1/21/2007

عن الموت.. وعن اللى بيحبوا الموت

يوم الخميس اللى فات، رحت مع زمايلي فى الشغل نحضر صلاة الجنازة على أخو واحد زميلنا، والصلاة كانت فى مسجد السيدة نفيسة

دى تانى مرة أصلي فيها صلاة جنازة، الأولى كان من زمان، كنا فى اسكندرية وقتها ورحنا نصلى الجمعة وبعد الصلاة كان فى صلاة جنازة، مش فاكرة اوى احساسي كان ايه وقتها.. بس الاكيد اننا كنا عايزين نخلص عشان نجري ع البحر :)ه

أما الخميس اللى فات ، كانت فارقة معايا صلاة الجنازة جدا، كالعادة فى اى مواقف زي دى بكون اكثر تماسكا من اللى حواليا وانا اللى بقعد اطبطب عليهم، وبعدين لما خلصنا صلاة الظهر وابتدا الامام يشرح كيفية صلاة الجنازة، مخي وقف عند الجزء اللى بيقول، اننا ندعو للميت باخلاص عسى ربنا يرزقنا بناس تصلي علينا وتدعي لنا باخلاص لما يحين معادنا.. ياااااه، من زمان مفكرتش فى موتي، وفى اللحظة دى اللى ببقى مش هحتاج من حد اى حاجة غير الدعاء، وان صلاة الجنازة هى احلى هدية ممكن تقدم لميت.. ساعة الصلاة انا كنت بدعي وانا متخيلة ان انا اللى بيصلوا عليا، دعيت للميت جامد واخلصت فى الدعاء على قد ما قدرت

اول ما خلصنا صلاة، كان قراري انى احاول بأى شكل اول ما تيجي ظروف زي دى تانى انى ما كسلش عن صلاة الجنازة، وانى اروح اصلي عشان ربنا يرزقنى باللى يصلي عليا ان شاء الله

المهم بأه، انا لفت نظري جدا المسجد وموقعه.. لأنى انا اعرف السيدة نفسية، قريت عنها.. ودى أول مرة أزور المسجد ده.. مين مايحبش آل البيت، ويعشقهم كمان، قريت عن السيدة نفيسة ازاى كانت حياتها وازاى ماتت وازاى أطلقوا عليها "نفيسة العلم" وازاى أئمة عصرها كانوا بياخدوها عنها العلم

حجت حوالى تلاتين مرة، وتزوجت وأنجبت وكانت مسئولة عن شئون بيتها بجانب علمها وتفقهها، ولما نزلت مصر، الناس خرجوا يستقبلوها من ع الحدود.. وقعدت فيها كتير والناس كانوا يروحوا يزوروها وياخدوا من علمها لحد ما حست انهم بيشغلوها عن العبادة فقررت ترحل عن مصر، وطبعا الناس شق عليهم جدا ان دا يحصل، وفى الاخر عُرض عليها انها تستقبل الناس يومين بس فى الاسبوع، وبعدين وافقت واستمرت فى مصر إلى ان توفاها الله

أستاذها كان الإمام مالك، وقرأت عليه الموطأ، والتقت بالإمام بن حنبل، وكمان كان الامام الشافعي دائم الزيارة ليها ، وكان بيثني على علمها ويسألها الدعاء لربنا ، وكانت من وصية الامام الشافعى ان السيدة نفيسة تصلي عليه لما يموت، وفعلا نفذت وصيته

ولما جت توفت.. مش هحكيلكوا طبعا حال المصريين لما عرفوا خبر وفاتها، انا لما اقرا سيرتها لازم اجى عند الجزء دا وابكي، هى حفرت قبرها بإيدها وكانت مستعدة ان الموت ييجي فى أى لحظة وكانت تقعد فى قبرها تقرا القرآن لحد ما ختمته مرات كتيرة جدا فيه، اعتقد هنا ان معنى القبر بالنسبة للسيدة نفيسة مختلف كتير عن اللى اتعود الناس عليه، هى هنا بتعتبره مكان جميل ومريح و"روضة من الجنة" وان الموت هو الباب اللى يتفتح لها عشان توصل بأه للدنيا الحقيقة، وتشوف اكتر حد ممكن اى حد يكون متشوق انه يشوفه.. وترتاح بقربه

31 comments:

  1. موضوعك جميل اوى
    وجاى فى وقته بال نسبة ليا على الاقل
    ربنا يرحمنا ويغفر لنا ي ارب

    ReplyDelete
  2. موضوع مهم جدا ممكن عرضه يكون سخيف و مخيف بطريقه منفره و هذا يؤدي الي انصراف الناس اما عن الامام الذي يحدثهم عنه او انصراف الناس عن الدنيا
    لكن انا اشهد ان عرضك له في اطار بسيط جدا و محاط بزكريات السيده نفيسه اعطاه بعد انساني جميل و مؤثر بصوره مباشره في النفس
    كل هذا دون ارهاب او تخويف و كلام عن الشجاع الاقرع و لا منكر و نكير و لا غيرهم
    انا بدون مجامله تاثرت بهذا الكلام و ضروري ان لا نكسل عن صلاة الجنازه لانها تعتبر طوق نجاه للميت او قارب يركبه للعالم الاخر ضروري يكون متين
    انا شاكر لكي جدا هذه البساطه في تناول الموضوع
    و تقبلي تحياتي

    ReplyDelete
  3. فعلا الواحد دايما يهرب من التفكير في الموت مع إنه الحاجة الوحيدة المؤكد إنها هتحصل
    بس هي الفكرة نفسها مخيفة جدا لأن الواحد حاسس إنه مش كويس .......يعني انتي لما بتقولي إن السيدة نفيسة حفرت قبرها وقعدت فيه....قعدت افكر وانا ممكن اعمل كده ...لقيتني بقول دانا ممكن اموت من الرعب وانا بعمل كده

    ياللا ربنا يستر علينا ويلهمنا عمل صالح و ناس صالحة تصلي علينا

    ReplyDelete
  4. أختى الكريمة :
    صلاة الجنازة اربع ركعات , بدون سجود , فى الاولى نقرأ الفاتحة , كعاده كل صلاة , وفى الثانية نصلى على رسول الله , ويستحب قراءة النصف الثانى من التشهد , وفى الثالثه , ندعوا للميت , وفى الاخيره ندعوا لاموات المسلمين جميعا

    تجربة مثمرة , وربنا يرحمنا جميعا

    ReplyDelete
  5. الغريب أننى أكتب تدوينة عن هذا الموضوع الآن , حيث أننى لايتوقف تفكيرى فى الموت لحظة , وهذا التفكير المستمر يبعد الأنسان عن الآثام ,و التدوينة أحتفظ بها فى الدرافت لحين اكتمالها, و أيضا كنت أتخوف من عدم قبول المتلقى لموضوع مثل ذلك , ولكن كتابتك هذه أنهت المشكلة لأنك عرضتيها بطريقة لطيفة , فشكرا جزيلا لك

    ReplyDelete
  6. الله يسامحك يا زيزي

    فيه كلام كتير لا يسعه بوكس التعليق، ولا يسعه الكلام، ولا أسعه أنا الآن في اللحظة دي!!د
    مش عارفة، أو بمعنى أصح مش عايزة أكتب أنا بافكر في ايه دلوقت، لأنها تجربة صعبة وخاصة جداً... لو قررت في يوم إني أكشفها كتابةً هاخصص لها موضوع كبير.. لما أبقى أشوفك هابقى أقول لك إن شاء الله..

    بس عموماً ربنا يرزقنا حسن الخاتمة.. يا رب.. يا سلام لما الواحد يبقى ميت وشايف حبايبه اللي حبهم في حياته، وحبايب تانيين مش كان يظنّ إنهم بيحبوه بالشكل ده، وهم ماشيين وراه بيودعوه.. ويا سلام لما يبقى الواحد كان سوّاح في بلاد الله فيلاقي كذا مسجد بيصلي عليه..!!د

    ده اللي حصل الأسبوع قبل اللي فات في عيلة البرادسة أقاربنا أوي.. الله يرحمك يا عمو ويا بختك!!! د

    ReplyDelete
  7. اسمها"تدعيلوا ربنا"مش تدعي لربنا"
    بس انا هابقي اصلي عليكي صلاة الغائب
    اصلي مش هابقي موجود
    او ممكن ماصليش اصلا
    لو دخلتي عندي هاتفهمي
    شكلي كده مش هاتحط في تابوت
    هاتعبي في ازايز
    ولو اقتنعتي قوليلي

    ReplyDelete
  8. اولاً انا حبيت اجى مدونتك علشان اشكرك جداً لانك انتى الى عرفتينى ازاى اعمل مدونه عن طريق بوست بتاعك كيف تنشئ مدونه

    ثانياً الموضوع جميل جداً و بيحكى عن سيده عظيمه قدرت تعرف ايه الهدف من الحياه و عرفت ازاى تنتظر الموت و عرفت ان الحياه على الارض هيه بدايه الحياه فى السما

    تحياتى
    واحد بيدور على باب السما

    ReplyDelete
  9. ربنا يجعلها اخر الاحزان

    ReplyDelete
  10. سوري انا مقرتش الموضوع بتاعك بس عندي طلب وياريت تنفذيه
    انا لسه فاتح المدونه بتاعتي ولسه يدوبك عامل فيها موضوعين طبعا عايزها تنتشر وكما عايز اضيف مدونتك وكمان مدونات كتير بس للاسف مش عارف اضيف ولا مدونه وكمان عايز اضيف حاجات كتير وكتير بس مش عارف ياريت تساعديني
    هستني منك رد عليا وكمان الايميل بتاعي اهوه وشكرا ليكي يابنت يامصريه
    www.spoony31.blogspot.com
    spoony31_31@hotmail.com
    ومتشكر ليكي ياستي

    ReplyDelete
  11. خلاص قريت الموضوع عموما جزافا هقول كلام ممكن يكون صح وممكن يكون غلط في مره كنت نايم علي سريري بس كنت حاسس ان جسمي متخدل يعني مش عارف احركه حسيت وقتها ان دا ممكن يكون الموت اني سامع كل شئ وحاسس بكل شئ بس مش قادر اتحرك ومش قادر اعمل حاجه ومن هنا جاتلي فكره الموت بس عموما اغلبيه الناس بتموت في اللحظه اللي بينسوا فيها انهم هيموتوا ..طبعا شكرا علي المعلومات اللي انتي واضعها اكيد انتي لفيتي عليها وعملتي بحث بس المهم بقي من الموضوع ان الموت مش وحش اوي كده ...وحش بس للناس اللي عارفه انها لما هتموت هيطلع عين ابوها انما الناس الخيره اللي بتخاف ربنا وبتعرفه نفسها تموت النهارده قبل بكره لان الحياه بالنسبه ليهم مرحله او باب داخلين منه وخارجين منه وبعديها هيكملوا في حياه ابديه فيها ذي الرسول موعدهم عموما ...كلمه دايما بقولها لما حد يموت وهيا فعلا معرفش ليه بتخلي اللي ادامي ينسي كل شئ (كلنا هنموت في )لما بقولها لحد بيحس ان المات ليه حتي لو كان ابوه من السهل نسيانه وبيحاول يفكر في نفسه لما هوا هيموت
    ربنا يحسن ختامنا جميعا ويقينا فتنه المحيا والممات وياريت الاقي رد بقي علي رسالتي ليكي وشكرا

    ReplyDelete
  12. الاخت العزيزو هانى شرح لكى صلاة الجنازة...

    ولكن لا اعلم..دائما عندما نفكر فى الموت فانة لا ياتى...ولا تسمعى عنة...

    انة الزائر المنفرد القوى...


    تحياتى اليكى...وفكرة جميلة

    ReplyDelete
  13. ربنا يرحمنا كلنا
    ساعات الانسان بينسى ان كل حاجة وليها اخر وان اخرتنا الموت

    البوست رائع

    وفكرنا بحاجات كنا ناسينها في غمرة الحياة
    سلامي ليكي

    ReplyDelete
  14. البوست جميل
    والى حكيتى عنه بيحدث معايا عند سماع خبر وفاة اى شخص من قريب او من بعيد .. فاصبح الموت هو الى قريب جداا منا
    وان جاى عليا الدور جاى فى يوم من الايام
    الموت هو الحقيقة الوحيدة الى فى حياتنا
    ومع ذلك بنضربها طناش برضة
    امتى هنفوق
    كلامك جميل وبسيط
    شكرا عزيزتى

    ReplyDelete
  15. allah yerhamha
    yahhhhhhhhhhh
    ad 2el el mot sa3at bey kon gamel bas lelnas el 7ayatha malyana ta3a lelah
    ya rab yerhamna game3an

    ReplyDelete
  16. البقاء لله وحده
    كلمة سمعتها كتير لسنة اللى فاتت
    و لبست الاسود كذا مرة ورا بعض
    و انا بصلى صلاة الجنازة
    مش فاكرة شعورى اوى ساعتها عشان كنت عمالة اعيط

    ربنا يرزقنا حسن الخاتمة وربنا يجعلهالك اخر الاحزان

    ReplyDelete
  17. هو زيزي ماتت ولا ايه يا ددعان؟
    طيب الصلاة فين ولا ايه اللي هايحصل يعني؟

    ReplyDelete
  18. ربنا يرزقنا حسن الخاتمه و يثبتنا عند سؤال الملكين و يسترنا جميعا فوق الارض و تحت الارض و يوم العرض .. أمين ..

    زيزي .. احنا صحاب من مدة .. و اتكلمنا ف حاجات كتيييييير قوي .. بس اللي اتكلمتي عنه ده مش من ضمن اللي اتكلمنا فيه قبل كده .. انا بخاف قوي من الفراق .. اي فراق .. بكره الفراغ اللي بيسببه الفراق .. و الموت هو اخر فراق ممكن لاي شخص .. و ده معناه اني بخاف قوي من سيرة الموت و التفكير فيه .. و مش ليا انا .. اللي بيموت بيرتاح "الي حد ما" و يسيب العذاب للي بيحبوه .. هما ممكن ينسوه مع الوقت .. لكن دايما بيفضل سايب فراغ كلا حسب قدره و تأثيره ..

    هو انا ابقي بتدخل ف مزاجك لو قلتلك ما تتكلميش ف الموضوع ده تاني لانك قبضتي قلبي ؟ و دخلت كذا مره و قريت اول سطر و ما رديتش اكمله للاخر ؟ و دلوقتي دي رابع مره ادخل ما الاقيش جديد فأضطريت اقراه .. ما تكتبيش عن الموت تاني .. ممكن ؟

    اشكرك عن المعلومات الاوليه اللي قلتيها عن السيدة نفيسة لانك فتحتي نفسي ادور علي قصة حياتها الكامله و اقراها .. خليني اشوفك .. انا وحيده قوي دلوقتي .. بقي جواب مش كومنت .. نصيبك بقي .. سلام

    ReplyDelete
  19. يظهر اننا لازم نعيد تفكير فى حياتنا تانى,اشكرك للفت نظرى
    ربنا يرحمنا كلنا ان شاء الله
    حلو احساسك
    كويس

    ReplyDelete
  20. ربنا يرزقنا حسن الخاتمه ويارب فعلا نلاقى اللى يصلى علينا ويدعيلنا بإخلاص ومن قلبه
    فيه جمله عجبتنى جدا فى الموضوع مين اللى مايحبش اّل البيت ويعشقهم كمان فعلا من ذا الذى لا يذوب عشقا فى اّل البيت وكم كانت عظيمه السيده نفيسه

    ReplyDelete
  21. موضوعك رائع وبيقول كلام كتير

    بيقول ان وضع المرأة كان قوى
    وبيقول انهم كانوا بيحترموا العالمات من النساء

    وبيقول ان صوت المرأة مش عورة لأنها كانت تتحدث إلى الجميع رجالا ونساءا من طالبى العلم

    وبيقول ان الإختلاط مش حرام لأنها كانت تختلط بالجميع يومين اسبوعيا

    وبيقول ان عمل المرأة ليس حراما

    وبيقول ان سفر المرأة ليس حراما

    وبيقول ان الدين لايفرق بين الناس إلا بالتقوى ولكنهم هم من وضعوا الفروق

    اشكرك جدا جدا على موضوعك الأكثر من رائع

    ReplyDelete
  22. معلش اذا كان موضوع الموت مش سهل عند اغلبنا ومعلش لو كنت اتكلمت عنه بشىء من البساطة :) بيتهيئلى ان اهم حاجة هى اننا نكون صرحاء.. اللى بيعتبر الموت امر جلل وخطير وبيضايقه لازم يعترف بكده واللى بيشوف الموت ابسط من كده بردو لازم يكون صريح.. ممكن يكون انا عندى ازمة ان سيرة الموت مش مرعبة اوى بالنسبة لى. بس والله انا بتكلم عنه بنفس البساطة اللى بحسها فيها، لكن طبعا بتبقى اهم صفاته انه مفرق الجماعات

    دعاء سمير: البقاء لله يا ديدي، ان شاء الله اقدر اشوفك قريب

    رومانتيك روز: بصي يا كوكى انا عندى موسوعة من تلاتة اجزاء عن آل البيت، هى السير متخصرة نوعا ما يمكن الواحد بياخد له عشرين تلاتين صفحة لكن هى كافية جدا كمعلومات اولية عنهم
    لو تحبي تاخدي تقريه، اوك؟

    ياسمين: اسمحيلي احييكي جدا واقولك اشكرك وميرسى وانى فرحانة جدا باللى استخلصتيه من كلامى عن السيدة نفيسة :) ربنا يكرمك بجد، قضية السيدة نفيسة بالنسبة لى هى قضية المرأة حتى لو ظهر انى بتكلم عن علاقتها بالموت ;)
    بمعنى ان سر نبهاري بيها هو مشوار حياتها مش بس الخاتمة الجميلة

    واخيرا، معلش جدا يا جماعة انى مش عرفت ارد الفترة اللى فات، انا مشغولة جدا اليومين دول لدرجة انى حتى مش بعرف ادخل على بنت مصرية كل يوم زي زمان :)) بس اهو يومين ويعدوا

    ReplyDelete
  23. مامتيش
    انتي زيزي بلحمك ودمك
    الحمد لله

    ReplyDelete
  24. ياااااااااه ..الموت.. يمكن أكتر حاجة بفتكرها في حياتي هيا الموت ..وبرضه أكتر حاجة مبعملش بيها ..لسة كان في جنازة يوم الجمعة لواحد معرفوش شفتوا الراجل وهما بيحطوا في عربية نقل الموتى ..كان اعادي بالنسبة لي-كان كله جوا - على عكس الناس اللي كانت حزينة أوي وبتوحدربنا كل شوية ..خوفي من الوت معدش الخوف على نفسي من الجنة أو النار ..بقى خوف غريب من إني أموت ومعملش حاجة بجد لأهلي وبلدي ..شعور غريب مابيبانش على الوش ..بس بيبقى جوا ...جواخالص ..ربنا يرزقنا حسن الخاتمة 0
    مع تحياتي 00
    والسلام عليكم0

    ReplyDelete
  25. لا احبه و لا أعترض عليه

    ReplyDelete
  26. نرجو تشريفنا
    www.blogs4arab.com

    ReplyDelete
  27. و الله كلامك لمس اوتار القلوب
    فعلا الواحد لازم كل فترة يحضر صلاة جنازة او دفنه علشان يفتكر و يفوق من الغفله اللي هو فيها
    ويعرف ان الدنيا زتئله و كل من عليها فان

    شكرا للتذكرة

    و ابقي شرفيني في البلوج بتاعتي اصله جديد و طبعا انت موجوده في اللينكات هناك و قولي ليا ايه رايك في البوست و التصميم

    ReplyDelete
  28. من رحمة ربنا علي الانسان انه بيشوف
    و يسمع عن الموت.... يعني لما أحد الاقارب أو الجيران او الاصدقاء بيتوفي الي رحمة الله بيكون هذا إنذار لنا أن نستعد ... أن نقف وقفه مع النفس ..نحاسبها.. و نتذكر ان الدور قادم علينا لا محالة....
    نسأل الله العلي القدير لنل جميعا حسن الخاتمة و ان يتوفنا و هو راض عنا مقبل علينا ضاحك الينا.

    الموضوع الثاني ...السيدة نفيسة العلم طيب الله ثراها و رضي عنها و أرضاها.... طبعا صوت المراة ليس بعورة..و لكن كلنا يعلم ان الصوت له تأثير شديد علي النفس... فإن كان الصوت بدلع و غنه فهو يستثير الغرائز و في هذه الحاله هو حرام...
    أيضا نوعية الكلام...و ان كان يدخل ضمن الاثارة و الاستثارة فهو حرام علي الجميع رجل كان أو امراة.

    تحياتي للجميع

    ReplyDelete
  29. بوست رائع من اخت رائعة ..التذكير بالموت ربما يجعلنا نقترب اكثر من فعل الخير ونبتعد اكثر من ايذاء الآخرين ..كم انا فى اشتياق لقراءة موضوع السيدة نفيسةفعرضك للموضوع يعطينا الشوق لمعرفة المزيد ..ربنا يبارك فيك يارب

    ReplyDelete
  30. النهاردة مرت سنه بالضبط علي وفاة بابا اللي كان اغلي انسان عندى ف الدنيا ولما توفي حسيت بكل اللي قولتيه دلوقتي وكمان حسيت ان الدنيا بقت فاضيه من حواليا لانى بصراحه فقدت احن قلب عليا

    ReplyDelete
  31. قرأت هذه التدوينة في موقع ولاد البلد
    فعلا تدوينة جميلة ومهمة
    وياريتنا كلنا نفوق ونفكر في الموت كما ينبغي لإن التفكير في الموت مش مرعب زي ما الناس بتفكر
    بالعكس ده بيخلينا نريح قلبنا من أثقال الدنيا الي كده كده هنسيبها
    ونعيش حيلة سعيدة بطاعة الله هادئة جميلة إلى أن نلقى الله
    جزاكِ الله خيرا مرة أخرى

    ReplyDelete