراب

واخد بالك.. اضراب يضم عشرين ألف بني أدم. ولا بني أدم منهم له اي خلفية سياسة ولا نشاط سياسي..كلهم عمال.. عمال غزل المحلة

الاسعار النار.. المرتبات القليلة..الحقوق الضايعة، العشرين ألف بني ادم اتحركوا وقالوا لأ..احتشدوا وعملوا اضراب.. لأن مابقاش في لقمة عيش

خبر زي ده،المفروض يكون مانشيت في الصفحات الأولي للجرايد.. ويكون اول خبر في نشرات الاخبار.. ويكون حديث الساعة في برامج اللت والعجن

بس الحقيقة غير كده ..

الاكتر من كده.. ان ادارة المصنع بتعمل لعبة قذرة ضد العمال، وامن الدولة محاصر المكان دلوقتي.. ومش بعيد تحصل مجزرة ما، وتروح ارواح

مش هتف من بقي واقول "فال الله ولا فالي" لأن التعتيم الاعلامي ده معناه ايه؟؟ كام واحد في مصر يعرف موضوع اضراب عمال غزل المحلة؟؟ ازاي الدنيا مش مقلوبة

مصدر واحد لحد دلوقتي اللي بيجيب اخبار العمال.. وصور..وفيديوهات كمان، مدونة كريم البحيري واسمها عمال مصر

وبما ان ما باليد حيلة.. وما عنديش غير حتة صفحة على النت اللي فيها مليون مليون مليون صفحة زيها، بس انا هعمل اللي حاسة اني لازم اعمله.. هقولكوا ادخلوا على مدونة كريم البحيري واعرفوا الاخبار اول باول،تابعوها.. وقولوا للي حواليكو..
اخلقوا اعلام شعبي طالما، كل العصر اللى احنا فيه بكل امكانياته وبكل ادواته بيتأمر عشان نفضل مش عارفين حاجة

ادخلوا على مدونة كريم

ولو حد يقدر ينزل يتابع معاه ينزل... هاتوا خبر، صورة، فيديو، وانا وانت وكلنا ننشر الحاجات دي،نعرف الناس .. لما صورة يجبيها واحد تتنشر على ألف مدونة.. يشوفها ميت ألف بني ادم على الاقل، هنبقي عملنا حاجة والله..

النشر للجميع

حط الفيد بتاع مدونة عمال مصر في السايد بار عندك
هتقولي ازاي؟ سهل جدا
ادخل صفحة اللاي اوت بتاعتك
layout
هتلاقي طبعا نموذج للتصميم بتاع مدونتك، على ايدك اليمين اضغط
add a page element
هتظهر لك صفحة "بوب اب" دور فيها على عنصر اسمه
feed
اضغط على
add to blog
هتدخل على صفحة حط فيها الفيد بتاع مدونة عمال مصر وهو:

http://egyworkers.blogspot.com/feeds/posts/default

واضغط
continue
وبعدين هتظهر صفحة ،اضغط
save changes

وبكده هتظهر على مدونتك مساحة زي اللي ظاهرة عندي دي في اول السايد بار وفيها عناوين بتنزل اول بأول حسب كريم ما بينزل اخبار، تبقي فرصة الناس اللى هتدخل عندك تسمع وتعرف الموضوع

مش عايزين اعلام مبارك الريادي يفضل متحكم في ايه اللي نعرفه وايه اللى مانعرفوش... لازم نعرف ان في عمال دلوقتي بيدوروا على حقهم.. وان امن الدولة عايز يسكتهم... بطريقته

صور من مدونة عمال مصر

المنط التاريخي: تدوينة لاستنباط نوايا الشعب

مع الاعتذار لأخونا العزيز بن عبد العزيز وتدوينته : المناط التاريخي: دراسة لمعرفة مقاصد الشريعة- الكلمتين الجايين ملهومش علاقة بتدوينته. هو بيتكلم عن المناط التاريخي،وانا يحضرني الآن المنط التاريخي

والمنط التاريخي هو -لمن لا يعلم- بؤرة زمنية تحدث كلما وصل نظام حكم استبدادي إلى نهايته بدون تدخل -لا مباشر ولاغير مباشر من المحكومين -الشعب يعني- بمعنى أنها إرادة القدر التي تتدخل ليموت الحاكم او يمرض او تطارده الشائعات مع ان" صحته زي الفل"

ومن هنا نلاحظ ان نظام الحكم الاستبدادي هو في نظر الشعب مرتبط دائما بشخص الحاكم الفرد، فحياته هى استمرار للنظام وموته هو موت النظام، بالضبط مثل الفتوات

وهذه البؤرة -المنط التاريخي- يستغلها غالبا الشعب بثورة هى هياج فصامي (!!) ناتج عن اصابة الشعب بصدمة عصبية نتيجة احساسه ان الراجل هينزاح والهم هيروح، حاجة كده زي اللى يستقوي اول ما يحس ان سيده ضعف فجأة، زي بالظبط ماجدة في الفيلم اللى كانت بتقول فيه لذكي رستم "عمو عزيز" وبعدين اتجوزها وكده. ولما الحصان بتاعه هجم عليه وموته كانت بالنسبة لها منط تاريخي هايل انها تتخلص من البيت اللي حبسها يه وترجع تعيش حياتها.

لا نقول ان المنط فرصة مثالية، ولكنها فرصة الشعوب الخيبانة دائما. لذلك توقع البعض ان الخبر الغير مؤكد / الشائعة الشبة اكيدة عن مرض الرئيس وربما وفاته ستكون بمثابة الاشارة "لطلوع" الشعب فى الشارع - تتزعمه (وتتنازعه) قيادات ستظهر فجأة- مسقطا ستة وعشرين عاما من حكم العائلة المباركية، محاولين القضاء الفوري والعمياني -بكل خوف وهياج وعشوائية- على أنصار العائلة من وزراء موالين وجهات حكومية موالسة وكيانات صحفية واعلامية متواطئة وهراوات وأقسام شرطة ومعتقلات وغيرها من رموز الحكم المباركي

لن نخوض في سلبيات الحياة ما بعد المنط وكيف انها فى الغالب سترسي العطاء على حزب جديد او مجموعة افراد في ظل موجة عمياء الشاطر فيه اللى بيعرف يقول بؤين حلوين يظبطوا بيها دماغ الشعب ويحصلوا على موافقته ويقيمون دولتهم الجديدة على رفات نظام مات لوحده ودون تدخل منهم او من الشعب اللى بالضرورة سوف يعاني -اكتر من نظامه القديم- اللى هيعمله فيه نظامه الجديد..ويا ساقية دوري مايهمكيش من البقرة المتغمية

الا ان الملاحظ يا سادة، ان حتى القاعدة الشعوبية اللى هي المنط التاريخي لم يكن لها مفعول علينا فبرغم شعورنا الداخلي بأن شيئا ما "سيريس" يحدث لحاكمنا إلا اننا لم ننط بعد ولم نستغل البؤرة الزمنية ولم نحرك ساكنا، كأن على رؤوسنا العادلي، وكأن طاقاتنا استنفذت في الصبر ، ونجيب الطاقة منين والسكر غلي

ملحوظة: التدوينة تخاريف ما قبل الصيام، كل سنة وانتو طيبين