2/22/2007

ساعة الحظ ما تتعوضش

عارفين لعبة الازازة اللى بيدوروها فى النص بين شوية اصحاب متجمعين فى دايرة وكل واحد بيسأل اللى قصاده سؤال ولازم الاجابة تكون فى منتهى الصراحة.. انا مكنتش بحب اللعبة دى، خالص

امبارح كنت فى عيد ميلاد رشا، وكنا متجمعين بالتمام والكمال انا وهى ورشا التانية وولاء، بالاضافة الى آية اخت رشا ومها بنت خالة رشا التانية وبعد شوية كتير جت لبنى جارة رشا،

آية اقترحت نلعب اللعبة انا متحمستش اوى، اصلى بحس انها لعبة ماسخة وسخيفة ، انما هى ظبطت تربيزة الصالون فى النص وهى تربيزة ارتفاعها صغير ما يجيش نص متر، وحطيت على الحرف فواحة (اللى هى فى حجم كوباية وجواها شمعه، نورتها وقفلت نور الاودة، وجابت الازازة، وهى كل شوية تقول لنا : ياللا يا جماعة، دى ساعة الحظ ما تتعوضش وتضحك اوى

نزلنا قعدنا حوالين التربيزة، وابتدت اللعبة... اول سؤال اتوجهلى جاوبته وانا مش مهتمة ، واول سؤال طرحته قعدت افكر فيه كتير اصلا لأنى مكنتش لاقية اسئلة.. بس بعد شوية الموضوع اتبدا يبقى حامى، بتتوجهلى اسئلة جامدة من نوعية مثلا:
- ايه الحاجة اللى مش بتحبيها فى نفسك وعمرك ما اعترفتي بيها لأى حد
- اكتر حد حبيته مين
- ميزات وعيوب اللى قاعدين فى اللعبة دى
، وتفاعلت على المستوى ده بقيت ارد بإجابات صريحة واسأل أسئلة صريحة واسمع الاجابات والاسئلة والسؤال الواحد ممكن يتحول لمناقشة.. وتتولد اسئلة تبعا للفكرة اللى اطرحت فى اول سؤال وتلاقى الاسئلة موجهة ليك من الجميع، ونسينا الازازة، الاسئلة بقت بتدور من غير مساعدتها، كنا صرحا جدا.. كان فى لحظات ضحك، ولحظات صمت مفاجىء، ولحظات تقدير لصراحة كل واحدة فينا

وبعدين الساعة جت عشرة وكنا لازم نروح، نورنا النور.. حسيت انى كنت فى مكان غير المكان، انى افضل حالا، واكتر سعادة، واكتر تفهما لنفسى ولاصحابى.. وكمان حبيت اللعبة دى جدا

22 comments:

  1. friendship is the best thing in life
    bass el mohem me ya'7ot el seka dee?

    ta7etatshy

    ReplyDelete
  2. This comment has been removed by the author.

    ReplyDelete
  3. اللعبة دي على قد ما هي لذيذة على قد ما هي احيانا بتضايق الناس اللى بيلعبوها

    ReplyDelete
  4. زمان ... و أنا صغير في واحد كان بيفهم فالدنيا شوية قال لي كلام ما فهمتوش قيمته الا لما كبرت و أحساسك بالراحه فكرني بكلامه أوي يا بنت مصرية
    شخصيتك هي ثلاث دوائر جوا بعض
    واحده كبيره و التانيه متوسطه و التالته صغيره
    و طبعا بما أنهم جوا بعض الصغيره جوا المتوسطه و المتوسطه جوا الكبيره
    الدايره الكبيره هي علاقتي بكل الناس اللي باتعامل معاهم في مكان شغلي أو دراستي أو جيراني أو الناس اللي بينا صباح الخير صباح النور و كلمتين و خلاص .. و غير مسموح للناس دي انها تدخل عالدايره المتوسطه
    الدايره المتوسطه هي اللي جواها مجموعة من الأسرار اللي ممكن تطلعي عليها مجموعة من أصدقائك أو قرايبك و عادي انهم يعرفوها علي سبيل المشاركة و كل ما كنت بتطمني للناس اللي حواليكي حجمها بيكبر و ممكن توسع أوي لدرجة أنها تتطابق مع الدايره الكبيرة و تتلغي المتوسطه لصالح الكبيره لو ما بتخافيش من الاسرار العاديه
    نيجي بقي للدايرة الصغيرة أس البلاوي كلها
    الدايرة دي غير مسموح لها أنها تكبر بتصغر و بس و مش مسموح لأي حد أي حد حتي لو كان مين يخش جواها مجموعة من الاسرار المرعبه عنك ... اللي ساعات أنت نفسك بتخافي تفكري فيها و بتنزلق الي دوامة اللاوعي و تخليكي تعملي حاجات أنت نفسك بعد فترة ما تبقيش فاهمة أنت أتصرفتي كده أزاي
    لما بننجح أننا نطلع من الدايرة الصغيرة شوية كلام ... و ده صعب أوي بتصغر أكتر و بتبقي أكثر قدرة علي تحليل و تبرير تصرفاتنا و بالتاي بتزداد قدرات التواصل عندنا مع الناس اللي قدرنا نطلع ليهم الاسرار دي و هنا بنحس اننا أفضل كتير من السابق و الدايرة حجمها بيقل و أنه ما عندناش أسرار مكبوسة جوا مكان ضيق ما بيوسعش و مش مضطرين نخفيها في اللاوعي بعد فترة لكي نستطيع ملئها بالمزيد و نصبح بعد فترة مثقلين و متعبين من الاسرار و التصرفات الغير مبرره من اللي حوالينا و مننا أحنا شخصيا
    هو ده أحساس الارتياح علي ما أعتقد اللي بيجي لنا لما بنقعد مع حد بنحبه نهمس له بأسرارنا لأنه الأنسان مخلوق أجتماعي من الدرجة الأولي

    عذرا للأطاله في التعليق

    ReplyDelete
  5. الناس علي فكره اللي بتسيب تعليقات ارائهم سطحيه لدرجه عدم التفكير ايه الخنقه دي
    حلو الاسلوب لو انتي قصدك قصه علي فكره تبقي فكرتها وانا مش بهزر عالميه لان ايه علاقه النور بالكلام الصريح ..هل احنا لما بنبقي في نور والناس كلها شايفه بعض بيتكسفوا يقولو علي عيوب بعض وكل واحد بيبتدي يتكلم بحريه زياده وميبقاش مكسوف لماالنور يطفي وممكن منبقاش شايفين بعض كويس وليه بنتكلم في خصوصيتنا بس في لعبه او وقت بنقول انه وقت الصراحه
    وبناء علي شروط اللعبه
    بس المفروض كنتي سميتي البوست ساعه صدق
    او شغل النغبشه بالفرفشه
    والاهم ليه رشا قريبها كتير اوي هههههههه ياستي ربنا يخلي رشا وخالت رشا والعيله وعيله العيله وانا وانتي وربنا يكرمنا
    انا

    ReplyDelete
  6. الصراحة دايما مفتاح القلوب

    ReplyDelete
  7. هههههه

    انا بقيت اكره اللعبه دي
    من يوم ما لعبتها مع صحابي و كنا حوالي 20 و احنا زعلنا من بعض و قلبت بغم

    نصيحه لكل الشباب

    ابعدوا عن هذه اللعبه هههه

    ReplyDelete
  8. حسيتي بالراحه بس علشان اتكلمتي بصراحه
    قد ايه الصراحه دي نعمه
    ليه ميكنش لينا ساعه في اليوم اسمها ساعه صراحه
    نتكلم و نقول لاء
    نتكلم بلونا احنا بس
    اعبر عن نفسي
    يمكن حتسود لحظات صمت
    بس بالظبط زي ما قلتي
    لحظات احترام للاخر
    شكرا بنت مصريه علي الموضوع الجميل

    ReplyDelete
  9. اسمها لعبة الصراحة وأخر مرة لعبتها كان من حوالي 10 شهوور وكنت مع شلة صحابتي خارجين نقعد على البحر بس علشان نلعب اللعبة دي وكان يوم رائع.. عندك حق ساعت الحظ متتعوضش أنا واخواتي لما نكون قاعدين قعدة فرفشة بنقول لماما اقعدي معانا يا أختشي ساعت الحظ متتعوضش. تحياتي يا زيزي

    ReplyDelete
  10. This comment has been removed by the author.

    ReplyDelete
  11. ana ba3sha2 el game da
    khososan ba2a law a3ed couple by7bo b3d aw 3yzen yetsa7bo maslan
    w n3d yesherr 3alehom
    loooool ^_^
    aw lw 7ad a3ed maslan 3yz yzabat wa7d mn elly a3den w tbtde el as2ela 7abet ab keda tb bt7b w7d mn ely a3den w el as2ela elly tbahdel de
    ba7b el game l sherer da:D

    ReplyDelete
  12. لعبة خنيقة
    المرة الوحيدة اللي لعبتها الناس كلها زعلوا من أسئلتي
    المفروض اللي مش قد لعبة ما يلعبهاش

    و


    بندحرك التماسي و معاهم قنبلة يدوية
    :0P

    ReplyDelete
  13. انا بصراحه اول مره اسمع عن اللعبه دي لكن اعتقد ان في علم النفس الفضفضه مريحه للنفس و دائما ما ينصحون بالصديق لاجل التخلص من الحمل الزائد من الكلام الذي لا يجد له منفذ
    ده سر الراحه التي توفرها العبه
    لكن انا حاسس اني من الصعب اني العب لعبه مماثله لاني صعب اني اتذكر بسهوله اي اجابات لاسئله غير متوقعه

    ReplyDelete
  14. ما أشبه اللعبتين

    لعبة الصراحة و لعبة التدوين
    واللعبتين بيتلعبوا فى الظلام وبيبقوا تُقااااال أوى على النفس فى الأول

    قد وأقول قد تخلو لعبة الصراحة من الصراحة كما قد يخلو التدوين
    فى بعض الأحايين من الحقيقة لكن الأكيد الأكيد أنهم هما الأتنين بيخلو الواحد

    أفضل حالا، واكتر سعادة، واكتر تفهما لنفسه ولاصحابه

    ReplyDelete
  15. I really like you writing, and I invite you to blog on my website, www.egyptoo.com, I believe you will inrich it, thanks.

    ReplyDelete
  16. الصراحة فعلا مفتاح القلوب
    ===================
    الامبراطورية المفقودة
    عالم مختلف
    http://www.lost-empire.blogspot.com/

    ReplyDelete
  17. لعبة جميلة
    ان كنا عملنا قعدات صراحة انا و اصحابي من غير الازازة
    بس بصراحة

    نفسي اجربها و نكون اكثر صراحة

    a wicked smile LOL

    ReplyDelete
  18. ادخل عندى ضرورى جدااااااااااااا
    وانصر الطلبه المفصولين

    وسلاااااااام
    https://www.fnangeology.com/

    ReplyDelete
  19. للأسف معظمنا يفضل ان يبقى داخل الزجاجه ويخاف ان يخرج منها حتى لا يجد فوهتها موجهه ليه تتطلبه من ان يتعرى من جلده الزائف

    فاصبح كل منا يعيش في زجاجته منعزل عن الأخر

    ReplyDelete
  20. السلام عليكم
    جزاك الله كل خير
    انا اتعلمت كتير من دروسك ( ا ب مدونة )
    وصراحه استفدت كتير جدا و كمان عملت مدونه .
    انا دورت كتير على ايميلك عشان اشكرك بس مش عارف فين
    عموما فيه حاجات لسه محتاجها منك ياريت اعرف اسالك عنها فين ؟

    ReplyDelete