صباح اسود على عيونك يا مصر

الخبر الأسود اللى كنا خايفين منه حصل.. اعتقلوا عبدالمنعم، اعتقلوه من غير اذن نيابة وكله بالدستور الجديد.. وهيعذبوه بتوع امن الدولة زى ما بتوع الشرطة ما بيعذبوا المصريين.. اتفرج على حلقة الجزيرة عن التعذيب، اما المجرمين فى حق مصر والمصريين فاحنا زهقنا منكو خلاص ومش مستحملين اكتر من كده ، اياكو تمدوا ايديكوا عليه يا كلاب

استفتاء، برنامج، وقرار

يوم الاتنين هيكون الاستفتاء على التعديلات الدستورية الجديدة.. انا هروح، وهقول رأيي.. هعلم بالرفض للتعديلات الارهابية الجديدة.. اتمنى كلنا نروح ونقول رأينا، سواء بنعم او لا.. طبعا غباء ان حد يقول نعم، بس ما علينا الديمقراطية بتقول ان اكيد فى نسبة ما هتقول نعم، الاكيد اننا مش لازم نقعد فى بيوتنا ومانقولش رأينا.. وعلى رأي أمل.. اللى مش هيقول رأيه النهاردة يبقى يسكت ومايسمعناش صوته تانى لحد ما يموت


الأهم من موضوع الدستور ده فى رأيي.. هو الخبر اللى لسه نازل على مدونة التعذيب فى مصر، وبيعلن عن برنامج هيتم عرضه على الجزيرة عن التعذيب فى أقسام الشرطة المصرية... الحلقة دى مهمة زى ما بيقو ل الخبر.. ارجوكم ادخلوا اقروا الخبر كامل على المدونة.. اما الحلقة هتعرض يوم التلاتاء 27 مارس الحادية عشر مساءا، والبرنامج اسمه (ورا الشمس).. طبيعى


اخر حاجة.. انا توصلت لقرار بخصوص التدوينة اللى فاتت، عشان اقولكم عليه لازم اشرح بشىء من التفسير وذكر حيثيات القرار :) ودا عايز منى وقت وانا مش فاضية بس، اول ما افضى هقعد اكتب وكده، وشكرا على حسن قراءتكم.. والاهم شكرا اوى اوى على كل تعليقاتكم فى التدوينة اللى فاتت، واللى حسستنى بفرحه جامدة اوى كأنى رفعت على عم الحج قضية وكسبتها وفاضل بس اوزع الشربات

انا هقوم انام، عندى شغل بكرة، ماتنسوش الاستفتاء والبرنامج بأه