9/18/2007

كلنا ليلى 2: جزء ثان: أصلهم ماعندهمش نظر

طبعا انا رحت وقلت عدولي، مجاش بكرة اللى انا قلت عليه ده، بس الظاهر اني مبقتش اقدر اقدر ظروفي نهائيا.. يعني يوم مشغولة ، يوم كسلانة، يوم مليش نفس، وكده يعني

المهم.. انا بعتذر عن انى قلت "بكرة هكمل اجابات" ومقدرتش اكمل الا بعد بكرة ده ما عدي بخمس ست ايام تقريبا، وبالتالي فانا مش هوعد المرة دي ببكرة، .. امم احم، اصلى بردو لسه هكمل اجابة فى بوست تالت وعليكو خير :)

المجموعة التانية من الاسئلة: ليلى والمجتمع: ما مشاكل ليلى الملحة في المجتمع من وجهة نظرك؟ ما مصدرها؟ هل يمكن حلها؟ وهل عندك موقف شخصى من واقع الحياة؟
وما يحلى الكلام إلا بذكر النبي عليه أفضل الصلاة والسلام، اما بعد :)
المشكلة الأولى والأخيرة وأم المشاكل والمصدر الرئيسي هى "نظرة الرجل للمرأة" أو بمعنى أدق "نظرة المجتمع الذكوري للمرأة".. لأني لو قلت هى نظرة الرجل فقط اكون غير منصفة، انما الحقيقة هي هذا المجتمع الذي يتفق فيه الرجل والمرأة على "النظرة الدونية للمرأة" والبداية من الرجل.. تسمونها نظرة ذكورية، تسمونها نظرة شرقية، المهم انها نظرة تعتبر الرجل كيان افضل من المرأة، أذكى اقوى اهم اقدر على الاستيعاب والتفكير وتسيير الامور، وكأنه وحده هو خليفة الله على الأرض وليست للمرأة مكان، ... عمنا الرجل صدق كده من زمان، ومارس كل طقوس هذا الاحساس.. وظهرت نُص مشكلاتنا التي نعاني منها من باب اننا الاضعف نحتاج حماية، واننا الاغبى نحتاج لمن يفكر لنا ولا يشاورنا فى الامر..

نُص المشكلات التاني ظهر، لما رضخت المرأة لمنطق الرجل فاعتبرت نفسها ضعيفة تحتاج لظل رجل، وهكذا عشنا فى مجتمع ذكوري يعلي من شأن الرجل ويقلل من شأن المرأة

غني عن الذكر ان الدين برىء براءة الذئب من دم بن يعقوب، (حلوة الحتة دي، كان نفسي اجيب سيرة الذئب ده من زمان، ماعلينا)
ربنا قال "والمؤمنون والمؤمنات بعضهم أولياء بعض يأمرون بالمعروف وينهون عن المنكر" صدق الله العظيم (سورة التوبة)، وسيدنا محمد صلى الله عليه وسلم قال "النساء شقائق الرجال" ولو جيبنا وقرينا السيرة النبوية هنفاجأ بكم التفهم والمساواة والحرية اللى حصلت عليها المرأة بسبب الاسلام، انما والله اعلم الناس ماقدرتش تستوعب بردو.. فضلت النزعة الذكورية "الجاهلية" دي جواهم.. وابتدت تطلع مع الوقت ويلووا معاني واحكام دينية في سبيل نظرتهم للمرأة. ما تلاقيش رجل يستشير زوجته زي ما كان الرسول (ص) بيعمل، ولا تلاقي حد يحافظ على مشاعرها زي الرسول ما كان بيعمل (دي ابسط حاجة ان الاولاد لما يقعدوا مع بعض ويحبوا يعملوا رجالة قصاد بعض كل واحد يتكلم عن حبيبته باعتبارها "المزة" او "الحتة" بتاعته..ودى الالفاظ اللي بيستخدموها.. على اساس انها رِجل كرسي او مُلة سرير)، باختصار ما بيحترمهاش

دا حتى ايام الرسول كانت النساء بتخرج تصلي الفجر، تصور باه لو جت واحدة دلوقتي تقول انا هخرج اصلي الفجر فى الجامع... "احنا معندناش بنات تدخل البيت بعد الساعة عشرة، يبقى عايزة تخرجى اربعة الفجر!!"..

المشكلة في النظرة دي.. البنت اللي هي بنتك واختك وامك وزوجتك وحبيبتك واللى ببساطة مينفعش تقول مين فيكو احسن او اهم من التاني لأن بدون وجود احد الطرفين مش هيبقى في عمار.. البنت دي بتبقى في ذهنك تقول الوقت كيان هش ضعيف عقلها صغير. لأ وكمان مااااكرة.. وكيد النساء باه والحاجات دي، وبرغم من تناقض الفكرة بين العقل الصغير والمكر إلا ان الرجل بيرتاح جدا للنظرية دي اللى تخليه يستسهل اصدار احكام بناءا على الموقف المتورط فيه، فهي ساذجة احيانا وماكرة احيانا أخرى

شىء مزعج جداً.. انك تكون بنت بتتنازعها جهتين، جهة المجتمع القائم بالفعل بكل افكاره الجاهلية الرجعية دي، وجهة احساسها الداخلي وقراءتها اللى دعمت ايمانها بإن في ظلم وان مش دا اللي المفروض يكون

طيب الحل ايه؟
م الاخر كلنا عارفين الحل، بس احنا مش قادرين ننفذه، مش قادرين نمارسه.. مش قادرين نغير النظرة الخاطئة للمرأة. ايوه هو دا بكل بساطة الحل.. انك تشوف المرأة ككيان انساني مماثل، ساعتها كل الحاجات هتتحل، هتعترف للانسانة دي بحقها.. هتحترمها من جواك

نفس الحكاية، المرأة كمان محتاجة تغير نظرتها لنفسها ولبنات جنسها، محتاجة تدي للانسانة اللى جواها حقها.

24 comments:

  1. اولا يسعدنى اوى اكون اول كومنت عندك
    ثانيا كلامك رائع وجميل .. لكن انا بحس انه كلام قديم جدا بالنسبه لى .. وياما قلته قبل كدة لكن محدش التفت .. او ساعات اتقابلت بهجوم كبير من الرجاله .. والغريبه انى كراجل بقول ان معاكى حق فى كل حاجه قولتيها..وان المشكله الأم هى نظرة الرجل للمراه

    دة الى انا قلته هنا

    http://demaghy.blogspot.com/2007/04/1_20.html

    وهنا

    http://demaghy.blogspot.com/2007/04/2.html

    أتمنى انك تقرى البوستين دول هتلاقيهم متفقين مع خطوط كتيرة من كلامك .. الفرق انهم اتكتبو فى فترة اقدم شويه

    وتحياتى لكتاباتك الطازجه وقلمك الحساس

    ReplyDelete
  2. ان قوامة الرجل على المرأة هى شرع الله وهى قوامة تكليف بمافضل الله بعضهم على بعض وبما انفقوا من اموالهم

    فالمرأة دوما مسئولة من

    وهذا لا يقلل من شأنها ولا من تفكريها ومكانتها

    فهى مسئولة من ابيها-ثم زوجها من بعد

    وان تلفت حولك الآن ستجدى المرأة فى كل مكان وفى كل موقع ومازالت تطالب بالحقوق هناك فكر مترسخ لدى المرأة انها مهضوم حقها على طول الخط وهذا ان كان موجود فى الماضى فهو ليس موجود الآن بأى حال

    اما بالنسبة للصلاة فى المسجد
    كان الأحرى بك ان تقولى ان الأفضل ان تصلى المرأة فى قعر دراها و مع السماح لها بالذهاب الى المسجد لكن فى بيتها أفضل

    ليس معنى ان تصلى المرأة الفجر فى المسجد ان هذا يعطيها الحق فى الدخول الى المنزل فى اوقات الليل المتأخرة

    لا تمنعوا إماء الله مساجد الله
    وليس التأخير فى فسحة خارج البيت او التنزة
    وكل شىء ضابط وهى ان تامن فيه المرأة على نفسها من المضايقات وما شابة لأن هذا احرى بان تتخذ تقاتها منه

    هناك سؤال ايضا لما يريد الرجل ابا كان او زوجا الا تتأخر ابنتة هل هذا من منطلق السيطرة ام من منطلق الخوف عليها

    اعتقد انه الخوف عليها

    على فكرة لم يكن هناك نسوة يسرن فى الشوارع على عهد رسول الله بعد المغرب الا ما ندر ولحاجات ملحة

    الحل

    ان هناك حقوق وواجبات
    نعرفها ونطبقها

    هذه وجهة نظرى المتواضعة
    بارك الله فيك
    كل عام انت الى الله اقرب وعلى طاعته ادوم

    ReplyDelete
  3. محمد حمدي
    كلام قديم وللا كلام جديد ، ما انا نفسي كتبت عن الموضوع ده ميت مرة،واكاري واحدة ما تغيرتش٫٫٫ انما لازم نقول يمكن حد يسمع ويعتبر
    وميرسي على اللينكات،هقراهم ان شاء الله
    ---



    الطائر الحزين
    • ايه علاقة قوامة الرجل على المرأة، بإنه يعتبرها مخلوق اقل شأننا منه؟!
    • وبالرغم من اني ماجبتش سيرة القوامة في تدوينتي ولا تعرضت لها ولا جت على بالي اصلا وانا بتكلم عن التقليل من شأن المرأة،إلا ان يبدو ان بعض الرجال بيعتبروا ف قرارة نفسهم ان كل ما يتصل بنظرة الرجل للمراة له علاقة بالقوامة عليها، ودا شىء كوميدي جدا، انا بتكلم هنا عن العموم، المطلق، نظرة الاخ لأخته وزميل العمل لزميلته، والراجل اللى فى الاتوبيس وجمبه واحدة ست، ومجموعة الرجال والنساء في ندوة عن البيئة او انفلونزا الطيور، واعتقد يعني ان كلنا عارفين ان القوامة دي علاقة زوج بزوجته فقط،وللا ايه؟
    • ثانيا،من ضمن تفسيرات القوامة (واللى انا مقتنعة بيها) هي ان القوامة تعني المسئولية مش انه يَفضُلها في شىء ٫يعني باختصار، انه بما ان المركب اللي ليها ريسين تغرق فلازم مركب الزواج يكون ليها ريس واحد وكان لازم يكون حد من الاتنين يا الراجل يا المرأة، مش هيجبوا حد من بره. يعني لو مكنش الرجل يبقى المرأة،فوقعت القرعة على الرجل، يبقى من وجهة نظر ادارية ليس الا هو عليه المسئولية النهائية ودي محدش جاب سيرتها ولا اتكلمنا فيها ولا انا هختلف مع حد فيها لأني مقتنعة بده٫٫٫٫٫انما دي حاجة والنظرة الذكورية للمرأة حاجة تانية، التقليل من شأنها حاجة تانية، اعتبارها ساذجة وغبية وداهية من دواهي الزمن حاجة تانية...
    • ثانيا، للمرة التانية بتقول كلام حق يراد به باطل،فعلا المرأة وصلت لأماكن كتيرة جدا... لكن هل دا معناه انها حصلت على حقوقها؟؟ هل وصل الرجل لقناعة من داخلة ان المرأة مساوية ليه؟ هل بيبقى الوضع بالنسبة له طبيعي ومريح لما تكون رئيسته واحدة ست؟ وللا في اول مشكلة ممكن يواجهها معاها يبتدي يقول لها "شغل ستات" ويقعد ينم مع زمايلة "ايه اللى مخراجهم من بيوتهم دول،ما يقعدوا في بيوتهم ويريحونا" .. هل يا عزيزي الطائر الحزين لما المرأة وصلت بقت وزيرة.. دا معناه الاب او (الام) بيعامل بنته زي ما بيعامل ابنه ؟ هل المجتمع نظرته للمطلقة والمتأخرة فى الزواج نظرة متساوية مع نظرة نفس المجتمع للمطلق والمتاخر فى الزواج؟ هل كل مشكلاتنا اتحلت لأن كام واحدة مننا بقوا وزيرات؟ وللا طبيبات وللا مهندسات وللا صحفيات؟
    • ثالثا: الاحرى بيا اني اقول كلمة الحق مش انى اقول اختياري الشخصي بمعني ان رغم اني بحب صلاة المرأة في البيت، الا اني عارفة ان الاسلام اعطى لها الحق انها تصلي في المسجد.. والرسول قال (لا تمنعوا اماء الله مساجد الله) والاحاديث عن صلاة النساء للفجر مع الرسول احاديث صحيحة..يبقى لما اقول ان مجتمع الاسلام الاول كان بيقبل خروج النساء للصلاة فى الفجر، ما كدبتش في حاجة، ثانيا ايه المانع انها تتأخر لصلاة او لعمل او لفسحة؟ طالما الفعل نفسه لا يغضب الله وطالما مع ناس تأمنهم وفي مكان تأمنه،والمواصلات متوفرة والطريق نور؟؟؟؟ هات نص من قرآن او حديث صحيح يقول الستات ماتخرجش من بيوتها بعد حداشر بالليل!
    • اخيرا انا معاك ان الاب او الاخ مايحبش بنته تتأخر خوف عليها.. وهي دي الحقيقة ان "موضوع عدم خروجها ملوش دعوة بالدين" ممكن يكون "ليه دعوة بنظرة الرجل للمراة انها كائن ضعيف لازم يخاف عليها" بس لما تتوافر كل عناصر الامان مايبقاش الخوف ليه معني غير ان "الناس تقول عليكي ايه لما تشوفك راجعة بالليل كده يا هانم... والله ربيتي يا ام ليلى"

    ReplyDelete
  4. النظره للمرأه بالشكل ده مش نظره ذكوريه لحد كبير جدا المرأه مشتركه فيها
    فى بعض الاحيان الاتكاليه على الرجل ومحاولة جعله شىء محورى فى حياتها او ان حياتها كلها لاتسير بدونه
    احاديث البنات فى الجامعه
    والموظفات
    والنساء فى عربات المترو
    حول طبيعة ذلك الرجل وما يرضيه وما يغضبه النظره دى بتوصل للرجل احساس بان المراه دى من كماليات حياته


    ومتنكريش ان بعض النساء موافق على ما يحدث بل يرى ان الحريه الموجوده حاليا لم تكن سوى حلم فى خيالاتهم

    يعنى النظره مش ذكوريه خالص بقدر كبير المشكله منكن ايضا

    على فكره البوست عندى ساخر بس والله يا استاذه

    شكرا لرحابة صدرك

    ReplyDelete
  5. حضرتك لم تفهمى قصدى
    اولا عندما تحدثت عن القوامة والافضلية قلت انها افضلية تكليف
    وليس افضلية نوع
    صح ولا ايه

    وبعدين ان الله سبحانة وتعالى يقول ان اكرمكم عند الله اتقاكم

    يعنى المرأة التى تتقى الله اكثر من الرجل تكون افضل منه

    وقوامة الرجل على المرأة التى تخصة مش اللى قاعده جنبة فى الاتوبيس زى ما حضرتك تفضلتى

    لا حضرتك القوامة ليست مسئولية

    لان الرجل ربنا جعل له القوامة وسيسألة عما يعول ومن هم فى قوامته

    اما المشاركة واجبة ولا احد ينكرها ولا ينكر اهميتها

    واضح ان حضرتك اعطيتى الموضوع أكبر من حجمة
    انا بتكلم عن اصل الموضوع
    يعنى كل واحد يقوم بدورة من وجه النظر التى يحددها الشرع له
    ستسقيم الامور من غير نظرة دونية او غيرة

    واحيانا كثيرة يكون مترسخ فى ذهن المرأة نفسها انها الأقل ولذلك تحاول ان تدافع دون مبرر

    بارك الله فيك
    كل عام انت الى اقرب وعلى طاعته أدوم

    هذا هو المعيار

    ارجو ان تكون وجهة نظرى وصلت لك

    ReplyDelete
  6. واضح تحفز حضرتك فى الرد وانى اتكلم فى العموم والالتزام بالحقوق والواجبات

    وحضرتك الضرر ليس مقدر له ساعه
    المهم الامان مثلما تفضلتى حضرتك

    وهل اخلاق الشارع الآن من الرجال والنساء مقتضاها الأمن اليس من ابسط الحقوق أن يحاول ان يأمن الرجل على من يعول

    اسف على الاطالة

    وفى الأخر دعوت لحضرتك وحتى لم تردى الدعاء واخذك الرد العنيف


    جزاك الله خيرا

    ReplyDelete
  7. كل سنه وانتي طيبه
    واحمدي ربنا ان مفيش بنات بتدخل البيت بعد الساعه عشرة
    دانتي تبوسي ايدك شعر ودقن


    وبعدين المراءة فعلا ضعيفة ومحتاجة لظل راجل
    بلاش مكابرة
    لان الراجل برضة ضعيف ومحتاج حنيه ست
    دة علي نفس منطق الضعف
    ومعرفش ليه سمتيه ضعف مش احتياج
    المهم
    الموضوع انك وانك بتكتبي مش مقتنعه
    لان الكلام مش مترتب
    ومش قادر يدخل قلبي ولا عقلي
    يعني
    تقدري تنكري انك نفسك تتجوزي وجوزك يبقي شخصية قوية
    ومسيطرة
    وحمش
    لا متقدريش تنكري
    وفي نفس الوقت يكون حنين وحساس
    ويحترمك
    انا عموما مبيدخلش دماغي كلام سفسطه النساء والبكاء علي اللبن اللي فاكرين انه مسكوب مع انه زي الفل موقعش منه ولا نقطة
    والستات زي الفل والمجتمع لا زكوري ولا حاجة
    والستات راكبه ازواجها ومدلدله
    والبنات بتعمل اللي هيا عاوزاه
    والست ما شاء الله
    ماسكه القيادة وبتقود الركب
    وربنا يخلي ماما سوزززززززززززان

    ReplyDelete
  8. e7na
    لا انكر طبعا ان النساء عنهم نفس النظرة الخطأ عن نفسهم،واعتقد اني وضحت ده فى التدوينة نفسها.. يا جماعة انتو بتقروا التدوينة كلها للا ايه؟؟؟
    كلامي بيوصل ازاي؟

    -----
    الطائر الحزين

    فين في تعليقي الرد العنيف اللى انت بتقول عليه؟ حسيت ازاي ان ردي عنيف؟

    اعتقد اني كنت بتناقش بكلمة قصاد كلمة وبرهان قصاد برهان، وبالتالي انا مش محتاجة اكون عنيفة ولا المفروض يوصلك الاحساس ده،الا اذا كنت انت كنت بتقرا وانت متحفز والله اعلم

    ثانيا، انا مخدتش بالي من دعاءك ليا فى اخر تعليقك، ومعتقدش ان حتى لو شفته فرض عليا اني ارده،او ان فرض عليا ان ارده مكتوبا الرد، مش يمكن دعيت لك بظهر الغيب؟

    ثالثا انت قلت

    لا حضرتك القوامة ليست مسئولية
    لان الرجل ربنا جعل له القوامة وسيسألة عما يعول ومن هم فى قوامته

    حسب فهمي يعني، ان اللي انت قلته دا متناقض.. منين القوامة ليست مسئولية ، ومنين ان الرجل سيسأل عن من هم في قوامته؟
    اعتقد ان مصطلح المسئولية شرحه هو بالظبط اللى انت قلته في الجملة

    رابعا انا ماديتش الموضوع اكبر من حجمه، انا رديت علي كل النقط الى انت اثرتها،ومش معني ان كان عندي رد عليها وكتبته اني بكبر الموضوع وللا مكنتش عايزيين ارد واكتفي بحاضر وطيب وشكرا على التعليق؟


    خامسا،انا معاك جدا ان في نساء مترسخ بداخلهم انهم الاضعف، ودا انا وضحت سببه فى التدوينة (انتو قريتوا التدوينة كلها؟؟؟)، ان النظرة دي كمان تبنتهاالمرأة وعاشت بيها.. بس لما تكون الحقيقة ان "النساء شقائق الرجال" يبقى لازم ندور كويس جوانا على المشاعر المترسخة خطأ دي ونعالجها

    -------

    yasser

    مش معنى ان الكلام مادخلش قلبك وعقلك ان انا كاتبة كلام مش مترتب او اني كاتباه وانا مش مقتنعة
    في حاجة اسمها اختلاف الرأي..ممكن اكتب رأي ما تقتنعش انت بيه.. بيبقى اختلاف ادمغة وطباع مش اكتر، مش ضروري ابدا تدور على شماعة "اسلوب الكتابة" عشان تقول انك رافض رأيي ومش مقتنع بيه

    الاختلاف في الراي لا يفسد للود قضية.. لكن تسفيه الرأي ومحاولة تشويهه بالتشكيك في اسلوب الكاتب وقناعاته شىء يفسد كل ود بصراحة
    بس عشان احنا في رمضان مش هزعل،عشان رمضان بيحب بيبسي وبيبسي بيحب رمضان

    وبعدين اذا كان كلام النساء سفسطة وبكا على اللبن المسكوب ما كنتش تعبت نفسك وكتبت تعليقك على كلام انت بتعتبره سفسطة الا اذا كنت عايز تعرفني عملي يعني ايه التعليقات السفسطائية

    ReplyDelete
  9. انا اخطأت لما قلت القوامة ليست مسئولية كنت اقصد مسئولية وهذا وضح من التفسير بعدها
    شكر الله لك على التصحيح

    ابالعكس من يغضب من الرأى ولارأى الأخر؟؟

    ايه علاقة قوامة الرجل على المرأة، بإنه يعتبرها مخلوق اقل شأننا منه؟!
    هذا هو ردك الأول انا ارى ان هذا هو أصل المشكلة لان الرجل يرى انه افضل وبالتالى ينظر للمرأة نظرة أقل لانه وهو القيم عليها
    لهذا قلت فى البداية أن الافضلية هى افضلية تكليف وليس نوع
    انا قصدت أنى رددت الموضوع لأصلة فالمرأة فى قوامة الرجل دوما
    كون الرجل يستغل هذه القوامة استغلال سىء أو يستغلها بشرع الله ويتق الله فى من هم تحت قوامته هذا موضوع أخر
    وسيحاسب علية الرجل بالقطع اذا ظلم او تعسف او ....

    وهناك اشياء يكون للرجل او للعائل سلطة مطلقة فى الاوامر ما دام لا يمنع شرع الله

    يعنى مثلا بنتى تقول لى انا نازلة اتفسح فانا من حقى اقول لها لا بلاش اليوم

    لكن لو قالت لى انا هصلى العصر لا يجوز اصلا ان اقول لها لا ولا يجوز اصلا ان تستمع لى

    بارك الله فيك
    وارجو ان تكون وجهة نظرى وصلت

    ReplyDelete
  10. حين توجد مثل هذه المشكلة تكون مشكلة أكبر من مجرد النظرة للمرأة
    فهي مشكلة شخصية وتفكير
    والشاب الذي يتحدث عن صديقته على أنها مزة يفتقد للاحترام بوجه عام
    وهو في الغالب لن يكون انسانا يتمتع باحترام الناس له
    او باحترامه هو للناس

    والأمثلة كلها على هذه العلل هي ظواهر لخلل في التفكير والشخصية
    سواء عند الرجل أو عند المرأة

    فكم من زوجات غير أمينات على أزواجهن مثلا بشكل أو بآخر
    من أول ذكره بما لا يحب عند صديقتها أو أمها
    أو التربص بماله وكأنهما ليسا في شركة ولكن في علاقة مصالح
    ثم تجدين زوجا لا يحترم زوجته او لا يعبأ بها

    الأمثلة كثيرة جدا على الخلل بين النساء وبين الرجال
    ولا أستطيع أن أقول ان الخلل في التفكير موجود لدى الرجال وحدهم
    ولكنه خلل في ثقافة المجتمع
    وهي ثقافة فاشلة في علاقة الرجل بالمرأة كما هي في اشياء أخرى كثيرة
    حتى في مفهوم الزواج وكيفية التعامل معه نجد تفكيرا فاشلاً جعل من الزواج في كثير من الأحيان مشروعاً مالياً خطيرا
    وليس اجتماع وسكن بالرحمة والحب والتوافق

    إذا استقام تفكير الانسان رجلا كان او امرأة فسوف تستقيم نظرته وعلاقته للجنس الآخر

    ReplyDelete
  11. القوامة ليست لها علاقة بالنظرة الدونية للمرأة
    ممكن تكون مسئول عن المرأة تحبها وتحترمها وتحميها وبرضه تعاملها كإنسان مساوي - وده مش هبة منك لأنها فعلا إنسان مساوي - في كل حاجة تاخد رأيها وتحترمه وتحترم أحلامها وطريقة تفكيرها وتعطيها - زي ما بتعطي نفسك - حرية الخطأ
    ولكن يمكن موضوع حرية الخطأ دي هي اللي بتخلي الرجل يبالغ في فرض قيوده على المرأة

    ReplyDelete
  12. رغم اني من قراء بلوجك و لم اقرا للناس التانيه قبل كدا .
    بس بصراحه و الحق يتقال
    ايوه انت بتقولي الكلام اخذ و عطا ... بس
    انت كلامك فيه عصبيه شويه ...و عنيف
    ========
    انا تماما مع كلام الطائر الحزين
    و ياسر
    و محمد شدو
    انا مع القوامه و لكل بالمفهوم الصحيح للاسلام
    قوامة الفضل لا قوامة القهر

    ====
    الحاجه عايز اقولها لانك معترضه علي قوامه الرجل
    حديث الرسول عليه الصلاه و السلام
    كلكم راع و كلكم مسئول عن رعيته : فالإمام راع و هو مسئول عن رعيته ، و الرجل راع في أهله و هو مسئول عن رعيته، و المرأة راع
    في بيت زوجها و هي مسئولة عن رعيتها ، و الخادم راع في مال سيده و هو مسئول عن رعيته ، و الرجل راع في مال أبيه و هو مسئول عن رعيته ، فكلكم راع و كلكم مسئول عن رعيته )

    كل واحد مسئول عن حاجه
    الرسول مقالش الرجل و المرأة راع و مسئولا عن بيتهما .

    حدد حاجات للراجل و حاجات للست ...
    مينفعش احنا بقي نيجي نخلط بينهم ..

    ===
    حاجه تانيه
    الي بتقولي فيها هات حديث او نص قران بيقول الست متجيش 11 بالليل .
    اولا مفيش حاجه اسمها كدا ...
    الاسلام قال لما يكون حاجه مش موجوده في الكتاب و السنه بنمشي علي العرف السائد ...
    و العرف السايد عندنا ان البنت متتأخرش ... دا صيانه ليها ...
    مش ذل ليها ...تسعين في الميه من البنات البايظه بيكون مواعيدهم كدا ...

    ===

    بالنسبه للايه الي كنتي بتستشهدي بيها .. لو تكملتيها للاخر
    قوامة الرجل ثابتة بنص القرآن: (الرِّجَالُ قَوَّامُونَ عَلَى النِّسَاء بِمَا فَضَّلَ اللّهُ بَعْضَهُمْ عَلَى بَعْضٍ وَبِمَا أَنفَقُواْ مِنْ أَمْوَالِهِمْ...)الآية[النساء:34].

    ايوه ربنا فضل بعضهم علي بعض..
    ولا في اعتراض علي كلام ربنا..
    دا الطبيعي و الي اتعودنا عليه من يوم ما بعث محمد عليه الصلاه و السلام لغايه العصر العجيب الي احنا جينا فيه دا ...
    من ساعه ما المرأة عماله تتكلم عن حقها و هي بقت كائن مخوخ هش ...من عارفه تحدد طريقها...
    كميه البنات المتبرجه اخذ في الزياده
    كميه الانحلال الاخلاقي
    ... انا مش بعمم.. لا لغايه دلوقت في بنات هم مثال و نبراس للجميع
    و برضو مش معني كدا ان زمان كان البنت واخده حقها كامل ... بس دلوقت هي اخدت بزياده..و اخدت حاجات زياده فعلاً .

    =====
    سيبك من دي يقولي ايه بقي لما ربنا قال
    "ولهن مثل الذي عليهن بالمعروف ... وللرجال عليهن درجة"
    !!!!!!!!!!!!!!

    ReplyDelete
  13. زي متفقن الكلام اخذ و عطا ...
    اسف لو الكلام جاف شويه اعذريني...
    الدنيا صيام و الواحد مش شايف ادامه ..

    ReplyDelete
  14. أولا
    إحنا كمجتمع كير مابنخلط بين الدين والعادات والأعراف والتقاليد ..وده للأسف الدين بيجي في الرجلين ..وكمان الفهم الخاطئ للدين
    ........

    ReplyDelete
  15. دعوة لكل المدونين ..للإشتراك في إقتراحات لتدوينة في حب الرسول صلى الله عليه وعلى إله وسلم

    ReplyDelete
  16. نقاش لا بأس به و لكن عندما ترى الحياة فى الغرب ، ستطالب بناتنا و سيداتنا بأن ما وصلن اليه من حقوق يكفى

    ReplyDelete
  17. الأخت البنت المصرية
    كل عام وأنتم بخير
    لقد استفدت افادة بالغة فى نشر مدونتى عن القصة القصيرة المصرية ..
    ولكن
    وجدت شريط كتابة وتنسيق التدوين أختفى ..
    أكون شاكرا لكم شرح الخطوات التى يتعين اتباعها لإعادة شريط التنسيق
    مع خالص الشكر والتحية
    على عبد اللطيف
    القاهرة
    http://shortstory1935-1986.blogspot.com/

    ReplyDelete
  18. دى مشاكل مجتمع مش نظرة الراجل
    ما ينفعش التعميم
    ما ينفعش تقولى الراجل نظرته كذا
    او بيفكر كذا
    او مجتمع ذكورى
    وبرامج ست ستات دى

    ReplyDelete
  19. السلام عليكم
    ازيك يا زينب

    فى الحقيقه الموضوع دا تاعبنى جدا لدرجة انى بعمل عنه دراسه

    بس الفكره بقى ان مادمنا اعترفنا ان الدين مالوش علاقه وان المشكله مشكلة افكار سائده فى المجتمعات العربيه

    شوفى بقى ايه اللى حصل
    الافكار زى ماهى ... ماشى ؟
    الدين مالوش دعوه
    بس الستات وبالغم من القهر مثلا زى ما بيقولوا كانت متعففه ومحتشمه والشباب مكانوش بالشكل والمصايب اللى بنشوفهم دلوقتى وكان فى حاله من الحياء

    لحد ما جه قاسم زفت امين
    فهم حرية المرأه غلط فهمها بوجهة النظر اللى شافها فى اوربا
    فحاول يغير فى المجتمع
    فبدل من نشر فكره حرية المرأه نشر فكره تانيه خالص هو نفسه مكانش فاهمها اسمها تحرير المرأه
    وانا ارى ان كان المفروض تحرير الرجل من قيود عقله مع الحفاظ على المرأه كما هى والدعوه فقط الى تعليمها فى مدراس بنات

    وربنا يستر على الامه

    ReplyDelete
  20. حزين
    جميل اننا متفقين على ان العادات والتقليد هي المشكلة وان الدين ملوش علاقة
    بالعكس الدين اعطى المرأة حريات ومسئوليات واعتبرها كائن مستقل في حين ان العادات عملت على تجنيب الحقائق دي ووجهة نظر الدين نفسه

    بس قبل ما تتكلم عن قاسم أمين.. هل انت قريت كتابه قبل ما تصدر قرارك بإنه زفت؟

    انا عن نفسي لما كنت اسمع زمان عن قاسم أمين كنت الاقي ناس تقول عليه محرر المرأة والناس دول ف الغالب انا بختلف معاهم على مفهوم الحرية وبالتالي حسبت قاسم أمين منهم طالما بيتكلموا عنه حلو كده

    والقسم التاني كانوا يقولوا قاسم امين لعنه الله اللى خرج الستات من بيوتها وعلمهم قلة الحيا.. ودول القسم اللي بيقول انه متمسك بالدين بس الحقيقة انه متمسك بعادات اكتر منها دين

    فلما قريت كتاب قاسم أمين الى هو "تحرير المرأة" ،وبرغم الخلفية اللى مش لذيذة اللى اتكونت جوايا تجاهه،فأنا فوجئت بكتابه وفوجئت بفكره واحترمته واحسبه رجل جاء يقول كلمة حق في وجهة مجتمع هو ابعد ما يكون عن الدين وقتها
    وعلى فكرة كان كلامه كله يقول ربنا قال والرسول قال.. كان متمسك بالفكرة الدينية وكان معلن ده ولم ينكره،
    يعني لو كان قاسم أمين بصفته وافكاره وطريقته في التناول دلوقتي كنا حسبناه على التيار الاسلامي باختصار
    بمعنى اخر، هو مجاش من اوروبا يقول يا مجتمع يا متخلف سيبوا الدين وامشوا ورا الغرب وحرية الغرب، بالعكس تماما، هو جه يقول ربنا قال والرسول قال

    وبصراحة انا شايفة انها مسئولية علينا نوضح للناس حقيقة قسم امين واختلاف دعوته عن الدعاوي اللي ظهرت بعده.. اننا نديله حقه المهضوم

    فإذا قرأت كتابه بنفسك، واختلفت معاه فى نقاط.. فدا وارد وممكن جدا، زي ما ناس بتختلف في الرؤية والتفسير

    ياريت تقرا كتابه، وتيجي نتناقش فيه ونشوف الراجل ده كان بيفكر ازاي وبيقول ايه
    :)

    ReplyDelete
  21. alyabdellatif & lailamahmoudelbadawy

    اولا ادخل ال
    settings
    بتاعة البلوج بتاعك ومن صفحةال
    basic
    اتأكد ان
    Show Compose Mode for all your blogs?
    معمولة
    yes
    وطبعا لو مش كده، اعملها واضغط الحفظ


    وبعدين لما تيجي تكتب بوست فى صفحة التحرير
    اتأكد انك مختار الوضع
    compose
    وليس
    edit-html

    ReplyDelete
  22. طيب ليه ما تقدميش عرض لكتاب قاسم أمين؟

    كتاب قاسم أمين لم يفعل شيئاً
    وأي تغيير حدث في المجتمع لابد أنه كان نتاجاً لعوامل عدة
    وانا شخصياً لا أحسب أن كتابا أو كاتبا واحدا كان هو العامل الأول أو الأقوى

    يا ريت كان كتاب واحد قادر على تغيير مجتمع
    !!

    ReplyDelete
  23. محمد شدو

    والله فكرت في كده بعد ما نشرت تعليقي على حزين
    ان شاء الله هجهز حاجة عن الكتاب

    عندك حق ان مش كتاب بس هو اللى يغير المجتمع
    انما اللى اعرفه ان وقت ما صدر كتاب قاسم امين اثار ضجة وقوبل بالرفض
    وبعدين وفاة قاسم امين المبكرة ادت لحركات التحرير بعد كده فرصة تلتصق بإسمه انما مش بأفكاره

    ReplyDelete
  24. نظرة تاريخية على دور المرأة والظروف التى مرت بها :

    المرأة فى المجتمع الشرقى مظلومة ، وهى لم تتحرر ولم تأخذ مكانتها إلا على مدى سنوات قريبة ، وقد كانت فى العصور الأولى ، لاتعتبر أكثر من أداة متعة .

    أما الإسلام فقد حرر المرأة وأوجد لها مكانتها فى التاريخ ، ولقد كان منها من يقاتل فى عصر النبى ، ويضمد الجرحى ويخطب ويناقض عمر بن الخطاب فى تشريعاته ، ولكن بعد الخلافات الشديدة التى حدثت بين العباسيين والأمويين والانتكاسات التى حصلت بعد مقتل الحسين ، تدهورت حالتها فى هذا الجو الكئيب من الفتن والدسائس حتى أصبحت جارية تباع وتشترى .

    وفى مصر بدأت الانتفاضة بعد عصر قاسم أمين ، فقد دافع عن المرأة دفاعا حارا وبين مكانتها فى صدر الإسلام وفى عهد الخلفاء الراشدين وتأثيرها على من بعثوا الثقافة إلى أوج عزها فى عصر هارون الرشيد والمأمون .. وطبعا لاقى قاسم أمين الاعنات من بعض المتخلفين وذوى العقول الجامدة ، ولكنه انتصر ، وظهر انتصـاره عندما بدأت السيدة هدى شعراوى وعائشة التيمورية .

    وبعد ذلك حدث تطور سريع ودخلت الفتاة المصرية الجامعة لأول مرة ، وخرجت إلى العمل فى الأربعينيات وأصبحت موظفة فى كل مرافق الدولة .

    نظرة تاريخية على دور المرأة والظروف التى مرت بها :

    المرأة فى المجتمع الشرقى مظلومة ، وهى لم تتحرر ولم تأخذ مكانتها إلا على مدى سنوات قريبة ، وقد كانت فى العصور الأولى ، لاتعتبر أكثر من أداة متعة .

    أما الإسلام فقد حرر المرأة وأوجد لها مكانتها فى التاريخ ، ولقد كان منها من يقاتل فى عصر النبى ، ويضمد الجرحى ويخطب ويناقض عمر بن الخطاب فى تشريعاته ، ولكن بعد الخلافات الشديدة التى حدثت بين العباسيين والأمويين والانتكاسات التى حصلت بعد مقتل الحسين ، تدهورت حالتها فى هذا الجو الكئيب من الفتن والدسائس حتى أصبحت جارية تباع وتشترى .

    وفى مصر بدأت الانتفاضة بعد عصر قاسم أمين ، فقد دافع عن المرأة دفاعا حارا وبين مكانتها فى صدر الإسلام وفى عهد الخلفاء الراشدين وتأثيرها على من بعثوا الثقافة إلى أوج عزها فى عصر هارون الرشيد والمأمون .. وطبعا لاقى قاسم أمين الاعنات من بعض المتخلفين وذوى العقول الجامدة ، ولكنه انتصر ، وظهر انتصـاره عندما بدأت السيدة هدى شعراوى وعائشة التيمورية .

    وبعد ذلك حدث تطور سريع ودخلت الفتاة المصرية الجامعة لأول مرة ، وخرجت إلى العمل فى الأربعينيات وأصبحت موظفة فى كل مرافق الدولة .

    ــــــــــــــــــــــــ
    حوار محمود البدوى مع الناقد ابراهيم سعفان نشر بصحيفة الوطن العمانية فى 3|8|1981 ومن كتاب سيرة حياة محمود البدوى للكاتبين على عبد اللطيف وليلى محمود البدوى والصادر عن مكتبة مصر 2002 "

    والمزيد لمن يريد فى مدونتى

    ReplyDelete