صباح اسود على عيونك يا مصر

الخبر الأسود اللى كنا خايفين منه حصل.. اعتقلوا عبدالمنعم، اعتقلوه من غير اذن نيابة وكله بالدستور الجديد.. وهيعذبوه بتوع امن الدولة زى ما بتوع الشرطة ما بيعذبوا المصريين.. اتفرج على حلقة الجزيرة عن التعذيب، اما المجرمين فى حق مصر والمصريين فاحنا زهقنا منكو خلاص ومش مستحملين اكتر من كده ، اياكو تمدوا ايديكوا عليه يا كلاب

بالفيديو، من مدونة دماغي: كيف تدون على بلوجر

محمد حمدى، صاحب مدونة "دماغى" عمل فكرة جميلة وهى انه قام بشرح كيفية التدوين من خلال ملفات فيديو

ان شاء الله تكون مفيدة لكل الناس، ومتشكرين جدا يا محمد

تراجيديا بطعم التردد

الحكاية ببساطة ان بعد الكشف اللى تم على ايد عمرو، وبعد ما الموضوع انتشر على المدونات واتعلق حوالى تلاتة اربع اسابيع على بوابات ومداخل ومخارج العمرانية ليراها القاصى والداني.. راح عمنا ورفع قضية على الحكومة - ضدها يعنى - مختصما فيها رئيس الوزراء وكام حد تانى، بيطالب فيها بحجب عدد واحد وعشرين موقع ومدونة من ضمنهم - الفقيرة لله -مدونتى، بكام تهمة كده م اللى قلبك يحبهم

ايشى اساءة سمعة مصر
ايشى اهانة الرئيس
وقال كمان ارهابيين وحرامية ملكية فكرية وشوية تحابيش بقى من بتوع سب وقذف وكده

أول ما قرأت خبر القضية دى.. لم أملك امام هذا الموقف إلا فاه فاغرة من كثرة الاندهاش.

الاندهاش.. هذا الفعل الذى ظننت انى تخطيته وما عدت أتمتع به -و فى قول آخر لم أعد مصابة به- الحقيقة أننى فى حالة دهشة قائمة من يوم وصلنى ايميل عمرو غربية بخصوص المستشار عبد الفتاح مراد وهو المستشار الذى كشف عمرو فى تدوينة له قيامه بأخذ جزء كبير من شرحى لكيفية عمل مدونة فى كتاب له ودون أخذ إذن منى طبعا، كما كشف تكرار نفس الحادثة مع الشبكة العربية لحقوق الانسان.

قلت فى البداية يمكن تكون روزاليوسف - اللى نزلت الخبر - أخطأت - وما أكثر ذلك فى الصحافة المصرية- وادرجت اسم مدونتى خطأ

لكن الخبر كان صح والعريضة اللى رفعها القاضى والى انتشرت على النت مذكور فيها بنت مصرية (ايوه يا فندم اخر القائمة، مجرد اسم المدونة بدون تعريف لها او لصاحبتها مع ذكر عنوان التدوينة اللى جت فيها سيرة حضرته)

مفكرتش ساعتها المدونة ممكن تتحجب وللا لأ، انا شايفة ان اللى يعمل مدونة يعمل عشرة، خلاص عرفنا السكة ومحدش يقدر يرجعنا منها -كلام كبير ده :)- ومفكرتش كمان فى ان القاضى اللى هينظر فى القضية دى ممكن يدخل عليه الكلام الغريب اللى جاى فى العريضة، يعنى بشىء من الفحص والبحث والتدقيق قى الكلام ده هتتضح قصاد القاضى اللى المفروض تنظر القضية محكمته حقيقة الموضوع وخصوصا لو قرر انه يسمع من اصحاب المواقع والمدونات دى نفسها، وساعتها هيعرف الحقيقة المثبتة ويا سلام لو طلب شهود مثلا

انا عن نفسى حكاية ان القاضى اخذ من الشرح بتاعى وحط فى كتاب من غير استئذانى او ذكر المصدر، فسهل جدا اثبت اسبقيتى فى النشر، وبوقت اطول بكتير من النشر بتاعه، يعنى هو مثلا رقم ايداع الكتاب بتاعه فى 2007 انما عندى ادلة تثبت نشرى للشرح فى مايو 200.. والاهم من كل ده، عندى شهود

ولو قلت يا شهود.. هلاقى الف من يشهد من المدونين وعابرى المدونات يقولوا لسيادة القاضى ان الدليل بتاعى ده بنفس المحتوى الموجود دلوقتى ده هو نفسه المحتوى الللى اتنشر فى مايو 2006.. وانا عارفة انى يوم ما اقول تعالوا اشهدوا هتيجوا وتقولوا الحق

وامبارح لما حضرت الاجتماع اللى عقدته الشبكة بخصوص القضية والحجب قررنا كلنا نقف فى وش الموضوع ده.. حكاية الحجب دى وبنوعية التهم دى اقل ما يقال عنها انها تعسفية جدا ان لم تكن سب وقذف فى حد ذاتها.. قال ارهابيين قال

انما اللى حصل ده نفسه كان شىء من الدراما العالية بالنسبة لى، واحدة لسه كان عيد ميلادها بتحتفل بيه وفرحانة ما تعرفش ليه ، بتعيش حياتها البسيطة والخفيفة واللى مافيهاش دراما تقريبا.. كله لايت كوميدي كده :)) وتيجى بعد عيد ميلادها بيوم واحد تتحط فى موضوع فيه محاكم وقواضى وحقوق وانتهاكات وحرية رأى وارهاب -ولكم ان تتصوروا التهمة دى فى ظل التعديلات الدستورية الجديدة - وسياسة واهانة رئيس - كله طبعا الا اهانة سيادة الرئيس - دى بقت لعبة جامدة اوى
اوعى، سيبى اللعبة بتاعتى
لأ دى بتاعتى..
يا سلام يا اختى
ما تشدش..
طب يالا سبيها..
ماتشدش..
ماتشديش انتى..
ما تشديش ما تشديش انتى


اه.. بس اللعبة دى صعب تتكسر، ومش هتتتطلع منها نيللى وتقول:"ما هو انا اصل اللعبة"
وانا اصلي بحب نيللى ;(

اهو بالظبط كده حاسة ان الدنيا بتقولى
welcome to the real world ya shabba!

والمفروض عليا دلوقتى انى اقرر اعمل ايه.. واتصرف ازاى..
ماتيجوا تلعبوا معايا؟؟ ماقصدش طبعا ادبسكوا ، حتى معرفش ازاى.. انما ليفترض كل واحد انه مكانى.. وبكل واقعية وحق يقولى اللى يعمله لو كان مكانى..

ارجوكم ردوا عليا وفكروا معايا بصوت عالى.. دى اكتر تدوينة انا محتاجة فيها تعليقاتكوا.. سواء كنتوا بتقروا لى دايما او ماهمكوش فى حاجة.. سواء حبتونى او كرهتونى او معدتش على تفكيركوا اصلا

أنا اسرقت يا مينز

اكتشف صاحب الأشجار إن بنت مصرية اتسرقت

دى حلقة جديدة ضمن مسلسل الاكتشافات الخاصة بحالة النقل "الغير معرف المصدر" اللى وجدها عمرو

Let's celebrate 31 August

It's time to celebrate :)
31 August.. ding ding

I'm presenting five blogs in this special day, let's start

1- le batteur noble

it's a lebanese blog, most of its recent posts give shots of lebanon after the 33 days war. Nobilis tobilis -the blog writer- says in one of his posts:

Hi again. I know it's been a long time. The fact is that I've been volunteering in Beirut, helping in the relief efforts for the displaced people and also working on independent projects, mainly a project pertaining to the mental health among the displaced people in Beirut during this war. I had many findings from visiting and meeting the displaced people. The war in general has changed my perspective to my country. Well, Lebanon is not only the Downtown Beirut.

ok.. stop it, i'll let know more just visit : le batteur noble


2- STOP DESTROYING LEBANON

Well, such a cry. This blog depends only on photos of Lebanonn after war, lots of them. You can see ISRAELI GIFTS BEFORE CEASE FIRE as one of the blog's titles says.
visit: STOP DESTROYING LEBANON

3- Cold Desert

Our third blog, A Lebanese blog... suffering the consequences of the Israeli war on Lebanon started. that's what this blog's writer says about his blog. find out more just serve the: Cold Desert


4- Gad Fly

You know, blogging is just great. Fadi -from Beirut- says: This blog was conceived at a time of war, when Israel is fighting Lebanon. We have to fight, and next, we have to win.

see how blogging can be the voice of voiceless!

Fadi believes that UN is not for United Nations, but for Unjust ,UNfair, UNethical or UNpardonable
funny?! ok then find out what USA stands for :)) take a look: Gad Fly

5- PASSING FOR NORMAL...

Mirvat, a lebanese girl describes how she feels about Lebanon, and how Lebanon is like a heaven and a father to her.
well, she says:
n these difficult times, the collective human psyche tends to clench up in an almost regressive state of extreme nationalism and social identity. I have never seen an overt celebration of Lebanon and a severe state of nostalgia and longing and belonging as I have seen since June 12. As we religiously reminisce about details and feelings and memories that we cherish and share, we might be mistaken to be living a sentimental bourgeois dream that only remains in our consciousness and that does not reflect the reality. Just like Fairuz songs. We have transcended from the bleak reality and imagery and evoked our mental treasures of what we see Lebanon was, is and should be. Maybe it is our way of locking the memory and preserving It from destruction. Maybe it is a foolish dream. Maybe it is a state of mind. So be it. Lebanon is and will remain the Levant of cultures, humanity, arts, love and our identity. It is heaven on earth but mostly it is the heaven in our hearts.
Lebanon is my father. Tough, old and dignified. Beirut is my mother. Warm, ageless and beautiful.

In this particular post, many lebanese bloggers describe how they feel about Lebanon, then you better go go go go now, read what they say here where Mirvat PASSING FOR NORMAL...

يا كل المدونين.. مصريين.. وعرب.. شاركوا

فرصة أتت لنا ولم نسعى إليها.. نحتاج أن يسمع العالم صوتنا، ربما تكون البداية هو عالم المدونين الذى ننتمى إليه.. ليسمع المدونون من أنحاء العالم صوتنا.. لنستغل فرصة إحتفالية يوم المدونة العالمية

ماهو يوم المدونة:

بدأت فكرة يوم المدونة بإعتقاد أن المدونين يجب أن يكون لهم يوم مخصص للتعرف على مدونين آخرين، من دول أخري أو مناطق مختلفه واهتمامات مختلفة. في هذا اليوم سيقوم المدونين بترشيح بعض المدونات ليقوم زوار مدونته بمطالعه هذه المدونات. من هنا جاءت الفكرة.. لنعطى المدونين من جميع أنحاء العالم الفرصة للتعرف على الصراع العربى الإسرائيلي وأخر أحداثه "الحرب على لبنان" .

ماذا سيحدث في يوم المدونه؟ :

خلال يوم 31 أغسطس، سيقوم مدونون من كافه أنحاء العالم بتدوين أسماء 5 مدونات يرشحونها، ويفضل أن تكون هذه المدونات من ثقافات غير ثقافاتهم، وليست بالضروره تتفق مع وجهات نظرهم أو توجهاتهم. في هذا اليوم، سيتاح لمتصفحين المدونات أكتشاف مدونات جديدة، مدونات لم يعلموا بها، أجواء أحتفاليه بإكتشاف أشخاص جدد ومدونين جدد.


دورنا:

الفكرة الأساسية التي سنعمل عليها هي كتابة مقدمة بسيطة ومختصرة توضح ما ترتكبه اسرائيل في حق العرب عموما والفلسطينين و اللبنانيين خصوصا، وهذا معناه أننا سنتحدث عن مذابح اسرائيل في كل من فلسطين ولبنان مثل مذبحة خان يونس ( التي تصادف ذكراها الخمسون نفس يوم الاحتفالية ) ، مذبحتي قانا ، والمذابح الأخرى التي تعرض لها عالمنا العربي على يد هؤلاء القتلة.


كيفية المشاركة:

1
قم بتجهيز تدوينة ما تضم مقدمة مختصرة ومليئة بالمعلومات المفيدة عن ذلك الكيان الصهيوني وأفعاله الدنيئةز

2
أرفق بتدوينتك خمس مدونات تعرفها تتحدث عن الحرب واسرائيل بما يوضح الصورة الكلية ويساهم أكثر في تعميق الفهم الغربي لقضيتنا، و حاول أن تنوع في الموضوعات التي تختارها و كلما كانت المدونات تتحدث عن أرقام و إحصاءات كلما كانت مهمة أكثر، وخاصة لو كانت تلك الأرقام والإحصاءات معتمدة أو مأخوذة من مصادر رسمية وليست مجرد كلام في الهواء.

3
لا تنس أن تكتب لمحة مختصرة عن كل مدونة وحاول التنويع قدر الإمكان ولا تعتمد على أسلوب واحد كأن تقول مثلا (مدونة جميلة لابد أن تذهب لها ، مدونة رائعة لا بد أن تزورها .. الخ ) .

4
أنشر تدوينتك في يوم 31 أغسطس


أضف واصفة tag إلى تدوينتك باستخدام هذا الرابط
http://technorati.com/tag/BlogDay2006
وأضف ارتباط لموقع الاحتفالية
http://www.blogday.org/
. تلك الخطوة ضرورية حتى يتم ايجاد تدوينتك بسهولة


س-ج : ألا تعد المشاركة في هذه الاحتفالية نوعا من التطبيع ؟

في رأيي الشخصي : طالما أن الفكرة تبناها عدد كبير من المدونين حول العالم وسيشارك فيها جمع كبير فليس هناك فرصة أكبر لايصال صوتنا لهذا العالم، و حتى إن كان صاحب الفكرة مدون اسرائيلي فأنت هنا لا تتعامل مع اسرائيل أو مدوني اسرائيل فقط بل مع مدوني العالم كله. ومن أعمالهم سلط عليهم.


لا تنسوا إذا رغبتم أيضا إضافة أسماء شهداء مذبحة خان يونس في ذكراها الخمسين.

يمكنك الحصول على قائمة ب 100 اسم من شهداء المذبحة الثمانمائة من مدونة فلسفات :


مدونات يمكنك الاستعانة بها والحديث عنها :

http://israelicrimes.blogspot.com/
http://lebop.blogspot.com/
http://ahjunior-liban.blogspot.com/
http://lebatteurnoble.blogspot.com/
http://beirutspring.blogspot.com/
http://chercheusedor.blogspot.com/
http://ibosblog.blogspot.com/
http://colddesert.blogspot.com/

حتى تنجح تلك الفكرة.. نحتاج من كل مدون أن يشارك بتدوينة فى هذا اليوم.. كلما زاد العدد كلما زادت فرصة الانتشار.. اذا اقتنعت بالفكرة لا تتكاسل عنها.. وانشرها بدورك فى مدونتك قبل يوم الاحتفال وارسلها من خلال ايميلك لأصدقاءك من المدونين


ولا تنسوا.. حتى لا نخاطب أنفسنا : اجعلوا تدويناتكم باللغات الأجنبية

أبويوسف
بنت مصرية

التدوين .. قلت مرة انه ميدانى

أوكى، لازم أعترف إن التاج ده كنت نفسى أوى يتمرر لى.. وأخيرا لست أدرى افتكرتنى ومررته ليا.. ميرسى أوى يا بلو.. نبتدى الشغل

هل انت راضى عن المدونة شكلا وموضوعأ؟

مدونتى شكلا، غير راضية عنها دلوقتى، هى حالة الرضا بتدوم عندى اسبوع اتنين تلاتة بالكتير، انا عايزة اغير شكلها، بس حاسة
اليومين دول انى عايزة اشحن افكار جديدة ، فهضطر اخليها كده شويتين تلاتة اربعة

اما على مستوى المضمون.. اه جدا، اعتقد انها بتعبر عنى، والكلام اللى بكتبه بيطلع من جوايا.. ودا اللى بيحقق لى الرضا، كمان
محصلش انى تعديت الحدود اللى مقتنعة بيها ودا مهم ويرضينى، اما عن اسلوب الكتابة فاللى بيضايقنى انى ساعات ببقى عايزة اتكلم
فى الموضوع جد اوى وكأنى مقضبة الجبين وحاجات كده بس بتقلب معايا للاسلوب البيتى ده :) مش كده احسن؟

هل تعلم أسرتك الصغيرة بأمر مدونتك؟

أسرتى الصغيرة وأسرتى الكبيرة كمان. من زمااان.. كل البيت عارف عن المدونة، حتى قعدوا معايا واتفرجوا على حلقة الجزيرة عن المدونين.. ما انا حكيت لكو، ساعات اقرأ لماما بعض اللى باكتبه وممكن اقولها التعليقات اللى جت ع بوست ما ونتناقش. كمان بوريها تصميم المدونة كل ما اعمل واحد جديد، وفترات بخفى سيرة المدونة خالص ومش بجيب سيرتها.. و اخواتى بحاول اقنعهم يقروها ويعملوا مدونات، بس هما ملهمش فيه، كمان بقية العيلة عدد منهم عارفين، واخيرا ليا خالى اقنعته يفتح مدونة بس مش عارفة هينفذ امتى

هل تجد حرجا فى أن تخبر صديقا عن مدونتك؟ هل تعتبرها أمرا خاصا بك؟

أصحابى أغلبهم عارفين إن عندى مدونة.. ومعتقدين انى هروح فى داهية بسببها.. ودا بيثير ضحكى كتير، فى اصحاب مالهمش فى
النت خالص فمش بيبقى فى مجال انى اقولهم اى نشاط ليا ع النت اساسا، حكاية امر خاص بيا دى مش موجوده من اول ما فتحت المدونة، حتى " بتكون" يعرفوا عنها، حتى اختى وبنت خالتى مستنينى اكتب عنهم فيها على اساس انهم من الشخصيات اللى اثروا فيا ههههههههه

عموما انا بقيت عاملة زى وكالة اعلانات متحركة من اجل التدوين عموما، اى حد جديد بتعرف عليه - او قديم- بقوله سمعت عن
التدوين؟ طيب تحب تدون؟ طيب كذا كذا كذا.. واقعد اشرح

هل تسببت المدونات بتغير ايجابى لافكارك؟ اعطنى مثال فى حالة الاجابة بنعم؟

ياااه السؤال ده اتسألته كتير.. واجابتى بقت واحدة.. اه التدوين ادانى ابعاد وزوايا اوسع واكتر لمواضيع كتير.. بقيت على يقين انى لو
كتبت رأى ما استحالة استحالة الاقى مية فى المية موافقة عليه.. ودى اجمل حاجة، انك تتخلص من فكرة انك واثق تماما ان كل الناس
هتوافقك، وبقى طبيعى ان الاقى رأى تانى.. بالعكس بقيت بفرح، لأنه معناه انه فتح لى زاوية جديدة للموضوع، وممكن جدا اقتنع
برأيه، وحصلت والله وبعترف ساعتها

هل تكتفى بفتح صفحات من يعقبون بردود فى مدونتك ام تسعى لاكتشاف المزيد؟

دلوقتى - ومن زمان بردو- بكتفى بحاجتين.. لو حد جديد بيعلق عندى بشوف هو مين واتعرف على مدونته.. ومجمع منال وعلاء
طبعا بلاقى عليه كل الناس.. اقرا موضوع ما ولو شدنى بدخل اكمله، وكده.. من زمان مش بسعى لاكتشاف مدونات بنفسى.. كسولة
شوية

ماذا يعنى لك عداد الزوار.. هل تهتم بوضعه فى مدونتك؟

من اول يوم وانا حطه العداد.. وبقى ادمان انى ابص عليه كل ما افتح المدونة.. زى ما بلو بتقول بيبقى مؤشر يومى عن مدى شعبية
تدوينات عن غيرها، ولو انى مع الوقت بقيت بحس ايه البوستات اللى هتجذب الجماهير وايه مش كده

هل حاولت تخيل شكل اصدقائك المدونين؟

لا مجاش فى بالى.. اصلا حكاية التخيل دى للمبتدئين ع النت عموما.. اى حد بيبتدى الف باء شات مثلا.. وكده، انما امثالى مش بقوا
ياخدوا فى بالهم خالص، كمان لما اقابل حد من المدونين لايف مش بحسه مختلف لأنى اساسا مارسمتش صورة فى خيالى

هل ترى فائدة حقيقة للتدوين؟

اوكى.. سؤال جامد ده.. ممكن اقول ان الفائدة دى بتختلف من مرحلة لمرحلة.. بس طول ما فى فايدة عائدة عليا من التدوين فانامستمرة فيه، مثلا انا ابتديت مدونتى مجلة - لو تفتكروا- وكان هدفى انى اكون مسئولة عن حاجة بتصدر فى شكل مجلة واظبط الجرافيك بتاعها وصورة مع كل موضوع وبتاع.. بعدين لقتنى بقيت اهتم اكتر انى اقول رأيى... يعنى ممكن يكون دا مش هدفى فى البداية بس المياه الراكده اتحركت وبقى عندى قدرة انى اكتب بصراحة رأيى فى اى حاجة.. بالعكس كمان اكتشفت انى بعرف اعبر عن افكارى وارتبها صح وانا بكتب.. دا يفرق كتير عن لو دخلت مناقشة لايف مع حد يمكن ماسترش ومعرفش اعبر عن رأيى كويس. انما لو قرا رأيى فى بوست غالبا هيلم بكل جوانب رأيى والمناقشة هتبقى ابسط بكتير.. يعنى دلوقتى التدوين بالنسبة لى وسيلة فعالة للتعبير عن رأيى.. و]دى اهم فايدة عادت عليا، انما على المستوى العام.. انا بعمل كل جهدى ان التدوين ينتشر ويقدر يكون فى يوم من الايام نبض حقيقى للشارع ورأى عام بجد.. ودى هتكون اهم فوايده

هل تشعر ان مجتمع التدوين مجتمع منفصل عن العالم المحيط بك ام متفاعل مع احداثه؟

اها اها اها اهااااا... هو منفصل ومش منفصل.. بمعنى ان اى حاجة بتحصل فى المجتمع هتلاقى صداها فى التدوين طبيعى... انما هو كعالم بحسه خاص ومختلف عن المجتمع الأرضى.. مهما كان لسه النت فى مصر غريب وبيستخدمه عدد قليل جدا.. وكتير الاقى ان اللى يأثر فينا كمدونين - او مستخدمين للنت بشكل عام ويشغلنا - مالاقش له اثر على الارض

يعنى لو وضحت أكتر اقول ان دبة النملة على الارض بيتسمع صداها على النت، انما احيانا كتييير بتنطلق دعوات على النت لا تصل
لأهل الارض ابدا

هل يزعجك وجود نقد بمدونتك؟ ام تشعر انه ظاهرة صحية؟

اولا انا من الناس اللى بتصدق بسهولة، بمعنى لو حد انتقد مدونتى فى حاجة بصدق على طول وبتفاعل مع النقد ده وبحترمه بما انه طلع قلبه عليا وكده.. عموما اكيد النقد ظاهرة صحية.. حاجة واحدة بس اللى تؤلمنى، لو حد انتقدنى وضمن انتقاده ألفاظ خارجة..ساعتها بحذف التعليق لأنى زى ما انتو عارفين برفض الألفاظ دى.. وببقى متضايقه ان صاحب التعليق مفكر انى شلته عشان النقد مش عشان اللفظ.. بس ولا بيهمنى، هو لم يحترم القواعد بتاعتى يبقى تطبق عليه احكامى

هل تخاف من بعض المدونات السياسية وتتحاشاها؟ هل صدمك اعتقال بعض المدونين؟

لا، دول اصحابى :)).. وبعدين ايه تعريفك للمدونات السياسية؟؟ اللى يتكلم فى السياسة؟ ما شاء الله علينا كلنا بندلى بدلونا.. انما لو قلت مدونات سياسية بحق وحقيق يتعدوا ع الصوابع، واكيد طبعا بهتم اقرالهم .. بيوسعولى مداركى يا ناس، ومش كتير من المدونين بيعمل كده

الاعتقالات صدمتنى اه. بس مش لأنهم مدونين.. لكن لأن من الناس اللى تم اعتقالهم اعرفهم بصفة شخصية او حتى بالصفة التدوينية.. وطبيعى اتخض عليهم.. بس توضيح بسيط، الاعتقالات اللى حصلت كانت بسبب المظاهرات وليس بسبب تدوينات لهم.. يا جماعة ما تطفشوش الناس من التدوين.. لم يحدث ان اعتقل مدون مصرى بسبب ما يكتبه على مدونته.. حتى عبدالكريم لما اعتقل بسبب تدوينة ما، كان لانه قام بطبعها وتوزيعها على الناس.. بقت منشور يعنى

هل فكرت فى مصير مدونتك فى حال وفاتك؟

لا مفكرتش، بس اهى فرصة افكر.. لو حصل ومت يعنى - واكيد طبعا دى بقى مافيهاش تسعة وتسعين وتسعة من عشرة- طبعا مش هلحق اكتب خبر وفاتى :) انما اختفائى هيكون داعى لمدونين كتير يسألوا عليا ويكلمونى واهلى يردوا عليهم ويقولوا لهم الخبر وهما هيقولوا، المفروض يعنى.. كمان لو سمحتوا لما تعرفوا كده، علقوا عندى فى اخر بوست وقولوا انى مت.. وادعولى واقروا الفاتحة،
وعموما هسيب مدونتى للتاريخ وحسنة جارية على روحى

مين اكتر مدونين أثروا فيك؟ وليه؟

اممم اوكى هما

"ليديز فيرست"

أرابيسك: مينفعش اقول انى اتأثرت بمدونتها بس وبكل ما تكتبه، انا كمان اتأثرت بيها هى شخصيا.. اتقابلنا كتير ودخلنا مع بعض فى مشروعين، واحد منهم استمرينا فيه للنهاية.. لما بقعد اتناقش معاها بقول ياااه.. اهى بنوتة سكر و بتفهم فى السياسة وفى غير السياسة. امال ليه معندكوش ثقة فى المرأة

لست أدرى: على قد عفويتها، على قد صراحتها وجمال تدويناتها.. بلو من اوائل الناس اللى اتعرفت على مدوناتها وهى بالنسبة لى من
الحرس القديم :) عموما اى حد ابتدا تدوين قبلى بيكون من قدماء المدونين بالنسبة لى.. بحس انها على شفا حفرة من التدوين.. ممكن تسيبه فى اى لحظة - زيي -، مش عايزاها ابدا ابدا تقف عن التدوين.. اوعى يا بلو

دعاء كروان: ديدى عارفة كويس اوى انا نفسى تعمل ايه لكتابتها.. عايزاها تاخد خطوه اكبر من مجرد التدوين (مع احترامى للتدوين) بس بجد دعاء بتكتب حلو اوى اوى، فى بيتنا التدوينى اديبه جامده يا ناس

أرابيسك ولست أدرى ودعاء.. بيرسخوا إيمانى بقضية المرأة أو بمعنى اصح.. مكانة المرأة

وبعدين "مينز" يا مرسى

وائل عباس.. بعتبره رائد الصحافة الشعبية ، معرفش حد قبله بصراحة.. نزولة الشارع وتقصيه للاخبار وقيامة بالتصوير .. ومن ثم التعليق والتوضيح والتبصير بالفساد اللى فى مصر.. الوعى المصرى كانت الدافع الاول اللى خلانى افتح مدونة

بن عبدالعزيز.. ويمكن هو عارف انه من المدونين المهمين بالنسبة لى، وعارف انى بتمنى يرجع يكتب ويحلل ويناقش ويتكلم عن فكرة الاصول الاسلامية تانى وغيرها مواضيع كتير، ويسيبه من الاحداث الجارية شوية.. لانه لما بيكتب حاجة فيها تحليل بيبقى اكثر هدوءا واقل انفعالا واكثر اقناعا، ولما بيكتب وهو منفعل ببقى عايزة اقفل المدونة على صباعه

يحيى عياش.. ما شاء الله، دايما اقرالك استفيد منك، كمان اسلوبك بيعجبنى اوى، مش بتكتب الا اذا كان موضوع شدك تكتب فيه ،
يعنى ملكش دعوة بالموضة :) كمان بيبقى رأيك اضافة فى التدوين مش شبه حد ومش متأثر بحد.. ودايما رايق

زرياب.. اعتقد ان وجوده مهم لكتير من المدونين.. ومدونته شبه ادمان حتى لو مكنتش بعلق عنده كتير، اساسا انا بقى تعليقى قليل اوى فى المدونات كمان مش معقول كل مرة اقول جميل وهايل بس :).. اسلوب زرياب مميز جدا سواء وهو بيكتب بخفة دم -وللأسف بقى نادرا- لكن بيضحكنا حتى تبدو نواجذنا واللوز كمان، و لما يحط رجل على رجل ويبقى اديب بنضارة.. فى كلا الشكلين عميق.. طبعا احيى تجربته الرائدة.. سيرة زرياب.. ورائدة دى ليها مستويات كتير

مين من المدونين بتحس انه شبهك؟

لست أدرى.. بصراحة كده.. من زمان بحس ان رأيى يشبه رأيها. وكل حاجة هى اتكلمت فيها ببقى رأيى من رأيها.. يمكن نختلف بس حول مدى تفاعل المدونين مع بعضهم، غير كده كله تمام سعادتك.. ويمكن وانا بقرا اجاباتها على الاسئلة لقيتها نسخة من رأيى

عشان كده خطر فى بالى اطرح عليها السؤال ده واللى هى بدورها ردته عليا :) انا كمان نفسى اوى اقابلها

آخر سؤال: تحب تسمع ايه؟

اوكى... اليومين دول بسمع ام كلثوم، وخصوصا.. من أجل عينيك، وبالذات وهى بتقول: أم تخوفت من اللوم فآثرت السكينة

اكتب اسماء خمسة مدونين ليقوموا بهذا الاستقصاء بعدك

أرابيسك - شيماء - بلوروز - دعاء - يحيى عياش

إلى س.س. العملية طلعت فى النملية

الله الله الله، دى الأووشاعة طلعت صح، والتخمين طلع فى محله، والوساوس القهرية بتاعة المنع والرقابة جت فى الجون المرة دى
أصل الحكاية إن "س.س" :) اتصلت بيا من يومين كده تقولى انها بتحاول تدخل على بنت مصرية والصفحة مش راضية تنزل
ازاى يا بنتى مابتنزلش، استنى عليها شوية هى تقيلة حبتين
لا، ما بتنزلش ومكتوب.. وقريتلى كلمتين جامدين كده اللى خمنت منهم ان الموقع ممنوع مثلا يا بسكيورتى معينة او فاير وول، قلت لها تخمنى ده
كانت لسه معايا ع التليفون، وبتجرب تفتح كمان المدونة بتاعتها، وتم تم تم.. مدونتها كمان مش بتفتح
امممم، س.س. فكرت ان الاهرام منع تصفح المدونات ، لأنها صحفية فى الأهرام وكانت بتتصفح المدونات يومها من هناك

المهم يعنى المكالمة انتهت انها هتحاول تشوف ايه الحكاية دى. بس انا نسيت اسألها تانى، ولقيت صاحب الأشجار بيقوم صحفيى الأهرام على الإدارة اللى منعت تصفح المدونات وبيقولهم ازاى يتخطوا الرقابة دى

يا سلام سلام، بقى مثلا يعنى مثلا المدونات ممكن تكون خطيرة اعلاميا أو معلوماتيا لدرجة ان مؤسسة بحجم الأهرام تمنع تصفحها؟
وللا يمكن تكون شمت خبر عن الكلام الكتير جريدة الدستور على المدونات المصرية والاعترافات - الغير مؤكده- من ناس بيدخلوا يقولوا انهم صحفيين فى الدستور، فمش عايزة مثلا أصجاب الضمائر الحية فى المؤسسة يستغلوا المدونات ويتكلموا شوية عن مؤسستهم الغراء؟؟
ههههههههههه انا عرفت فايدة جديدة للتدوين كده

بس بجد بجد انا عايزة اعرف السبب.. هموت كده واعرف السبب

كل لووك وانتو طيبين

أجلت نشر التصميم الجديد لبنت مصرية لاكتر من.. تصوروا كام؟ دعاء العدل رسمت البنوتة الى على البانر دى من شهر نوفمبر2005، وانا ابتديت اجهز التصميم ده من أبريل، اها.. فى الفترة اللى كنت موقفة تدوين فيها :) ، لأنى طبعا كنت عارفة انى راجعة وانها مجرد اجازة.. المهم بردو مكنتش عايزة انشره دلوقتى، مكنش ليا مزاج يعنى.. بس فوجئت امبارح ان بلوجسبوت الله يعمر بيته وقع التمبليت بتاعى الأخير، وكل ما افتح بنت مصرية القى اللون الفحلقى اللى انا كنت حطاه خلفية ، ومفيش اى حاجة تانية.. وطبعا لأنى انسانة كسولة درجة اولى فمكنتش محتفظة بباك اب للتيمليت القديمة، وعليه، قررت انزل التصميم الجديد

طبعا واولا وقبل اى شىء، البنوتة دى رمز للبنوتات المصريات، مش انا يعنى، ومش شبهى لا من بعيد ولا من قريب :) انا حتى معرفتش انفذ مقترحاتى بخصوص البنوتة دى، انا كنت عايزاها لابسه كاجوال ووشها مدور مش وش حبة الألماس، وبتضحك اوى زى الهبلة كمان.. دعاء قالت لى اوكى، هى كمان اللى اقترحت فكرة الرسم.. يعنى البانر دا هدية من دودو .. ميرسى اوى اوى اوى يا دودو، فكرونى اكتب عن دعاء، من يوم ما عرفتها من سنة واحنا بقينا اصحاب اوى.. انتيم بمعنى الكلمة وبكل ما تحتوية من حواديت ومواقف وتليفونات ومقابلات وضحك ودموع وفرح وامل وقرب وكله كله.. بس طبعا الكلام ده عايز تدوينة او ثلاثية كده على قدنا

المهم بقى قبل الكلام ما يتوه اكتر من كده، جت دعاء بالرسمة دى.. وقالت لى ان الموود بتاعها خلاها رسمت كده، وان مزاجها كان كده، ودى رؤيتها.. طبعا انا مكنش ليا كلام تانى لأن ببساطة الرسم عجبنى جدا.. وتسلم ايدك يا دودو

الخلفية بقى اللى ورا البنت دى اختيارى انا.. والصورة اللى منزلاها مع البوست ده انا اللى عملتها متربة وقديمة كده.. لوك يعنى.. رايقة انا مش كده
اه كمان انا قلت بقى جو الصيف عايز حاجة اورانج فخليت التصميم غرقان فى شوب عصير برتقان زى ما انتو شايفين

غنى يا بهية.. انطباعاتى وحواديتى

حبيت اتكلم دلوقتى واقول عن الحفلة، بكرة هدعم التدوينة بلينكات، سورى.. التدوينة طويلة

:ايفوريا بهية

عندما يسجل مؤشر حالتك النفسية خطا راقصا بين نقط الإحباط والحماس واليأس واللهفة والحزن والفرح والقلق والسعادة.. إذا انا اتحدث عن معوقات ومسببات الإيفوريا التى وصلنا إليها ليلة ما غنت بهية وغنينا معها

سأحكى إذا عن انطباعى الشخصى لليلة الحفل، والأيام التى سبقت ذلك، وكواليس لا تسجل بكاميرا او تكتب فى ريبورتاج صحفى او تظهر على شاشة تلفزيون

لما قلنا يا حفلة... لم يكن يتوقع الكثيرون أنها ستنجح كل هذا النجاح، ولم يتوقع الكثيرون أن يتفاعل الناس معنا.. وأن تنتشر الدعوة كل هذا الانتشار.. وأن نحقق بالضبط ما أردنا من وراء الحفل

غنت بهية، وقبلها وجعت قلبنا.. الوقت ضيق، وحددنا الموعد ونشرناه.. ولم نكن اتفقنا بعد مع اى فرقة غنائية إلا مع عمر صاحب بلوج تجربة.. حتى عمر اختفى بعد ذلك وظهر يوم الحفلة. لم نجهز الملف الإعلامى الذى سيطبع على سى ديهات.. لم نطبع حتى الدعوات الشخصية لأسماء كبيرة فى عالم الصحافة، كل ما تم وقت اعلان الموعد، كان الاتفاق مع محمد عبدالقدوس على ان يستقبل مسرح نقابة الصحفيين الحفلة، وذلك بعدما رفضت ساقية الصاوى لأنها لا تتفق مع أفراد


تم توزيع المهام.. وكل محتاس فى مهمته فقط بسبب الوقت، كان على يحيى العبء الأكبر، ولكن مع اقتراب الموعد تمت كثير من الأشياء، ماعجزنا عن فعله فقط كان طباعة الدعوات الشخصية لكبار الشخصيات الاعلامية، اكتفينا بإرسال دعوات خاصة من خلال الإيميلات، ورسائل الموبايل، والمكالمات الهاتفية.. وعلى قد لحافنا. لا أستطيع أن أشعر بمدى الضغط الذى واجهه يحيى وأيوب وسيزر وشيماء وارابيسك، فأنا فى بيتى بنفذ مهامى كلها من خلال الجهاز بتاعى،

الليلة السابقة للحفل، نمت وكل ما كان ببالى هو ترقبى وقلقى وسعادتى، ونهضت من نومى بنفس الحالة من الترقب والقلق والسعادة، لم أنتبه إلى السيناريو الطبيعى لأى حدث مهم، وهو ظهور ما يزيد من حدة الأحداث، ويسبب لى اكتئاب وسدة نفس، كل هذا قبل الخروج من بيتى فى طريقى إلى الحفل

ما حدث هو أنى كالعادة عندما أصحو من نومى اجرى افتح الجهاز واشوف الميل والمدونة، ساق لى القدر من أحدثه شات ليخبرنى بأن هناك من المدونين من يرفضون الحفل، ويناهضونه، ويشككون فى النوايا.. تا تا تا تا

طب مين؟ طب طلعوا امتى؟ طب ليه دلوقتى؟ كل دا ومخى ابتدى يلف ويدور وكان قد وصل الاحباط وكسرة النفس إلى القمة

أتارى فى مسرحيات وأفلام من نوعية "مالقوش فى الورد عيب.. قالوله يا احمر الخدين"، المشكلة انى صدقت للحظة ان فعلا احمرار الخدين عيب فى الورد.. سذاجة بعيد عنك

ونزلت مصر، وقابلت دعاء العدل لنذهب إلى الحفل سويا..بالمناسبة فى يوم الحفل أيضا كان نفس يوم نزول أول عدد للدستور يحمل بين صفحاته كاريكتير لدعاء.. مبروك يا دودو. ذهبنا سويا للحفل بعد ما تأخرنا فى مشوار كان خاص بدعاء، وحكيت لها طبعا سبب ما تراه من تجهم على وجهى.. ما هو انا الحاجات الجوانية بتطبع على وشى وممكن على تصرفاتى وكلامى كمان

:حبكة دارمية.. بعقدة وفيونكاية

جاءت الثامنة.. موعد الحفل، وعدد من يجلسون فى المسرح بسيط جدا، يا نهار ابيض.. واعصابى تنفلت بزيادة، بى الكثير، والآن تكتمل العقدة .. فين الناس يا يحيى، فين الناس يا مريم.. لكن علمت أن الناس طبيعى تيجى متأخرة عن المعاد، على تمانية ونص يكونوا وصلوا..

الكلام اللى اتقال وحطاه فى قلبى وساكتة.. والناس اللى مش موجوده لسه.. والأمل اللى مزروع رغم كل ده جوايا.. كركبة

لا أعلم كيف مرت النصف ساعة، كل ما استطيع ان ارى نفسى فيه بحلول الثامنة والنصف.. كل البنات المشتركات فى تنظيم الحفل وكمان دعاء، نمسك بورقتى التعريف بالحفل ونوزعها على المتوافدين عبر باب النقابة.. كنا نتسابق، ونتلاحق.. وفوجئنا الناس جوه المسرح... الحفلة ابتدت.. ووثائقى المدونين خطف عيون الحضور.. وألهبت كفوفهم تصفيقا وتفاعلا مع ما تم عرضه.. حتى وصلت ذروة التصفيق والسخونة المحيطة بالجميع لحظة ان انتهى الوثائقى بنزول صور علاء ومالك وشرقاوى كمعتقلين.. هنا أدركت ان الحفل يصعد بسرعة التفاعل الوجدانى لفكرتنا الغير تقليدية نحو النجاح.. وكلمة فى ودانكو.... الساااااااااااااااااااااااااااااااحق

كمنظمين بالطبع لم نهنأ كثيرا بمتابعة فعاليات الحفل على المسرح، فالكواليس مليئة بالمحررين من الصحف ووكالات الانباء والفضائيات

:وغنت بهية تحت الجميزة.. صبحت الحالة ضى

ما شاهدته من الحفل كان جزء لفرقة "حالة" وهى اسم على مسمى.. قدمت عرض كستور ببيجاماتهم الكستور.. متنا على اديهم من الضحك، وختموا على موتنا الضاحك بدموع تسربت من أغنيتهم الأخيرة لمصر

استمعت أيضا لفرقة الجميزة، وبينما استمع إليها وبجوارى دعاء وصباح، نظرت فى الساعة فكانت قد تعدت التاسعة والنصف، لازم أمشى.. اقترحت على دعاء ان اتصل بأسرتى وأعرض عليهم أن أبيت تلك الليلة عند دعاء.. ترددت، ثم وافقت، أجرب هخسر ايه.. ردت على ماما، ولم يكن أبى بالبيت، اتفقت معها ان تخبر أبى واذا وافق، تدينى رنة، واذا لم يوافق تكلمنى.. وجلست أنتظر.. ربما عشرة دقائق مرت، رقص موبايلى على نغمته التانجو، ودعاء وصباح وأنا نترقب.. أشعر كأن النغمة طويلة.. لكنها لم تكن كذلك ، كانت رنة واحدة.. هى تلك التى تعنى الموافقة.. يا حلولى يا حلولى.. هقعد لآخر الحفلة يا حلولى

فرقة ضى.. لسه هشوفها لما يجينى فيديو الحفلة.. طبعا زى ما قلت كنا فى الكواليس اغلب الوقت، بس وصلنى انهم كانوا روعة وخصوصا لما غنوا للعادلى

كنا قبل اسبوع، فى مأزق نريد تدبير حفلة مدتها ساعتين.. لكن حفلتنا استمرت أربعة ساعات.. اختفى يحيى ولم اشاهده يرحل معنا.. رحل قبلنا، مختبئا من مجهود كبير، وضغوط من كل الجهات لم ترحم مجهوده كمن قام على أحسن وجه بدور ام العروسة بالضبط كما وصفه وائل عباس

لكنها كانت اجمل عروسة.. حفلة معارضة بنهكة مصرية، اتمت لنا ما أردنا.. أكدت تضامننا مع المعتقلين.. جمعت تبرعات لهم.. نشرت فكرة التدوين.. كانت ضمن محاولات الكشف المضاد للتعتيم الاعلامى عن قضية المعتقلين.. ولسه كمان الايام الجاية سيظهر تأثير الحفل، من خلال الصحف التى ستروى ما حدث والتقارير الاخبارية لاهم البرامج.. على شاشات التلفزيون،

بهية غنت.. وغنينا معاها بعلو صوتنا.. اتارى الغنا لسه بيسيب فى الحلق طعم المرار الى بتدوقه مصر.. اتارى الغنا مش بس غنا المساطيل ع الفضائيات


: لحظات.. كانت من حلاوتها

كل مرة الجمهور كان بيصفق بحماس

لما سمعت صوت غادى سامحونى.. عظمة على عظمة يا بنت، وكمان البنوتة اللى كانت معاكو.. اسمها ايه يا غادة؟ هى صوتها اصيل اوى

لما قابلت.. وبعد طول انتظار.. وعلى حين غرة.. دعاء كروان التدوين.. ديدي انتى كملتى فرحتى بالليلة

لما قلت لوائل عباس ايه رأيك فى الحفلة باه.. وابدى اعجابه بيها وسعادته لنجاحها.. وفى مناقشة جمعتنى بيه انا ومالك.. جت سيرة ان المدونين ماهماش حزب عشان تنزل الحفلة بإسم المدونين المصرين، وقلت احنا مجموعة من المدونين عملنا حفلة، وفى اخرها كل واحد هيروح على بيته، لا احنا قلنا جمعية المدونين المصريين ولا قلنا حزب المدونين المصرين

لما قابلت واحدة مصرية، المثال الجميل للصحفية النشيطة الجادة

لما شيماء قالت لى ، الناس عايزة السي.ديهات زى ما تكون لحمة.. انا استغربت بصراحة الناس عرفت منين موضوع السى ديهات.. فين وفين لما فى اخر الحفلة عينى جت على ورقة التعريف بالحفلة وفيها ذكر للقرص المدمج حوالى اربع خمس مرات.. ذاكرتى اكلتها البارومة

لما مريم شرحت لى الفيلم اللى ما شفتوش، فاكرينه.. الفيلم بتاع الورد الاحمر الخدين

ولما كنت انا ومريم واقفين بنتفرج على كستور فى حالة توحد تام مع ما يغنونه، وضحك للأرض مع ما يغنونه بردو

لما ناولت د.ليلى سويف ورقة التعريف بالحفل.. حضور دكتور ليلى ودكتور أحمد سيف كان مهم عندنا جدا

لما كل حد طلب منى اشرح له الموضوع ايه بالظبط.. وكل حد قال انه فتح مدونة جديدة او هيفتح مدونة خلاص

لما اديت لأحد الحضور ورقة التعريف بالحفلة وبيقرا العنوان قصادى.. من هم المعذبون المصريون؟!!!!، رديت عليه: معذبون مين.. مدونووون.. ورينى كده.. اه هى مدونوووون

:وأخيرا

هقول كلمة ملهاش لازمة لأن اللى بيحط فى دماغة فكرة، العالم بتاعه بيقف عندها ومش بتتغير، لكن هقول وأجرى على الله.. ولأنى بقالى فترة عايشة فى موود المواجهة ومبقتش أحب أسكت وأكبر دماغى ... ندرك اننا مجموعة من المدونين اقمنا حفلا لم نريد من وراءه غير اعلان تضامن مع مدونين عرفناهم من خلال مدوناتهم وتأثرنا بدخولهم المعتقل..ندرك أن الفكرة ليس لها توجهات ابعد من "ليلة" وكل واحد هيروح على بيته، لا هنروح تانى يوم الصبح نشهر الحزب الأورطى السلموقراطى للمدونين المصريين ولا حتى الجمعية التعاونية المشتركة للمدونين المصريين، كنا ممكن نعمل الحفلة تحت اى مسمى تانى، لكن اذا كانت الصفة اللى جمعتنا كانت التدوين، واذا كان هدفنا من الاساس هو اننا نقف ورا المدونين المعتقلين، يبقى ننزل على الارض بإسم تانى ازاى؟ واى اسم ممكن يكون اصدق وأوقع من الحقيقة... اننا مدونين.. ودى حلقة الوصل الوحيدة بينا.. وبعدين هى الناس ليه احكامها بتبقى مسبقة دايما؟ طب استنوا.. شوفوا.. فى ناس حضرت- مشكورة -الحفلة وهى معترضة عليها.. شافت بعنيها النجاح والتأثير ومعترفة بيه

-------------------
مش هنسى كلمة دعاء واحنا مروحين: الكل يا زيزى كان جميل اوى.. مختلفين فى افكاركو واتجاهتكو.. بس اتجمعتوا وعملتوا حاجة حلوة، بروح جميلة.. وعملتوها بضمير

وهذا ولم ينقصنا سوى رؤية جميلة الأسكندرية رومانتيك روز.. الحفلة كانت عايزاكى يا كوكى

كيف تنشىء مدونة

يبدو أن وثائقى المدونين على الجزيرة سره باتع
اعتقد ان التدوين دخل مرحلة فاصلة فى الانتشار
وحقق خطوة كنا ممكن نبذل فيها مجهود جامد اوى وفرته علينا الجزيرة

وصلتنى ايميلات من مدونين جداد ابتدوا يعرفوا عن التدوين ويهتموا بيه بعد الحلقة..بسرعة كده :))ه

وكانت اغلب الاستفسارات عن حاجات متعلقة بكيفية التدوين وكده، وبصراحة انا فكرت -ونفذت كمان- فى صفحة تشرح الموضوع بالتفصيل من اول فتح حساب فى بلوجر لحد وضع لينكات وصور فى السايد بار

كان عندى ملف اشتغلته من كام شهر للمجلة اللى كنت بشتغل فيها
واضفت كمان الجزء المتعلق بتنسيق المدونة والتعديل فى قالبها

يا رب تفيد كل المهتمين يكون عندهم مدونات

المهم يعنى، لما حد يبعت لكم استفسارات ممكن بسهولة توفروا على نفسكم مجهود الشرح والوقت كمان وتبعتوا لينك الصفحة: أ،ب...ي: تدوين