9/09/2006

كلنا ليلى: آدم وليلى.. وضمير المتكلم

متى كانت تلك اللحظة التى توقف فيها الرجل عن الانصات إلى المرأة؟
لابد أنها كانت لحظة دراماتيكية عالية تخللها شيئاُ من المطر البارد وبعضاُ من الرياح المثيرة للأتربة والصداع.. فظن أن كلامها هو الذى صدع رأسه، فتوقف عن الاستماع إليها إلى الأبد

لابد أن يكون هذا هو السبب.. مجرد إرتباط شرطى بين صوتها وبين لحظة مؤلمة خاضها.. وحسب نظرية بافلوف يمكن بالتدريب أن يتخلص من تأثير هذا الإرتباط الشرطى

ولأن لى أمل فى ذلك.. لازلت أتكلم، عسى أن يسمعنى جيداً فى يوم من الأيام

أما تأثير تلك اللحظة على حياة المرأة فكان شديد القوة.. لحظة واحدة حددت لها معالم أزمانها المتعاقبة، وشكلت حدود تلك العلاقة فأصبحت كالتى تصب الماء بين يديه المفتوحتين المتباعدتين الأصابع، فلا هو احتفظ بالماء ولا هى أيضاً

لعلّى أفشل فى رسم تلك الصورة تحديدا.. قد لا أجيد وصف تلك المرأة التى توقفت منذ زمن عن البوح. حسناً.. ربما أعود لتلك اللحظة سابقة الذكر لنلحظ هذا التحول المخيف فى قدرة المرأة على البوح، فبعد أن توقف هو عن الاستماع.. ظلت تتكلم وتتكلم كى يستمع وينصت، وربما بدأ فى التهرب منها فطاردته ورفعت صوتها، ولكنه كان لا يزال تحت تأثير اللحظة وياله من تأثير جعلها فى النهاية تتوقف عن المطاردة والكلام، ومر الوقت سريعا أو بطيئاُ لا يهم، ولكنها ما عادت تتكلم حتى نسيت كيف يكون الحوار وكيف تتمنطق فى حديثها وكيف تناقش وتبدى رأياُ

وللعجب أصبح هو ينتقد ذلك، يراها أقل شأنا منه لأنها ببساطة لا تحاوره، قد يكون قد فقد هذا الجزء من الذاكرة الخاص بلحظة الصداع، فلم تدلنا الحفريات على أى دليل يجعله يقر بوقوع تلك اللحظة من الأساس، بل أصبح يؤكد أن هذا طابع المرأة، وهكذا خلقت.. بلسان أهوج عقيم أفضل لحظاته ساكناُ تحت سقف الحنك ووراء أسنان هى قضبان

حتى إذا حاولت هى بين الحين والآخر أن تتكلم سخر منها، واسكتها
وإذا انتباتها رعشة حوار مفاجئة واصرت على المناقشة استعاد الصداع واتهمها بالجدال والعاطفة الزائدة ليغلق فى وجهها كل السبل

حتى كانت تلك الليلة التى خلت فيها إلى نفسها باكية.. تشك فى كل كلامها، وتفنده، وتعيده على مسامعها لربما يكون هو محقاً.. ظلت هكذا و أتى الصباح فوجدها تفرد كل الكلمات على أرضية الحجرة والجدران الأربعة، فنزع الكلام ومزقه، وتركها بلا بوح

ومنذ ذلك الحين، المرأة لا تبوح.. ولا تتكلم.. ولا تناقش

لم يتوقف الأمر عند ذلك، بل أصبحت تتفنن فى خلق لغة أخرى تكسر بها هذا الخرس، ولكنها لغة لا يفهمها الرجل بأى حال.. فأضحى التواصل أسطورة وما هو بالأمر المباح

هذه هى بين يديكم، لا تستطيع البوح، ولا تفهمون إشاراتها الصماء، رغم أنهم اخترعوا علاجا للصداع رخيص الثمن وفعال


تعرف مين ليلى؟

31 comments:

  1. الي الامام يا ليلي
    سعيدة بانطلاقتك
    نعم تكلمي و عبري و انشري رزاز الغضب المتراكم في قلبك من ادم
    لعله يصل الي قلبه فيؤثر فيه
    و تنبت له مشاعر قد ذبلت
    نعم كلنا ليلي

    ReplyDelete
  2. متهيألي إن الإنصات ده فن ممكن الواحد يتعلمه.. بس لو أقنع نفسه إن الإنصات فترة راحة ولحظة مهادنة مع الأصوات العالية وبدون ما يكون عند كل واحد فكرة مسبقة لحد ما نوصل لحل يرضي جميع الأطراف
    بس اللي يتعلم يا زيزي
    (:

    ReplyDelete
  3. لم نعد نسمع لأننا....؟
    ربما لأننا نفهم ما تريدين ان تقوليه! فلا تقللي من قدرتنا على قراءة افكارك ، او لان الكلام مكرر ، او كثير التحفظ لدرجة الملل ، او لاننا مللنا الصوت الخافت الخاضع ، تحركي ..ازعجيني ..مللت جمودك ..فمتى يتكلم ذاك الصنم 0 وماذا يقول ..ايقول اكسروني ام يقول اعبدوني 0

    ReplyDelete
  4. يازيزي عايزة الراجل يسمع الست
    معقول ؟؟؟؟
    ولما هو هيسمعها أمال مين اللي هيحل الكلمات المتقاطعة
    و مين اللي هيتفرج على ماتش الكورة لمدة ساعتين و بعديه يقعد تلات ساعات يتفرج على أحمد شوبير و هو بيعلق على الماتش على دريم
    و بعد كدة يروح ينام و هو مرتاح البال على نتيجة المبارة
    هما الرجالة فاضيينلنا و الا ايه؟؟

    ReplyDelete
  5. يا ليلى / زيزي
    اسمحيلي ، أنا طريقة الكتابة نفسها أخذتني أكتر كمان من كونها معبرة عن ليلى

    حلوة جدا المقاربة الخيالية ل ليلى الأولى و بدايات فقدان التواصل

    بس عاوزة أقول
    ان ماحدش هايساعد ليلى غير نفسها
    استعادة البوح مشكلتها الخاصة التي لا و لن يهتم بها الرجل

    لكنها تهتم ... لتستعيد نفسها ، لتستعيد روحها و قوتها

    لتعرف بعد ذلك ما الذي يمكنها من استعادة التواصل مرة أخرى بالرجل من ذلك البوح الخاص بها

    المرأة أكثر صدقا مع ذاتها ، و عليها أن تظل كذلك ، و على الرجل أن ينصت قليلا ، عله يتعلم

    ReplyDelete
  6. حلو اوي اي ليلي .. ليلي بتبدأ تنطق كلام و مع الوقت كل اليلاوات هيقولوا ولما الصوت يعلي و يعلي هيتسمع لان سدادات الودان مش هتكون مجديه ..

    ReplyDelete
  7. قد يكون قد فقد هذا الجزء من الذاكرة الخاص بلحظة الصداع، فلم تدلنا الحفريات على أى دليل يجعله يقر بوقوع تلك اللحظة من الأساس، بل أصبح يؤكد أن هذا طابع المرأة، وهكذا خلقت.. بلسان أهوج عقيم أفضل لحظاته ساكناُ تحت سقف الحنك ووراء أسنان هى قضبان
    ...............

    رائع يا زيزي
    فعلا اتقنا الصمت و اتقنا لغة خاصة لا تنطلق إلا بيننا كبنات
    وأحيانا استعملنا الصمت كأداة للمقاومة أو لتنبيه من يفهم
    لكن جاء وقت الكلام

    ReplyDelete
  8. طيب نبتدي الكلام بالصلاة على خير الخلق عشان الشيطان ميدخلش بينا
    صلى الله عليك يا حبيبي يا رسول الله
    هتكلم بالمصري مش بالفصحى عشان محدش يخاف
    بداية انا شامم ريحة مش كويسه مش هقول ريحة ايه عشان المتصيدين ميمسكوش فيها
    مبدئيا قريت معظم الكلام والمقالات اللي كتيت في موضوع انا ليلى
    كلها مستخدمة الفاظ وتعابير مش موجوده في ثقافتنا العربية اولها الكلمه البغيضه اللي ادخلها جورج بوبر وامثاله وهي كلمه ذكوري
    بالاضافه لجمل مقيته جدا كلها ترمي لنفس الهدف اللي هو البنت مظلومة ومقهورة
    مفكرتوش في الراجل اللي يبقول لمراته متشتغلش بيكون قايلها كده عشان ميجبلهاش البهدلة
    راجل بيرضى لنفسه البهدلة ولاة ان راجل (مدير او ما شايه يدايقها بكلمه
    الراجل ده بيبص لمراته فعلا على انها ملكه متوجة على عرش النساء وبيكون حاسس ان الشغل ده مش ليها
    هو بس اللي يتبهدل لكن هي لا
    اشتغلت فترة في شركة كان الراجل بيبقل الذل والله وكان بيشتغل 5 ساعات بالليل مقابل 200 جنيه وكان بيرفض دايما ان مراته تشتغل
    لكن طبعا المقالات اللي تناولت الموضوع ده تناولت نموذج الرجل السيء حاد الطباع كعادة كل المقالات اللي بتتناول الموضوع ده
    عن نفسي بشكل شخصي انا لو طلبت من من مراتي متشتغلش مش لاني بقلل منها اطلاقا انا عندي استعداد اشتغل اليوم كله ولا اني اشوف مراتي مدايقه
    انا وامثالي ذلك الرجل الذي تتحدثون عنه
    لكن انا بقدر المراه جدا والموضوع مش تشتغل او متشتغلش الموضوع ان مهمة المراه الاولى في الحياة بيتها ده موضوع مفروغ منه طبعا هتقولولي ده بعد ما تتجوز طيب قبل الجواز؟
    قبل الجواز بتكون بتشتغل
    ما عيلنا طبعا الكلام ده هيقابله سيل من الاتهامات
    لكن والله لو حد قرا القران هو موضح جدا راي الدين في عمل المراة اللي انا مش ضده مبدئيا
    قصة سيدنا موسى
    ما خطبكما ؟
    البنتين مكانوش واقفين بيزاجموا الرجاله
    كانوا واخدين جنب\
    ولما سالهم ما خطبكما
    قالو لا نسقى حتى يصدر الرعاء .... يعني مش بنزاحم الرجاله
    والسبب؟ ابونا شيخ كبير
    يعني لولا ان ابوهم شيخ كبير مكنوش هما طلعوا واشتغلوا لان الشغل مهمة الرجاله
    يبقى عمل المراة مش حرام لما يكون في داعي ايا بقا كان الداعي
    بس مفيش واحده تقول الداعي هو تحقيق ذاتي وتعمل بيتها
    ده بخصوص العمل اللي انتي اتكلمتي عليه يا سوسة
    الفكر اللي انتوا بتقولوه ده يا جماعه بيبتدي بكده وبينتهي بنوال سعداوي واقبال بركة
    على فكرة انا تقريبا قريت اغلب كتب نوال سعداوي
    والله معظم الكلام اللي اتقال مكتوب بنفس طريقة نوال سعداوي
    نفس طريقة التفكير بتبدي كده وفي النص بنتحايل على الدين وفي الاخر نتطاول على الدين
    مش بقلكم انا شامم ريحة وحشه
    وبما انكم كلكم زي اخواتي فانا بنصحكم بلاش تمشوا على خطى هدى شعراوي ونبويه موسى
    مش ملاحظين ان جوازات زمان كانت سعيده ودلوقتي معدلات الطلاق زادت جدا
    احد اهم الاسباب ان البنت عايزة تاخد اكتر من حقوقها ومش عايزة تادي واجباتها
    بجد والله انا خايف عليكم
    بس الطريقة اللي بتفكروا بيها غلط
    ولو مليتوا بيها نفوسكم هتخسروا كتير اوي
    ذكوري؟ يا خبر
    يلا كله على الله

    ReplyDelete
  9. زيزى أسلوبك حقا رائع و معبر

    أما آدم فهو لم يعد بالفعل يسمع لكلام حواء لأنه يشك فى قدرتها على التفكير
    نظرا لعادات خاطئة توارثها و إن أراد آدم تصحيح رؤيته للمرأة فعليه أن يبحث فى الكتاب و السنة
    فلينظر آدم كيف كان رسولنا محمد صلى الله عليه و سلم يعامل زوجاته رضى الله عنهن و كيف كان يستمع اليهن و كثيرا ايضا ما كان يعمل برأيهن فى أمور عظيمة

    ReplyDelete
  10. As this campaign is spreading, I would recommend if you all add common tag to technorati like LialaDay for example.

    ReplyDelete
  11. بنت مصرية
    البوست رائع..أهنيكى

    عبدالله مفتاح

    عليه أفضل الصلاة و السلام

    انت بتقول ان الراجل مابيخليش مراته تشتغل عشان خاطر خايف عليها و كل الكلام ده..يعنى هى بتبقى عايزة تشتغل و هو يمنعها عشان خاطرها هى..يعنى هو عارف مصلحتها أكتر منها..ده نفس منطق انهم قاصرات عقل و دين..ان الراجل بيفهم عنها و انها مش عارفة مصلحتها..ده منتهى الاهانة..هو قاعد يفكرلها و يملى عليها تصرفاتها و المفروض تبقى سعيدة و راضية..

    و بعدين يعنى ايه الشغل مش للستات؟؟ده على أى أساس يعنى..على أساس انها مابتفهمش و لا ايه؟؟؟..و طب و الستات اللى ناجحين فى شغلهم دلوقتى دول يبقوا ايه؟؟

    المثل اللى ذكرته عن سيدنا موسى و بنات الشيخ مش شايفة ليه علاقة بفكرة الشغل..هو انهم يجيبوا ميه ده أسمه شغل؟؟؟ مش فاهمة المنطق..اللى بنات الشيخ كانوا بيععملوه زى كده الستات عندنا لما ينزلوا السوق و يشتروا حاجات الأكل..ليه بقى الرجالة مايمنعوش الستات من النزول للسوق و ينزلوا هما؟؟؟ليه مابيخافوش عليها فى البيت من تعب الحمل و الولادة و التنطيف و الطبيخ و مذاكرة العيال و المحافظة على جمالها و رشاقتها عشان تفضل ماليه عينه و و و..ليه دايما التركيز على الخوف على كرامتها بره لكن جوه بيهينها بتصرفاته و بروده ناحيتها و باهماله ليها..أقرا البوست السابق لرومانتيك روز..أقراه بامعان و حاول تفهم مشكلة ليلى من وجهة
    نظرها مش من وجهة نظرك انت

    ReplyDelete
  12. كلبوزة لكن سمباتيك
    ليلى ليلى.. اووووه اووووه
    ليلى ليلى.. اووووه اووووه
    :D
    ----------

    دعاء
    هى المشكلة فى حكاية الافكار المسبقة دى
    يمكن يكون ادم حاول يسمع ليلى مرة، بس بيرجع ويقنع نفسه انها مهما اتكلمت فكلامها اجوف ولن يرقى لكلماته العصماء
    ويمكن تكون ليلى كمان عندها فكرة مسبقة ان ادم مش هيمسع لها.. فبتسكت وتحط فى قلبها
    --------------

    احمد
    اهى ليلى ابتدت تتكلم فعلا، وليلات كتير اوى كتبوا وعلو صوتهم.. يا ترى ممكن ادم يسمع بعقلانية ويفكر المرة دى
    -----------------

    تاتى
    ههههههههههههههههههه
    موتينى م الضحك
    طيب حتى يسمعونا بين الشوطين
    ----------------

    شغف
    بالظبط يا شغف
    دا اللى انا اتعملته اول ما ابتدينا نشتغل فى موضوع ليلى ونعمل الجروب ونجمع البنات وكل واحدة تقول اللى عندها واكتشفنا اننا احنا اللى محتاجين نبوح ونقول .. الحل بإيدينا وعلى رأى لست أدرى.. اكتشفنا ان احنا قدها وقدود
    ----------------

    الغريب
    سمع هسسسسس
    :)
    -------------

    بسمة
    لا خلاص راحت على سدادات الودان.. يا اما يحصل تواصل وتفاهم ونخلق حوار، يا اما التصدعات اللى فى حياتنا دى هتستمر وهنستمر فى انجاب اجيال مكبوتة ومحبطة وصامتة
    ودا مش حلو ع الصحة العامة للأسرة والطفل
    ههههههههههههه
    ------------

    الغريب
    جميل اوى
    بس احنا لسه بنقول يا هادى
    ------------

    ارابيسك
    وانا بكتب التدوينة دى.. كنت صريحة مع نفسى لدرجة انى لما حبيت امسك الموضوع من الاول واوصل واحدة واحدة لسبب فقدان التواصل.. اكتشفت ان ادم مش بس بيسمع، لا دى ليلى كمان توقفت عن البوح.. وتوقفت عن الصراحة وابتدت يبقى ليها لغتها الخاصة
    بقت عقدة بشنيطة يعنى
    انا فوجئت بكده وانا بكتب بصراحة
    ---------------

    عبدالله مفتاح
    اللهم صلى عليك يا نبى
    اللهم صلى عليه عدد البنات من اول حواء
    وصلى عليه قد ما اشتكت البنات يا رب لك، وقد ما الهمتهم الصبر
    وصلى عليه قد حبه لابنته فاطمة وحب فاطمة ليه

    الشيطان مش هيدخل بينا ابدا لو واجهنا مشاكلنا بنفسنا من غير ما نستنى حد من بره يحلها ونرجع نقول العلمانية والبتاع
    اعتراضك على كلمات او مصطلحات تم استخدامها فى يوم ليلى لمجرد ان سبق استخدامها من قبل شخصيات انت بتعترض على توجهاتهم مجرد اعتراض ادبى ، مش المفروض ابدا يكون عائق فى مناقشة المشاكل الحقيقيةاحنا ممكن نتكلم من النهاردة لسنة قدام على ايه المصطلحات اللى تستخدم وايه لأ
    انا بالنسبة لى حسمت موضوع المصطلحات دا من زمان
    المصطلح مش بيهمنى قد ما يهمنى تعريفه
    عشان كده قبل اى مناقشة لازم نوضح التعريفات اللى نقصدها عشان مانبقاش بنتكلم لغات مختلفة
    انما مش معقول نقف عند المصطلحات وننسى القضية

    موضوع شغل المرأة ده اعتقد ان "انى راحة" ردت بشكل عقلانى جدا وقالت اللى فى قلبى عنه"

    وعموما يا سيدى ما تزعلش
    بنات كتير دلوقتى بتفضل انها تقعد فى البيت وماتشتغلش، بس النكتة باه ان العريس بيبقى عايزه امرأة عامله
    وشماعته هى الحياة الصعبة دلوقتى
    يعنى دايما عندكو شماعة
    عايزة ماتشتغلش.. يبقى شماعتك انك خايف على بهدلتها
    عايزها تشتغل. .يبقى شماعتك هى المعيشة الصعبة

    عموما يا ريت تقرا التدوينة اللى كتبتها كلبوزة لكن سمباتيك عن جارتها.. عشان تعرف ان فى بيوت مفتوحة بس بشغل المرأة
    ودى بيوت كتير اوى.. ماينفعش معاها تجيب شماعات ولا دولايب

    -------------

    ابيتاف
    ميرسى يا ابى، ان شاء الله هما هيستهدوا بالله كده ويسمعوا :)
    -----------

    رانية
    انتى الى صدقتى
    لو حد فعلا واخد سيدنا محمد صلى الله عليه وسلم مرجعية ليه فى تعامله مع المرأة كانت فرقت كتييييييير اوى فى حياتنا
    اللهم صلى عليك يا خير خلق الله
    ------------------

    اخناتون2
    فكرة كوول.. انا هعرضها على مجلس القيادة وناخد قرار
    ----------------

    انى راحلة
    شكرا يا جميل على ردك الرائع، انا موافقكى فى كل كلمة

    ReplyDelete
  13. كلنا مصريين يا ليلى .. عايز مبرر واحد يخلينا نقتل روح جماعيه رائعه موجوده بين المدونين و مش موجوده بره في الحياه الحقيقيه

    كل واحد مننا عنده مشاكله .. لو حبينا نعمل زيكم هنعمل كلنا أطباء .. كلنا طلاب .. كلنا مسلمون .. و مش هنخلص .. هنوصل في النهايه لكم كبير من التكتلات .. و نقتل روح جماعيه جميله كانت اكبر مشجع لينا على الكتابه !!ده رأي ..واللهم لا اعتراض

    ReplyDelete
  14. آه يا ليلى

    فعلا لقد اعتادت الصمت بعد ان نزع منها آدم كل الكلمات

    آدم فقد القدرة على التواصل واصبح لا يسمع ولا يريد ان يسمع الا نفسه

    ربما يجب عليها الان ان تتكلم ليتذكر ان لها كيان ووجود

    ReplyDelete
  15. اغيب تلات ايام ارجع الاقي ثورة نسائية واللا ايه ؟
    :)
    فكرة كويسة والله
    مش شرط كل المواضيع اللي تشارك تكون معبرة عن ناس كثيرة
    كفاية انها تكون معبرة عن الشخص " البنت" اللي كتبتها
    لان الهدف هو " البوح" زي مفهمت
    ومن وراء البوح ياتي اشياء كثيرة

    بالنسبة لموضوع انصات الرجل للمراة والعكس
    اعتقد ان المشكلة متبادلة
    وان كانت في المجتمعات اللي بنعيش فيها
    الراجل ممكن يكون بيستهبل اكثر بكثير ساعات
    وده مش عشان حد يقوللي انت حتعملي فيها نصير النساء وعيشة في الفيشة

    اطلاقا

    مثلا يعني
    في المجتمعات الغربية
    الست بقت بلطجية
    بدا الموضوع باعطاء المراة حقوقها
    وده طبعا صح
    ثم بدا الموضوع يسحب علي غويط قوي
    لدرجة ان المراة يتم تصديقها اكثر من الرجل
    بمجرد متقول اي حاجة
    لمجرد ان الست قالت

    وده برضك تهجيص
    بس عشان نكون صريحين مع نفسينا

    لو الراجل والست بيحاولوا
    فيه نتيجة
    وان كانت الامثلة للاسف مش كثيرة
    بس اللي بيحاول باخلاص
    واللي بيقول اصبر واحاول والاجر علي الله
    بيجيب نتيجة


    الاخ عبد الله مفتاح
    مع احترامي الشديد لوجهة نظرك
    انا شايف انك مرعوب

    وده طبيعي في مجتمع مبني علي فكرة سد الذرائع والحق ضايع
    المهم درء الفتنة والانسان ياتي فيما بعد
    محدش هنا لا عاوز يخلي الست تنحل او تتخلل او تتنيل
    الفكرة ببساطة
    احنا خايفين ليه؟
    متسيب البنات والستات يتكلموا
    واسمع يا سيدي
    مش شرط توافق علي كل حاجة
    وهما الستات يعني منزهين ومعصومين من الله؟

    بس بدل متحذر من خطي الستات اللي انت ضربتهم امثلة للانحلال
    اقدر اقوللك ان نفس الناس دي انت بالتاكيد مقرتش عنهم كثير من بقهم هما مش من بق الناس اللي بتتكلم عنهم في الدروس والخطب والهم الازرق ده

    من الاخر يعني
    كل الناس دي ممكن تكون قالت او عملت حاجات صح او غلط

    بس النقطة انت قريت ليهم هما؟
    من بقهم هما؟
    تعرف هما عملوا ايه من غير متكون قريت لحد تاني شغال طحن فيهم ؟


    الست بستتهبل ساعات طبعا :)
    وايه استهبالها ينقط

    بس سبحان الله
    الراجل مهبب الدنيا هو راخر

    شفت ديكتاتورة ابدا يا عم الحاج ؟
    :)
    معظهم رجالة بعيد عنك
    ربنا يبعد عن الظلم والظالمين
    رجالا ونساءا
    واطفالا برضك
    :)

    امين

    ReplyDelete
  16. طريقتك معبرة وجميلة جدا ليلى

    لن اتحدث عن الاستثناءات التى تترك لليلى حرية البوح .. لان الغالب الاعم يتحدث نفس اللغة

    اتمنى ان يصل الاثنين الى نقطة تلاقى قريبا

    ReplyDelete
  17. تخيلي انك جيتي علي الوجع فعلاً الراجل بيرفض يسمع للمرأة وبيعتبرها لا ترتقي لعقليته الفذة
    بس انتي عبرتي بطريقة حلوة اوي وانا سعيدة ان فيه شباب هنا من غير مايهاجموا الحملة دي
    إلي الامام ياليلي

    ReplyDelete
  18. ملحوظة كلبوظة
    :)


    احببت ان انوه ايضا
    اني مع تاييدي لفكرة كلنا ليلي

    واري انها فكرة جيدة للبوح والمصارحة
    اريد ان اركز علي نقطتين

    منها ان كلنا ليلي قد تكون عبارة غير معبرة عن كل النساء فربما هناك من النساء من لا يريد ان يكون ليلي اصلا
    ويريد ان يكون شيئا اخر

    وده طبعا مبني علي تعريف ليلي حسب اللي بداوا الحملة دي

    وانا متاكد ان عبلة ممكن تزعل :)
    لانكم اخترتم اسمها مش اسم ليلي
    واللا ايه
    ؟؟؟؟

    ثانيا

    انا شايف ان ظلم المراة للمراة
    وهو مصية بكل المقاييس
    لا يلتفت اليه احد

    اتمني ان يكون كلنا ليلي
    منطقة تشابك افكار
    وليست مجرد فرض فكرة
    ان المراة مدفونة تحت الرمال
    والرجل يضع قدمه فوق راسها
    ليس انكارا لواقع يحدث فيه بالفعل ظلم الرجل للمراة
    ولكن ايضا ليكون " كلنا ليلي" مع الاعتذار لعبلة ومني وهياتم :)
    يكون تعبير عن واقع حقيقي لاي امراة
    امراة تشكو من ظلم الرجل
    او تشكو من ظلم المراة
    او تعبر فقط عن احلامها
    او تتحدي او حتي تنكر علي سائر " الليلات " انهن اصبحن كلهن " ليلي" لانها لا تريد ان تكون منهن

    او تلك التي ظلمت رجلا مرة وتعترف

    خلوا كلنا ليلي
    انسانية بشكلها الاوسع
    يحتوي النساء
    كلهن
    مطلقات ارامل زوجات امهات
    زوجات في علاقة تعدد زوجات
    عازبات
    الكل

    ReplyDelete
  19. على راي تاتي و يسمع ليه مهو عنده حاجات اهم بكتير يعملها

    مشكلة الرجل انه اتعود ان زوجته مواطنه من الدرجه التانيه ملهاش راي مهم مهما اتعلمت و مهما اتثقفت ووصلت لاعلى المناصب فهي برضه حتة ست لا راحت ولا جت متستاهلش انه يضيع وقته الثمين في الكلام معاها و عمرها ما هتفهم طبيغة شغله ولا مشاكله حتى لو كانت بتشتغل في نفس المجال

    سبحان الله


    الاستاذ عبدالله مفتاح
    اللهم صلي وسلم وبارك عليك يا نبي

    انا مش هرد غير على جزء واحد من الكلام بقى هو الراجل بيرفض شغل مراته عشان خايف عليها و عايز يكرمها ولا عشان تقعد في البيت تخدم فيه و تشتغله خدامه بدون اجر و في الاخر يقول عليها جاهله و مبتفهمش عشان مبتشتغلش؟؟

    ReplyDelete
  20. الجميلة زيزى او ليلى جديدة مناضلة
    ارى ليلات كثيرات تحدثن واسهبن وافضن عن ما فى نفوسهن والحمد لله كلهن اجدن ولمسن كل على اختلاف ما فى داخل كل ليلى
    وصببنا غضبنا على انفسنا وعلى ادم
    ادم الاب الذى زرع المخاوف مع ليلى الام فى ليلى البنت
    الى ان ليلى الام الان سوف تتغير ستكون ام مختلفة تربى ليلى على الدين وعلى القوة لم نختلف فى الدين ولم نطالب بالخروج عنه لمجرد ان نطالب بان يكون لنا كيان يحترم من قبل ادم

    ليلى الابنة سوف تبقى قوية سوف لا تكون سلعة تباع و تشترى على يد ادم الاب وادم الزوج
    ليلى الزوجة الناضجة المثقفة لنفسها اولا وليس لارضاء غرور ادم

    ليلى سوف تأخذ منظور اخر غاضب جديد ولادم ان يختار اما ان يكون مع ليلى فى نفس المركب وينجوا جميعا من الهلاك او يبقى حيث يشاء وسوف تنهض ليلى وابدا لن تعود للوراء

    زيزى الجميلة المعبرة نتشرف الان ونفخر اننا سوف نكون ليلى مثلك ومثل كل ليلى ناهضة ومصممة على تحرير نفسها من ذل وعبودية ادم
    تحياتى

    ReplyDelete
  21. سوسة
    هههههههههههههه ههههههههههههههههه هههههههههههههه هههههههههههههه
    -----------------

    زانجولا
    مين قال ان ده يقتل روح الجماعة؟ ليه فكرت ان دا اقصاء للرجال؟ حنا بنعمل كده عشان نتواصل معاكو نسمعكوا مشاكلنا
    الانتماء لشىء معين لا يعنى رفض الانتماء لشىء اخر، يعنى انا بنت تبع كلنا ليلى ، ومصرية تبع المصريين، ومسلمة تبع المسلمين.. ومتعلمة تبع المتعلمين، ومش بشتغل تبع البطاله :)... البنى ادم "متعدد الانتماءات"

    ------------------

    حلم
    عشان كده كتبت البوست ده بالذات وعن الموضوع ده بالذات.. تمهيد لكل الكلام اللى بتقوله البنات
    -------------

    بن عبدالعزيز

    فينك يا عم :) اه والنبى زى حضرتك ما فهمت كده، دا مجرد بوح مش ثورة ولا حركة ولا بتاع


    احنا خايفين ليه؟
    متسيب البنات والستات يتكلموا
    واسمع يا سيدي
    مش شرط توافق علي كل حاجة
    وهما الستات يعني منزهين ومعصومين من الله؟


    انا عارفة ، والنبى قوللهم

    انا موافقة على كل كلامك طبعا، والستات اكيد بيستهبلوا احيانا، لانهم مش معصومين، لكن دا مش معناه ان معندهمش مشاكل ومش من حقهم يتكلماو فيها

    هى فكرة كلنا ليلى جت من ان كل بنت غالبا بتعانى ضغط ما من المجتمع بصفتها بنت.. ممكن اللى اتعرض له انا غير اللى تتعرض له غيرى، ممكن نخلف اساس على كون الضغط ده ناتج عن كونها بنت وللا انتماء اخر.. يعنى الموضوع محتاج نتناقش كلنا مع بعضينا

    همتك معانا بس وناقشنا.. مدونات كتير اوى كتبت يا عم الحج.. ناقشهن كلهن بأه
    :D
    ----------------

    نيرفانا
    ان شاء الله هنتابع باتجاه الحلم.. الشمعة اتولدت خلاص :)

    ------------

    توتا
    ميرسى يا توتا :) ربنا يكرمك يا جميل
    ----------

    ReplyDelete
  22. سلام عليكم :))
    انتي مفهمتيش قصدي
    اقرئي تدوينتي وانت تفهميني

    وشكرا

    بالمناسبه ؟؟ هوه انتي صاحبه فكره كلنا ليلي دي ؟؟

    ReplyDelete
  23. ناقشهن كلهن يا زينب؟
    :)

    انا قريت بتاع 5 او ست تدوينات لاشخاص مختلفين

    مش لازم اعلق
    بس انا بس مبسوط انكم بتكتبوا

    مش شرط اناقش حد

    اكتبوا

    ReplyDelete
  24. آآآآآآآآآآآآه

    عارفه
    عمرك ما تخلي حد يسكتك و لا يغيرك

    الحياه أقصر من اننا ننهزم و نعيش حزن خلقه لينا غيرنا

    نعيش زي ما احنا
    و في النهايه حنرحل

    يبقى اللي مش عاجبه
    مش مهم

    ReplyDelete
  25. لازلت لا ادري مما الفزع؟؟
    في الحقيقة موقف بعض الرجال يسبب لي التهاب في الامعاء ومغص وجميع امراض
    السل والرئة

    انا في عائلتي 3 نساء
    اختان وام
    اتريدون ان تعرفوا ماذا صنع الرجل باسرتي؟

    للاسف لا استطيع ان اسرد الكثير حفاظا علي الخصوصيات

    لكن اسرتي الصغيرة
    لم تكن الوحيدة

    قل ان اجد رجلا ملتزما يعامل نساء اسرته بانسانية وبدون استعلاء ذكوري قبيح

    سواء اب او اخ او زوج

    لحظة واحدة كدة
    ابص علي نفسي لحسن حد يفتكر اني عملت عملية تغيير جنس واللا حاجة
    الحمد لله لسة في شنب ولحية
    وجسمي كله عضلات
    لسة ذكر يعني

    النساء يعاملون معاملة درجة ثانية وثالثة ورابعة في مجتمعاتنا
    هذه حقيقة
    متنفعهاش عمليات تجميل اعلامية
    و لا تغطيها محاولات رجالية للانكار
    المسالة في الحضيض بصراحة

    في المجتمعات الغربية
    المراة اصبحت وحش كاسر وجعلت من نفسها سلعة لمن يدفع اكثر
    وهذا رايي الشخصي علي كل حال

    في مجتمعات شرقية المراة مظلومة
    ومجتمعات غربية المراة اصبحت ممكن تتهم الرجل باي شئ والرجل مسكين لايدري ماذا يصنع

    والغريب كل لما المرأة تفتح بقها
    ينزل علينا فقه سد الذرائع زي غضب الله عشان يسكت الشكائين

    انا لو عاوز اكتب عن تناقضات المجتمع في تفريقه المزري بين الرجل والمرأة
    وكيف ان بعض المتدينين يستخدمون قال الله وقال الرسول لسحق المرأة
    لرايتم العجب العجاب

    وبالرغم من هذا لم انكر ان المراة تظلم المرأة ايضا
    واحيانا اقسي من الرجل
    والامثلة كثيرة

    لعلني افرد موضوع في هذه القضية ان شاء الله
    بس ان حد ييجي يرش مية عشان الكل يكش ويخش بيته تاني

    فاقول له تمهل
    دع البشر تتكلم بحريتها
    دعهم يقولون ما يشعرون به
    واستمع ياشيخ
    استمع
    استمع
    لاول مرة في حياتك
    اسمع بدون احكام مسبقة

    اسمع للناس اللي بتتكلم
    ده نبي الله كان ارحم يا ناس

    ReplyDelete
  26. اصحوا ياجماعة حملة كلنا ليلى مشبوهة ضد الدين والوطن وضدالمراة نفسها,وفيهاشئى خفى بيحاولوا يشغلوكم
    بموضوعات فرعية يامتنورين,ياواعين
    المراةهى ام الرجل واخته وزوجته وبنته فهل هناك احب للرجل احب من هؤلاء
    انسوا الموضوع تماما لانه مدسوس ومحاولة لايجاد الخلافات واللى مش مصدق يقابلنى على الرصيف

    ReplyDelete
  27. متى كانت تلك اللحظة التى توقف فيها الرجل عن الانصات إلى المرأة؟

    متهيألي من زمان قوي ... لدرجة اني مش فاكرة تقريبا أمتي أخر مره سمع لها و فكر ف كلامها .. و حتي ف الزمن المعاصر لما بيعمل اللي هي عايزاه بيكون بسبب من اتنين .. اما انه يشتري دماغه من الزن و القمص و مشتقاتهم .. أو علشان المره اللي وراها لما تكلمه يقولها مش انا لسه ممشي كلامك ؟؟ انتي عايزه تبقي الريس ؟؟ و ياخد عليها واحده بتعود الي حالة صمتها من جديد ..

    لكي الله يا ليلي ..

    ReplyDelete
  28. السلام عليكم و رحمة الله وبركاته
    الحقيقة ان لى راى فى وضع المراة فى مجتمعنا خاصة ارجو من الله ان يمنحنى الوقت فيما بعد لاوضحه لكى فى مدونتى واسعد باستضافتك فيها, لافتح بابا من الحوار بيننا حيث ان هذا الموضوع يشغلنى, والى ذلك الحين اقول لكى ان المراة او ليلى ان شئتى هى ضحية العادات والتقاليد الجاهلة المتوارثة, كما انها ىانساقت وراء دعاوى كاذبة تدعى المساواة افضت بها الى وضع اسوا او لنقل انه زاد الطين بلة
    والى ذلك الحين اسال الله لى لكى وللمسلمين الهداية والسداد آمين
    والسلام عليكم و رحمة الله وبركاته

    ReplyDelete
  29. إذن ومتى تنصت ليلى إلى آدم
    آدم الذي أتي بها من عدم وصنع لها جناحي ملاك و ذرف من روحه حَباً فأكلت
    ومن قلبه حُباً ففرحت ومن صوته غنى فرقصت ومن ذراعه وسادة فنامت ومن همسه حدوتة فحلمت ولما بالغنا أيقظها طارت ورقصت على غير أنغامه
    آدم الذي لم يغضبها يوما ولم يخنها هنةً ولم يظلمها حبا ولا مالا ولا لين جناح
    أدم الذي حفظ سرها وستر عيبها بل وجعل من كل عيب فيها ميزة
    ولما طارت غنا لها فما سمعت همس لها فتصنّعت
    الصمم
    استخلفها بكل غالٍ ونفيس أن تنصت أن تستمع إلى شكوى من لم يدر سر التحليق المفاجئ خارج مدار الملائكة
    فمتى تنصت ليلي، حواء.
    إلى أدم

    ReplyDelete
  30. طبعا الراجل ده ليه معامله خاصه
    ومابيعجبوش العجب
    بس اعتقد ان الراجل محتاج مساحه من الصمت
    محتاج انك تتجاهليه لحد ماهو يبدا الحوار
    والكلام معاه يستحسن يكون بالقطاره لما تحسى انه ممكن يصدع
    لان احيانا الحوار المتواصل يمكن يكون هادف لكن متعب
    الحل ان يكون فى شويه صمت وشويه كلام
    وربنا يهدى الرجاله

    ReplyDelete