6/10/2006

لو بتمنى تصير جنونى


هل ترى؟.. إنها تعبر الطريق الآن بنفسها.. فلا تندهش إذا صرخت لو حاولت أن تمسك يدها لتقودها

الإحتمال الأول لوجود طرق شديد داخل المخ هو أنك مصاب بالتفكير.. الإحتمال الثانى أنك فقدت القدرة على التكيف

تدخر كلماتها للحظات أهم.. وتدخر مشاعرها لرجل أهم.. وتدخر ضحكتها لأنها اعتادت على ذلك

يتحدث عنها دائما. كان من الممكن أن تكون الأمور أفضل لو كان قد تحدث إليها

الوردة التى جفت بين صفحات الكتاب.. طوت الكلمات وانفرطت.. لكنها لا تهجر الكتاب حتى لو صلبت على الهامش العلوى

توقفت أحاديث الروح ولم تعد تحكى مع نفسها. هل يعنى هذا نضج ـ أم فقدان شهية؟

الله جميل.. الله عدل.. الله حق.. له الكبرياء والعزة، تكفينى كل لحظة أشعر برضاه حتى أرى وجهه الكريم

-------------
من كتاب "مذكرات كاثرين": " تصنع أمى أفضل عصير تفاح فى مقاطعة لنكولن، وهى تقسم أنه كذلك لأنها تُضمِن الخليط دائما عددا من ثمار التفاح الفاسدة، ورحت أسأل نفسى إن كان ذلك ينطبق على البشر - فهل العالم بحاجة إلى زمرة من البشر الفاسدين لصنع المزيج الأكثر حلاوة؟ وهل لهذا السبب يترك الله الشر فى العالم؟"ه
---
العنوان من أغنية لإليسا.. ملوش علاقة بالتدوينة بس كان لازم اسميها حاجة

19 comments:

  1. انا باحب الاغنية دي

    اضطريتا اسمع البومها اللي مليان ثمار فاسدة

    لحد ما عجبتني الاغنية دي


    ممكن الشر و القبح و الظلم يكونوا موجودين علشان مقاومتهم و تغييرهم خير و جمال و عدل

    و بضدها تتميز الاشياء

    ReplyDelete
  2. يااااااااا
    بقالى كتير ما اقرتش حاجات ليكى زى نصف التدوينة الاول قبل ما تاخد نطاقها السياسى شوية فى اخر التدوينة

    فى مثل بلدى بيقول مافيش حلاوة من غير نار
    فا لازم يكون فى شر عشان نقاومه ويعم الخير فى الاخر
    زى نظام الافلام العربى كدة
    :D
    طول الفيلم بيفرقوا بين البطل والبطلة ويزرعوا الشر وفى الاخر يفوز الخير على الشر ويتجوز البطل البطلة
    :D

    ReplyDelete
  3. من غير الناس الفاسدة ازاي هنحس بالرضا عن نفسنا؟

    ReplyDelete
  4. أحاول أن أتخيل طعم عصير تفاح صنع من ثمرات فاسدة.. وقليل من الثمرات الصالحة .
    كيف سيكون الحال..؟
    والتأثير ..؟؟
    أعتقد أنه طعم الحياة الآن .. (وجه عبوس فقري)

    ReplyDelete
  5. ممكن عنوان اجيب منه الكتاب دا علشان اقرا انا بدور عليه من زمان مع انة كان عندى بس منة لله اخوية الصغير قطعة وعمل منه طيارات ومراكب يا الله الله يسامحة

    ReplyDelete
  6. الوردة التى جفت بين صفحات الكتاب.. طوت الكلمات وانفرطت.. لكنها لا تهجر الكتاب حتى لو صلبت على الهامش العلوى
    استوقفتني كثيرا هذه الخاطرة
    هل تتحدثين الى نفسك
    ام عن نفسك
    احمد العزيزي

    ReplyDelete
  7. "الله جميل.. الله عدل.. الله حق.. له الكبرياء والعزة، تكفينى كل لحظة أشعر برضاه حتى أرى وجهه الكريم" .. و نعم بالله .. ربنا ما يحرمنا من رضاه و يعطينا جميعا لذة النظر الي وجهه الكريم ..

    بجد بجد بجد .. تدوينه و تجميعه أجمل من مجرد جميله .. صدقيني قريتها لحد دلوقتي 4 مرات و كل مره احس باحساس جديد .. احب اقولك "Welcome Back" يا جميل ..

    :))

    ReplyDelete
  8. 1- السيده التى اعتدى عليها الامن فى يوم التضامن مع القضاه
    2-ومن المحتمل الاحتمالين لو كنت معتقل فى احدى سجون مصر
    3-اما حرص او عدم معرفه اللحظه الاهم
    4-خائف من المواجهه
    5-بعد ان هجر العطر الزهره لم تغادر هى الكتاب _ هل غادر الحب من قلب صاحب الكتاب _
    6-ام زارها الزائر الاخير
    7-الله جل جلاله

    تدوينه رائعه

    ReplyDelete
  9. " فهل العالم بحاجة إلى زمرة من البشر الفاسدين لصنع المزيج الأكثر حلاوة؟ وهل لهذا السبب يترك الله الشر فى العالم؟"
    بقدر ما يرتفع جبل يهوى امامه وادى وبينهما تسرى المياة، السالب والموجب سر استمرار الحياة ، السالب والموجب من صنع الله

    جميل وجديد اللى انتى كاتباه دا ، من مدة ما قريتش حاجه تستغرقنى زى كدا

    ReplyDelete
  10. انا مكنتش مفكرة انكو هتتأثروا اوى كده بالتفاح ذى المزيج الأكثر حلاوة :))

    عمرو عزت
    انا كنت بسمعها وقت ما بكتب التدوينة دى.. هو فى كذا اغنية حلوة من الألبوم

    سويدى
    يااا مين قال ان الجزء بتاع التفاح سياسة؟؟ دى كلمة عجبتنى وبس.. حبيت اشاركوكم معايا فيها.. هى مش بتتكلم عن الشر يقدر ما بتتكلم عن حكمة وجوده.. استغفر الله العظيم، فى ناس تلوم الله -حاشا لله طبعا- على وجود الشر، مش بيستوعبوا ان فى حكمة ورا كده، مش بيتعبوا نفسهم حتى يفكروا فى الحكمة دى.. نيتهم مش خالصة يا بنى :))

    still breathing
    نورتى المدونة :) وعندك حق

    عبده باشا
    وجه عبوس فقرى!!! جديدة دى

    شباب اسكندرانى
    والنبى انا كنت سالفة الكتاب من دعاء صاحبتى، هسألها جابته منين :) كتاب رائع ومشوق وجميل وبينقلك لعالم كله خفة وتأمل وبراءة، لو اتحول ورقه لحاجة تانية مش هيليق عليه غير الطيارات والمراكب.. اخوك ذكى D:

    مصريون بلا حدود
    والنبى يا خويا بتحدث عن وردة فى كتاب مش اكتر

    رومانتيك روز
    آمين يا رب آمين.. :))

    يحيى
    شكرا، بس هعتبر ان دى تفسيراتك الخاصة.. فهمك انت للكلام :))

    أيوب
    جميل اننا متفقين على حكمة وجود السالب والموجب.. راضيين

    ReplyDelete
  11. مش عاجبني حوار اننا راضين بالسالب والموجب ده بيتهيالي السالب طول شويه عايزين نقابل الموجب بقي

    ReplyDelete
  12. الوردة التى جفت بين صفحات الكتاب.. طوت الكلمات وانفرطت.. لكنها لا تهجر الكتاب حتى لو صلبت على الهامش العلوى

    مفيش كلام يعبر عن حبي للجزء ده وصلتله و عيني وقفت عليه مش عايزه تتحرك ومش عارفه اقولك ايه توهتي الكلمات مني

    الله عليكي متالقه

    ReplyDelete
  13. المهم هى الأغنية التى تلح على النافوخ وتعبث بخلايا المخ, وهى الأغنية التى لابد أن يغنيها الجميع.
    اولا أحب أن أبدى إعجابى بمدونتك الرائعة, وثانيا أرجو أن أطمع أن تضيفى عنوان مدونتى الجديدة الوليدة إلى صفحتك المقروءة وعنوانها كالآتى
    لو مش هتحلم معايا مضطر أحلم بنفسى
    www.hawadeeet.blogspot.com

    ReplyDelete
  14. جامد اوى الجزء بتاع التفاح دة

    ReplyDelete
  15. مفيش إضافة ممكن تزود او توضح الحقيقة اكتر.. خير و شر، ظلم و عدل، سالب و موجب.. كول دول موجودين و متضادين و ده سر الحياة.. ايوه انا موافق.
    بس مش تفاح و تفاح. دي مش مسألة قدرية.. كلنا تفاح. و متنسوش ان التفاح الفاسد ده، كان تفاح طعمه يدوب القلب من اللذة قبل ميفسد!! لو سلمنا ان التفاح الفاسد فاسد و لازم يفضل فاسد يبقى دي اللحظة اللي فيها قلوبنا فسدت.
    ربنا خلق الشر و الخير بس مش الإنسان الفسد و التاني الكويس و إلا ملهاش لازمه الحياه و بالتالي مالهاش معنا رحمته و تبقى القصه الكبيره كولاها فالهوا.. حاشى لله..صدقوني، الحياة مش هتكون وحشه لو كل الناس بقوا كويسين. الفاسد هيموت بس اللي جاي طعمه جميل و لازم نعرف ان دورنا نساعد بعض نفضل على الشجره لغايت ما طعمنا يحلو و بعدان نساعد بعض ننزل منها قبل منفسد، عشان يمكن في يوم، في لحظة جوع، نقدر ننفع بلدنا و نسد جوعها.
    اما بالنسبة لطعم عصير التفاح لما يكون فيه حبات فاسده، فبلاش حد يجرّب لحسن يتسطل :)

    ReplyDelete
  16. نور
    قول يا رب

    نفرتيتى
    اكيد يا نفرتيتى، بس يمكن عصير التفاح اللى عملته مزيج بين الاتنين لضمان افضل مذاق.. فكرة حتمية وجود الشر فى حياتنا عشان التوازن، هيفضل فى خير وهيفضل فى شر وهيفضل فى صراع الى ان يرث الله الارض وما عليها

    بسبس
    ميرسى يا بسبس :)

    bleeding arrow
    مبروك المدونة الجديدة، وهحطها عندى حاضر.. ونحلم سوا

    ايمان
    المذكرات كلها جامدة يا ايمان.. كاثرين دى ما تخلكيش تسيبى الكتاب اللا لما تخلصيه.. جميييييييييييلة

    nuriennium
    انا موافقاك جدا، بس كل الحكاية اللى من ورا الكلام بتاع التفاح الحلو والتفاح الفاسد، مش اننا نقبل الشر ونعتبره طبيعى ومانحربهوش، بس هى وسيلة لتفسير وجوده من الاصل.. ليه اساسا فى شر، وليه موجود فى حياتنا.. بعد كده نقدر نحاربه واحنا اقويا :)
    بمعنى تانى، فى ناس رافضة وجود "الله" سبحانه وتعالى لمجرد انهم مش مدركين ازاى يكون موجود وازاى فى كل الشر والخراب والدمار ده

    ReplyDelete
  17. الحياة لا تخلو من الفاسدين ولكن يجب أن نلاحظ أن الفاسدين هم الذين أختاروا طريقهم وأغراهم كل منافع الفساد وثماره فلم تمنحه النفس الفاسدة التى تسكن بداخله فرصة ليعيد حساباته فقد قتل بسلاح الفساد كل نداء يعلو بالخير داخله وأعلن يحيا الفساد
    وما أكثر الحكام فى بلادنا الذين يتصفون بتلك الصفات
    www.krakeb.blogspot.com

    ReplyDelete
  18. الأخت زيزى لماذا يتم أحيانا مسح بعض التعليقات من المدونة؟
    حدث لى هذا فى تعليق على كيفية إنشاء مدونة
    تحياتى إليك
    أحمد التابعى مدونة كراكيب مصرية
    www.krakeb.blogspot.com

    ReplyDelete
  19. اولا انا عايزة اشكرك ع المدونة الرائعة دي و اللي عن طريقها اتعلمت يعني ايه تدوين و عملت اول مدونة و طمعت و عملت واحدة كمان ...يا ريت لو فاضية تزوريهم ...يهمني رايك

    و مرة تانية ....شكرا

    www.soosamafroosa.blogspot.com
    http://ghadaabdo.jeeran.com

    ReplyDelete