9/12/2007

كلنا ليلى2: جزء أول: خبرات شخصية

أولا: كل سنة وكلنا طيبين وبالصحة والسلامة، وتعود علينا الايام بخيرها وبركتها ومعناها وايمانها وفروضها وسننها وصيامها وصلاتها وقيامها وقرءانها وفطارها وسحورها وكوباية البلح والزينة في الشوارع والفوانيس فى البلكونات، ومايحرمناش من صوتك يا "عبد المطلب" وانت بتغني رمضان جانا

ثانيا
نظرا لظروف اسمها "الانشغال" و"الوقت الضيق" وكده، مقدرتش انزل تدوينتي المشاركة فى احتفالية "كلنا/مع ليلى" للسنة الثانية على التوالي، ولكن بما ان كل شى فى المجتمعات الافتراضية "ملحوق" ولأن فكرة الاحتفال بليلى السنة دى جت على نسق "التاجات" اللي بنمررها لبعض.. فدا كان كفيل بإنه يديني ويدي للي هيجاوب على التاج بعدي فرصة مستمرة، ويدي للاحتفال نفسه انه يبدأ يوم تسعة تسعة ويستمر إلى ما شاء الرحمن.

قبل ما ندخل فى الموضوع. ممكن تقرا التدوينة اللى حضرتها لست أدرى مشكورة واللى نشرتها على المدونة الرسمية لكلنا ليلى، وكمان اقرا التدوينات اللى شاركوا اصحابها فى الاحتفال السنة دي مشكورين، وياريت لو تحب يعني، تشترك معانا، بما ان الوقت ما فاتش والفرصة متاحة وكده :)

ندخل فى الموضوع -التاج يعني-

-----------

• ليلى ونقد/معرفة الذات : هل أنت سعيدة كفتاة في مناحي حياتك؟ هل تحبين نفسك أم تتظاهرين بالقوة؟ هل تعرفين دورك في الحياة أم تتسابقين وتلعبين أدوارا مرسومة وفقط؟ هل مستعدة أن تدافعي عن وجهة نظرك عموما أم تجبنين عند المواجهة؟ وهل ترين جبنك سمة شخصية أم يغذيها من حولك؟

وبالتفصيل

-- هل أنت سعيدة كفتاة في مناحي حياتك؟ اولا مش هفصل ذاتي كفتاة عن ذاتي كإنسان، يعني لما افكر فى هل أنا سعيدة وللا لأ... بصراحة النوع ده من الاسئلة مرهق جدا بالنسبة لي، ومش بعرف اجاوب عليه، عموما ممكن اسيبه على جمب شوية يمكن ردودي على بقية الاسئلة تشكل ملامح الاجابة عن السؤال المعقد ده.

-- هل تحبين نفسك ام تتظاهرين بالقوة؟ بحب نفسي اه، بمعني اني بحب كوني أنثى، وبحترم الحقيقة دي جدا. دا نابع من احساسي بأهميتنا ( بنات حواء وادم)ويقيني الداخلي اننا نتساوي مع الجنس الآخر (الاولاد يعني). بس هل دا معناه انى ما "اتمنتش اكون ولد؟"
بصراحة اتمنيت اكتر من مرة انى اكون ولد. مش لأنهم احسن مننا، او انى شايفة انى لما اكون ولد هكون اعلى مقاما او اكبر قيمة، بالعكس. انا بس اتمنيت احيانا انى اكون ولد لأنى بشوف انهم - فى مجتمعاتنا المعوجة دى- بيحصلوا على صلاحيات وحقوق بتتحرم منها البنات، وبيكون السبب فى النهاية متعلق بالعادات والتقاليد - مش أحكام الدين ولا الحقائق العلمية - وعليه، التمني بيجي في لحظة الاحساس بالعجز عن تغيير العادات والتقاليد دي، ما هو ياإما تتغير ياإما ابقى ولد.

-- هل تعرفين دورك في الحياة ام تسابقين وتلعبين ادوار مرسومة فقط؟ هو اللى انا متأكده منه انى لحد دلوقتي مامرتش بدور مرسوم بشكل مسبق ليا، ولا حد تدخل فى توجيه حياتي او تمريرها واللعب بيا كأنى عروسة ماريونت، لا خالص، من اول ما اخترت قسم علمي علوم فى الثانوية، ومرورا بدخولي كلية تربية عشان ابقى مع اصحابي، ولحد ما قررت ما اشتغلش مدرسة (قد تبدو تلك الحوادث صغيرة، لكنها في حياة البنت مش سهلة خالص)، واغير مسار حياتي العملية تماما، بس دايما كان فى نصيحة من بابا وماما، بيفكروا بصوت عالي معايا، احيانا بتطول المناقشات عشان يقنعوني بحاجة مش عايزاها، انما الموضوع بينتهي على تفهم كامل من ناحيتهم انى مقتنعة بقراري، وبردو الموضوع بيكون فيه نوع من التطمين والمناورات فى النقاش عشان المركب تمشي :)
وبرغم كل ده، مقدرش اقول انى محددة اوى دوري في الحياة، يمكن اكون عارفة كويس انا مش عايزة ايه، انما مش واثقة اوى انا عايزة ايه.. حلو كده وللا لخبطكوا؟

-- هل مستعدة أن تدافعي عن وجهة نظرك عموما أم تجبنين عند المواجهة؟ وهل ترين جبنك سمة شخصية أم يغذيها من حولك؟ اه طبعا مستعدة ادافع عنها، مم بس احيانا الجو مايكنش مشجع، ساعات تحسي ان اللى قصادك "غير مؤهل" انه يفهم انك بتتكلمي عن ايه، او تركيبه عقلة متشبعة بالنظرة الدونية للمرأة، فدا محتاج عملية تحضير (وتطهير) قبلها انك تشيل من دماغه النظرة دي وبعدين تبتدي تتكلم فى حقوقي وحقوقك

بكرة ان شاء الله هكمل الرد على بقية الاسئلة المنشورة على مدونة كلنا ليلى، وبما ان دا تاج فأنا بمرره لأى حد يحب يجاوبه - يتفضل.

11 comments:


  1. كل عام وانت بخير

    تحياتي لك من ماناساس البلد

    ReplyDelete
  2. tzpكل سنه و انتي طيبه و كل بنت مصريه بالف خير و صحه و سلامه

    ReplyDelete
  3. كل سنة وكلنا مع ليلى
    كلنا يعني كلنا

    ReplyDelete
  4. بصراحه انا معرفش ايه موضوع الاحتفاليه دى اول مره اسمع عنها
    عجبنى اسلوبك جدا لما قلتى
    بياخدوا صلاحيات اكتر مننا بكتير بس دا راجع لعادات وتقاليد مش لاحكام دين او قواعد علميه

    الحمد لله
    طول عمر الاعلام يحط الموضوع دا فى الدين بس يخبوها
    يجيبوا مثلا شيخ ملتحى او امام فى الجامع ويجيبوه بيقهر بنته او بيعاملها باسلوب قاسى

    عموما كل عام وانت بخير

    ReplyDelete
  5. the groom
    كل سنة وانت طيب ورمضان كريم :)

    ذو النون المصري
    وانت طيب يا فندم :) وتعود عليك الايام بخير

    مصطفى السيد سمير
    ان شاء الله دايما :)

    حزين
    مش قول اكتر من اللى انت قلته، دى بالظبط وجهة نظري انا كمان

    ReplyDelete
  6. ازيك تانى
    كنت عايز اسألك سؤال بس بعيد عن البوست دا
    يا ترى جيبتى فانوس ؟؟؟
    مش عارف ليه عندى رغبه فى انى اجيب فانوس مش ليا لأى حد بس نفسى ارووح اجيب فانوس

    انتى ضحكتى عليا تيجى تعلقى وتمشى من غير ما تقولى رأيك فى البوست

    ReplyDelete
  7. مدونة جميلة وخفيفة الظل
    حبيت بس اهنيك على اسلوبك في الكتابة

    ReplyDelete
  8. زيزىىىىىىىى
    كل سنة وانتى طيبة يا جميل ورمضان كررررريم

    ReplyDelete
  9. السلام عليكم
    لدي سؤال وليت احد منكم يا اعضاء بنت مصرية يجاوبني السؤال هو
    انا لدي مدونة جديدة وادخلت موضوعين لكنهما لم يدخلو التصنيف الذي انا عملته كيف اجع الموضوعين يدخلون تصنيف مدونتي؟؟؟
    وهذه هي مدونتي
    http://ahmedkbaany.blogspot.com/

    ولكم جزيل الشكر
    اخوكم
    احمد قباني

    ReplyDelete
  10. This comment has been removed by the author.

    ReplyDelete
  11. السلام عليكم
    لدي سؤال وليت احد منكم يا اعضاء بنت مصرية يجاوبني السؤال هو
    انا لدي مدونة جديدة وادخلت موضوعين لكنهما لم يدخلو التصنيف الذي انا عملته كيف اجعل الموضوعين يدخلون تصنيف مدونتي؟؟؟
    وهذه هي مدونتي
    http://ahmedkbaany.blogspot.com/

    ولكم جزيل الشكر
    اخوكم
    احمد قباني

    ReplyDelete