صباح اسود على عيونك يا مصر

الخبر الأسود اللى كنا خايفين منه حصل.. اعتقلوا عبدالمنعم، اعتقلوه من غير اذن نيابة وكله بالدستور الجديد.. وهيعذبوه بتوع امن الدولة زى ما بتوع الشرطة ما بيعذبوا المصريين.. اتفرج على حلقة الجزيرة عن التعذيب، اما المجرمين فى حق مصر والمصريين فاحنا زهقنا منكو خلاص ومش مستحملين اكتر من كده ، اياكو تمدوا ايديكوا عليه يا كلاب

لأني مدونة: هل تقبل شهادتي وللا مجروحة؟

رحت النهاردة لجنة من لجان الاستفتاء، هى نفسها اللجنة اللى رحت انتخبت فيها قبل كده. وكلمتكوا عليها.. مدرستى الجميلة اللى كل ما اشوفها افتكر البراءة والضحك واللعب واحس انها مكان مقدس مينفعش يلوثوه بالتزوير والغش والضحك ع الدقون

المهم.. انا اصلا اخدت بعضى ورحت وانا خايفة اتاخر ع الشغل، بس استبيعت بصراحة وحسيت انى مسئولة اوى اروح.. بما ان يعنى نص الشعب مايعرفش حاجة، والنص التانى مقاطع الا قليل.. والقليل بأه يإما انصار الحزب الوطنى او اللى زيي هيروح يقول لأ ومش هيقاطع

اول ما وصلت لقيت طنط اللى هى حد مهم فى الجناح النسائى بالحزب الوطنى عندنا فى بلدنا.. وهى تعرفنى وتعرف ماما شخصيا، كان الجو هادى جدا، وكل اللى موجودين طنط دى وخمس ست سيدات وسبع تمن بنات، كلهم حواليها ماسكين كشوف وبطاقات مكتوب عليها الحزب الوطنى

سلمت على طنط وهى اتبسطت لما شافتنى، سألتنى بشتغل فيه دلوقتى وازى ماما واخواتى وكده
وبعدين خلت البنات يقفوا يدورا على اسمى فى الكشوف اللى معاهم

وانا واقفة جمبها وهى بتتكلم معايا، جت واحدة وهى بتقولها: اللجنة سبعتاشر حلوة اوى و
انا حسيت طبعا بلعب فقلت اطرطأ ودانى
بس طنط قاطعتها فى الكلام وقالت لها طيب اسكتى ، دا وقته

المهم لاقوا اسمى وكتبوه فى بطاقة وادهولى وشاورولى على اللجنة بتاعتى
وسبت طنط وقلت لها بعد اذنك، قالت لى ابقى عدى عليا بعد ما تخرجى
قلتها حاضر

طلعت الدور التانى، واخدت الورقة، واتلفت على الستارة، فقلت للراجل، اروح هناك.. سؤال غبى لا مؤاخذه معرفش سألته ليه
بس النكتة بأه انه قاللى: هناك او هنا... براحتك
هو ما شفش البطاقة بتاعتى على فكرة

رحت ورا الستارة وعلمت على الدايرة السودا.. هما ليه عاملين الرفض بدايرة سودا.. هل معناه انها سنة سوده على دماغ الرافضين للتعديلات؟
وبعدين حطيت الورقة فى الصندوق بعد ما طبقتها، وخرجت من غير ما يوصمولى صباعى بالحبر الازرق ده

وخرجت
ورحت لطنط اشوفها عايزة منى ايه
فوجئت بيها بتقولى: ما تيجى ادخلك لجنة تانية
انا ضحكت ضحكة ساذجة اوى وقلت لها ايه لأ ، ماينفعش، اصلى متأخرة ، شغلى فى مصر

وسلمت عليها وسيبتها وانا مخضوضه من العرض اللى عرضته عليا
طبعا هى عرضته عليا لانها متصورة او واثقة منى انى تبعها مش تبع الناس التانيين
بس انا والله لما بسلم عليها اوبضحك فى وشها، لانها صحبة ماما وست كبيرة وبحترمها

ازاى هى تتصور انى ممكن اشاركها فى الغش والتزوير.. طيب هتقولولى ليه ماديتهاش محاضرة فى الحلال والحرام وجاية تقوليها هنا
هقولكوا لانها ست كبيرة، واكتسف اقولها حاجة زى كده.. وكمان معتقدش ابدا انها هتسمع لأن دا اللى بتعمله فى كل انتخابات.. ازاى هتيجى النهاردة وتسمع من عيلة زيي

طيب هتقولولى كنتى استغليت الموقف ووافقت وطلعت علمت بالرفض تانى
بس طبعا دا بردو اسمه غش، وتزوير، والهدف لا يبرر الوسيلة باختصار

المهم انا لحد دلوقتى مخضوضه.. باه الحكاية سهلة اوى كده؟ اطلع ادى صوتى ومايتعلمش على ايدى بالحبر، وما يبصوش فى بطاقتى الشخصية، واخرج من لجنة اروح لجنة باسم حد تانى وادى صوتى وما يتعلمش على ايدى بالحبر، وما يبصوش فى بطاقتى الشخصية، واخرج من لجنة اروح لجنة باسم حد تانى وادى صوتى وما يتعلمش على ايدى بالحبر، وما يبصوش فى بطاقتى الشخصية واخرج من لجنة اروح لجنة باسم حد تانى و يالاااااااهوى

ما تيجوا نبتكر زى الحزب الوطنى

"

يا أهالي ### الكرام
غدا موعدنا
نشارك جميعا فى تعديل الدستور
غدا الاتنين 26 مارس
من أجل أولادك.. من أجل وطنك
من أجل مستقبلك
قول: نعم نعم نعم

"
دا نص النداء اللى كانوا بيلفوا بيه الليلة دى بعربية سوزوكى.. (هما مين؟ الحزب الوطنى طبعا) وبيحرضوا الناس يقولوا نعم للتعديلات بكرة

طيب ما دام الحكاية كده، ليه المعارضة المصرية والحركات "المنبثقة".. ما تجيبش عربيات، ان شا الله كارو بحمار، وتمشى تنادى كمان على الناس.. تقولوهم يقولوا لأ.. تقولهم التعديلات الجديدة دى خراب.. دى دستور الوسية الجديدة

ضرب واهانة علاء فى قسم العمرانية

تحديث: تم الافراج عن علاء

علاء سيف صاحب مدونة منال وعلاء، والمعتقل سياسيا فى أحداث القضاة لم يتم الإفراج عنه حتى الآن
كان قد صدر قرار الإفراج عنه يوم الثلاثاء الماضى 20 يونيو 2006
موجود حاليا فى قسم العمرانية وبات الليلة الماضية فى زنزانة مع جنائيين، وقام بعضهم بضربه واهانته
الزنزانة التى يوجد فيها علاء الآن ضيقة جدا وبها عدد كبير من الجنائيين معه، وسيئة التهوية
لم يتم وضع علاء فى زنزانة أفضل من ذلك رغم توافر زنازين أكثر آدمية
الحالة النفسية لعلاء سيئة جدا
وكان من المفترض أن يتم الإفراج عنه صباح هذا اليوم الخميس 22 يونيو 2006، لكن توجد مماطلة فى إجراءات الإفراج عنه
علاء هو المعتقل السياسى الوحيد فى قسم العمرانية لا أحد معه من المعتقلين
الخبر من مالك
thur june 22th 206 - 4.00 pm


تحديث: تم الافراج عن علاء

التنين افراج يا عمرانية

آآآآآآآآآآآآآآآآآ..... علاء أخد إفراج

دا مالك.. كلمنى وقالى كده,, علاء هيخرج بكرة

أخيرا يا بلوجرز.. حمدالله على سلامتك يا علاء، ومبروك يا منال