4/08/2007

شم النسيم.. وكفى

بمناسبة شم النسيم احب اقولكوا كل سنة وانتو طيبين وكمان دعاء العدل بتبلغكوا سلاماتها وبتقولكوا كل سنة وانتو طيبين، والبوست المرة دى مطعم برسمتين كاريكتير من بتوع دعاء عن شم النسيم.. ميرسي اوى يا دودو

----------

لو قعدنا نفكر لمصر فى عيد قومي.. لو ضرورى ضرورى يكون لمصر عيد قومي، يبقى مش هنلاقى غير شم النسيم يكون العيد القومي لمصر

سيبوكوا من حكاية ان العيد القومي لازم يكون عيد ثورة او تحرير او جلاء او انتصار فى حرب.. مش لازم ابدا يكون العيد القومى ليه علاقة بالكيان السياسى لمصر -او سموه زى ما تسموه- انما المفروض انه يكون اقرب لروح مصر

واذا كان لمصر روح - على اساس انها بسبع ارواح و لم تزهق بعد تحت وطأة الاحتلال الـوطني - فهى روح الناس البسيطة اللى بتطلع لسه فى شم النسيم للجناين -على اساس ان مصر فيها لسه مساحات خضراء - وهى مبسوطة ومتحمسة تقضى يوم جميل، تشم فيه النسيم وتاكل فسيخ وسردين ورنجة

شم النسيم ، يوم اجتماعى - بالاحرى- ملوش علاقة لا بسياسة ولا بدين - مع احترامى لكل الاديان- يعنى كلنا بنحتفل بيه، و"كلنا" تعود على عنصري الأمة مسلمين ومسيحيين، حلوة عنصري دى.. بسمع سيد درويش كتير انا

شم النسيم مدعوم بقوى الشعب العاملة، يعنى اللى بيحييه الشعب والمجتمع والناس. من كام ألف سنة والمصريين بيحتفلوا بيه منهم لنفسهم كده، من غير ما تطلع شركة سردين تلف السردين فى علبة حمرا وتلفها فى ورق احمر وتربطها بشريط احمر ومعاها هدية قلب احمر وتبيع الكيلو بخمسين جنيه، ولا يكون فى شركة ترمس، تنزل عرض فى شم النسيم الاتنين كيلو عليهم هدية كوباية حمص شام، من غير اى شركة استهلاكية تعمل اعلانات فى الشوارع والفضائيات وتعمل حملة دعائية تحت اسم "هتعزم مين! على ايه! فى شم النسيم؟" وتقنع الناس بضرورة الاحتفال بشم النسيم وتدبسهم فى مصاريف بايخة لزوم الوجاهة الاجتماعية او تفاديا لزعل الرفقاء والعائلة

الاجمل من كل ده، ان شم النسيم هو عيد الطبيعة.. احنا بنحتفل بالربيع فيه، باللون الاخضر الللى بيرجع يفرد ع الشجر، الورد اللى بيفتح، وريحته والوانه، فواكهة الصيف اللى بتظهر بشايرها فى الوقت ده، الحياة الجديدة اللى بتطلع فى كل شىء حوالينا - على اساس اننا عايشين فى وسط جناين مش ابنية مسلحة وارصفة ودخان عربيات - يعنى عيد بيرجع لنا الامل.. بيقول ان كل شىء ممكن يتولد من جديد، وان مفيش حاجة اسمها مستحيل، وان البيات الشتوى، مش موات.. دا مجرد طبقة -سميكة حبتين- بس بتسيح مع اول شمس للربيع

كل سنة فى الاوقات دى تلاقينى انا واصحابى نسأل بعض: ها شميتوا النسيم؟
وغالبا واحدة بترد -فتقول مثلا- : ايوه انا شميته امبارح، طلعت فوق السطوح فلقيت الريحة هاللة عليا..

يعنى ايه!!

يعنى من اول اواخر مارس كده او اوائل ابريل بتهل علي مدينتنا ريحة النسيم.. وتملا شوراعها وحارتها وبيوتها.. اغلبها يعنى، وخصوصا اللى مطرفة مش وسط البلد.. ريحة النسيم دى بأه هى ريحة زهر البرتقان، فى الوقت ده بيكون البرتقان استوى على الشجر، ولأن بلدنا حواليها قرى اغلبها مزروع برتقان طبعا عشان "وتشتهر محافظة القليوبية بزراعة الموالح البرتقال واليوسفى والفراولة والمشمش"، فالطبيعى ان النسيم عندنا يكون نسيم زهر البرتقان. ريحته حلوة جدا ومنعشة، تخيل بأه لما بلد بحالها تكون ريحة نسيمها حلوة ومنعشة كده

المهم باه، اتفقنا خلاص ان شم النسيم هو العيد القومى لجمهورية مصر العربية طيب الله ثراها وحفظها من كل سوء - على اساس ان مصر هيجيلها يوم تتولد من جديد فلازم تربتها من دلوقتى تكون طيبة عشان تلد ولد صالح ، فادعو له

25 comments:

  1. اولا كل سنة وانتم كلكم طيبين
    ثانيا:جميل شم النسيم بس انتي مش شايفة ان اختلاف توقيته سنة عن سنة بيخليه عيد غريب اشبه بالزئبق اللي محدش يعرف يمسكه مرة ييجي في اول ابريل ومرة في اخر ابريل ومرة جه اول مايو
    هو لذيذ بس هل ينفع يكون عيد وطني؟
    مش علشان عيد مسيحيين ولا كلام فارغ من دة بس علشان مواعيده
    تحياتي وارجو انك تشرفي المدونة بتاعتي بالزيارة
    على فكرة انا حاطط استطلاع رأي بخصوص شم النسيم
    اكون سعيد لو شاركتي برأيك اللي بالتأكيد عرفته من البوست

    ReplyDelete
  2. انا رايي ان عيد شم النسيم من الاعياد الجميلة واللذيذة بس لو فكرنا نعمل عيد قومي فانا رايي انه يبقي 9 مارس ( عيد وفاء النيل ) لان النيل من وجهة نظري هو سر الحياة في بلدنا
    وكل سنة وانتم طيبيين

    ReplyDelete
  3. تحياتى ليكى وللفنانه دعاء
    بجد بعد ما استمتعت بكتاباتك استمتعت بريشه الفنانه دعاء
    تحياتى

    ReplyDelete
  4. الصور مش باينة عندي يا زينب
    القاهرة كانت فاضية قوي الجمعة اللي فاتت وكاننا في الخمسينيات

    طب ما العدل شغالة كاريكاتور اهيه
    طب ليه كبت جاز علينا
    :)
    ؟؟

    ReplyDelete
  5. و أنت طيبة يا بنت!

    كلامك صح 100%
    الحروب و الانتصارات و الهزايم مرتبطة بتاريخ الحكومات و السياسات و كلها بتتغير مع الزمن، لكن عيد زي شم النسيم مرتبط بالمصريين
    و بعدين إيه أهمية إسرائيل في الدنيا علشان نخلي انتصارنا عليهم عيد! و نحتفل بإيه بعد ما ننسف إسرائيل في اليمّ؟

    و زي ما قلتِ شم النسيم هو عيد يجمع المصريين كلهم، و يفكرهم بالطبيعة و الجمال و الأسرة

    اتفقنا..
    تحيا مصر

    ReplyDelete
  6. هو الحقيقة عيد فطري (من الفطرة و ليس من الفطريات) و طعمه مصري خالص مخلّص
    أنا عن نفسي بحب الجو ده

    همسة (لألف)
    يسمع من بقك يا شيخ بخصوص النسف في اليم
    بس بحنيّة عشان الأيام المفترجة دي
    :)

    تحية للبنت المصرية
    و يجعله عامر

    ReplyDelete
  7. علي فكرة .. اتبسطت قوي قوي من روح الحماس و الحيوية اللي ف البوست ده .. حسستيني ان الشمس طلعت فوق الكمبيوتر من خلال كلامك و صورك و الله .. مع ان المود مش ف الجون يعني .. بس هيتحسن ان شاء الله !!

    للأسف بقي .. الجو عندنا مش حلو و الجو برد و الشمس طلعت يجي 10 دقايق كده و الظاهر ما عجبهاش النظام قامت مروحة تاني ..

    واضح ان شم النسيم عندنا هيبقاله دور تاني .. هبقي أقولك امتي بالظبط .. انجوي يور تايم يا بنوتة

    :)

    ReplyDelete
  8. مش عارفه اشكرك ازاي علي لينكات المدونات ف السايد بار يا زيزي .. أدي سرعة الاستجابة ولا بلاش .. و الله من الساعه 2 الظهر و لحد دلوقتي قاعده بنقرا اللي فاتني ف المدونات اللي بحبها و كنت بتابعها .. معندكيش فكرة كانوا واحشني قد ايه .. و اكتشفت اخبار جديده قد ايه .. جعلك الله زخرا للوطن و ابناءة يا بنوته :))

    ReplyDelete
  9. أنا أؤيدك بشدة وبعنف في جعل شم النسيم هو عيد مصر القومي. البلد كلها بتحتفل باليوم دة. هو صحيح كتير بيدخل المستشفيات فيه بس مش مشكلة أهو نوع من تكاتف المصرييين مع بعض واظهار روح المودة والتعاطف بين القوى المختلفة للشعب المصري ممثلة في العيان إللي مش فاهم حاجةن والدكتور إللي مش هامه حاجة والتمرجي إللي عايز يلهف كل حاجة.

    حتى حياتنا اليومية بقت مثل جميل ولوحة مرسومة بعناية عن التكاتف اليومي في طاحونة الحياة المصرية. لتتوقف تلك الطاحونة وتعطي البشر فرصة لكي يذوقوا شيئًا من طعم الحياة. هو صحيح بنكهة البصل والخل والليمون ولكنه في أفواههم أزكى بكثير من رائحة أزهار البرتقال التي ذكرتيها. بالمناسبة أنا عشت أيام طفولتي بالقليوبية وأعرف تمام المعرفة عن ماذا تتحدثين. تحياتي وشم نسيم رائع ولا عزاء للمصابين بلحمية الأنف.

    ReplyDelete
  10. وكل سنة وانتى طيبه

    ReplyDelete
  11. كل سنة وانتي والمصريين كلهم بخير!
    انا بأضم صوتي لصوتك بشدة!
    طول عمري بحب شم النسيم زيادة شوية عن أي عيد لأنه فعلاً عيد كل المصريين. الأعياد الفالصو التانية زي 23 يوليو وعيد الجلاء وعيد النصر والحاجات دي محدش بيحتفل بيها زي مانتي عارفة. عموماً اتمنى تكوني قضيتي يوم جميل!

    ReplyDelete
  12. كل سنه وانت طيبة يا بنتي
    والله فرحتيني بحماسك دة ليوم شم النسيم
    أنا أصلي باتضايق أوي من ناس كتير حواليا بتستخف باليوم و هناك من يحرم أكل الفسيخ و الرنجة
    بل وصل الأمر أن طلب بعض الأئمة في المساجد من الناس صيام هذا اليوم
    أليس هذا هو الابتداع في الدين؟
    أنا لا أعرف لمصلحة مين بس القضاء على مظهر مهم من ثقافة و حضارة شعب
    بلاش دول كمان
    برامج الراديو و التليفزيون المصري المكررة كل سنة عن خطورة أكل الفسيخ و البيض الملون
    و النبي مش مكسوفين؟
    يعني هي جت على الفسيخ اللي طول عمرنا بناكله
    معدة المصريين اللي اتعودت على بودرة السيراميك في اللبن و الجبنة
    و القمح المسرطن
    هايقف قدامها يعني الفسيخ؟
    هييييه
    ياللا
    كل سنة وانتوا طيبين

    ReplyDelete
  13. fffكل سنة وانتوا طيبيين

    ReplyDelete
  14. كل سنه وانتى طيبه يا قمر
    هى فعلا فكره
    بس العيد ده ميعاده مش ثابت بيختلف كل سنه عن التانيه
    وده هيخلى العيد القومى كل سنه فى يوم
    غير السنه اللى قبله
    مدونتك لطيفه
    تحياتى

    ReplyDelete
  15. كل سنة وانتو طيبين

    ReplyDelete
  16. مؤيد مؤدي مؤيد والى اقصى درجة
    الله ينور

    تحياتي

    ReplyDelete
  17. بمناسبة شم النسيم بقي

    ابو جمال قرر انه يفرح حد في شم النسيم راكب طايرته و معاه الأسره الكريمه و قرر انه هيرمي ورقه بمية جنيه من الطياره عشان يسعد واحد .. سوزي بقي قلبها رهيف قالت ل ابو جمال خليهم ورقتين بخمسين و نسعد اتنين .. علاء بقي الحنيه ضربت عنده زياده و قال يا ابا خليهم خمس ورقات بعشرين نسعد خمسه احسن .. جيمي بقي بيرسم علي اكبر قاعده تشجعه قال يا ابا لاء خليهم عشر ورقات كل ورقه بعشره جنيه و نسعد عشره .. طيار الطياره قل ل ابو جمال طيب ما ترمي نفسك انت و تسعد 75 مليون

    تحياتي

    ReplyDelete
  18. وانتى بالصحة واسعادة

    ReplyDelete
  19. انا مررت لك تاج من عندي ياريت تجاوبي عليه

    ReplyDelete
  20. صباح الخير انا عارف تعليقي متأخر جدا بس اعمل ايه المهم كل سنه والناس كلها بخير وتشم نسيم بجد حتي لو كان فسيخ ... بس المشكله بجد اننا محتاجيين نشم هوا نضيف بس المشكله ان هوا نضيف صعب .. دلوقتي هتلاقي العيل من دول تحت كوبري الملك الصالح وماسك كيس بلاستيك وحطه علي بوقه ويفضل يشم في الكولا لحد ماوشه يبقي عامل ذي فرده الكوشت يروح البيت يشم في رجلين اخواته وانا من هذا المذنأ بقول ان التلوث في القاهره اصبح يخنق بجد والناس تعبت وياريت يعملوا الف شم نسيم بس لو في نسيم اساسا صيف ولا شتا وبلاش نقر علي الناس اللي عندهم جنايين في بلدهم يحسن تضرب يحسن العين فلقت الحجر وخلينا احنا في الشوراع الي الدخان فيها ينفع يتعبا في قزايز علي انه اسلحه بيلوجيه ويتصدر لامريكا وهيقوله مصر فيها اسلحة بيلوجيه وشكرا للراجل صاحب النكتة وانا بحبز رأي الطيار وياريت بقي لو ابو علاء ينط وينزل رشق في البرج ماهو اصل الطيران دا حظوظ

    ReplyDelete
  21. مش هارخم كالعادة واقعد اطلعلك غلطات في الكتابة

    ومع ان الجو بيهبل وجت متأخرة

    بس كل سنة وانتوا طيبين ورمضان كريم بمناسبة شم النسيم

    مع تحيات رابطة مرضي الزهايمر


    كمان عاوز اقولك حاجة كل شوية انسي اقولهالك

    البانر بتاع سيبونا ده هايشجعهم عليكوا
    خليكوا جامدين لان بجد البانر بصورة العصفور بسيبونا توحي بان الحق حقهم مش حقكم او حقنا كمدونين

    ReplyDelete
  22. كل سنه وانتى طيبه بمناسبه كل حاجه حلوه حوالينا يا جميله
    حسام مراد
    شغال
    اتمنى انك تنورينى فى شغال
    سلاااااام

    ReplyDelete
  23. انا شايف ان يوم وفاء النيل و يبدا من 15 اغسطس و يستمر حتي 15 سبتمبر هو الانسب كي يكون عيدا قوميا للمصريين
    اليوم ده فعلا هام جدا لانه ببساطه مريبط بالحياه ايضا علي هذه الارض و كنا نحتفل به منذ الاف السنين ايضا بخلاف انه اعظم شانا من شم النسيم لانه وفاء النيل بخلاف انه اكثر ارتباطا بمصر وحدها فاربيع للعالم كله اما وفاء اللنيل فهو مناسبه مصريه خالصه
    تحياتي للموضوع المتميز و الاسلوب الاكثر تميزا

    ReplyDelete
  24. يكون اجمل لما فكرة العيد تكون قادرة انها تلم كل الناس اللى فى البلد ومالهاش علاقة بنظام الحكم من عيد ثورة او عيد ميلاد الرئيسبس احب اضيف حاجة للفكرة ان لازم يكون فى اعياد اقليمية للمحافظات يعنى والاعياد دى تكون فيها مهرجانات وكلام من دا يعنى مهرجان يخص طبيعة كل محافظة وبشكل غير سياحى يعنى المهرجان يكون بيخاطب ابناء المحافظة انفسهم يعنى مثلا مهرجان للقصب ومسابقة فى انتاج القصب ومهرجان للقطن ومسابقة ومهرجان فى تربية المواشى وصيد الاسماك للصيادين
    الكلام دا ممكن يحصل فى مصر بعد كام سنه؟؟؟؟؟؟؟؟؟؟؟؟
    لما نبقى نخلص من موضوع المواطنه اللأول

    ReplyDelete
  25. قبل تعديل الدستور و بعد تعديل الدستور _the constitution

    watch this video

    http://www.youtube.com/watch?v=Dj3U0VPWFRo


    and if u like it i hope u post it in ur blog...
    thnx

    ReplyDelete