12/22/2006

مبروك


الساعة كانت بالظبط 13:54:28 يعنى اتنين إلا خمسة بعد الضهر، وكنت قاعدة فى امان الله قافلة باب اودتى عليا وبشتغل. وإذ فجأة، توصلنى مسج ع الموبايل.. وانا اصلى بفرح اوى اول ما اسمع نغمة المسجات ، مين يا ترى بعتلى مسج؟ طيب وفيها ايه؟ خير.. ، يا رب تبقى نكتة وللا حاجة دمها خفيف... دا دايما اللى ييجى فى بالى اول ما اسمع النغمة وامسك الموبايل عشان افتح المسج

لقيت المسج جاية من رشا صحبتى، والمسج كلمة واحدة: مبروك

انا مافهمتش، قريت المسج تانى... مبروك

مبروك؟؟ مبروك على ايه!!! صباح البتنجان يا اووووش.. وقعدت اسأل نفسى، يا ترى ايه اللى حصل عشان رشا تبعت تقولى مبروك؟؟ اول حاجة جت فى بالى انها جت تبعت المسج دى لحد فغلطت وبعتتها ليا.. اه اكيد دا اللى حصل.. اصل انا معنديش حاجة تقولى عليها مبروك

فكرت كمان، يمكن اكون كسبت حاجة؟؟ طيب يعنى انا ماشتركتش فى اى مسابقات.. يمكن اشتركت لى هيا وكسبت فبعتت تبارك لى؟؟ طيب مش تقولى ايه المسابقة الاول
لا لا، طيب يمكن ولاء صاحبتنا اخدت الماجستير وبعتت لها المسج غلط عليا؟؟ بس ازاى؟؟ اساسا ولاء لسه ما ناقشت الرسالة واكيد كلنا هنكون موجودين فى اليوم ده
ممم، يمكن رشا صاحبتنا التالتة ولدت؟؟ بس دى فى الرابع

مخي ضرب ، وفكرت فى استنتاجات كتيرة جدا فى ثوانى معدودة قبل ما اقرر اتصل بيها واسألها.. المهم اتصلت بيها وهى ما فتحتش عليا خالص، زهقت وسبت الموبايل.. واستقريت على انها اكيد بعت لى المسج غلط

بس شوية كمان سرحت فى المسج تانى.. مبروك.. امتى اخر مرة اتقالت لى الكلمة دى؟؟ لما اخدت الليسانس!!.. فعلا اخر مرة حد قالى مبروك لما اخدت الليسانس واتخرجت، دا حتى محدش كان بيقولى مبروك لما اشتغلت.. بيقولولى ربنا معاكى، ربنا يوفقك... انما مش مبروك

الكلمة دى انا بقولها كتير، بقولها للناس من غير ما احس بيها ولا بطعمها، المسج دى كان ليها طعم غريب.. اول مرة احس ان الكلمة دى جميلة.. كنت حاسة ان لونها وردى

سبتنى من السرحان والتفكير ده، ورجعت اشتغل

بالليل اتصلت برشا اول ما رجعت البيت، لقيت اخوها محمود بيقولى مبروك.. الله انت كمان يا محمود.. وقعد يضحك، قلت له انا بأه متصله عشان اعرف حكاية مبروك دى، قالى خدى معاكى رشا تحكيلك

كلمتنى رشا، وبعد السلامات والتوحيشات، قالت لى ، ابدا انا كنت بقلب فى المسجات الجاهزة عندى فى الموبايل ولقيت المسج دى.. قلت ابعتهالك.. بس كده

43 comments:

  1. علي فكره يا بنت مصريه انا ايضا لم اعد اشعر بمعني الكلمه (مبروك)لماذا ربما لان وراء كل مناسبه سعيده صار لدينا يقين بان وراءها مشاكل كثيره تغطي علي اهمية الحدث السعيد
    انا شخصيا ايام السعاده صارت لا تاتيني تقريبا و ربما تاتي دون ان اشعر لكن في النهايه لا توجد عندي اسباب كي اسمع من احد هذه الكلمه
    انا اكتب الان و انا استمع الي موسيقي (اوان الورد)
    هي دي الموسيقي التي اشعر و انا اسمعها كان هناك من يقول لي (مبروك)
    و علي ماذا لا ادري ايضا

    ReplyDelete
  2. انا سعيد اني اول من يعلق علي البوست و هذه اول مره يسعدني الحظ و اكون اول المعلقين عند اي مدون

    ReplyDelete
  3. اود ان اقول ان صاحبتك هذه عندها زوق عالي جدا حافظي عليها

    ReplyDelete
  4. مبروك على أستمتاعك بكلمة مبروك و أحساسك أن لونها وردى , و مبروك على صاحبتك اللى بتحبك فى زمن أدينى فلوس أقولك مبروك , ومبروك على جواكى الأصيل و الا ما كنتش صاحبتك حبتك وقالتك مبروك
    بأختصار مبروك على مبروك شفتى بقى أن مبروك ممكن تتقال فى أى وقت

    ReplyDelete
  5. ههههههههههههههههههههه
    عجبتني جدااااااااااااااا الحركه دي
    اه والله
    كتير اوي بتحصل حاجات...ان شاء الله حتى حرف ولا كلمه صغيره..
    بتقلي في دماغي حاجات كتيره جدا
    وبتكون الكلمه او الحرف دول مش مقصودين
    ولما باجي احكيها لحد
    يقولولي يااااااه ايه التفكير ده
    يابنتي دماغك...ارحميها شويه
    هههههههههه اه والله..ده اللي بسمعه دايما..
    فكرتيني بنفسي..لما تحصل حاجه كده واقول صباح البتنجان..
    بس طبعا انتي احسن مني كتير..
    صحيح...انتي ماتعرفنيش..
    انا كنت شوفت مدونتك زمااان وتاهت مني..
    دلوقتي توصلتلها بعد ماعملت سيرش عليها على النت..
    ربنا يوفقك ويكرمك ياااااارب:)))
    سلاااااااام

    ReplyDelete
  6. زيزي يا حبيبتي
    صحبتك دي مفروض تحمد ربنا انها متعرفنيش
    دا انا مرارتي اتفقعت وانا بقراء امال لو كان حصل فيا كنت هعمل اييه

    ReplyDelete
  7. كل ما نحتاجه: الصدق

    والمشاعر الصادقة هي الجسر الذي يمتد ليصل بين البشر

    ليس صحيحاً أن الناس أصبحوا تماثيل من رخام.. هناك دائماً فئة تتنفس الصدق وتبث الدفء في نفوس وقلوب من تحب

    أعرف أن هؤلاء موجودون.. يحبونك بعيداً عن لغة المصالح.. ويمنحونك أجمل ما يملكون: تلك المحبة التي تتدفق مثل نهر من الكلمات

    كثيرون لا يدركون ثراء اللحظة التي نشعر فيها بأنهم معنا. كثيرون لا يعرفون أن كلمة خرجت من أفواههم يوماً منحتنا قدرة على الصمود في وجه العواصف وجعلتنا نواصل الحياة الصعبة وابتسامة ثقة ترتسم على وجوهنا

    أما الذين يحبوننا فعلاً فإن هداياهم الجميلة ترسو على موانئننا باطمئنان.. حتى لو كانت الهدية مجرد كلمة تهنئة

    ReplyDelete
  8. عزيزتىالبنت المصريه

    بعد التحيه و السلام .... انا من احد المعجبين وقراء موقعكم... و فى الحقيقة موقعكم شجعنى على ان اعمل مدونتى الخاصه ... و اكتب فيها بعض من تجاربى فى الحياه كمصرى بيحب وطنه و بيغير عليه... و يتمنى انه يبقى نجم قوق فى السما و عالى...حاليا باعيش فى انجلترا و باشتغل فى جامعة شيفلد...المهم علشان ما طولش عليكم و اعطل و قتكم...اتمنى انكم تضيفوا
    اسم مدونتى الى موقعكم و انا كمان اضفت اسم مدونتكم الى موقعى.

    عنوان موقعى كالآتى:

    http://kalambelmasry.blogspot.com/

    و اسم المدونة "حدوته مصريه على المصطبه"

    مدونتى عباره عن حدوته مصريه على المصطبه ...احكيها لابن بلدى المصرى البسيط ...و هى حكايه سهله بس عويصه ...اتمنى انها تعجبكم انتم كمان
    و اتمنى انى اسمع منكم قريبا

    اخوكم دكتور محمد الرفاعى
    انجلترا شيفلد

    ReplyDelete
  9. mabrouk she gave u hope that something u donot know and didnto expect is happeneing

    ReplyDelete
  10. ده ايه الاشتغالات الجامدة ديه

    بس انتي لازم ترديها
    احسن بعد كده تستهفأك

    وتقولك اللي جابلك يخليلك
    ولا تجيبلك هدية جواز
    وتعملك فرح
    وتجوزك وانتي مش عارفة
    :)

    ReplyDelete
  11. مبروك كلمة أكتر من رائعه .. لونها وردي و طعمها عسل و شهد مكرر .. بس ليها شرط واحد علشان تبقي كده بجد .. انها تطلع من القلب بجد و تدخل القلب بجد .. ما تبقاش "بري بايد" أو "تمبلات" .. يعني بصريح العبارة ما تبقاش برو ملامة ..

    مش هتقوليلي مبروك و تعمليلي سياح ف المنطقه يا زيزي ؟؟

    :)

    ReplyDelete
  12. ههههههههههههههههههههههههه
    بجد مش قادر ابطل من الضحك
    بس فعلا بحس الموضوع ده مع حاجات كتير مش كلمخ مبروك بس فى كلام كتير بنقوله بس مش حاسين بيه وبيجى مره واحده كده نحس معناه

    اه صح
    ميررررررررررروك
    وسلااااااااااااام

    ReplyDelete
  13. اه صح نسيت انا كمان زيك بفرح اوى لما بسمع نغمه الماسيج حتى لو مش تليفونى مش عارف ليه مع انه ممكن يكون خبر مش كويس او حاجه مش لذيذه
    بس بفرح برده لما بسمع النغمه لو حد عرف ليه يبقى يقولى
    وسلااااااااااااام

    ReplyDelete
  14. الاخت العزيزة/انا جديد على موضوع البلوجات.و الصراحة ان الفضل يرجع ليكى فى كده.انا قعدت اقراء المدونات لمدة شهر تقريبا.وللى يعجبنى احطه على الفيفوريت.وكل ده علشان اشوف ايه الحكاية واخش فيها ازاى.حاولت اخش فيها ولكنى احتست.لحد ما خت بالى من اللجو بتاع ازاى تنشىء مدونة بتاعت سيادتك.ومنها ويلا ابتدى وعملت فعلا البلوج.ولكن كان عندى شوية مشاكل علشان يكون شكلها كويس.فضلت احاول لحد ما تقدرى تقولى مش بطاله.لكن فضل عندى موضوع نفسى اعرف يتحل ازاى.الا وهو:ازاى انزل مزيكه من الهارد ديسك بتاعى على البلوج.انا نزلت فعلا ولكن من على سايت.والمزيكة ماتشتتغلش الا لما اعمل كليك عليها.ملحوظة :انا المدونة بتعتى فتحتها بعد شهر نوفمبر اى انها مع نظام البلوج الجديد.ياترى فى طريقة اعمل بيها الحكاية دى؟انا على فكرة فضلت متردد مدة طويلة اسالك السؤال ده.انا اسف اذا كنت طولت عليكى ورغيت كتير..اسف مرة تانية..حسنى(على فكرة ارجوا ان اسمى ما يعملش لك حساسية ده شىء ماليش ذنب فيه)والله لو اعرف!!!لكن اعمل ايه من الاشياء التى لايد لينا فيها
    واخيرا سلام..واضح انى رغاى قوى..اسف

    ReplyDelete
  15. اخ حسني انت رغاي زي حسني الكبير
    ههههههههههههههههههههههههههه

    ReplyDelete
  16. قد تكون الكلمة وسعادتك بها فألاً حسنا
    وتوقعوا الخير تجدوه

    الحقيقة أنا أؤمن أن فكر الإنسان وعالمه الداخلي أقوى من الواقع
    كلمة المسيح المشهورة أن المؤمن الحق يستطيع تحريك الجبال تشير لهذا المعنى
    والإنسان المتفائل يجتذب الخير كأنه مغناطيس للخير
    والعكس صحيح

    ولا يغير الله ما بقوم حتى يغيروا ما بأنفسهم إشارة أخرى لنفس المعنى وذات الحقيقة

    يبدو أن الأفراح قد ندرت بالفعل في حياة معظم الناس، هذا هو ما يقوله الجميع، على الأقل في ثقافتنا التي نعرفها جيدا
    حتى العيد، أصبحت أتوقع أن نعلق فيه على ذهاب "طعم العيد" الذي كنا نشعر به في زمن ماض، ربما زمن الطفولة
    أعتقد أننا لو أدركنا أن تغيير حالتنا الوجدانية عمل إرادي وأن له تأثيرا واقعياً على حياتنا وظروفنا الخارجية ولو تعاملنا مع هذه الحقيقة بإيجابية فسوف نشعر بطعم الحياة المفقود ونصبح مغناطيسا للخير في حياتنا الخاصة والعامة

    ReplyDelete
  17. عارفة؟ مبروك حتى على إن حد فرحك وخلاكى تضحكى :)
    وحشتينى

    ReplyDelete
  18. ههههههههههههههههههه...تيب مبروك على البوست الجميل دا..
    بجد حلو اوي بس احنا الشعب المصري بنبارك على كل حاجه ان شالله لو لقينا جنيه واقع على الارض بنقول مبروك ..واحيانا لما حد يحكي لي حاجه ومش اعرف ارد عليه اقول له مبروك يعني احنا بنحب نفرح دايما
    المهم..عقبال ما نقول لك مبروك بجد :)

    ReplyDelete
  19. I love your blog..i am a frequent visitor here...never left a comment though..this is my first:
    Wishing you and your loved ones a great holiday season and a very happy 2007!
    May 2007 brings us all Health, Wealth, Happiness and much needed Peace on earth.

    ReplyDelete
  20. مبروك
    100 مبروك
    300000 مبروك
    علي البسلة اللي اتحرقت وأنا عمال أقرا البوست ده.

    ReplyDelete
  21. I would take this as God-sent sign... and be optimistic and feel that it came just in time you needed to hear that word!

    ZeiZei...Mabrook!

    by the way, wa7shany ya7'ty! :D

    ReplyDelete
  22. انا كمان يا زينب بفرح ةلما بسمع صوت المسج وبتمنى وانا بفتحه انه يكون من شخص معين او خبر حلو نفسي فيه..
    أما مبروك دي لو كانت اتبعتتلي أكيد مكنتش هستريح غير لما اتصل واعرف مبروك على اييه..
    اخر مرة سمعت مبروك لما سجلت للماجستير

    عموما مبروك

    ReplyDelete
  23. ازيك يا بنت انا لو هقولك مبروك هقولك عشان حاجتين
    اولا عشان انا عملت مدونتى عن طريق شرحك المفصل الجميل
    ثانيا عشان مبروك وبس
    تخيلي لو انتى في موقف وحش اوى وحد جة باصلك وفاش بوقة اوى وبيقولك مبروك تخيلي هيكون احساسك اية
    دى حصلت معايا من واحد صاحبي-خدى بالك من الفرق بين صاحبى وصاحبتك-
    فمبروك لان صاحبتك قالتهالك عادى او وهيا بتهزر دا انا لو منك اروح اشكرها واقولها مبروك ان انا عندى واحدة صحبتى فاكرانى على الاقل بكلمة
    مبـــــــروك
    ودا اللينك بتاع مدونتى انا لسا عاملها فهاتلاقيها اكيد تعبانة لانى لسا داخل موضوع المدونات على ايدك
    بس بليز شوفيها وسيبيلى كومنت قوليلي رايك
    ومبروك

    ReplyDelete
  24. ازيك يا بنت انا لو هقولك مبروك هقولك عشان حاجتين
    اولا عشان انا عملت مدونتى عن طريق شرحك المفصل الجميل
    ثانيا عشان مبروك وبس
    تخيلي لو انتى في موقف وحش اوى وحد جة باصلك وفاشخ بوقة اوى وبيقولك مبروك تخيلي هيكون احساسك اية
    دى حصلت معايا من واحد صاحبي-خدى بالك من الفرق بين صاحبى وصاحبتك-
    فمبروك لان صاحبتك قالتهالك عادى او وهيا بتهزر دا انا لو منك اروح اشكرها واقولها مبروك ان انا عندى واحدة صحبتى فاكرانى على الاقل بكلمة
    مبـــــــروك
    ودا اللينك بتاع مدونتىhttp://7ob7ob7ob.blogspot.com/ انا لسا عاملها فهاتلاقيها اكيد تعبانة لانى لسا داخل موضوع المدونات على ايدك
    بس بليز شوفيها وسيبيلى كومنت قوليلي رايك
    ومبروك

    ReplyDelete
  25. انا متاسف جدا يا بنت مصريه اني باذكر الكلام ده هنا
    اخ حسني انا اسف جدا علي كلمة رغاي التي قلتها هنا
    انا لم اضع في حسباني ابدا انها ستكون سبب ضيق لك علي الاطلاق
    انا و اخرين من الاصدقاء المدونيننتحدث بهذه الصوره مع بعضنا البعض كثيرا دون حرج حتي لو لم يكن بيننا تعارف سابق
    اؤكد لك انني حزنت جدا لانك تضايقت من كلمتي
    و المني اكثر تذكيرك لي بفارق السن بيننا في ثنايا كلامك
    انا اسف مره اخري و ارجو قبول الاعتذار و الصداقه رغم فارق السن

    ReplyDelete
  26. انا اسف مره تانيه لبنت مصريه
    الاخ حسني ضايقه كلامي و ارسل لي علي مدونتي
    عتاب عن الكلمه لكن انا اعتقدت انه هيقبل الكلمه كهزار خصوصا ان هو كان الباديء بتلميح قبوله الهزار
    اسف مره اخري و ارجو قبول الاعتذار

    ReplyDelete
  27. اخ حسني انا حاولت اكتب لك اعتزار ثم تعليق لكن التعليقات عندك لا تظهر ربما لم تقم باعدادها بصوره صحيحه
    شوف يا سيدي
    اضغط علي settings
    وبعدها علي comments
    فيه حوالي عشر بنود كلها اختيارات التاسع منهم احتمال تكون انت عامله (ييس)غيره خليه (نوو)هذا اذا كان العيب في التعليقات عندك فعلا موجود
    و لك تحياتي

    ReplyDelete
  28. فيه جانب تاني في القصة ، يمكن لمحته وأنا بأقراها سريعاً جداً..

    جانب "ضحكت عليك" .. الكاميرا الخفية..

    وعدناك بحياة أفضل ، مصارحة وشفافية ، عدم تخطي الحدود كحزب ، عدم حشر البيروقراطية في السياسة ، شقق مرمية والشغل في كل حتة ، واللحمة بسبعة جنيه ، وساعات تلاقيها بستة ..

    وتكتشف إنه كان مضحوك عليك في الآخر ..

    عايزة تذيعي؟

    ReplyDelete
  29. يا صبرك و قعدتي لحد كل ده من غير مل تعرفي السبب
    لو انا كنت كمتها على طول اعرف ليه
    اصل مبروك ممكن يكون ليها معنى تاني؟؟
    شماته مثلا

    على العموم مبروك عليكي العيد الكبير
    بلاش لحمه كتير

    ReplyDelete
  30. ذو النون المصري
    وانا سعيدة انك بتعلق عندى، سواء كنت اول واحد او اخر واحد :))
    ويارب ايام السعادة تبقى كل ايامك الجاية
    وانا هقول لصاحبتى عن رأيك فى ذوقها
    ---

    مبرمج حر
    ومبروك كمان ان البوست عجبكم كده وخلاكم تتفاعلوا معاه :D
    ---

    ورداية
    اهو انا فعلا من النوع ده اللى الافكار مكن تزدحم فى دماغة من مجرد كامة او لفته صغيرة و خصوصا لما تكون اشتغاله جامدة كده
    ميرسى يا وردياة يا جميلة على كلامك الرقيق
    ----

    شيماااااء
    ممم هوصلها الرسالة سعادتك :D بس ماتضايقيش نفسك.. انا عملت ما يجب عمله بردو
    ;)
    ---
    yasser_best
    كلام جميل :)
    ---

    The Egyptian group in Sheffield
    هشوفها حاضر
    ---

    maf2ou3a
    ممكن فعلا، الانسان ايه غير شوية توقعات فوق بعض :D
    ---

    رومانتيك روز
    مبررووووك من القلب يا احلى روزة.. وهسيحلك جامد، اطمنى ;)
    ----

    fnan_geology
    هههههه طيب كويس انها جت معاك ضحك، فى ناس تانية جت معاهم غيظ
    هههههههههههه
    ---

    hosnysoliman
    بص هو مبدئيا ماينفعش تحط اغنيه تتسمع من على الهارد عندك
    لازم تكون موجوده على سيرفر تانى وتاخد العنوانا بتاعها وتحطه فى امر الهتمل بتاع الصوت
    ---

    Mohamed Shedou محمد شدو

    محمممممد يا عزيزيى، ليك وحشة بجد
    انت مختفى فين كده :)
    لسه من كام يوم كنت بطل على مدونتك وربنا يعلم اتضايقت ازاى انك مش بتحط بوستات خالص من زمان كده
    ابقى دون يا بنى، ماتكسلش
    ---

    egygirl
    :)) ومبروك عليا ان التدوينة دى خليتك تنورينى وتزورينى
    انتى كمان وحشتينى ، عقبال ما اقولك مبروك قريب يا جميل
    ---

    BaTresYa
    الله يبارك فيكى يا بنوتة.. احنا بنحن دايما للفرحة، وبنتلكك للضحك
    مممم وكمان ان جيتى للحق بنتلكك ع الحزن بردو
    ---

    Summer
    اهلا يا سمر، انا سعيدة بتعليقك وزياراتك اللى كنتش اعرف عنها حاجة دى :) كل سنة وانتى طيبة وهابى نيو يير، وبالصحة والسلامة
    ----

    بنى آدم مصري
    انت حرقت البسلة.. انا بحب البسلة.. دى اكتر خالخضروات اللى بحبها.. عاااااااا انا هعيط علها دلوقتى كده، بس ياللا فداك بردو
    :)
    ----

    Epitaph
    آبى وحشتينى اوى اوى.. ايه يا ربى التدوينة دى اللى جابت الحبايب كلهم.. بركاتك يا س رشا.. وبركات مبروك كمان :)) على فكرة انتى هتلاقينى على جوجل توك، مش على مسنجر خالص.. اعملى اكونت بأه عشان نتكلموا مع بعض يا شابة :D
    ----

    تسـنيم
    طيب ان شاء الله نقولك كلنا مبروك لما تناقشى الرسالة ان شاء الله
    :)
    ----

    بقايا مصري
    هشوفها اكيد وهسيب كومنت لما احس انى عايزة اكومنت على حاجة
    اتفقنا !
    ---

    ذو النون المصري
    اسمحسلى اقولك انت ذوق جدا، وان شاء الله يكون حسنى قبل اسفك وتفهم موقفك
    وعموما يا جماعة احنا كلنا فى البلوجسفير اخوات.. وبناخد على بعض بسرعة
    وان شاء اللله مافيش بينا زعل ابدا
    ---

    قلم جاف
    معلش يا شريف، انا الظاهر مش مستوعبة كويس.. هو التعليق بتاعك ليه علاقة بالبوست بتاعى؟؟
    وضحلى بس
    ----

    ام العياال
    ما هو اعمل طيب ، ما هى ما رضيتش تفتح عليا وسبتنى على نارى
    ومع ذلك كانت فرصة افكر فى الكلمة واتأملها اوى كده
    وعموما عمرى ما كان ييجى فى بالى انها تبعتا شماتة.. لسبب واحد ، ان انا ورشا وصلنا فى صداقتنا لمرحلة ان اللى اتمناه لنفسى اتمناهولها، واننا ما بنزعلش من بعض ابدا.. انما نزعل على بعض او لبعض .. نفرح لبعض.. انما ما نشمتش فى بعض.. دى استحالة :)

    ReplyDelete
  31. البنت المصرية الجدعة جدا/اشكر لك ردك وعلى فكره الموضوع الى كان بينى وبين ذوالنون دى كانت شوية عكارة ولكن راقت واحلوت وكانت بفيده لى لانه نبهنى ان البلوج بتاعى لا يستقبل التعليقات وطبع دى كانت غشومية منى لكن الحمد لله كله تمام..و اشكرك مرة اخرى

    ReplyDelete
  32. مبروك الف مبروك ومليون مبروك
    بقولها لنفسي من ساعة ما
    نجيت من الموت






    علي ايد توك توك

    ReplyDelete
  33. كلمة تدخل سرور علي قلب الانسان تساوي الكثير بالفعل
    وكلمة سيئة تسبب اكتئاب

    سبحان الله في الانسان

    ربنا يرزقك بمن يدخل السرور علي قلبك دائما ان شاء الله

    ReplyDelete
  34. وماله
    علي راي اودي
    عادي بقه

    ReplyDelete
  35. جميل ان تسعدى من كلمة فالبعض لا يكفية العمر كلة كى يحس بالسعادة

    ربنا يفرح ايامك

    ReplyDelete
  36. يا صباح التنفيض
    :)

    ReplyDelete
  37. عربى
    يا خبر يا احمد
    والله ما اخدتش بالى من تعليقك وانا برد
    معلش معلش.. انا الغلطانة المرة دى
    :D
    ---

    hosny sliman
    كويس ان الموضوع قلب صداقة جديدة.. جميييييل
    ---

    هيثم ابوعقرب
    مبروك يا هيثم.. يعنى بجد اهم حاجة انك ما متش على ايد توك توك.. :)) هى دى النجاة
    ----

    بن عبد العزيز
    فعلا.. ما هى الكلمة الطيبة صدقة
    ---

    .:.-=- ELGaZaLy-=-.:.
    على قدى بأه :)))

    ReplyDelete
  38. بالنسبة لصاحبتك كان اللي حصل مجرد خطأ..

    بالنسبة ليكي كان اللي حصل مقلب حتى وإن عرفتي بعد كدة إنه مش مقصود .. مقلب بتيجي قسوته من المثل المصري الدارج : عشمتك بالحلق خرمت أنا وداني..

    وفي بعض الأحيان ولما بيتعاظم الإحباط في حياتنا بيبقى المقلب زي الكاميرا الخفية ، بالنسبة للضحية مش حتى بالنسبة للي بيشوفوا الشو في التليفزيون!

    ReplyDelete
  39. هو صحيح سبب يفقع مرارة النمله لكن برده اهو فال كويس .. مش يمكن تكون علامه حلوه اديكي برده عيشتيلك ساعتين حاسه ان فيه حاجه ممكن تكون حلوه مستنياكي

    ReplyDelete
  40. والله كلام زى العسل..فعلا فيه حاجات كتير الواحد معدش بيحس معناها اليومين اللذاذ اللى احنا فيهم دلوقتى.. زى كلمة مبروك .. كلمة بحبك.. كلمة اللحمة .. عموما انا هحاول الفترة الجاية أقول كلمة مبروك أربع مرات قبل ما انام يمكن أحس معناها..إنما كلمة اللحمة بيتهيألى لو قعدت اقول فيها مدى الحياة مش هاشوفها برضه .. دى الأحلام المستحيلة..

    ReplyDelete
  41. السلام عليكم ورحمه الله وبركاته انا محمد صولان من اليمن تاجر سيارات 22سنه وانا من احد المعجبين بمواقعك الجميله وبكلمك الحلو وطريقتك في ادخال المعلومات وكنت عايز استفسر منك على حاجه انا عايز موقع يكون دعايه واعلان لمعرضي وعايزك تخدميني وتقلي لي هل البلوجر ينفع يكون موقع دعايه واعلان انا لسى مصصم موقع من شويه وهو لسى مش مترتب لاني مش عارف ازؤه ازاي انصحيني ربنا يخليكي ويحرسك لشبابك يا اصيله يابنت الاصول ردي عليا خلال يومين وانشاء الله مايجرا لكيش حاجه FJ.2007@HOTMAIL.COM SALMIYA89@YAHOO.COM انشاء الله تردي عليا مع السلامه

    ReplyDelete
  42. ههههههههههههههههه

    جميلة أوي أنا حبعتها لكام بنت وآعد أضحك

    مشكووووورة

    ReplyDelete
  43. انا لو منك مش عارفة كنت هعمل فيها ايه
    بس تعرفي الكلمة جميلة والمعنى حلو قلبتي عليا المواجع
    انا اخر مرة سمعتها كان بعد نتيجة الامتحان بس معرفش ليه محستهاش اوي
    هههههههههه يمكن بقا مش هحس بيها الا اما اخد البكالورويس
    على فكرة مدوناتك اكثر من رائعة اسلوبك حلو وبسيط بيشدني
    انا لسة عاملة مدونة جديدة استفدت كتير من شرحك فانشاء المدونات اتمنى انك تشرفيني بالزيارة

    ReplyDelete